Jehova—Em God Bilong Makim Ol Taim na Ol De
“I gat taim bilong mekim olgeta samting.”—EKLISIASTIS 3:1, NW.
1, 2. (a) Olsem wanem yumi ken save long ol taim bilong ol samting? (b) Wanem ol hevi bai kamap sapos yumi no inap save long taim?
YUMI save lukim klok, a? Sapos yumi lukim klok na em i 6 klok apinun na yumi lukim san i go daun, yumi save taim bilong tudak i klostu. Na yumi save lukim kalenda bilong save long mun, a? Na sapos yumi lukim win o klaut o plaua bilong diwai samting, yumi save, nau em taim bilong ren o taim bilong san. Ol samting yumi lukim i olsem mak na i helpim yumi long save, yumi stap tru long dispela taim o de o aua Olsem klok o kalenda i makim.
2 Sapos yumi no inap save long taim bilong ol samting, hevi bai kamap. Olsem: Sapos planti handet balus i mas pundaun long wanpela ples balus, tasol ol pailot i no gat klok na ol i no bihainim taim, orait ating bikpela bagarap bai kamap. Na sapos i gat taim bilong ol man i mas kirap long wok, tasol ol i no gat klok na ol i no save long taim, ol samting bai Paul, a?
3. Husat i bin kamapim ol taim na de?
3 Husat i bin kamapim oltaim na ol de? Em Man bilong wokim olgeta samting, em God Jehova. Long Jenesis 1:14 Baibel i tok: “Bihain God i tok, ‘Ol lait i mas kamap long skai bilong makim de na nait, na bilong makim ol mun, na ol yia, na ol kain kain taim bilong yia.”’
Sampela Narapela Taim i Bikpela Moa
4-6. (a) Gutpela yumi ken save long ol taim na de bilong mekim wok bilong yumi, tasol wanem samting i bikpela moa, winim dispela? Bilong wanem dispela i bikpela samting? (b) Olsem na yumi mas tingim wanem ol askim?
4 Gutpela yumi save long ol taim na de bilong mekim wok bilong yumi ol man, tasol bikpela samting em olsem: Dispela taim nau em wanem taim long ai bilong God? Eklisiastis 3:1 (NW) i tok: “I gat taim bilong mekim olgeta samting.” Yumi ol man yumi save makim taim bilong mekim ol samting, na God tu i save mekim olsem. Em i makim ol taim na ol de bilong kamapim laik bilong Em. Sapos yumi no bihainim ol ldispela taim na de God i makim, orait ol taim na ol de samting ol klok na kalenda i makim i no ken helpim yumi.
5 Bilong wanem yumi mas bihainim ol taim na de Jehova i makim? Long wanem, Jehova i gat laik long ol samting em bai mekim long dispela graun na long ol man; taim em i bin wokim graun em i gat dispela tingting na laik. Sapos yumi no bihainim laik bilong em, bihain yumi no ken insait long ol samting em bai kamapim. Em bai kamapim ol samting stret long taim em i bin makim. Em i tok: “Olsem tasol tok bilong mi i lusim maus bilong mi na i go na i mekim olsem. Em i no ken i kam bek nating long mi na i no bin kamapim wok; nogat. Tasol em i mas mekim kamapim laik bilong mi, na ol wok mi bin salim em bilong mekim, em bai mekim tru.”—Aisaia 55:11, NW.
6 Olsem na yumi mas tingting: Nau em wanem taim long ai bilong Jehova? Olsem wanem? Ol lain bilong dispela graun i tingim dispela taim nau yumi stap long en? Yu tingim? Yu stretim ol samting yu laik mekim bambai yu inap bihainim ol taim na ol de God i bin makim?
Yu Ting Ol Man Bilong Graun Ol i Kamapim Laik Bilong God?
7. Planti man bilong lotu ol i gat wanem tingting? Tasol olsem wanem tingting bilong ol i kranki?
7 Planti man i ting, sapos ol i bilip long God, orait ol samting God i laik mekim bai helpim ol tu. Tasol ol i no save long laik bilong God. Ol i no save long ol samting Baibel i tok God i laik mekim. Ol i bihainim laik bilong ol yet tasol na ol i ting God bai mekim gut long ol. Planti hetman bilong graun long nau na long bipo, ol i bihainim kain tingting olsem. Ol i ting God bai kamapim laik bilong em long rot bilong ol maski ol i mekim wanem. Tasol ol tu i no save long laik bilong God.
8.Olsem wanem yumi ken save, God i no save helpim ol hetman na ol manmeri bilong graun long mekim ol wok bilong ol?
8 Olsem wanem? Baibel i tok God i save helpim wok bilong ol hetman bilong dispela graun na ol man i gat lotu? Orait, tingim dispela samting: God i gat olgeta strong. Long strong bilong em em i wokim olgeta samting, na ol planti bilion bilion sta i stap long antap. (Sam 147:4) Na God i gat olgeta save na gutpela tingting. Orait, dispela God i gat olgeta strong na olgeta gutpela save, sapos em i helpim ol lain bilong dispela graun, yu ting bai i gat pait na pasin i no stret na pen na hevi olsem i stap long graun inap longtaim pinis? Yu ting God bai kirapim ol hetman wantaim planti milion man long lain bilong ol long i go pait na kilim i dai ol narapela hetman wantaim lain bilong ol, em ol tu i ting olsem God i helpim wok bilong ol? Dispela i stret long tingting bilong yu?
9. Baibel i tok, lain tru bilong God ol i mas i stap olsem wanem long ol samting bilong spirit?
9 Long 1 Korin sapta 14 ves 33 Baibel i tok: “God i no save paulim nabaut ol samting. Nogat. Em i save mekim yumi: stap wanbel.” Na Jehova i tokim lain tru bilong em: “Yupela olgeta i mas mekim wankain tok tasol. Yupela no ken bruk lain nabaut. Yupela mas i stap wankain tru long wankain tingting na wankain laik.” (1 Korin 1:10) Na sapos sampela long lain bilong God ol i no bihainim dispela pasin, orait olsem wanem? Rom 16:17 i tok: “Lukaut gut long ol man i save brukim sios, na i save sakim dispela tok yupela i bin kisim. . . . Yupela i mas givim baksait long dispela ol man.” Ol lain man na ol lotu i bruk lain nabaut na ol i no stap wanbel, olsem na yumi save God i no helpim ol. Ol i no lain bilong God.
10, 11. Wanem sampela tok bilong Baibel i makim bos bilong ol hetman na ol manmeri bilong dispela graun?
10 Orait, ol i lain bilong husat? Long 1 Jon sapta 3 ves 10 i go inap long ves 12, Baibel i tok: “Sapos yumi laik save husat i pikinini bilong God, na husat i pikinini bilong Seten, orait yumi ken save olsem: Man i no mekim stretpela pasin, em i no bilong God. Na man i no save laikim tru brata bilong en, em tu i no bilong God. Bipo tru yupela i harim tok olsem: Yumi mas laikim tru ol brata. Yumi no ken i stap olsem Ken. Em i man bilong Seten, na em i kilim i dai brata bilong en.” Na long 1 Jon sapta 4 ves 20, Baibel i tok: “Sapos wanpela man i tok, ‘Mi givim bel bilong mi long God,’ na sapos em i bel nogut long brata, orait dispela man em i giaman. I no gat wanpela man i bin lukim God. Man i lukim brata bilong en na i no save laikim em, dispela man em i no inap laikim God.” Olsem na long Jon 13:35 Jisas i putim lo olsem: “Sapos yupela i laikim tru ol brata, orait bambai olgeta man i save, yupela i disaipel bilong mi.”
11 Em nau, ol wokboi tru bilong God ol i mas i stap wanbel na laikim tru ol brata. Tasol olsem wanem long ol hetman bilong dispela graun na ol narapela manmeri? Ol i bihainim gutpela pasin olsem? Nogat, a? Ol man bilong lotu i birua long ol man bilong narapela lotu na ol i pait. Long taim bilong yumi, long ol kain pait olsem bilong lotu, ol i bin kilim i dai 10 milion manmeri. Planti taim ol i pait na kilim i dai ol wanlotu bilong ol yet! Tru tumas, God i no bos bilong ol dispela lain. Baibel i tok, Seten em i bos bilong ol. Olsem na aposel Jon i tok: “Yumi stap pikinini bilong God, na Seten i stap het bilong olgeta man bilong graun.” (1 Jon 5:19) Seten em i “god” bilong dispela graun. (2 Korin 4:4) Em yet i bosim ol hetman bilong dispela graun na ol lain man bilong dispela graun. Ol samting ol i mekim i kamapim long ples klia olsem ol i no lain bilong God.
Samting Jehova i Laik Mekim Bilong Helpim Ol Man i Gat Pasin Daun
12, 13. God i gat wanem laik long dispela graun na ol man?
12 Tasol taim God i wokim ol man na putim ol long graun em i laik bai olgeta hap bilong graun i kamap gutpela ples paradais olsem long Iden na olgeta manmeri i ken i stap gutpela olgeta na i stap amamas. Em laik bilong God. (Jenesis 1:26-28; 2:15; Aisaia 45:18) Maski ol man na ol spirit nogut i bikhet long God, tasol God i no senisim dispela laik bilong em. God bai kamapim laik bilong em long taim stret olsem em i makim pinis. Tru, long nau ol man i sakim God na ol yet i laik bosim graun na God i larim ol i mekim olsem, tasol em i makim pinis taim bilong pinisim dispela wok bilong ol.
13 Jisas i bilip tru olsem God bai kamapim laik bilong em long graun. Olsem na em i tokim man nogut i bilip long em, olsem: ‘Bai yu stap wantaim mi long Paradais.’ (Luk 23:43) Jisas i tok long Paradais bihain bai kamap long graun. Paslain long dispela Jisas i bin tok: “Ol man i no save hambak na bikhet, em ol i ken amamas. Bai God i givim olgeta graun long ol.” (Matyu 5:5) Ating Jisas i tingim tok promis i stap long Sam 37:11, olsem: “Ol manmeri i daunim nem bilong ol yet bai ol i stap gut long graun. Bai ol i sindaun gutpela tumas na amamas i stap.”
14. Wanem kain man bai stap long graun?
14 Ol dispela man God i laik givim olgeta graun long ol, ol i husat? Sam 37:34 i tok: “Yu mas bilip long [Jehova] na prea long em, na bihainim pasin bilong em. Sapos yu mekim olsem, bai em i givim biknem long yu, na yu ken holim dispela graun em i givim yu. Na bambai yu lukim em i bagarapim ol man nogut.” Na ves 37 na 38 i tok: “Yu tingting long man i no gat asua long wanpela samting, na lukim stretpela man. Man i save sindaun isi wantaim ol arapela manmeri bai lain bilong em i stap oltaim. Tasol Bikpela i save bagarapim tru ol man bilong sin. Ol lain tumbuna pikinini bilong ol bai i lus olgeta.” Olsem na ol man i kisim save long Jehova, na ol i bilip tru long ol tok promis bilong em, na ol i bihainim ol lo bilong em, na long ai bilong em ol i olsem ol stretpela man i no gat asua long wanpela samting, ol dispela man i olsem ol stretpela man em God bai givim olgeta graun long ol. Long 1 Jon sapta 2 ves 17 Baibel i tok: “Pasin bilong graun bai i pinis, na aigris bilong en tu wantaim. Tasol man i bihainim tok bilong God, em bai i stap oltaim.”
15. Wanem samting i mas kamap pastaim bambai bikpela senis i ken kamap long graun?
15 Ol man i bin bosim dispela graun na ol i no bin kamapim ol gutpela samting, olsem na ol dispela hetman i mas pinis pastaim na bai ol bikpela senis i ken kamap long graun. Jehova inap mekim dispela samting i kamap. Baibel i tok, Jehova “i save senisim ol taim, na em i save rausim ol king na putim ol man i stap king.”—Danyel 2:21, NW.
Rausim Ol Bikhetman
16, 17. (a) Fero i bikhet long Jehova, tasol Jehova i mekim wanem long Fero? (b) Olsem wanem dispela i truim tok profet bilong Jehova?
16 Tingim ol samting Jehova i bin mekim long ol strongpela king na ol lain king long bipo. Em i daunim tru ol king i bikhet na i laik katim wok bilong Em long kamapim laik bilong em. Wanpela king olsem em Fero bilong Isip. Fero i kalabusim lain bilong God. Tasol Jehova i laik givim wanpela wok long lain bilong Em, olsem na em i salim Moses i go long Fero na Moses i tokim Fero em i mas larim lain bilong God i go. Tasol Fero i bikhet na em i tok: “[Jehova] em i husat? Bilong wanem mi mas harim tok bilong en na larim yupela Isrel i go? Mi no save long [Jehova], olsem na mi no ken larim yupela i go.”—Eksodas 5:2.
17 Jehova i givim rot long Fero bambai Fero i ken senisim tingting bilong em, tasol nogat. Eksodas 11:10 i tok, Fero i ‘pasim tingting bilong em’; em i bikhet yet. Tasol Jehova i gat olgeta strong na i no gat wanpela man inap sakim em. Olsem na long taim em i makim pinis em i bagarapim Fero wantaim ol ami bilong em long Solwara Retsi. Eksodas 14:28 i tok: “I no gat wanpela i stap. Olgeta i dai pinis.” Tasol Jehova i lukautim gut ol wokboi bilong em na ol i lusim kalabus. Na dispela samting i kamap long taim stret olsem tok profet bilong Jehova i makim pinis. Em i kamap long pinis bilong dispela hap taim bilong 400 yia Jehova i bin tokim bilipman Ebraham long en.
18. Jehova i mekimwanem long Nebukatnesa bilong Babilon? Bilong wanem Jehova i mekim olsem?
18 King Nebukatnesa bilong Babilon em o i bikhet. Em i hambak long bikpela nem na namba bilong em. Em i litimapim nem bilong em yet olsem em i wanpela god. Tasol Danyel 4:31 (NW) i tok: “King i toktok yet na wantu wanpela maus i kamap long heven na em i tok: ‘O King Nebukatnesa, mi laik tokim yu, “Nau bai wok king i tekewe long yu.”’” Jehova i tokim Nebukatnesa em bai kamap olsem wanpela animal “inap long taim yu save Nambawan Bikpela em i Bos bilong ol man, na em bai givim wok king long man em i laik givim long em.” (Danyel 4:32, NW) Na ol samting i kamap olsem Jehova i tok pinis.
19. Bilong wanem Jehova i bagarapim Babilon na Belsasa?
19 Na laspela king bilong Babilon, em Belsasa, em i stap long taim Jehova i makim bilong pinisim gavman nogut bilong Babilon. Bilong wanem Jehova i laik pinisim ol? Long wanem ol i bin kalabusim lain bilong Em na bagarapim nem bilong Em. Danyel sapta 5 i stori long Belsasa i wokim bikpela kaikai na em i singautim wan tausen bikpela man i kam. Na nau em i tokim ol wokboi bilong em long kisim i kam ol kap gol na silva, em papa bilong em Nebukatnesa i bin kisim long haus lotu bilong Jehova long Jerusalem. Ol i kisim i kam na king wantaim ol bikman na ol meri bilong ol, ol i dring long ol dispela kap. (Danyel 5:2, 3) Na bihain ol i mekim wanem? “Ol i dring wain, na ol i litimapim nem bilong ol god bilong gol na silva na bras na ain na diwai na ston.” (Danyel 5:4, NW) Ol i dring long ol dispela kap holi bilong haus lotu bilong Jehova na i olsem ol i tok bilas long Jehova na bagarapim tru nem bilong Em. Ol i lotuim ol god giaman bilong ol na long dispela rot ol i lotuim Seten.
20, 21. Danyel i givim wanem tok long Belsasa? Wanem samting i kamap na i truim dispela tok?
20 Tasol wantu wanpela narapela kain samting i kamap. Ol i lukim wanpela han bilong man i raitim sampela tok long banis bilong haus bilong king! King i pret nogut tru na bel bilong em i guria na lek bilong em i no gat strong moa. (Danyel 5:6) Tasol ol glasman bilong Babilon i no inap kamapim as bilong dispela tok long Belsasa. Olsem na ol i singautim Danyel i kam. Danyel i tokim king dispela tok i kam long Jehova na insait bilong en i olsem: “God i makim pinis hamas de kingdom bilong yu i ken i stap, na nau em i pinisim pinis. . . . God i bin skelim yu na yu sot long stretpela pasin. . . . Ol i brukim kingdom bilong yu na givim pinis long ol Midia na Pesia.”—Danyel 5:26-28, NW.
21 Long dispela nait stret ol ami bilong Midia na Pesia ol i kam insait long ol dua bilong taun. Danyel 5:30 (NW) i tok: “Long dispela nait stret ol i kilim i dai Belsasa.” Ol i daunim Babilon na nau rot i op bilong lain bilong Jehova i ken i go bek long ples bilong ol long taim stret olsem God i bin makim, olsem long taim ol i kalabus pinis inap 70 yia. Dispela samting i kamap long taim stret olsem Jehova i makim long Jeremaia 29:10.
22, 23. Herot Agripa Namba Wan i bin mekim nogut long ol Kristen, na Jehova i mekim wanem long em?
22 Long taim bilong ol aposel Herot Agripa Namba Wan em i laspela king bilong Palestain i wok aninit long bikpela Gavman bilong Rom. Herot i tok na ol i kalabusim aposel Pita na ol i mekim nogut long ol narapela Kristen. Herot i kilim i dai aposel Jems. (Aposel 12:1, 2) Herot i kamapim ol pait na ol pilai haiden long ples bung bilong amamasim ol man. Em i tok em i lotuim God, tasol ol dispela samting em i mekim i soim yumi, em i no lotuim God.
23 Bihain taim i kamap bilong Jehova i mas pinisim dispela birua. Aposel sapta 12 ves 21 i go inap 23 i tok: “Orait, Herot i makim wanpela de, na long dispela de em i putim bilas bilong king, na i sindaun long sia bilong king, na i mekim bikpela tok long ol. Na ol manmeri ol i singaut olsem, ‘Em i maus bilong wanpela god! Em i no maus bilong man!’ Na Herot i no litimapim nem bilong God, olsem na nau tasol ensel bilong Bikpela i paitim em. Na ol liklik snek i kaikai em, na em i dai pinis.” Em narapela king Jehova i bin “rausim” olsem Danyel 2:21 (NW) i tok.
24. Ol dispela samting i bin kamap bipo em i olsem piksa na i makim wanem samting?
24 Ol dispela samting i bin kamap bipo em i makim olsem Jehova i gat taim bilong mekim ol wok bilong em na kamapim laik bilong em. Na dispela i makim tu olsem em i gat strong na em inap long kamapim laik bilong em na mekim dispela graun i kamap wanpela gutpela ples paradais “na bai stretpela pasin tasol i stap long en.”—2 Pita 3:13.
Yu Tingim?
◻ Bilong wanem yumi mas save long ol taim na ol de Jehova i bin makim?
◻ Bilong wanem God i no helpim ol hetman na ol manmeri bilong dispela graun?
◻ Ol wanem kain man inap i stap long Paradais i laik kamap long graun?
◻ Jehova i mekim wanem na dispela i kamapim long ples klia olsem em inap rausim ol king na hetman i bikhet long em?