Kisim Save Long Bikpela Nem i Stap Hait

Buk Koran bilong ol Muslim na buk Baibel bilong ol Kristen i kamapim nambawan bikpela nem. Ol tok hia bai stori long insait bilong dispela nem, na bilong wanem em i bikpela samting, na olsem wanem em i mekim samting long olgeta man na long ol samting bai painim ol long graun long bihain.

PLANTI milion manmeri i bin kamap long graun na i dai pinis. Taim ol i dai, nem bilong planti i pinis, na ol man i lusim tingting pinis long ol. Tasol sampela man i gat biknem long mekim wanpela wok o long kisim sampela save o long wokim masin samting, na ol man i tingim yet nem bilong ol, olsem Avisena, na Edison, na Pasteur, na Bethoven, na Gandhi, na Niuton.

Tasol i gat wanpela nem i winim olgeta narapela nem. Dispela nem i gat wok long olgeta gutpela samting bilong bipo na bilong nau i stap long skai na long graun. Dispela nem tasol inap helpim ol man long i stap longtaim na i stap amamas!

Planti man i laik kisim save long dispela nem. Ol i wok long painim na askim askim, tasol ol i no kisim save long en. Em i stap hait long ol. Bilong yumi yet, yumi no inap kisim save long dispela nem; Papa bilong en i mas kamapim long yumi. Tasol gutpela tru, nau yumi inap save long dispela bikpela nem! God yet i kamapim long ol man bambai ol bilipman i ken kisim save long em. Em i kamapim nem bilong em long Adam, na bihain long Abraham, na long Moses, na long ol narapela gutpela wokboi bilong Em long bipo.

Bilong Save Long Nambawan Bikpela Nem

Buk Koran i stori long wanpela man “i save tumas long Buk bilong God.” (27:40) Wanpela buk (Tafsīr Jalālayn) i stori long dispela hap tok bilong buk Koran na i tok: “Asap em i pikinini bilong Berekia na em i gutpela man. Em i save long nambawan bikpela nem bilong God, na taim em i singaut long en, God i save helpim em.” Dispela i kirapim yumi long tingim wanpela man bilong raitim Baibel, nem bilong em Asap, em i tok long Song 83:18 olsem: “Bai ol i ken save tru, yu wanpela tasol, [nem bilong yu Jehova], na yu God Antap Tru, na yu save bosim olgeta hap bilong graun.”

Buk Koran 17:2 i tok: “Mipela givim buk bilong God long Moses bilong soim rot long ol Israel.” Long buk bilong God, Moses i tokim God: “Taim mi go kamap long ol Israel bai mi tokim ol olsem, ‘God bilong ol tumbuna bilong yumi i salim mi na mi kam long yupela.’ Na sapos ol i askim mi, ‘Wanem nem bilong en?’, orait bai mi bekim wanem tok long ol?” God i tok: “Yu mas tok olsem . . . , ‘[Jehova], em God bilong ol tumbuna bilong yupela, Abraham na Aisak na Jekop, em i bin salim mi na mi kam long yupela.’ Na God i tok moa long Moses olsem, ‘[Jehova], em i nem bilong mi oltaim oltaim.’ ”​—⁠Kisim Bek 3:​13, 15. [Lukim liklik tok daunbilo long Baibel Pisin.]

Ol Israel bilong bipo i save long dispela bikpela nem bilong God. Ol i putim insait long nem bilong ol yet. Yumi ken tingim nem Abdala, insait bilong en i olsem “Wokboi bilong God,” na sampela Israel bilong bipo i gat nem Obadia, olsem “Wokboi bilong Jehova.” Nem bilong mama bilong profet Moses em Jokebet, na ating insait bilong nem bilong em i olsem “Jehova i Gat Biknem.” Insait bilong nem Jon i olsem “Jehova i Bin Mekim Pasin Marimari.” Na insait bilong nem bilong profet Elaija i olsem “God Bilong Mi Em Jehova.”

Ol profet i save long dispela bikpela nem na ol i kolim long pasin i litimapim dispela nem. Em i stap olsem 7,000 taim long Baibel. Krais Jisas, pikinini bilong Maria, em i kamapim gut dispela nem. Em i beten na tokim God: “Mi autim pinis nem bilong yu long ol man . . . Mi bin kamapim nem bilong yu long ol. Na bai mi kamapim moa yet, bai ol i ken kisim pasin bilong laikim ol arapela man, olsem yu save laikim mi.” (Jon 17:​6, 26) Wanpela man (Bayḍāwī) i stori gut long buk Koran na em i stori long Koran 2:87 olsem, “long bikpela nem bilong God,” Jisas i bin “kirapim bek ol man i dai pinis.”

Orait, olsem wanem na bihain dispela nem i stap hait? Dispela nem i gat wanem wok long ol samting bai painim yumi long bihain?

Olsem Wanem na Nem i Stap Hait?

Sampela i ting, long tok Hibru nem “Jehova” i makim “Ala” (God). Tasol long tok Hibru, dispela tok “Ala,” olsem “God,” em ʼElo·himʹ (insait bilong en i olsem “ol god” na em i makim wanpela God em i gat bikpela nem tru). Wanpela bilip kranki i bin kamap namel long ol Juda na ol i pret long kolim nem bilong God, olsem na taim ol i kaunim Baibel na ol i lukim nem Jehova i stap, ol i save kolim tok ʼAdho·naiʹ, olsem “Bikpela.” Long sampela hap bilong Olpela Testamen ol i rausim nem “Jehova” na putim dispela tok ʼAdho·naiʹ i go insait.

Ol pris pasto bilong ol misin i gat nem Kristen ol tu i bihainim dispela pasin. Ol i rausim nem Jehova na raitim “God” (“Ala” long tok Arap) na “Bikpela.” Dispela i helpim tok giaman bilong God Triwan, tasol Baibel i no as bilong en. Planti milion manmeri i bilipim dispela tok na ol i lotuim Jisas na spirit holi, na ol i ting Jisas na spirit holi i bikpela olsem God.a

Olsem na ol hetman bilong lotu Juda na bilong ol misin, ol i gat asua long haitim dispela nambawan bikpela nem, na nau planti manmeri long olgeta hap i no save long en. Tasol God i tok profet pinis olsem: “Bai ol [lain man] i givim biknem long mi. . . . Na bai ol i save gut olsem, mi yet mi Bikpela [Jehova].” Tru tumas, Jehova bai mekim na bai olgeta lain man i save long nem bilong em. Long wanem, em i no God bilong lain Juda tasol o bilong narapela lain. Nogat. Jehova em i God bilong olgeta lain man.​—⁠Esekiel 36:23; Stat 22:18; Song 145:21; Malakai 1:11.

Nambawan Bikpela Nem na Ol Samting Bai Painim Yumi Bihain

Baibel i tok: “Olgeta manmeri i [singaut long nem bilong Jehova] . . . em bai i kisim bek ol.” (Rom 10:​12, 13) Yumi mas save long nem bilong God bambai yumi ken kisim laip long de bilong kot. I olsem yumi mas save long ol pasin na wok na laik bilong God, na bihainim ol lo bilong em. Olsem: Abraham i save long nem bilong God na em i singaut long en. Olsem na em i pas gut wantaim God; em i bilip tru long God na kamapim bilip bilong em, na em i bihainim tok bilong God. Long dispela rot em i kamap pren bilong God. Olsem tasol, sapos yumi save long nem bilong God, dispela bai helpim yumi long i go klostu long em na save gut long em, na holimpas sori bilong em.​—⁠Stat 12:8; Song 9:10; Sindaun 18:10; Jems 2:⁠23.

Baibel i tok: “Bikpela i tok, na long heven ol i raitim wanpela buk i gat nem bilong ol manmeri i save stap aninit long Bikpela na i tingting long [nem bilong] em oltaim.” (Malakai 3:16) Bilong wanem yumi mas “tingting long” dispela nambawan bikpela nem? Insait bilong nem Jehova i olsem “Em i Mekim i Kamap.” Em i mekim i kamap olgeta samting em i tok promis long en. Olgeta samting em i laik mekim, em i save mekim. Em i God i gat olgeta strong, na em wanpela i Man bilong wokim ol samting, na em i gat olgeta gutpela pasin. I no gat wanpela tok tasol yumi ken kolim bilong makim pasin bilong em. Tasol God i kolim nem long em yet, na taim yumi tingim dispela nambawan bikpela nem Jehova, yumi tingim olgeta gutpela pasin bilong em na ol samting em i laik mekim.

Long Baibel, God i tokim yumi long ol samting em i laik mekim long ol man. Em i wokim ol man bilong i stap amamas oltaim long Paradais. Em i laik bai olgeta manmeri i stap olsem wanpela famili na i pas gut wantaim long pasin sori na pasin wanbel. Klostu nau bai God bilong sori i mekim dispela i kamap.​—⁠Matyu 24:​3-14, 32-42; 1 Jon 4:​14-21.

God i stori long as bilong pen na hevi i painim ol man, na long rot bilong kisim laip. (KTH 21:⁠4) Long Song 37:​10, 11, Baibel i tok: “I no longtaim na bai ol man nogut i lus olgeta. Bai yu wok long painim ol long ples bilong ol, tasol yu no inap lukim ol. Tasol ol manmeri i daunim nem bilong ol yet bai God i givim olgeta graun long ol. Bai ol i sindaun gutpela tumas na amamas i stap.”​—⁠Lukim tu Koran 21:105.

Tru tumas, bai ol man i save long bikpela nem bilong God. Olgeta lain man i mas save, em i Jehova. Gutpela tru yumi save long dispela nem, na yumi autim long ol man, na pas long en! Long dispela rot ol gutpela samting bai painim yumi olgeta wan wan olsem God i tok promis pinis: “Bai mi kisim bek ol man i laikim mi tru, na bai mi lukautim gut ol man i save tru long [nem bilong] mi. Taim ol i prea long mi bai mi harim prea bilong ol. . . . Bai mi skruim laip bilong ol i go longpela olsem prais bilong ol. Na bai mi kisim bek ol.”​—⁠Song 91:​14-16.

[Ol Futnot]

[Piksa long pes 5]

Long liklik diwai i paia, God i tokim Moses, ‘Mi Jehova, God bilong Abraham’

[Kredit Lain]

Moses and the Burning Bush, by W. Thomas, Sr.