Tok Bilong Jehova i Gat Laip
Sampela Bikpela Tok Bilong Buk Malakai
TEMPEL ol i wokim gen long Jerusalem i bin sanap inap 70 yia olgeta. Tasol isi isi, ol Juda i no pas gut moa wantaim God. Ol pris tu i mekim pasin nogut. Husat inap mekim na ol i luksave long ol i stap olsem wanem na helpim ol long kirap gen long pas gut wantaim God? Jehova i givim dispela wok long profet Malakai.
Malakai i raitim ol strongpela tok. Buk Malakai em i laspela buk bilong Ol Skripsa Hibru na em i gat ol tok profet i kam long God. Sapos yumi skelim ol tok profet bilong Malakai, dispela bai helpim yumi long redi long “bikpela De” bilong Jehova taim em i pinisim pasin nogut bilong dispela graun.—Malakai 4:5.
OL PRIS I ‘PULIM PLANTI MANMERI LONG MEKIM PASIN I NO STRET’
Jehova i kamapim tingting bilong em long lain Israel olsem: “Longtaim tru mi laikim yupela tumas.” Tasol ol pris i givim baksait long God. Olsem wanem ol i mekim olsem? Ol i save “kukim ol ofa nogut long alta bilong [em],” na ol i save ofaim “ol abus i gat sik, o lek bilong ol i bruk.”—Malakai 1:2, 6-8.
Ol pris i bin ‘pulim planti manmeri long mekim olkain pasin i no stret.’ Ol manmeri i ‘save brukim ol promis ol i bin mekim long ol wantok bilong ol.’ Sampela i maritim ol meri bilong narapela lain. Sampela narapela i brukim promis ol i bin mekim wantaim ‘ol meri ol i bin maritim long taim ol i yangpela yet.’—Malakai 2:8, 10, 11, 14-16.
Bekim Bilong Ol Askim Bilong Baibel:
2:3—Wanem mining bilong dispela tok olsem ‘rapim pekpek’ long pes bilong ol pris? Ol i save kisim pekpek bilong ol animal ol i ofaim na bringim i go ausait long kem na kukim long paia olsem Lo i makim. (Wok Pris 16:27) Taim dispela ves i tok long rapim pekpek long pes bilong ol pris, dispela i makim olsem Jehova i no orait long ol ofa ol man i mekim na em i no laikim tru ol dispela man i mekim ofa.
2:13—Aiwara bilong husat i kapsait antap long alta bilong Jehova? Em aiwara bilong ol maritmeri husat i kam long tempel na krai long Jehova. Wanem samting i mekim na ol i bel hevi? Ol man Juda bilong ol i katim nating marit na lusim ol, ating ol man i mekim olsem na bai ol i ken maritim ol meri bilong narapela lain.
Skul Yumi Kisim:
1:10. Jehova i no amamas long ofa bilong ol pris em ol i save mangal long ol samting, na ol i save makim pe bilong ol liklik wok ol i save mekim, olsem pasim dua bilong tempel o wokim paia bilong alta. Em i bikpela samting olsem pasin bilong laikim tru Jehova na ol narapela i kirapim yumi long mekim ol wok bilong lotu, na wok autim tok—yumi no ken mekim ol dispela samting bilong kisim mani!—Matyu 22:37-39; 2 Korin 11:7.
1:14; 2:17. Jehova i no laikim tru pasin bilong giaman.
2:7-9. Ol man i gat wok long skulim ol narapela insait long kongrigesen i mas was gut na bai ol i skulim ol man long tok i stret wantaim Tok Bilong God, em Baibel, na wantaim ol buk na nius em ol “wokboi i gat gutpela tingting” i kamapim.—Luk 12:42; Jems 3:11.
2:10, 11. Jehova i laik bai ol man i lotuim em i tingim tru dispela tok long maritim tasol “man i bilip long Bikpela.”—1 Korin 7:39.
2:15, 16. Ol Kristen tru i mas tingim tok promis ol i bin mekim wantaim meri ol i maritim taim ol i yangpela.
GOD BAI I KAM NA ‘STAP LONG HAUS BILONG EM’
“Wantu bai mi [God] i kam na mi stap long haus bilong mi” na “dispela ensel bilong autim tok bilong kontrak [Jisas Krais]” em tu bai i kam. God bai “kam bilong skelim pasin bilong yupela [lain bilong em]” na kotim kwiktaim ol man i save mekim pasin nogut. Na tu, ol bai “raitim wanpela buk i gat nem bilong ol manmeri” i save pret long Jehova.—Malakai 3:1, 3, 5, 16.
Dispela de i olsem “paia” bai kam na bagarapim olgeta man nogut. Paslain long dispela de i kamap, God bai salim wanpela profet i kam bilong “mekim ol papa na ol pikinini i kamap wanbel.”—Malakai 4:1, 5, 6.
Bekim Bilong Ol Askim Bilong Baibel:
3:1-3—Wanem taim “God” na “ensel bilong autim tok bilong kontrak” olsem man bilong bringim tok, tupela i kam long tempel? Husat i go paslain long tupela? I olsem Jehova i kam long tempel bilong em na klinim tempel long Nisan 10, 33 C.E. Dispela samting i kamap taim Jisas i go insait long tempel na rausim ol man i mekim wok bisnis insait long tempel. (Mak 11:15) Em 3 na hap yia bihain long Jehova i bin makim Jisas olsem Man Bilong Kamap King. I luk olsem 3 na hap yia bihain long em i kamap King long heven, Jisas i go wantaim Jehova long tempel spirit na tupela i kisim save olsem lain bilong God i mas kamap klin. Long taim bilong ol aposel, Jon Bilong Baptais i go paslain long Jisas bilong redim ol Juda long Jisas Krais bai i kam. Long nau, i gat wanpela lain i go pas bilong redim rot bilong Jehova long i kam long tempel spirit bilong em. Long 1880 samting, wanpela lain sumatin bilong Baibel i kirapim wok bilong skulim ol man i gat gutpela bel long planti tok i tru bilong Baibel.
3:10—Olsem wanem? Pasin bilong givim olgeta namba 10 hap long Jehova i makim olsem yumi givim olgeta samting bilong yumi long em? Indai bilong Jisas i pinisim Lo Bilong Moses, olsem na long nau i no gat wok long givim namba 10 hap bilong ol samting long God. Tasol pasin bilong givim namba 10 hap i olsem piksa na i makim wanpela samting. (Efesus 2:15) Dispela pasin i no makim olsem yumi givim olgeta samting bilong yumi. Long olgeta yia ol Israel i mas givim namba 10 hap bilong ol samting bilong ol long Jehova, tasol yumi mekim olsem wanpela taim tasol—yumi mekim olsem taim yumi dediket long em na yumi kamapim klia dispela samting taim yumi baptais. Kirap long dispela taim na i go, olgeta samting bilong yumi i bilong Jehova. Tasol em i larim yumi yet long makim wanpela hap bilong ol samting yumi gat—olsem namba 10 hap—bilong mekim wok bilong em. Em samting yumi inap mekim na bel bilong yumi i kirapim yumi long mekim. Ol ofa yumi givim Jehova em taim, strong, na ol samting bilong yumi bilong helpim wok bilong autim tok bilong Kingdom na kamapim ol disaipel. Na taim yumi go long ol miting Kristen, go lukim ol man i sik na ol lapun, na givim mani bilong helpim wok bilong lotu i tru, ol dispela samting tu i olsem ofa yumi givim long Jehova.
4:3—Long wanem rot ol man i lotuim Jehova bai ‘krungutim ol man nogut’? Lain bilong God long graun bai i no ‘krungutim ol man nogut’ olsem insait long pait bilong God long givim strafe long ol man nogut, nogat. Dispela tok i makim olsem lain bilong Jehova long graun bai givim bel olgeta long insait long bikpela amamas bilong winim pait i kamap bihain long pinis bilong graun bilong Satan.—Song 145:20; KTH 20:1-3.
4:4—Bilong wanem yumi no ken ‘lusim tingting long ol lo bilong Moses’? Ol Kristen i no gat wok long bihainim dispela Lo, tasol Lo i stap olsem “piksa o tewel tasol bilong ol gutpela samting i laik kamap bihain.” (Hibru 10:1) Olsem na taim yumi skelim Lo Bilong Moses, dispela inap helpim yumi long lukim olsem wanem ol tok i stap long en i kamap tru. (Luk 24:44, 45) Na tu, Lo i stori long ol samting i stap olsem “piksa tasol bilong ol samting i stap long heven.” Em i bikpela samting long yumi kisim save long en, long wanem, dispela bai helpim yumi long kliagut long ol bilip na pasin Kristen.—Hibru 9:23.
4:5, 6—“Profet Elaija” i makim husat? Tok profet i kamapim olsem “Elaija” bai stretim bek ol samting, olsem redim bel bilong ol manmeri. Long taim bilong ol aposel, Jisas Krais i tokaut olsem Jon Bilong Baptais em “Elaija.” (Matyu 11:12-14; Mak 9:11-13) Long nau Jehova i salim lain i makim Elaija i kam paslain long “bikpela De” bilong em. Dispela lain em “wokboi i gat gutpela tingting.” (Matyu 24:45) Dispela lain Kristen em God i bin makim, ol i wok strong long helpim ol man long pas gut gen wantaim God.
Skul Yumi Kisim:
3:10. Sapos yumi no givim bel olgeta long mekim wok bilong Jehova em i no inap blesim yumi.
3:14, 15. Ol pris i no stap gutpela piksa, dispela i mekim na ol Juda i ting pasin bilong lotuim God em i liklik samting. Ol man i holim wok insait long kongrigesen Kristen i mas i stap gutpela piksa.—1 Pita 5:1-3.
3:16. Jehova i save tingim ol man i pret long em na i stap gut long em. Em bai tingim ol na lukautim ol taim em i pinisim dispela graun nogut bilong Satan. Olsem na yumi mas wok strong long stap gut long God.—Jop 27:5.
4:1. Long de bilong Jehova i skelim na kotim ol man, ol liklik pikinini bai kisim wankain pe olsem papamama bilong ol. Olsem na em bikpela samting long ol papa na mama Kristen i mas wok strong long mekim ol samting God i orait long en na stap gut long em.—1 Korin 7:14.
“Aninit Long God”
Husat bai abrusim bagarap long taim “bikpela De” bilong Jehova i kam? (Malakai 4:5) Jehova i tok, “yupela manmeri i save bihainim tok bilong mi bai mi kisim bek yupela long strong bilong mi. Strong bilong mi i bikpela tru olsem lait bilong san na em bai i mekim gut long yupela olsem san i save hatim skin bilong ol manmeri. Na bai yupela i gat bikpela amamas olsem ol pikinini bulmakau i lusim banis na i kalap kalap i go ausait.”—Malakai 4:2.
“Lait bilong san,” em Jisas Krais, em bai givim lait long ol man i daun long nem bilong God na Jehova i orait long ol. (Jon 8:12) Em bai ‘mekim gut long ol’—ol bai pas gut gen wantaim God long nau, na long nupela taim God bai kamapim, em bai mekim skin na tingting na bel bilong ol bai kamap gutpela olgeta. (KTH 22:1, 2) Ol i amamas tru na ol i mekim pasin “olsem ol pikinini bulmakau.” Taim yumi wet long lukim ol kain gutpela blesing olsem, yumi mas bihainim tok bilong King Solomon em i tok: “Namba wan samting long laip bilong yumi man i olsem. Yumi mas aninit long God tasol na bihainim ol lo bilong em.”—Saveman 12:13.
[Piksa long pes 26]
Profet Malakai em wanpela wokboi bilong God i givim bel tru long wok
[Piksa long pes 29]
Ol samting yumi skulim ol man long en i mas stret wantaim tok bilong Baibel
[Piksa long pes 29]
Ol wokman bilong Jehova i save tingim tru tok promis ol i mekim taim ol i marit