Bilip Strong Long Stretpela Pasin Bilong God

“Mi laik autim dispela tok, bilong yu yet i ken harim, na bai yu ken bilip tru long Bikpela.”​—⁠SINDAUN 22:19.

1, 2. (a) Bilong wanem ol Witnes Bilong Jehova i bilip strong long Jehova? (Sindaun 22:​19) (b) Wanem samting i makim olsem sampela i mas strongim bilip bilong ol long Jehova?

OL KRISTEN tru i gat stretpela save long Jehova na long ol samting em i laik mekim. Long gutpela pasin sori, wanpela “wokboi i gat gutpela tingting” i save givim “kaikai [bilong spirit] long ol long taim bikman i makim.” (Matyu 24:45) Dispela save ol i kisim i helpim tru ol na dispela i mekim na i gat as bilong ol i ken bilip long God. Olsem na lain Witnes Bilong Jehova ol i bilip strong long Jehova na long stretpela pasin bilong em.

² Tasol ating sampela Witnes wan wan i mas strongim pasin bilong ol long bilip long Jehova. Sampela taim Sosaiti i kisim pas long ol man i no bilip tumas long ol tok Sosaiti i kamapim long ol buk bilong ol. Man i salim pas ating em i gat tupela tingting olsem, long wanem, i gat sampela tok Sosaiti i bin stretim tingting bilong ol long en, o i gat sampela tok i hevi tumas na i save bagarapim bel bilong dispela man.​—⁠Skelim wantaim Jon 6:​60, 61.

 3. Wanem samting inap painim tu ol gutpela wokboi bilong Jehova? Bilong wanem i olsem?

³ Samting Saveman 9:​11 i toktok long en i save painim ol gutpela wokboi tu bilong Jehova, olsem: “Mi bin lukim wanpela samting moa long dispela graun. Ol man i save ran strong tumas i no save winim resis. Ol strongpela soldia i no save winim pait. Ol man i gat gutpela tingting o bikpela save, ol i no save kisim planti mani samting. Na ol hapman bilong kain kain wok, ol i no save kisim ol bikpela wok. Taim nogut i save painim yumi olgeta.” Olsem wanem dispela tok inap makim ol wokboi bilong Jehova? Ating yumi save long sampela Kristen ol i bin ran strong strong, olsem ol i hariap tru, long bihainim ol tok bilong Baibel, na ol i olsem strongpela soldia long helpim tok i tru, na ol i kamapim gutpela tingting taim ol i bihainim ol lo bilong Baibel, na ol i givim bel long kisim stretpela save. Tasol “taim nogut i save painim yumi olgeta,” olsem na sampela i no inap mekim planti wok olsem bipo, long wanem, ol i bin kisim hap bagarap long ka samting o ol i wok long go lapun. Ating ol i laik save, bai ol i abrusim dai na go insait long nupela taim God bai kamapim o ol i mas i dai pastaim?

4, 5. I gat wanem as na ol Kristen i no ken lusim bilip bilong ol long stretpela pasin bilong Jehova?

⁴ Taim poroman marit bilong wanpela Kristen i dai, bel hevi bilong dispela i bikpela tru. Ating tupela wantaim i bin mekim wok bilong Jehova inap planti planti yia. Poroman marit i stap yet em i save olsem i dai i pinisim marit.a (1 Korin 7:​39) Olsem na bilong holim strong bilip bilong em long Jehova, em i mas bosim gut bel.​—⁠Skelim wantaim Mak 16:⁠8.

⁵ I gutpela sapos yumi tingim i dai bilong poroman marit, papa o mama, pikinini, o wanpela gutpela pren Kristen, olsem wanpela rot bilong yumi ken kamapim klia olsem yumi bilip strong long stretpela pasin bilong Jehova! Maski wanpela long famili o gutpela pren bilong yumi yet i dai, yumi ken bilip olsem Jehova bai mekim stretpela pasin. Yumi ken bilip olsem olgeta man i kisim laip oltaim​—⁠maski ol i abrusim bagarap na stap laip o ol i dai na kirap bek​—⁠bai ol i stap amamas. Man bilong raitim Song i tok God bai givim olgeta samting long ol man “inap long ol i stap gut. God i save bihainim stretpela pasin na em i save marimari long yumi long olgeta samting em i mekim. Wanem ol manmeri i save bel tru na i singaut long em, em i save stap klostu long ol. Wanem ol manmeri i save pret long em, em i save givim ol samting long ol. Na em i save harim krai bilong ol na kisim bek ol.”​—⁠Song 145:⁠16-​19.

Sapos Yumi Pilim Olsem Yumi Bin Kisim Hevi Nating

6, 7. (a) Sampela Witnes bipo ol i bin kisim hevi, olsem wanem na nau ol i gat narapela tingting? (b) Jehova i bin larim ol dispela hevi i kamap bipo, tasol bilong wanem yumi no ken ting Jehova i no bin mekim stretpela pasin?

⁶ Bipo, sampela Witnes i bin kisim hevi, long wanem, ol i no laik insait long wanpela wok ating nau maus bilong bel bilong ol i no gat tok moa long ol i mekim. Olsem: Ating sampela yia i go pinis ol i pilim olsem ol i no inap mekim sampela wok bilong ples em gavman i tok ol i mas mekim. Tasol nau ating wanpela brata i pilim olsem em inap mekim dispela wok na bel bilong em i no gat tok​—⁠em i save dispela wok i no kalapim ol lo Kristen i tok yumi no ken insait long ol pait samting bilong dispela graun.

⁷ Yu ting Jehova i bin mekim pasin i no stret taim em i larim dispela brata i kisim hevi long pasin bilong sakim samting ating nau em inap mekim na hevi i no kamap long dispela? Klostu olgeta brata em kain samting olsem i bin painim ol, ol i no ting olsem. Ol i amamas long rot i bin op long ol long kamapim long ples klia olsem ol i strong long stap gut long Jehova, em i nambawan King. (Skelim wantaim Jop 27:⁠5.) I no gat as na ol i ken bel hevi long ol i bin bihainim maus bilong bel na stap gut long Jehova, a? Ol i bin stap gut long ol lo Kristen long ol samting ol i ting i stret long ol i ken mekim o ol i no ken mekim, na ol i bin bihainim maus bilong bel bilong ol, olsem na ol inap tru long Jehova i stap pren wantaim ol. Tru tumas, sapos yumi gat gutpela tingting bai yumi abrusim ol samting em inap mekim na bel i gat tok o i mekim ol narapela i pundaun. Yumi ken tingim pasin aposel Pol i bihainim long dispela samting.​—⁠1 Korin 8:​12, 13; 10:​31-​33.

 8. Ol Kristen Juda em bipo ol i bin bihainim Lo, bilong wanem ol i no ken sutim tok long stretpela pasin bilong Jehova?

⁸ Bilong mekim ol samting Jehova i laikim, ol Juda i mas bihainim ol Tenpela Lo na ol 600 narapela lo tu. Bihain, taim kongrigesen Kristen i kamap, ol man i laik bihainim laik bilong Jehova ol i no gat wok moa long bihainim ol dispela lo, na ol Juda bilong skin tu i no gat wok long bihainim. Sampela lo olsem, em lo bilong katim skin, lo bilong Sabat, mekim ofa long ol animal, na ol lo bilong kaikai. (1 Korin 7:​19; 10:25; Kolosi 2:​16, 17; Hibru 10:​1, 11-​14) Ol Juda i kamap Kristen, ol aposel tu, ol i no gat wok moa long bihainim ol lo ol i mas bihainim taim ol i bin stap aninit long kontrak bilong Lo. Yu ting ol i kirap na toktok planti olsem pasin bilong God i no stret, long wanem, nau ol i no gat wok moa long mekim sampela samting bipo God i bin tokim ol long mekim? Nogat, ol i no toktok planti olsem. Ol i amamas long kisim sampela save moa long laik bilong Jehova.​—⁠Aposel 16:​4, 5.

 9. Wanem samting i bin painim sampela Witnes? Bilong wanem i no gat as na ol i no bel hevi long dispela?

⁹ Long nau, i gat sampela Witnes i bin strong long sampela samting ol i ting ol i mas mekim o ol i no ken mekim. Long dispela as ol i bin karim bikpela hevi, winim hevi ol narapela i karim. Bihain ol i kisim sampela save moa na dispela i helpim ol long kisim nupela tingting long dispela samting. Tasol i no gat as na ol i ken bel hevi long ol i bin bihainim maus bilong bel, maski sampela taim dispela i bin givim sampela hevi moa long ol. I gutpela tru ol i bin redi long karim hevi long pasin bilong stap gut long Jehova na mekim “olgeta wok bilong mekim gutnius bilong Jisas i kamap strong.” Jehova i amamas long dispela kain pasin bilong givim bel long em. (1 Korin 9:​23; Hibru 6:​10) Aposel Pita i givim tingting long yumi olsem: “Sapos yupela i mekim gutpela pasin na ol i paitim yupela, na yupela i karim dispela pen, orait God i laikim dispela pasin.”​—⁠1 Pita 2:⁠20.

Pasin Bilong Jona Inap Skulim Yumi

10, 11. Jona i mekim wanem na dispela i kamapim klia olsem em i no bilip tumas long Jehova (a) taim em i kisim wok bilong i go long Ninive? (b) taim God i no bagarapim ol Ninive?

¹⁰ Jehova i tokim Jona long go long Ninive, tasol Jona i no pilim pasin bilong Jehova long bilip olsem em inap tru long mekim dispela wok. Jona i surik long mekim dispela wok, olsem na wanpela samting i kamap na i pretim em nogut tru. Bihain em i kisim bek gutpela tingting; em i save em i bin mekim popaia, na em i kisim dispela wok bilong go long narapela kantri na toksave long ol Ninive olsem bagarap i laik painim ol. Orait nau wanpela samting i kamap em i no ting bai kamap: Ol Ninive i kirap na tanim bel, olsem na Jehova i no bagarapim ol long dispela taim.​—⁠Jona 1:​1–​3:⁠10.

¹¹ Wanem tingting bilong Jona long dispela? Em i kros nogut tru na em i beten na toktok planti long God. I olsem em i tok: ‘Em nau, ol samting i kamap olsem mi tingting pinis. Long dispela as tasol, pastaim mi no laik kam long Ninive. Planti hevi i bin painim mi​—⁠bikpela pis i bin daunim mi na pretim mi nogut tru na mi sem, na mi bin hatwok long toksave long ol Ninive olsem bagarap bai painim ol, na nau, dispela samting i kamap! Hatwok na ol hevi mi bin karim, em i lus nating tasol! Gutpela sapos mi dai!’​—⁠Jona 4:​1-3.

12. Stori bilong Jona inap skulim yumi long wanem samting?

¹² Olsem wanem? I gat as tru na Jona i ken toktok planti olsem? Yu ting Jehova i mekim pasin i no stret taim em i marimari long ol man bilong mekim rong na ol i bin tanim bel? Planti tausen manmeri bai abrusim bagarap, olsem na Jona i mas amamas! (Jona 4:​11) Tasol em i toktok planti na em i no daun long Jehova, na dispela i kamapim klia olsem em i no bilip tumas long stretpela pasin bilong Em. Jona i tingting tumas long em yet, na em i no tingim ol narapela. Yumi mas larim pasin bilong Jona i skulim yumi olsem: Tingting bilong yumi yet long ol samting i mas i stap nambatu. Yumi mas bilip olsem i stret yumi bihainim tok bilong Jehova na ol tok em i save givim long yumi long rot bilong oganaisesen bilong em. Yumi bilip olsem “man i aninit long God, bai i stap gut.”​—⁠Saveman 8:​12.

Nau Em Taim Bilong Strongim Bilip Bilong Yumi Long Jehova!

13. Yumi olgeta i ken mekim wanem bilong strongim bilip bilong yumi long Jehova?

¹³ Em i savepasin sapos yumi strongim bilip bilong yumi long Jehova. (Sindaun 3:​5-8) Tru, yumi mas beten askim Jehova long helpim yumi na bai yumi ken bilip strong long em, tasol i gat sampela samting moa yumi mas mekim. Bilong bilip strong long Jehova, yumi mas i gat stretpela save, olsem na long olgeta de yumi yet i mas stadi long Baibel, na kaunim Baibel na ol buk i kamapim as bilong ol tok bilong Baibel. Na yumi mas go oltaim long ol miting Kristen, na redim gut ol tok i laik kamap long miting na bekim sampela tok inap tru long yumi mekim. Yumi mas tokim ol narapela long ol tok i tru bilong Baibel, na long pasin isi kamapim ol tok long ol man i no wanbel long sampela bilip bilong yumi. Ol dispela samting tu bai strongim bilip bilong yumi long Jehova na long Tok bilong em. Long dispela rot bai yumi tingim em moa yet long olgeta wan wan de.

14. Olsem wanem na liklik taim lain bilong God i mas kamapim klia olsem ol i bilip strong long Jehova, winim olgeta taim bipo?

¹⁴ Klostu nau, wanpela bikpela hevi tru bai kamap, winim olgeta narapela hevi i bin kamap bipo, na em bai kamap wantu tasol. (Matyu 24:21) Taim dispela hevi i kamap, ol wokboi bilong God i mas kamapim klia olsem ol i bilip tru long stretpela pasin bilong Jehova na long oganaisesen bilong em i soim rot long ol. Long tok piksa bai i olsem ol i mekim dispela samting God i bin tokim ol long mekim, olsem: “Yupela ol manmeri bilong mi, yupela go insait long ol haus bilong yupela na pasim ol dua. Yupela i mas hait i stap liklik taim tasol inap belhat bilong Bikpela i pinis.” (Aisaia 26:20) Longtaim ol i go insait pinis na hait i stap insait long 85,000 kongrigesen long 232 kantri. Maski wanem samting moa yumi mas mekim bilong bihainim dispela tok long “go insait long ol haus bilong yupela,” yumi ken bilip tru olsem Jehova bai helpim yumi long mekim.

15. Long yia bilong 1998, wanem samting i bin kirapim yumi long bilip strong long Jehova? Bilong wanem i stret yumi mas bilip strong olsem?

¹⁵ Em i bikpela samting tru long yumi mas strongim bilip bilong yumi long nau. Sapos yumi no bilip long ol brata Kristen bilong yumi, na long oganaisesen bilong Jehova, na long Jehova yet, bai yumi no inap abrusim bagarap na stap laip. Olsem na planti taim insait long yia 1998 ol Witnes Bilong Jehova long olgeta hap i bin harim tok bilong yia-teks bilong ol olsem, “olgeta manmeri i singaut long nem bilong Jehova, bai em i kisim bek ol”! (Rom 10:​13, NW) Yumi mas holimpas bilip bilong yumi long dispela samting. Sapos yumi save olsem yumi no bilip tumas long ol, orait yumi mas kirap nau, long dispela de stret, long mekim wok long strongim dispela bilip.

Jehova Bai Mekim Stretpela Kot

16. Olsem wanem long pasin bilong bilip long Jehova sapos yumi no wok long strongim? Yumi ken mekim wanem na bai dispela samting i no ken kamap?

¹⁶ Hibru 3:​14 i toksave long ol Kristen God i makim, olsem: “Taim yumi stat long bilip long God, yumi bilip strong tru. Na yumi mas mekim bilip bilong yumi i stap strong tru i go inap long taim bilong yumi dai. Sapos yumi mekim olsem, orait yumi stap ol poroman tru bilong Krais.” Dispela tok i go tu long ol Kristen i wet long kisim laip oltaim long graun. Bilip yumi kisim pastaim em inap lus sapos yumi no wok long strongim. Olsem na i bikpela samting long yumi mas wok yet long kisim stretpela save na bai yumi ken strongim dispela samting i olsem as na yumi bilip!

17. Olsem wanem yumi ken bilip tru olsem Jisas bai mekim stretpela pasin taim em i mekim wok bilong skelim husat inap long abrusim bagarap?

¹⁷ Liklik taim Krais bai skelim olgeta lain man bambai em i ken “tilim ol na putim ol long tupela lain, olsem wasman i save tilim ol sipsip i go long hap na ol meme i go long hap.” (Matyu 25:​31-​33) Yumi ken bilip olsem Krais bai mekim stretpela pasin taim em i mekim wok bilong skelim husat inap long abrusim bagarap na kisim laip. Jehova i bin givim gutpela tingting na save long em na ol narapela pasin em i mas i gat bambai em i ken “skelim pasin bilong olgeta manmeri bilong graun [long stretpela pasin].” (Aposel 17:​30, 31) Yumi mas kisim wankain bilip olsem bilong Abraham, em i tok: “Yu [Jehova] laik kilim ol gutpela man wantaim ol man nogut. Em i no gutpela pasin. Yu no ken mekim wankain pasin long ol gutpela man na long ol man nogut. Jas bilong olgeta graun, em i mas bihainim stretpela pasin.”​—⁠Stat 18:⁠25.

18. Bilong wanem yumi no ken tingting planti long ol samting yumi no klia tumas long en long nau?

¹⁸ Sapos yumi bilip strong long stretpela pasin bilong Jehova, yumi no ken tingting planti long kisim bekim bilong ol askim olsem: ‘God bai skelim ol bebi na ol liklik pikinini olsem wanem? Ating Armagedon bai kam na i gat planti manmeri yumi no autim gutnius yet long ol? Olsem wanem long ol man i gat sik longlong? Olsem wanem long . . . ?’ Tru, long dispela taim nau yumi no save God bai skelim ol dispela man olsem wanem. Tasol em bai mekim long pasin i stret na long pasin marimari. Yumi no ken kisim tupela tingting long dispela samting. Ating bai yumi amamas tru long lukim em i stretim ol dispela samting long wanpela pasin yumi no bin tingim bipo.​—⁠Skelim Jop 42:3; Song 78:​11-​16; 136:​4-9; Matyu 15:31; Luk 2:​47.

19, 20. (a) Bilong wanem i no gat rong long kamapim ol gutpela askim? (b) Jehova bai kamapim bekim bilong ol dispela askim long wanem taim?

¹⁹ Oganaisesen bilong Jehova i no laik pasim ol man i gat gutpela bel long kamapim ol askim, olsem sampela birua bilong yumi i tok. (1 Pita 1:​10-​12) Tasol Baibel i tok yumi mas abrusim ol askim i kranki na ol askim nabaut long ol samting Baibel i no mekim sampela tok long en. (Taitus 3:⁠9) Pasin bilong kamapim ol gutpela askim na lukim Baibel na ol buk Kristen bambai yumi ken save Baibel i tok wanem long ol dispela askim, dispela inap helpim yumi long kisim sampela stretpela save moa na bilip strong moa long Jehova. Oganaisesen bilong Jehova i save bihainim pasin bilong Jisas. Em i no mekim toktok long sampela askim i no taim yet bilong bekim ol dispela askim. Em i tok: “Mi gat planti tok moa mi laik givim yupela, tasol yupela i no inap kisim nau.” (Jon 16:12) Na tu, em i tokaut olsem i gat sampela samting em yet i no save long en long dispela taim bipo.​—⁠Matyu 24:⁠36.

²⁰ I gat planti samting i stap yet em Jehova bai tokaut long en. Olsem na gutpela sapos yumi wet long em na bilip olsem em bai tokaut long ol samting em i laik mekim long taim stret bilong en. Yumi ken bilip strong olsem, taim Jehova i kamapim klia ol samting long taim em yet i makim, bai yumi amamas long kisim sampela save moa long ol gutpela pasin bilong em. Tru tumas, bai yumi kisim gutpela pe sapos yumi bilip tru long Jehova na long dispela oganaisesen em i save mekim wok long en. Sindaun 14:26 i tokim yumi: “Sapos man i aninit long Bikpela, em bai i sanap strong na i no ken pret long wanpela samting, na ol pikinini bilong en tu bai i stap gut.”

[Futnot]

Yu Ting Olsem Wanem?

◻ Bilong wanem i no gutpela sapos yumi larim ol samting yumi tingting planti long en i mekim na yumi no bilip tumas long Jehova?

◻ Ol samting i bin painim Jona inap skulim yumi long wanem samting?

◻ Bilong wanem i bikpela samting long yumi mas stadi long Baibel na go long ol miting?

[Piksa long pes 16]

Maski wanpela long famili o gutpela pren bilong yumi i dai, yumi ken bilip olsem Jehova bai mekim stretpela pasin

[Ol Piksa long pes 18]

Olsem wanem? Yu bilip strong long Jehova?