ASKIM

Inap planti yia ol litresa bilong yumi i tok, Satan i kisim nem olsem Gok Bilong Magok bihain long Jisas i rausim em long heven. Ol litresa bilong yumi i tok olsem bikos Buk Revelesen i kolim Satan olsem lida bilong olgeta manmeri husat i birua long lain bilong God. (Rev. 12:1-17) Olsem na ol litresa bilong yumi i kamapim olsem ol profet i yusim nem Gok bilong makim Satan.

Tasol sampela bikpela askim i kamap. Taim Jehova i stori long taim we em bai daunim na bagarapim Gok, em i tok: “Bodi bilong yupela bai i slip i stap nating long graun. Na ol tarangau na wel animal bai i kam kaikai ol bodi bilong yupela.” (Ese. 39:4, 5) Jehova i tok moa olsem: “Taim dispela olgeta samting i kamap, bai mi makim wanpela hap graun long kantri Israel bilong kamap matmat bilong planim King Gok wantaim ol soldia bilong en.” (Ese. 39:11) Tasol olsem wanem “ol tarangau na wel animal bai i kam kaikai ol bodi” bilong ol dispela spirit? Hau bai “matmat” bilong Satan i stap long graun? Baibel i kamapim klia olsem insait long 1,000 yia, Satan bai i stap kalabus long hul i no gat as, olsem na i no gat rot long ol pisin na ol wel animal i kaikaim em, na tu, i no gat rot long planim em.—Rev. 20:1, 2.

Yumi kisim save tu olsem long pinis bilong 1,000 yia, Satan bai lusim hul i no gat as, na “em bai go bilong giamanim ol lain manmeri i stap long 4-pela kona bilong graun, em ol lain Gok wantaim Magok. Em bai bungim ol bilong i go long pait.” (Rev. 20:8) Tasol hau bai Satan i giamanim Gok sapos em yet em Gok? Dispela i soim klia tru olsem “Gok” long tok profet bilong Buk Esekiel na Buk Revelesen i no makim Satan.

Orait, husat em Gok Bilong Magok? Sapos yumi laik save long bekim bilong dispela askim, yumi mas skelim gut ol skripsa na kisim save long husat i laik bagarapim ol manmeri bilong God. Baibel i no stori tasol long pait bilong ‘Gok bilong Magok,’ nogat, em i stori tu long pait bilong “king bilong hap not” na pait bilong “ol king bilong graun.” (Ese. 38:2, 10-13; Dan. 11:40, 44, 45; Rev. 17:14; 19:19) Yu ting ol dispela pait i makim ol narapela narapela pait? Ating nogat. Baibel i yusim ol narapela narapela nem bilong stori long wankain pait. Bilong wanem yumi tok olsem? Baibel i kamapim klia olsem olgeta lain man bai insait long laspela pait we bai kirapim pait bilong Armagedon.—Rev. 16:14, 16.

Taim yumi skelim olgeta tok bilong Baibel we i stori long laspela pait em Gok Bilong Magok bai mekim long ol manmeri bilong God, yumi luksave olsem dispela nem i no makim Satan, nogat, em i makim ol kantri i bung wantaim long mekim dispela pait. Yu ting “king bilong hap not” bai go pas long dispela pait? Nau yet yumi no inap tok olsem. Tasol dispela tok i stret wantaim tok Jehova i mekim long Gok, em i tok: “Yu wantaim ol bikpela lain ami bilong yu bai i lusim kantri bilong yu long hap not na bai yupela i kam bilong pait long ol. Ol dispela soldia i kam long planti kantri, na olgeta bai i sindaun long ol hos na i kam wantaim yu.”—Ese. 38:6, 15.

Profet Daniel i mekim wankain tok long king bilong not olsem Esekiel i mekim. Em i tok: “Ol man bai i tokim em long ol samting i kamap long hap sankamap na long hap not na dispela tok bai i mekim em i pret. Na bai em i bel nogut tru na i go pait strong moa” na em bai laik “pinisim tru planti lain manmeri.” ‘Em bai i sanapim ol bikpela haus sel long hap graun i stap namel long nambis bilong biksolwara Mediterenian na dispela maunten i nambawan tru, em maunten bilong God. Tasol em bai i bagarap na i no gat wanpela bai i helpim em.’ (Dan. 11:44, 45) Dispela tok i wankain long stori em Buk Esekiel i mekim long ol wok bilong Gok.—Ese. 38:8-12, 16.

Wanem samting bai kamap bihain long laspela pait? Daniel i tok: “Long dispela taim namba wan ensel Maikel [Jisas Krais] bai i kamap [long taim bilong Armagedon], em ensel i save lukautim yupela ol Israel [kirap long 1914]. Long dispela taim bikpela hevi tru bai i kamap. Bipo kain hevi olsem i no bin kamap long wanpela kantri bilong graun. Taim dispela hevi i kamap, God bai i kisim bek olgeta manmeri bilong lain bilong yu, nem bilong ol i stap pinis long buk bilong em, na bai ol i stap gut.” (Dan. 12:1) Jisas em mausman bilong God, na Revelesen 19:11-21 i mekim wankain stori olsem i stap long Buk Daniel long ol samting Jisas bai mekim.

Tasol husat em “Gok wantaim Magok” em Revelesen 20:8 i stori long en? Long laspela traim bai kamap long pinis bilong 1,000 yia, ol manmeri i givim baksait long Jehova bai kisim wankain tingting olsem ‘Gok Bilong Magok’ na ol bai i laik kilim i dai ol manmeri bilong God. ‘Gok Bilong Magok’ i makim ol lain manmeri i pait long ol manmeri bilong God long pinis bilong traipela hevi tru. Tupela lain wantaim bai kisim wankain strafe—ol bai dai na pinis olgeta! (Rev. 19:20, 21; 20:9) Olsem na long pinis bilong 1,000 yia, i stret tru long kolim ol dispela birua olsem “Gok wantaim Magok.”

Yumi amamas long stadi long Baibel, olsem na yumi laik tru long save long husat bai i stap olsem “king bilong hap not.” Tasol maski husat i stap olsem “king bilong hap not,” yumi save olsem dispela 2-pela samting bai kamap: (1) Gok Bilong Magok na lain ami bilong em bai bagarap na pinis olgeta; na (2) King bilong yumi, em Jisas Krais, em bai helpim ol manmeri bilong God na bringim ol i go insait long nupela taim we ol bai i stap bel isi tru na pasin birua bai i no stap moa.—Rev. 7:14-17.