Yu Ting God i Laik Bai Yumi Mas i Stap Tambu Long Kaikai?
LO BILONG God ol Israel i bin kisim long han bilong Moses i makim wanpela de tasol long yia bilong ol i mas i stap tambu long kaikai—long Bikpela De Bilong God i Tekewe Sin Bilong Ol Manmeri. Lo i tok, long dispela de ol Israel i mas i stap “tambu long kaikai.” (Wok Pris 16:29-31; 23:27; Song 35:13) Tasol ol i no mekim nating dispela pasin bilong i stap tambu long kaikai, nogat. Taim ol Israel i bihainim ol pasin bilong Bikpela De Bilong God i Tekewe Sin Bilong Ol Manmeri, dispela i kirapim ol long tingim sin bilong ol na i mas i gat wanpela man bilong baim bek ol. Na tu, ol i stap tambu long kaikai long dispela de bambai ol i ken kamapim long God olsem ol i bel hevi long ol rong bilong ol na ol i tanim bel pinis.
Tru, aninit long Lo Bilong Moses i gat dispela wanpela de tasol na ol Israel i mas i stap tambu long kaikai, tasol long sampela narapela de tu ol i bin mekim olsem. (Kisim Bek 34:28; 1 Samuel 7:6; 2 Stori 20:3; Esra 8:21; Esta 4:3, 16) Sampela taim, long laik bilong ol yet, ol i stap tambu long kaikai bilong kamapim klia olsem ol i tanim bel pinis. Jehova i kirapim ol Juda i mekim rong, olsem: “Yupela i mas tanim bel tru na kam bek long mi. Na yupela i mas tambu long kaikai na yupela i mas bel sori na krai na kam bek long mi.” Tasol dispela i no samting ol i mekim long skin tasol na bai ol narapela i ken lukim, nogat; long wanem, God i tok moa olsem: “Maski long brukim nating ol klos bilong yupela, bilong makim sori bilong yupela. Long bel bilong yupela yet yupela i mas sori tru long ol sin bilong yupela.”—Joel 2:12-15.
Bihain, planti Israel i kirap mekim nating dispela pasin bilong i stap tambu long kaikai; ol i mekim bambai ol narapela i ken lukim. Jehova i no laikim tru dispela kain pasin giaman olsem na em i askim ol: “Ating yupela i ting mi save laikim ol pasin yupela i mekim long ol de yupela i makim bilong tambu long kaikai, a? Yupela i save putim ol klos bilong sori na yupela i save putim het bilong yupela i go daun long graun olsem pitpit win i sakim, na yupela i save slip antap long sit bilong paia . . . Na yupela i ting ol dispela kain pasin bai i mekim mi i belgut long yupela, a? Nogat tru.” (Aisaia 58:5) Jehova i no laik ol i hambak long ai bilong ol narapela na stap tambu long kaikai; em i laik bai dispela bikhetlain i mekim pasin i soim olsem ol i tanim bel pinis.
I gat sampela de ol Juda i bin makim bilong i stap tambu long kaikai em Jehova i no orait long en. Olsem: Bipo i gat 4-pela taim long yia na ol Juda i stap tambu long kaikai bilong makim ol i krai sori long ol narapela lain i bin kam banisim na bagarapim Jerusalem long yia 607 B.C.E. (2 King 25:1-4, 8, 9, 22-26; Sekaraia 8:19) Taim ol Juda i lusim kalabus pinis long Babilon, Jehova i mekim tok long maus bilong profet Sekaraia, olsem: “Tru, inap long 70 yia, . . . yupela i bin tambu long kaikai na krai sori. Tasol yupela i no bin mekim dispela pasin bilong litimapim nem bilong mi. Nogat tru.” God i no orait long ol dispela de ol Juda i bin makim bilong i stap tambu long kaikai, long wanem, ol i stap tambu long kaikai na krai sori long strafe Jehova yet i bin givim long ol. Ol i tingim ol samting nogut i bin painim ol na ol i stap tambu long kaikai—ol i no tingim rong bilong ol i as bilong ol samting nogut i bin painim ol. Taim ol i go bek long ples bilong ol, em taim bilong ol i mas amamas na ol i no ken krai sori moa long ol samting nogut i bin painim ol bipo.—Sekaraia 7:5.
Olsem Wanem Long Ol Kristen?
Tru, Jisas i no bin tokim ol disaipel bilong em long ol i mas i stap tambu long kaikai; tasol long Bikpela De Bilong God i Tekewe Sin Bilong Ol Manmeri, Jisas na ol disaipel bilong em ol i stap tambu long kaikai, long wanem, ol i stap aninit long Lo Bilong Moses. Na tu, sampela disaipel long laik bilong ol yet ol i stap tambu long kaikai long ol narapela taim, long wanem, Jisas i no bin tokim ol long ol i mas klia olgeta long dispela pasin. (Aposel 13:2, 3; 14:23) Tasol taim ol i stap tambu long kaikai, ol i no ken ‘mekim pes nogut bambai ol manmeri i ken save ol i tambu long kaikai,’ nogat. (Matyu 6:16) Kain pasin olsem inap mekim na ol manmeri bai ting ol i gutpela man. Tasol God i no amamas long man i mekim kain pasin olsem bambai ol narapela i ken lukim na litimapim nem bilong ol, nogat.—Matyu 6:17, 18.
Jisas i tok ol disaipel bilong em bai i stap tambu long kaikai long taim em i dai. Tasol em i no kamapim dispela olsem wanpela pasin bilong lotu ol man i mas bihainim. Tok bilong em i makim olsem ol bai stap tambu long kaikai bilong kamapim bel hevi bilong ol. Taim em i kirap bek pinis, em bai stap gen wantaim ol, na i no gat as moa na ol i mas i stap tambu long kaikai.—Luk 5:34, 35.
Lo Bilong Moses i pinis taim “Krais i givim em yet long God olsem ofa, bilong karim hevi bilong ol sin bilong planti manmeri.” (Hibru 9:24-28) Taim Lo i pinis, lo bilong i stap tambu long kaikai long Bikpela De Bilong God i Tekewe Sin Bilong Ol Manmeri, em tu i pinis. Olsem na dispela wanpela de tasol em Baibel i makim bilong i stap tambu long kaikai, i tekewe.
Olsem Wanem Long Len?
Orait, i gat wanem as na ol lotu i gat nem Kristen i bihainim pasin bilong i stap tambu long kaikai long taim bilong Len? Misin Katolik na ol misin Talatala ol i bihainim pasin bilong Len, tasol pasin bilong ol long mekim olsem i no wankain. Sampela i save kaikai wanpela taim tasol long olgeta wan wan de i go inap 40 de olgeta—dispela hap taim i kamap paslain long taim bilong Ista. Na sampela, long Astrinde na Gut Fraide tasol, ol i no kaikai wanpela samting. Na long taim bilong Len, sampela ol i no save kaikai abus o pis o kiau o ol samting ol man i bin wokim long susu.
Ol man i tok, taim Jisas i baptais pinis em i stap tambu long kaikai inap 40 de na dispela i as bilong ol samting bilong Len. Tasol taim Jisas i mekim olsem, yu ting em i kamapim wanpela pasin bilong lotu ol man i mas bihainim long olgeta yia? Nogat tru. Yumi ken save olsem, long wanem, Baibel i no stori long ol Kristen bilong pastaim i bihainim kain pasin olsem. Namba wan taim ol man i mekim ol samting bilong Len, em long yia 350 samting bihain long Krais. Olsem planti narapela bilip bilong ol misin, ol i kisim dispela pasin tu long ol haiden.
Ol i tok, taim Jisas i baptais pinis em i stap tambu long kaikai long ples i no gat man, na ol samting bilong Len i makim dispela samting. Tasol sapos olsem, i gat wanem as na ol man i mekim Len long ol wik i kamap paslain long taim bilong Ista—em ol i tok em i taim bilong Jisas i kirap bek? Jisas i no stap tambu long kaikai paslain long taim em i dai, nogat. Baibel i makim olsem sampela de paslain long taim em i dai, em wantaim ol disaipel bilong em ol i go lukim ol man long haus bilong ol long ples Betani na ol i kaikai. Na long nait paslain long taim em dai, em i kisim kaikai bilong Pasova.—Matyu 26:6, 7; Luk 22:15; Jon 12:2.
Pasin Jisas i bin mekim long i stap tambu long kaikai bihain long taim em i kisim baptais, dispela inap skulim yumi long sampela samting. Jisas i laik mekim wanpela bikpela wok. Samting em i mekim inap kamapim klia olsem Jehova em i King tru na i helpim olgeta manmeri long kisim laip oltaim. Em taim bilong tingim tingim ol samting em i mas mekim, na beten askim Jehova long helpim em na stiaim tingting bilong em. Taim em i mekim olsem, i stret em i stap tambu long kaikai. Dispela i makim olsem pasin bilong i stap tambu long kaikai inap helpim man sapos stretpela tingting i kirapim em long mekim olsem na em i mekim long taim stret bilong mekim.—Skelim wantaim Kolosi 2:20-23.
Taim Dispela Pasin Inap Helpim Yu
Yumi ken tingim sampela taim long nau na man i lotu long God em i gat laik long i stap tambu long kaikai. Olsem: Sapos man i mekim wanpela rong, ating inap liklik taim bai em i no gat laik long kaikai. Tasol em i no mekim long wanem em i laik hambak long ai bilong ol narapela o em i kros long sampela tok em i bin kisim bilong stretim em, nogat. Na yumi mas save olsem, pasin bilong i stap tambu long kaikai, dispela yet i no inap helpim man long kamap wanbel gen wantaim God. Tasol sapos man i tanim bel tru, em bai bel hevi long pen em i bin givim long Jehova na ol pren na famili bilong em. Em i bel hevi tumas na em i beten strong long Jehova i ken lusim rong bilong em, na ating dispela inap mekim na em i no gat laik long kaikai.
Kain samting olsem i bin painim King Devit bilong Israel. Liklik pikinini man bilong Devit, em Batseba i karim, taim em i laik i dai Devit i wok strong long beten long Jehova na bai Jehova i ken marimari long dispela pikinini. Em i beten strong olsem, na em i stap tambu long kaikai. Na i wankain long nau. Taim bikpela hevi i painim yumi, ating sampela taim yumi pilim olsem i no stret long yumi kaikai.—2 Samuel 12:15-17.
Ating sampela taim man i laik tingim sampela strongpela samting bilong spirit. Ating em i mas wok long kisim save long Baibel na ol buk Kristen. Inap sampela hap taim em i mas tingim tingim dispela samting. Taim em i stadi i go, ating em i no laik bai kaikai i ken pulim tingting bilong em, olsem na em i no kaikai.—Skelim wantaim Jeremaia 36:8-10.
Sampela wokboi bilong God bipo ol i stap tambu long kaikai taim ol i mas tingim sampela bikpela samting ol i mas mekim. Long taim bilong Nehemia, ol Juda i mas mekim wanpela tok tru antap long Jehova, na sapos ol i brukim, bai ol i kisim nogut. Ol i mas tok promis long rausim ol meri haiden bilong ol na i stap narapela kain long ol narapela lain klostu. Taim ol i no mekim yet dispela tok tru antap na ol i wok long tokaut long rong bilong ol, olgeta long lain Juda ol i stap tambu long kaikai. (Nehemia 9:1, 38; 10:29, 30) Olsem na taim Kristen i mas tingim wanpela bikpela samting em i mas mekim, ating inap liklik hap taim bai em i no kaikai.
Taim ol lain elda long lain Kristen bilong pastaim i laik pasim tok long wanpela samting, sampela taim ol i stap tambu long kaikai. Long nau, taim ol elda bilong kongrigesen i mas pasim tok long wanpela bikpela samting, olsem long taim ol i harim kot, ating ol i no kaikai taim ol i wok long tingim dispela samting.
Pasin bilong i stap tambu long kaikai long sampela kain taim, em samting bilong ol wan wan yet. Narapela i no ken skelim narapela long dispela samting. Yumi no ken stap tambu long kaikai na bai ol man ‘i ting yumi stretpela man’; na tu, yumi no ken mekim kaikai i bikpela samting tumas na bai i pasim yumi long lukautim ol bikpela samting yumi mas mekim. (Matyu 23:28; Luk 12:22, 23) Na Baibel i soim olsem, God i no tok yumi mas i stap tambu long kaikai o no ken i stap tambu long kaikai.
[Piksa long pes 7]
Yu save i gat wanem as na taim Jisas i baptais pinis, em i stap tambu long kaikai inap 40 de?