Buk Bilong Baibel Namba 30—Amos

Man Bilong Raitim: Amos

Ples Em i Bin Raitim: Juda

Raitim Pinis: 804 B.C.E. samting

 1. Amos em i husat?

TAIM Jehova i makim Amos na salim em i go autim tok long lain bilong em yet, em ol Juda, na long kingdom bilong Israel i stap long hap not, em i no wanpela profet o pikinini bilong profet, nogat; em i wasman bilong sipsip na man bilong lukautim ol diwai fik. Em wanpela bilong ol profet em 2 King 17:​13, 22, 23 i stori long ol. Em i bilong taun Tekoa long Juda, em longwe long Jerusalem long hap saut inap 16 kilomita, na sapos man i stap long boda long hap saut bilong Israel ol 10-pela lain i stap long en, em i mas wokabaut inap wanpela de bilong go kamap long dispela taun.​—Amo. 1:1; 7:​14, 15.

 2. Olsem wanem yumi ken save long taim Amos i bin raitim tok profet bilong em?

² Namba wan ves long buk bilong em i tok, Amos i kirap mekim wok profet long taim Usia i stap king bilong Juda, na Jeroboam Namba 2, em pikinini bilong Joas, i stap king bilong Israel. Em tupela yia paslain long taim bikpela guria tru i kamap. Olsem na Amos i bin raitim tok profet bilong em namel long yia 829 na 804 B.C.E., insait long 26 yia bilong tupela king hia i mekim wok king long wankain taim. Profet Sekaraia tu i stori long bikpela guria nogut i bin kamap long taim bilong Usia, na ol man i pret na ranawe. (Sek. 14:5) Man bilong raitim stori bilong ol Juda long bipo, em Josifas, em i tok wanpela guria i bin kamap long taim Usia i bikhet na mekim ofa bilong smok i gat gutpela smel insait long tempel. Tasol i olsem Amos i stori long narapela guria i bin kamap paslain long dispela.

 3. (a) Olsem wanem na i stret Amos i tokaut long ol hevi i mas painim ol Israel? (b) Olsem wanem Amos i litimapim wok king bilong Jehova?

³ Insait bilong nem “Amos” i olsem “Em i Hevipela Samting” o “Karim Hevipela Samting.” Amos i autim hevipela tok long ol samting nogut bai painim Israel na Juda (na planti kantri haiden), tasol em i autim gutpela tok tu olsem lain bilong Jehova bai stap gutpela gen long ples bilong ol. I gat as na em i mas tokaut long hevi bai painim ol Israel. Ol i gat planti samting bilong skin na gutpela sindaun, na ol i kaikai na dring planti, na ol i pamuk nabaut. Ol i lusim tingting pinis long Lo bilong Jehova. Gutpela sindaun bilong ol i mekim na ol i no lukim olsem ol i wankain long kaikai i mau tumas na i laik bagarap​—ol i wok long bagarap i go i go na bihain ol bai bagarap olgeta. Amos i tok profet olsem, i no longtaim na ol 10-pela lain bilong Israel bai i go kalabus long wanpela kantri i stap long hapsait bilong Damaskus. Long dispela tok em i mekim, Amos i litimapim stretpela pasin bilong Jehova na wok king bilong em​—long Baibel ol i bin raitim pastaim long tok Hibru, inap 21 taim Amos i kolim Jehova olsem “King, Bikpela.”​—Amo. 1:8, NW.

 4. Truim bilong wanem ol tok profet bilong Amos i makim olsem ol tok bilong Buk Amos i tru?

⁴ Truim bilong dispela tok profet na ol narapela tok profet bilong Amos i makim olsem ol tok bilong Buk Amos i tru na yumi inap bilip tru long en. Amos i tok, ol lain i birua long Israel, olsem Siria, Filistia, Tair, Idom, Amon na Moap, ol tu bai bagarap olsem long paia. Stori bilong ol samting i bin kamap bipo i soim yumi olsem ol dispela strongpela lain birua i bin bagarap. Ol Juda na Israel i gat bikpela asua moa, long wanem, ol i bin lusim Jehova na lotuim ol god giaman. Laspela strongpela taun bilong ol Israel i stap yet long han bilong ol, em Samaria, na ami bilong Asiria em Salmaneser Namba 5 i bosim, ol i banisim na kisim long yia 740 B.C.E. (2 Kin. 17:​1-6) Tasol dispela i no givim save long lain Juda, em i olsem susa bilong lain Israel, olsem na Juda i bagarap long yia 607 B.C.E.

 5. Ol samting bilong bipo ol saveman i painim pinis, dispela i helpim stori bilong Amos olsem wanem?

⁵ Amos i givim strongpela tok long ol Israel, long wanem, ol i laikim tumas gutpela sindaun​—ol maniman i pulim samting bilong ol rabisman bambai ol i ken wokim ol gutpela haus na “bilasim long tit bilong elefan,” na ol i kaikai na dring planti insait long ol dispela haus. (Amo. 3:15; 5:​11, 12; 6:​4-7) Ol saveman bilong digim graun na painim ol samting bilong bipo ol i painim pinis planti samting i kamapim klia gutpela sindaun bilong ol. Ol i digim graun long hap bipo taun Samaria i stap long en na ol i painim planti samting ol man i bin wokim long tit bilong elefan. Wanpela buk i tok, ‘i gat ol piksa ol i bin sapim long plang na ol piksa ol i bilasim long ol naispela ston i gat bikpela pe na glas i gat kain kain kala na gol samting. Ol i ting ol Fonisia yet i bin wokim ol dispela bilas long tit bilong elefan na ol man i kisim bilong bilasim ol sia na tebol long haus bilong ol king bilong Israel. Baibel i stori long haus King Ahap i wokim na em i “bilasim long tit bilong elefan” (1 Kin. 22:39), na “ol naispela bet tru” ol Samaria i wokim long tit bilong elefan, i makim olsem ol i gat planti samting bilong skin na gutpela sindaun, na Amos i krosim ol long dispela pasin bilong ol (6:4).’a

 6. Wanem samting i kamapim klia olsem Buk Amos em i hap tru bilong Baibel?

⁶ Yumi inap save tru olsem Buk Amos em i hap tru bilong Baibel. Olsem: Stiven i bin kamapim tok bilong 3-pela ves bilong dispela buk long Aposel 7:​42, 43, na Jems i kamapim sampela tok bilong en long Aposel 15:​15-18.​—Amo. 5:​25-27; 9:​11, 12.

HELPIM YUMI OLSEM WANEM?

13. Yumi ol lain bilong nau i mas mekim wanem na bai ol tok lukaut bilong Amos i helpim yumi?

¹³ Ol man bilong ritim Baibel long nau, sapos ol i tingim as bilong ol tok lukaut Amos i bin autim long Israel na Juda na ol kantri i stap klostu, dispela bai helpim ol. Ol man i sakim lo bilong Jehova, na stilim ol samting bilong ol rabisman na mekim nogut long ol, na ol i mangalim planti samting na mekim pasin pamuk, na ol i save lotuim god giaman, God i no ken orait long ol. Tasol ol man i lusim ol dispela pasin nogut na tanim bel, God i save marimari long ol na lusim sin bilong ol. Yumi bihainim savepasin sapos yumi klia long ol man nogut bilong dispela graun na yumi mekim olsem Jehova i tok: “Yupela kam long mi, na bai yupela i kisim laip.”​—5:​4, 6, 14.

14. Ol tok lukaut bilong Amos i bin helpim ol Juda i stap long taim bilong Stiven o nogat?

¹⁴ Taim ol man i laik kilim Stiven i dai, em i kolim sampela tok bilong Amos. Em i kirapim ol Juda long tingim ol samting i bin painim ol Israel bipo, em ol i lotuim ol god giaman olsem Molek na Refan na long dispela as ol i go kalabus. Orait taim ol Juda i harim gen ol tok bilong Amos, yu ting dispela i helpim ol? Nogat tru! Ol i belhat na tromoi ston long Stiven na kilim em i dai. Olsem na narapela bikpela hevi gen i mas painim ol long taim Jerusalem i bagarap long yia 70 C.E.​—Amo. 5:​25-27; Ap. 7:​42, 43.

15. I gutpela yumi tingim wanem ol tok profet long Israel bai kam bek gen long ples bilong ol?

¹⁵ I gutpela yumi tingim truim bilong ol planti tok profet bilong Amos, olsem strafe i bin painim Israel na Juda na ol narapela kantri, tasol i no dispela tasol; yumi mas tingim tu ol tok profet bilong Amos olsem bihain ol Israel bai kam bek gen long ples bilong ol. Na tru tumas, olsem Jehova i tok pinis long maus bilong Amos, ol Israel i kam bek long ples long yia 537 B.C.E. na wokim gen ol taun i bagarap na ol i sindaun gen long en, na ol i planim gen ol diwai wain na wokim ol gaden.​—Amo. 9:14; Esr. 3:1.

16. Jems i tok wanem na em i makim olsem truim bilong Amos 9:​11, 12 i kamap long lain Kristen?

¹⁶ Tasol i gat wanpela gutpela truim bilong tok profet bilong Amos long taim bilong ol aposel tu. Taim Jems i stori long ol man i no Juda ol i kam insait long lain Kristen, spirit bilong God i kirapim em long tok, dispela i truim tok bilong Amos 9:​11, 12, olsem God bai ‘wokim gen haus bilong Devit i pundaun pinis.’ Jems i tok, truim bilong dispela i kamap long lain Kristen bambai “ol arapela manmeri i ken wok long painim mi Bikpela. Em olgeta manmeri bilong ol arapela lain, mi makim ol pinis bilong mi yet.” Em nau, i gat ol tok bilong Baibel i helpim dispela nupela samting i kamap long lain Kristen olsem Saimon Pita i stori long en​—olsem God i kisim ol man bilong ol narapela lain na ol i “kamap lain bilong em yet.”​—Ap. 15:​13-19.

17. Amos i tok profet long wanem ol gutpela samting na ol samting bilong i stap oltaim em Kingdom bilong God bai kamapim?

¹⁷ Jisas Krais em i Het bilong dispela lain Kristen, na Baibel i kolim em tu olsem “pikinini bilong Devit” na em bai “stap king olsem tumbuna bilong en Devit” i go inap oltaim oltaim. (Lu. 1:​32, 33; 3:31) Olsem na tok profet bilong Amos i makim truim bilong kontrak bilong kingdom em God i bin mekim wantaim Devit. Laspela tok bilong Amos i kamapim klia tru ol gutpela samting bai kamap long taim God i wokim gen ‘haus bilong Devit,’ na em i makim tu olsem Kingdom bilong God bai stap oltaim oltaim. Jehova i tok: “Bai mi larim ol manmeri bilong mi i sindaun gut long dispela graun mi bin givim ol, na bai i no gat wanpela man inap long rausim ol gen.” Em nau, taim Jehova i wokim gen ‘haus bilong Devit,’ ol blesing bilong i stap oltaim oltaim bai pulap long graun!​—Amo. 9:​13-15.

[Futnot]