Kisim Skul Long Ol Tok Profet Bilong Baibel

 1. Wanem samting i ken helpim yumi long amamas long stadi long ol tok profet bilong Baibel?

WANPELA yangpela brata nem bilong em Ben, em i tok: “Mi save laik tru long stadi long ol tok profet bilong Baibel.” Yu wanbel long tok bilong em? O yu pilim olsem i hatwok long kliagut long ol tok profet bilong Baibel? Na ating yu pilim olsem yu les long stadi long ol tok profet. Tasol taim yu kisim sampela save moa long wai na Jehova i putim ol tok profet long Baibel, yu bai i gat laik long kisim save long ol.

 2. Dispela atikol bai stori long wanem samting?

² Long dispela atikol, yumi bai stori long wai na yumi mas kisim save long ol tok profet bilong Baibel na hau yumi ken stadi long ol. Yumi bai stori tu long tupela tok profet long Buk Daniel bilong soim olsem wanem ol dispela tok profet i ken helpim yumi long nau taim yumi kliagut long ol.

 3. Yumi mas mekim wanem bilong kliagut long ol tok profet bilong Baibel?

³ Yumi mas kisim helpim bilong kliagut long ol tok profet bilong Baibel. Tingim dispela tok piksa. Piksaim long tingting olsem yu go visitim wanpela nupela ples, tasol pren bilong yu i go wantaim yu em i save gut long dispela ples. Em i save long ples yupela i stap long en nau na ol rot i go long wanem hap. Tru tumas, yu bai amamas olsem pren bilong yu i go wantaim yu! Olsem tasol, Jehova i save long haptaim nau yumi stap long en na wanem ol samting bai kamap bihain. Olsem na bilong kliagut long ol tok profet bilong Baibel, long pasin daun yumi mas askim Jehova long helpim yumi.​—Dan. 2:28; 2 Pita 1:19, 20.

 4. Wai na Jehova i kirapim ol man long raitim ol tok profet long Baibel? (Jeremaia 29:11) (Lukim tu piksa.)

⁴ Olsem ol gutpela papamama, Jehova i laik bai ol pikinini bilong em i stap amamas long bihain. (Ritim Jeremaia 29:11.) Tasol Jehova inap tokim yumi stret long wanem ol samting bai kamap bihain, em samting ol papamama i no inap mekim. Em i kirapim ol man long raitim ol tok profet long Baibel bambai yumi ken save long ol bikpela samting bai kamap paslain long ol i kamap. (Ais. 46:10) Ol tok profet bilong Baibel em ol gutpela presen i kam long Papa bilong yumi long heven. Tasol hau yu ken save tru olsem ol samting Baibel i tok profet long en bai kamap tru?

 5. Ol yangpela i ken kisim wanem skul long stori bilong Max?

⁵ Long skul, ol yangpela Kristen i stap namel long ol narapela em ol i no save rispektim tok bilong Baibel. Ol tok na pasin bilong ol i ken kirapim wanpela yangpela Witnes long i gat tupela tingting. Tingim stori bilong wanpela brata, nem bilong em Max. Em i tok: “Taim mi tineja, mi stat long i gat tupela tingting long ol tok papamama i skulim mi long en long lotu i tru na long God i kamapim ol tok bilong Baibel.” Papamama bilong em i bin mekim wanem? Em i tok: “Ol i stap isi, maski mi save olsem ol i wari tru.” Papamama bilong Max i yusim ol tok bilong Baibel long bekim ol askim bilong em. Max i mekim sampela samting tu. Em i tok: “Mi yet i stadi long ol tok profet bilong Baibel na mi stori long ol narapela yangpela long ol skul mi kisim long en.” Wanem gutpela samting i kamap? Max i tok: “Bihain long dispela, mi bilip tru olsem God i kamapim ol tok bilong Baibel!”

 6. Yu mas mekim wanem ol samting sapos yu gat tupela tingting, na bilong wanem?

⁶ Olsem Max, sapos yu stat long holim tupela tingting long ol tok i tru bilong Baibel, orait no ken pilim sem long dispela. Tasol yu mas mekim sampela samting. Tupela tingting i olsem ros. Sapos yu no mekim wanpela samting bilong rausim, isi isi em bai bagarapim ol gutpela tok i tru yu bin lainim. Bilong rausim ol samting i olsem ros long bilip bilong yu, yu ken askim yu yet olsem, ‘Mi bilipim ol tok Baibel i mekim long ol samting bai kamap long bihain?’ Sapos yu gat tupela tingting long dispela samting, orait yu mas stadi long ol tok profet bilong Baibel i kamap tru pinis. Hau yu ken mekim olsem?

 7. Olsem wanem Daniel i stap gutpela piksa long pasin bilong stadi long ol tok profet? (Daniel 12:10) (Lukim tu piksa.)

⁷ Daniel i stap gutpela piksa long pasin bilong stadi long ol tok profet. Em i gat gutpela risen long stadi long ol tok profet, em i laik save long tok i tru. Na tu, Daniel i gat pasin daun, em i luksave olsem Jehova bai helpim em long kliagut long ol tok profet sapos em i pas gut wantaim Em na bihainim ol stretpela lo bilong Em. (Dan. 2:27, 28; ritim Daniel 12:10.) Daniel i soim olsem em i gat pasin daun taim em i askim Jehova long helpim em. (Dan. 2:18) Na tu, Daniel i stadi gut long ol tok profet. Em i mekim wok painimaut long ol Rait Holi we i stap long taim bilong em. (Jer. 25:11, 12; Dan. 9:2) Olsem wanem yu ken bihainim pasin bilong Daniel?

 8. Wai na sampela i no laik bilip olsem ol tok profet bilong Baibel i save kamap tru, tasol yumi mas mekim wanem?

⁸ Skelim ol risen na yu stadi long ol tok profet. Olsem wanem? Yu stadi long ol tok profet bilong Baibel bikos yu laik save long tok i tru? Sapos olsem, orait Jehova bai helpim yu. (Jon 4:23, 24; 14:16, 17) Wai na sampela man i stadi long ol tok profet? Sampela i mekim olsem bikos ol i laik painim evidens i soim olsem God i no kamapim ol tok bilong Baibel. Long dispela rot, ol i pilim olsem ol i ken putim ol lo bilong ol yet long wanem samting i stret na wanem samting i no stret na bihainim ol dispela lo. Tasol yumi mas i gat gutpela risen bilong stadi long ol tok profet bilong Baibel. Na tu, i gat wanpela pasin em yumi mas kisim bilong helpim yumi long kliagut long ol tok profet bilong Baibel.

 9. Yumi mas i gat wanem pasin bilong helpim yumi long kliagut long ol tok profet bilong Baibel? Stori long dispela.

⁹ Mekim pasin daun. Jehova i tok promis long helpim ol man i gat pasin daun. (Jems 4:6) Olsem na yumi mas beten askim Em long helpim yumi long kliagut long ol tok profet bilong Baibel. Na tu, yumi mas luksave olsem yumi nidim helpim bilong wokboi i gat savetingting em Jehova i makim ol bilong givim kaikai bilong strongim bilip bilong yumi long taim stret bilong en. (Luk 12:42) Jehova em i God bilong oganaisim gut ol samting, olsem na em i makim wanpela rot tasol bilong helpim yumi long kliagut long ol tok i tru i stap long Baibel.​—1 Kor. 14:33; Efe. 4:4-6.

10. Yu kisim wanem skul long ekspiriens bilong Esther?

¹⁰ Stadi gut long ol tok profet. Makim wanpela tok profet em yu laik save moa long en na mekim wok painimaut long dispela pastaim. Esther em wanpela sista i bin mekim olsem. Em i laik kisim sampela save moa long ol tok profet i stori long Mesaia bai kam. Em i tok: “Taim mi gat 15 krismas, mi stat long mekim wok painimaut bilong save olsem tru tru ol man i bin raitim ol dispela tok profet paslain long taim bilong Jisas.” Ol tok em i lainim taim em i ritim ol atikol samting i stori long Ol Olpela Rait Bilong Detsi i strongim bilip bilong em. Em i tok: “Ol man i bin raitim sampela bilong ol dispela rait paslain long taim bilong Krais, so dispela i helpim mi long save tru olsem ol tok profet i stap long ol dispela rait i kam long God.” Esther i tok: “Mi ritim ol dispela tok planti taim bilong kliagut long ol.” Tasol em i amamas olsem em i wok strong long mekim olsem. Bihain long em i stadi gut long sampela tok profet bilong Baibel, em i tok: “Mi yet i luksave olsem ol tok bilong Baibel i tru!”

11. Taim yumi pruvim long yumi yet olsem tok bilong Baibel i tru, hau dispela i ken helpim yumi?

¹¹ Taim yumi luksave olsem sampela tok profet long Baibel i kamap tru pinis, dispela i helpim yumi long kisim pasin bilong trastim tru Jehova na rot em i yusim bilong stiaim yumi. Na tu, ol tok profet bilong Baibel i helpim yumi long holimpas bilip na wetim gutpela taim bai kamap bihain, maski yumi karim ol hevi long nau. Yumi ken stori liklik long tupela tok profet em Daniel i bin stori long en em nau yumi wok long lukim truim bilong en. Taim yumi kliagut long ol dispela tok profet, dispela bai helpim yumi long mekim ol gutpela disisen.

12. Tupela fut em “ain i miks wantaim graun malumalum” i makim wanem samting? (Daniel 2:41-43)

¹² Ritim Daniel 2:41-43. Long driman em King Nebukatnesar i bin lukim na Daniel i kamapim mining bilong en, tupela fut bilong imis em ol i bin wokim long “ain i miks wantaim graun malumalum.” Taim yumi skelim dispela tok profet wantaim ol narapela tok profet long Buk Daniel na Revelesen, yumi luksave olsem tupela fut i makim Gavman Inglan-Amerika, em gavman i gat bikpela strong long nau. Daniel i tok long dispela strongpela gavman olsem, “dispela kingdom bai i gat strong long wanpela samting na long narapela samting, em bai malumalum.” Wai na dispela gavman bai malumalum long narapela samting? Bikos ol manmeri nating bilong en, em graun malumalum i makim, ol i daunim strong bilong dispela gavman long mekim wok olsem ain.b

13. Yumi kisim save long wanem ol bikpela tok i tru long dispela tok profet?

¹³ Yumi lainim sampela bikpela tok i tru long stori bilong Daniel long dispela imis long driman bilong Nebukatnesar, na moa yet long tupela fut bilong en. Namba 1, Gavman Inglan-Amerika i soim strong bilong em long sampela rot. Olsem, dispela tupela gavman i bin mekim bikpela samting bilong winim Wol Woa 1 na Wol Woa 2. Tasol dispela strongpela gavman i wok long lusim strong bilong en, na em bai wok yet long lusim strong bilong en bikos ol manmeri aninit long en i wok long pait long narapela narapela na ol i pait long gavman tu. Namba 2, dispela gavman em laspela strongpela gavman long mekim wok bos paslain long Kingdom Bilong God i pinisim olgeta gavman bilong ol man long dispela graun. Maski sampela taim ol narapela gavman i pait long Gavman Inglan-Amerika, ol i no inap kisim ples bilong en. Yumi save long dispela bikos “dispela ston”—Kingdom Bilong God—em bai brukbrukim i go liklik liklik tupela fut bilong imis we i makim Gavman Inglan-Amerika.​—Dan. 2:34, 35, 44, 45.

14. Taim yumi kliagut long tok profet bilong tupela fut em ain i miks wantaim graun, hau bai dispela i helpim yumi long mekim ol gutpela disisen?

¹⁴ Yu bilip tru olsem tok profet bilong Daniel long tupela fut em ain i miks wantaim graun em i tru? Sapos olsem, dispela bai mekim sampela samting long laip bilong yu. Yu bai no inap tingting long bungim planti mani kago bikos yu save olsem klostu nau God bai pinisim ol samting nogut bilong dispela graun. (Luk 12:16-21; 1 Jon 2:15-17) Taim yu kliagut long dispela tok profet, dispela bai helpim yu long luksave olsem em i bikpela samting long autim tok na skulim ol man. (Mat. 6:33; 28:18-20) Bihain long yu stadi long dispela tok profet, yu ken askim yu yet olsem, ‘Ol disisen mi mekim i soim olsem mi bilip tru olsem klostu nau Kingdom Bilong God bai pinisim olgeta gavman bilong dispela graun?’

15. Husat em i “king bilong not” na husat em i “king bilong saut” long nau? (Daniel 11:40)

¹⁵ Ritim Daniel 11:40. Daniel sapta 11 i stori long tupela king, o tupela gavman, i pait long narapela narapela bikos ol i laik bosim graun olgeta. Taim yumi skelim dispela tok profet wantaim ol narapela tok profet bilong Baibel, yumi luksave olsem “king bilong not” em Rasia na ol gavman i sapotim em, na “king bilong saut” em strongpela Gavman Inglan-Amerika.c

16. “King bilong not” i mekim wanem long ol manmeri bilong God?

¹⁶ Ol manmeri bilong God i stap aninit long wok bos bilong “king bilong not” ol i karim hevi bilong pasin birua em dispela king i mekim long ol. Ol birua i paitim sampela Witnes na kalabusim ol bikos long bilip bilong ol. Tasol ol samting “king bilong not” i mekim i no pretim ol bratasista bilong yumi, nogat, em i strongim bilip bilong ol. Wai na yumi tok olsem? Bikos ol bratasista bilong yumi i save olsem taim ol birua i mekim nogut long ol manmeri bilong God, dispela i truim ol tok profet i stap long Buk Daniel.d (Dan. 11:41) Taim yumi save long dispela, dispela i ken helpim yumi long holimpas bilip na stap gut yet long Jehova.

17. Ol manmeri bilong God i karim wanem ol hevi aninit long wok bos bilong “king bilong saut”?

¹⁷ Long bipo, “king bilong saut” tu i mekim nogut long ol manmeri bilong Jehova. Olsem, long taim bilong Wol Woa 1 na Wol Woa 2, ol i kalabusim planti brata bikos ol i no laik insait long woa, na tu, ol i pinisim sampela Witnes pikinini long skul bikos ol i no salut long fleg. Tasol insait long ol yia i go pinis, ol wokman bilong Jehova em ol i stap aninit long wok bos bilong dispela king, sampela samting moa i kamap na i traim pasin bilong ol long i stap gut long Kingdom Bilong God. Olsem, long taim bilong ol ileksen kempein, wanpela Kristen inap pilim presa long sapotim wanpela lain politik o wanpela kendidet. Tru em i no vot, tasol long bel na tingting bilong em ating em i sapotim wanpela lain politik o wanpela kendidet. Em i bikpela samting tru long yumi no ken sapotim wanpela lain politik o wanpela kendidet long pasin bilong yumi na long bel na tingting bilong yumi tu!​—Jon 15:18, 19; 18:36.

18. Yumi mekim wanem taim yumi lukim pait i kamap namel long “king bilong not” na “king bilong saut”? (Lukim tu piksa.)

¹⁸ Ol man i no bilip long ol tok profet bilong Baibel inap tingting planti na pret nogut tru taim ol i lukim “king bilong saut” i “lokim kom” wantaim “king bilong not.” (Dan. 11:40, ftn.) Dispela tupela king wantaim i gat ol wepen na ol nuklia bom we inap pinisim laip bilong olgeta manmeri long graun. Tasol yumi save olsem Jehova i no inap long larim dispela samting i kamap. (Ais. 45:18) So taim yumi lukim pait i kamap namel long “king bilong not” na “king bilong saut,” dispela i no ken mekim yumi tingting planti, nogat, dispela i mas strongim bilip bilong yumi. Dispela i soim olsem pinis bilong dispela haptaim nogut i kam klostu pinis.

19. Yumi mas luksave long wanem samting long ol tok profet bilong Baibel?

¹⁹ Yumi no save long hau sampela tok profet bilong Baibel bai kamap tru. Profet Daniel tu i no kliagut long mining bilong olgeta tok profet em i bin raitim. (Dan. 12:8, 9) Maski yumi no kliagut long hau wanpela tok profet bai kamap tru, dispela i no makim olsem em bai no inap kamap tru, nogat. Tru tumas, yumi ken bilip tru olsem Jehova bai helpim yumi long kliagut long ol tok profet long taim stret bilong en, olsem em i bin mekim long bipo.​—Amo. 3:7.

20. (a) Klostu nau yumi bai lukim truim bilong wanem ol narapela tok profet bilong Baibel? (b) Yumi mas wok yet long mekim wanem?

²⁰ Ol lida bilong dispela graun bai mekim dispela tokaut olsem, “nau em i taim bilong bel isi na gutpela sindaun.” (1 Tes. 5:3) Bihain ol gavman bilong dispela graun bai birua long ol lotu giaman na pinisim ol olgeta. (Rev. 17:16, 17) Na bihain ol bai pait long ol manmeri bilong God. (Ese. 38:18, 19) Ol dispela samting bai bringim yumi i go long laspela pait bilong God, em Armagedon. (Rev. 16:14, 16) Yumi ken save tru olsem klostu nau ol dispela samting bai kamap. Olsem na long nau yet, yumi mas wok yet long soim tenkyu bilong yumi long gutpela Papa bilong yumi long heven long rot bilong putim gut yau long ol tok profet bilong Baibel na helpim ol narapela long mekim olsem tu.