Lain Bilong Jehova i Litimapim Nem Bilong Em Long Olgeta Hap
“Long dispela taim bai mi givim wanpela gutpela tok ples long ol man, bambai olgeta i ken singaut long nem bilong Jehova na wok gut wantaim long mekim wok bilong em.”—SEFANAIA 3:9, NW.
1. I gat wanem as na ol strongpela tok bilong kot i kamap tru long Juda na sampela kantri moa?
MAN! Em ol strongpela tok bilong kot Jehova i kirapim Sefanaia long givim long ol man! Ol dispela strongpela tok bilong kot i go long Juda na nambawan biktaun bilong en, Jerusalem, long wanem, ol hetman na ol manmeri bilong en i no bihainim laik bilong Jehova. Belhat bilong Jehova bai painim tu ol kantri i stap klostu, olsem Filistia, Moap, na Amon. Bilong wanem? Long wanem, inap planti handet yia ol i birua long lain bilong Jehova na mekim nogut tru long ol. Long dispela as yet, strongpela gavman bilong Asiria bai bagarap na i no ken kamap gen long bihain.
2. Ating tok bilong Sefanaia 3:8 i go long husat?
2 Tasol long dispela taim bipo i gat sampela man long Juda ol i gat stretpela bel. Ol i amamas long wetim taim bilong God long givim strafe bilong kot long ol man nogut, na ating wanpela tok bilong Sefanaia i go long ol dispela man, em i tok: “Orait Bikpela i tokim ol manmeri i bihainim em olsem, ‘Yupela i no ken tingting planti. Yupela i ken wet tasol long dispela De mi bai kotim ol manmeri bilong olgeta kantri. Long wanem, mi kros long ol na mi pasim tingting pinis long mekim olgeta lain i kam bung na bai mi mekim save long ol. Na belhat bilong mi bai i kamap olsem bikpela paia na bagarapim olgeta hap bilong graun.’ ”—Sefanaia 3:8.
“Wanpela Gutpela Tok Ples” Bilong Husat?
3. Jehova i kirapim Sefanaia long givim wanem tok long ol man long gutpela samting ol inap wet long en?
3 Sefanaia i autim ol dispela tok bilong Jehova long bagarap bai painim ol man nogut. Tasol Jehova i kirapim em long autim gutpela tok tu long ol gutpela samting ol man inap wet long en—em wanpela tok bai mekim gut bel bilong ol man i stap gut long Jehova. Long Sefanaia 3:9 (NW ), God Jehova i tokaut olsem: “Long dispela taim bai mi givim wanpela gutpela tok ples long ol man, bambai olgeta i ken singaut long nem bilong Jehova na wok gut wantaim long mekim wok bilong em.”
4, 5. (a) Wanem samting bai painim ol man i mekim pasin i no stret? (b) Dispela bai helpim husat? Bilong wanem dispela bai helpim ol?
4 I gat sampela man em God i no ken givim dispela gutpela tok ples long ol. Dispela tok profet i tok long ol olsem: “Bai mi rausim olgeta man bilong yupela i save hambak na bikhet.” (Sefanaia 3:11) Olsem na ol man i save hambak na sakim ol lo bilong God olsem em i samting nating na ol i mekim ol pasin i no stret, God bai rausim ol. Orait taim God i mekim olsem, dispela bai helpim husat? Sefanaia 3:12, 13 i tok: “Ol manmeri bai mi [Jehova] larim ol i stap long Jerusalem, ol bai i no gat planti samting na bai ol i daunim ol yet. Na bai ol i kam long mi na askim mi long helpim ol [olsem ol bai painim ples hait long nem bilong Jehova]. Ol liklik lain Israel i stap yet, ol bai i no inap mekim pasin nogut long ol arapela man, na ol bai i no inap mekim tok giaman na trikim ol wantok. Bai ol i gat gutpela sindaun tasol, na i no gat man inap mekim ol i pret.”
5 Wanpela liklik hap lain long Juda em ol i stap gut long Jehova, ol i bilong kisim gutpela samting. Bilong wanem? Long wanem, ol i bihainim tok olsem: “Yupela ol manmeri i no save bikhet na sakim tok bilong Bikpela, yupela i mas i kam long em. Yupela i mas daunim yupela yet na mekim pasin i stret. Sapos yupela i mekim olsem, orait taim Bikpela i belhat na bekim pe nogut long ol manmeri, yupela bai i no inap bagarap.”—Sefanaia 2:3.
6. Wanem samting i bin kamap long namba wan truim bilong tok profet bilong Sefanaia?
6 Long namba wan truim bilong tok profet bilong Sefanaia, God i givim strafe long ol Juda i no bin stap gut long em—em i larim nambawan strongpela gavman bilong graun, em Babilon, i daunim Juda na kisim lain bilong en i go kalabus long yia 607 B.C.E. Sampela, olsem profet Jeremaia na sampela moa, ol i no i go kalabus wantaim ol. Na sampela, taim ol i go kalabus ol i stap gut yet long Jehova. Orait long yia 539 B.C.E., King Sairus i bringim ol ami bilong Midia na Persia i kam na daunim Babilon. Tupela yia bihain, Sairus i putim wanpela lo i orait long liklik hap lain Juda ol i ken i go bek long kantri bilong ol. Bihain ol i wokim gen tempel long Jerusalem, na i gat lain pris gen bilong skulim ol manmeri long Lo. (Malakai 2:7) Olsem na Jehova i mekim gut long dispela liklik lain ol i kam bek long ples na ol i gat gutpela sindaun taim ol i stap gut long Jehova.
7, 8. Tok profet bilong Sefanaia 3:14-17 i toktok long husat? I gat wanem as na yu bekim olsem?
7 Sefanaia i tok profet long ol man em ol bai insait long dispela gutpela samting bai kamap. Em i tok: “Yupela Israel, yupela singaut na mekim song bilong amamas. Yupela Jerusalem, yupela belgut na amamas moa yet. Bikpela i bin tok long em bai i mekim save long yupela, tasol nau em i lusim dispela tok. Em i bin rausim olgeta birua bilong yupela. Bikpela, em i king bilong Israel, na em i stap wantaim yupela. Olsem na yupela i no ken pret long wanpela samting. Bihain wanpela De bai i kamap na long dispela De ol bai i tokim ol Jerusalem olsem, ‘Yupela manmeri bilong Jerusalem, yupela i no ken pret long wanpela samting. Na yupela i no ken seksek nating. God, Bikpela bilong yupela i stap wantaim yupela. Strong bilong en i helpim yupela na yupela i winim pait. Bikpela bai i amamas long yupela na mekim song olsem ol manmeri i amamas long bikpela de bilong lotu. Em i laikim yupela tumas, na em i no mekim wanpela tok.’ ”—Sefanaia 3:14-17.
8 Dispela tok profet i toktok long liklik hap lain i lusim kalabus long Babilon na ol i go bek long graun bilong ol tumbuna bilong ol. Sefanaia 3:18-20 i kamapim klia dispela samting, em i tok: “Mi [Jehova] bin mekim save long yupela Jerusalem, na yupela i no inap bihainim pasin bilong ol bikpela de bilong lotu. Yupela i no inap tru long lotu long mi, na dispela i bin mekim yupela i sem moa yet. Tasol nau bai mi bringim yupela i kam bek. Long dispela De bai mi mekim save long ol dispela birua i bin daunim yupela na mekim nogut long yupela. Yupela Israel i stap nabaut long ol arapela kantri olsem ol lain sipsip i bin go nabaut na lek bilong ol i bagarap. Tasol bai mi bringim yupela i kam bek long as ples bilong yupela. Nau yupela i sem tru long ai bilong ol arapela lain, tasol bai mi pinisim dispela sem na givim biknem long yupela. Na ol manmeri bilong olgeta hap bilong graun bai i litimapim nem bilong yupela. Long dispela De bai mi kisim yupela long olgeta hap yupela i stap long en, na bai mi bringim yupela i kam bek long as ples. Na bai mi givim biknem long yupela na bai olgeta lain manmeri bilong graun i litimapim nem bilong yupela. Na long dispela taim bai mi mekim wok bilong yupela i kamap gutpela tru na bai yupela i gat gutpela sindaun. Mi Bikpela, mi tok pinis.”
9. Olsem wanem Jehova i kisim biknem long ol samting em i mekim long Juda?
9 Ol lain i stap nabaut klostu long Israel na ol i birua long lain bilong God, ating ol i kirap nogut tru long dispela samting! Strongpela gavman bilong Babilon i bin kisim lain Juda i go kalabus, na i olsem ol i no inap tru long kam bek, na graun bilong ol i stap olsem bus nating. Tasol strong bilong God i mekim, na inap 70 yia bihain ol i kam bek long kantri bilong ol, tasol bagarap bai painim ol lain i birua long ol. Man! Jehova i kisim biknem tru taim em i bringim dispela liklik hap lain i stap gut long em ol i kam bek long as ples bilong ol! Em i ‘givim biknem long ol na olgeta lain bilong graun i litimapim nem bilong ol.’ Taim ol i sindaun gen long ples bilong ol, dispela i litimapim nem bilong Jehova na ol man i holim nem bilong em!
Lotu Bilong Jehova i Kisim Biknem
10, 11. Bikpela truim bilong tok profet bilong Sefanaia long God bai kisim bek lain bilong em, dispela i mas kamap long wanem taim? Yumi save olsem wanem?
10 Wankain samting olsem i kamap long taim Jisas Krais i stap long graun na em i bungim wanpela liklik hap lain bilong Israel i kam long lotu tru bilong God. Dispela i olsem piksa bilong samting bai kamap bihain, long wanem, bikpela truim bilong en i bilong bihain. Maika i bin tok profet olsem: “Wanpela taim bai i kamap bihain na dispela maunten, haus bilong Bikpela i sanap long en, bai i stap antap tru na i winim olgeta arapela maunten. Na planti lain manmeri bai i kam bung long en.”—Maika 4:1.
11 Dispela bai kamap long wanem taim? Olsem dispela tok profet i tok, em bai kamap long ‘wanpela taim bihain’—olsem nau long “taim bilong las de.” (2 Timoti 3:1) Em bai kamap paslain long pinis bilong dispela pasin nogut bilong graun, taim ol lain bilong graun i lotu yet long ol god giaman. Maika 4:5 (NW ) i tok: “Olgeta lain manmeri bai wokabaut long nem bilong god bilong ol yet.” Na olsem wanem long ol man i lotu tru long God? Tok profet bilong Maika i tok: “Tasol mipela bai wokabaut long nem bilong Jehova, em God bilong mipela, i go inap long taim bihain bihain, inap oltaim oltaim.”
12. Olsem wanem lotu tru bilong Jehova i stap antap tru nau long dispela taim bilong las de?
12 Olsem na nau long taim bilong las de, “dispela maunten, haus bilong Bikpela i sanap long en, [em] i stap antap tru na i winim olgeta arapela maunten.” Lotu tru bilong Jehova i kamap strong gen na i stap antap tru na i winim olgeta narapela kain lotu. Na olsem Maika i tok profet long en, “planti lain manmeri bai i kam bung long en.” Ol manmeri i bihainim lotu tru bilong God, ol bai “wokabaut long nem bilong Jehova, em God bilong [ol], i go inap long taim bihain bihain, inap oltaim oltaim.”
13, 14. Dispela “taim bai i kamap bihain” em i bin kirap long wanem taim? Kirap long dispela taim, lotu tru bilong Jehova i wok long mekim wanem?
13 Ol samting i kamap na i truim tok profet bilong Baibel i kamapim klia olsem nau yumi stap long dispela “taim bai i kamap bihain”—em taim bilong las de—i bin kirap long 1914. (Mak 13:4-10) Ol samting i bin kamap i soim olsem, long dispela taim Jehova i kirap long bungim liklik hap lain bilong ol manmeri em i bin makim bambai ol i ken lotu tru long em—em dispela lain ol i wet long kisim laip long heven. Bihain long dispela, wok i kirap bilong bungim wanpela bikpela lain, olsem “planti manmeri tru . . . bilong olgeta lain man na bilong olgeta kantri na bilong olgeta kain skin na bilong olgeta tok ples,” em ol i wet long kisim laip i stap oltaim long graun.—KTH 7:9.
14 Kirap long taim bilong Namba Wan Pait na i kam inap nau, Jehova i stiaim lotu bilong em ol manmeri i holim nem bilong em ol i mekim, na dispela lotu i kamap strong na i go bikpela tru. Bihain long Namba Wan Pait, ol manmeri i lotuim Jehova ol i liklik lain tasol inap sampela tausen, tasol nau ol inap olsem 6 milion, na ol i save bung long 91,000 kongrigesen long 235 kantri. Long olgeta wan wan yia, ol dispela lain bilong autim tok bilong Kingdom i save lusim wan bilion aua samting long litimapim nem bilong God namel long ol manmeri. Samting i stap ples klia tru i olsem: Ol dispela Witnes Bilong Jehova yet i truim tok profet bilong Jisas, em i tok: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.”—Matyu 24:14.
15. Long nau truim bilong Sefanaia 2:3 i wok long kamap olsem wanem?
15 Sefanaia 3:17 i tok: “God, Bikpela bilong yupela i stap wantaim yupela. Strong bilong en i helpim yupela na yupela i winim pait.” Nau long taim bilong las de, ol wokman bilong Jehova i stap gutpela tru long ol samting bilong spirit, na as bilong en, em Jehova ‘i stap wantaim ol’ olsem nambawan strongpela God bilong ol. Taim Jehova i bin bringim ol Juda i kam bek long graun bilong ol long yia 537 B.C.E., ol i bin stap gutpela olsem, na i wankain tu long nau. Olsem na bikpela truim bilong Sefanaia 2:3 i kamap long taim bilong yumi na dispela i kamap klia long tok bilong en, i tok: “Yupela ol manmeri i no save bikhet na sakim tok bilong Bikpela, yupela i mas i kam long em.” Long yia 537 B.C.E., dispela “ol manmeri” i makim olgeta wan wan bilong dispela liklik hap lain Juda i bin lusim kalabus na i go bek long as ples bilong ol. Long nau dispela tok i makim ol man i gat pasin daun, em ol i bilong olgeta lain bilong graun na ol i laikim dispela tok em lain bilong Jehova i autim long olgeta hap, na ol i wok long kam long “dispela maunten, haus bilong Bikpela i sanap long en.”
Lotu Tru Bilong God i Kamap Strong
16. Taim ol birua bilong yumi i lukim ol wokman bilong Jehova long nau i stap gutpela tru, ating ol i gat wanem tingting long dispela?
16 Bihain long yia 537 B.C.E., planti lain i stap nabaut klostu long Juda ol i kirap nogut tru taim ol i lukim lain bilong God i kam bek long kantri bilong ol na kirapim gen lotu tru bilong God. Tasol ol i no bikpela lain tumas. Orait yumi ken tingim sampela lain long nau—na ol birua bilong lain bilong God tu—ating ol i tok wanem long taim ol i lukim lain wokman bilong Jehova i go bikpela moa yet long taim bilong yumi na ol i stap gutpela tru long ol samting bilong spirit? Yumi save, sampela bilong ol dispela birua ol i gat wankain tingting olsem ol Farisi taim ol i lukim planti manmeri ol i kam bung long Jisas. Ol i tok: “Lukim. . . . Olgeta manmeri i go bihainim em.”—Jon 12:19.
17. Wanpela man bilong raitim buk i tok wanem long ol Witnes Bilong Jehova? Lain bilong ol i go bikpela inap olsem wanem?
17 Long buk These Also Believe, Profesa Charles S. Braden i tok: “Ol Witnes Bilong Jehova i bin inapim olgeta hap bilong graun long wok bilong ol long autim tok. Yumi ken tok tru olsem, i no gat narapela lain bilong lotu long dispela graun i strong tru long autim gutnius bilong Kingdom long olgeta hap olsem ol Witnes Bilong Jehova. Yumi ken ting olsem dispela lain bai wok long kamap strong moa yet.” Na em i tok stret tru! Taim em i raitim dispela tok inap olsem 50 yia i go pinis, i gat olsem 300,000 Witnes tasol i autim tok. Orait em bai tok wanem long wok bilong yumi long nau, em lain bilong autim tok i go bikpela moa yet, inap olsem 6 milion?
18. Dispela gutpela tok ples em i wanem samting? God i bin givim long husat?
18 Long maus bilong profet bilong em, God i tok promis olsem: “Long dispela taim bai mi givim wanpela gutpela tok ples long ol man, bambai olgeta i ken singaut long nem bilong Jehova na wok gut wantaim long mekim wok bilong em.” (Sefanaia 3:9, NW ) Nau long taim bilong las de, ol Witnes Bilong Jehova yet i save singaut long nem bilong Jehova na ol i wanbel long mekim wok bilong em, na ol i save pas gut wantaim long pasin bilong laikim tru ol narapela—yes, ol i “wok gut wantaim.” Jehova i bin givim dispela gutpela tok ples long dispela lain yet. Bilong mekim dispela tok ples, yumi mas i gat stretpela save long God na long ol samting em i laik mekim. Jehova tasol i save givim dispela stretpela save long man long rot bilong spirit holi bilong em. (1 Korin 2:10) Jehova i bin givim spirit bilong em long husat? Em i givim long “ol manmeri i bihainim tok bilong em.” (Aposel 5:32) Ol Witnes Bilong Jehova tasol i gat laik long bihainim tok bilong God long olgeta samting. Long dispela as ol i kisim spirit holi bilong God na ol inap mekim dispela gutpela tok ples, em tok i tru bilong Jehova na ol gutpela samting em i laik mekim. Ol i save mekim dispela gutpela tok ples bilong litimapim nem bilong Jehova long olgeta hap, na dispela wok i go bikpela moa yet.
19. Bilong mekim dispela tok ples, yumi mas mekim wanem?
19 Bilong mekim dispela gutpela tok ples, yumi mas bilip long tok i tru na skulim ol man long en, na tu, pasin na wokabaut bilong yumi i mas stret wantaim ol lo bilong God. Ol Kristen God i bin makim ol i bin go pas long kam long Jehova na mekim dispela gutpela tok ples. Man! Tingim bikpela wok tru ol i bin mekim! Long nau lain bilong ol i go liklik tru inap olsem 8,700, tasol i gat olsem 6 milion manmeri moa ol i bihainim pasin bilong dispela lain long bilip na ol i kam long Jehova na mekim dispela gutpela tok ples. Em dispela bikpela lain manmeri bilong olgeta kantri i wok long go bikpela moa yet, na ol i bilip long ofa bilong Jisas long baim bek ol man na ol i mekim wok bilong God insait long banis bilong tempel spirit bilong em hia long graun, na ol bai abrusim bagarap long taim bilong “bikpela hevi” liklik taim bai painim ol lain nogut bilong dispela graun.—KTH 7:9, 14, 15.
20. Lain God i bin makim na ol i stap gut long em, na ol manmeri bilong bikpela lain, ol inap wetim wanem gutpela samting?
20 God bai bringim dispela bikpela lain manmeri i go insait long nupela taim i gat stretpela pasin tasol long en. (2 Pita 3:13) Jisas Krais na lain 144,000 God i bin makim, em ol i kirap bek na i go antap long heven bilong mekim wok olsem king na pris wantaim em, ol bai stap olsem nupela gavman bilong bosim graun. (Rom 8:16, 17; KTH 7:4; 20:6) Ol lain i abrusim bagarap long taim bilong bikpela hevi tru ol bai mekim wok bilong kamapim Paradais long graun na ol bai wok yet long mekim dispela gutpela tok ples God i bin givim long ol. Wanpela tok i makim stret ol, em i tok: “Bai mi yet [Jehova] mi skulim ol pikinini bilong yu, na bai ol i gat gutpela sindaun tru. Long stretpela pasin bilong mi bai mi mekim yu i kamap strong.”—Aisaia 54:13, 14.
Bikpela Wok Tru Bilong Skulim Ol Man
21, 22. (a) Olsem Aposel 24:15 i makim, husat ol i mas lain long mekim dispela gutpela tok ples? (b) Wanem bikpela wok tru bilong skulim ol man em bai kamap taim Kingdom i bosim graun?
21 I gat wanpela bikpela lain tru em ol bai i gat rot long lain long mekim dispela gutpela tok ples long nupela taim. Aposel 24:15 i stori long dispela lain na i tok: “God bai i kirapim bek ol man i dai pinis, em ol stretpela man na ol man nogut wantaim.” Long bipo, i gat planti milion milion manmeri ol i bin i stap na ol i dai pinis na ol i no bin kisim stretpela save long Jehova. Long taim na pasin i stret long mekim, em bai kirapim bek ol, na ol i mas lain long mekim dispela gutpela tok ples.
22 Bai yumi amamas tru long insait long dispela bikpela wok bilong skulim ol dispela lain! Em i wanpela bikpela wok tru bilong skulim ol man, winim olgeta narapela wok olsem i bin kamap long graun, na ol bai mekim aninit long gutpela wok king bilong Krais Jisas, em i kisim pinis strong bilong bosim Kingdom. Olsem na bihain bihain, ol man bai lukim truim bilong tok i stap long Aisaia 11:9, i tok: “Olgeta samting long graun bai i save tru long Bikpela. Dispela save bai inapim olgeta hap graun olsem solwara i inapim mak bilong en olgeta.”
23. I gat wanem as na yumi ken amamas tru long yumi stap lain manmeri bilong Jehova?
23 Nau long dispela taim bilong las de, em i gutpela samting tru long yumi ken mekim ol samting bilong redi long dispela gutpela taim tru bai kamap, taim olgeta man bilong graun i save long Jehova! Na long nau yumi ken amamas tru long yumi stap lain manmeri bilong God, em truim bilong tok profet i stap long Sefanaia 3:20 i wok long painim ol! Long dispela ves Jehova i tok: ‘Bai mi givim biknem long yupela na bai mi litimapim nem bilong yupela namel long olgeta lain manmeri bilong graun.’
Bai Yu Bekim Olsem Wanem?
• Tok profet bilong Sefanaia long lain bilong God bai go bek long as ples na kamapim gen lotu tru bilong em, dispela i gat wanem ol truim bilong en?
• Lotu tru bilong Jehova i bin kamap strong olsem wanem nau long dispela taim bilong las de?
• Wanem bikpela wok bilong skulim ol man bai kamap long nupela taim?
[Piksa long pes 25]
Lain bilong Jehova i go bek long as ples bilong ol bilong kamapim gen lotu tru bilong em. Dispela i makim wanem samting long nau?
[Ol Piksa long pes 26]
Long rot bilong dispela “gutpela tok ples,” ol Witnes Bilong Jehova i save givim gutpela tok bilong Baibel long ol man i save mekim gut bel bilong ol