“Bringim Wanpela Hap Olgeta Long Haus Bilong Mi”
“Mi ken givim planti gutpela samting long yupela na yupela i no ken sot. . . . Na bai yupela i ken save olsem tok bilong mi em i tru olgeta.”—MALAKAI 3:10.
1. (a) Sampela handet yia paslain long Krais, Jehova i tokim ol Israel long em i ken mekim wanem long ol? (b) Long taim bilong Jisas, Jehova i kam long haus lotu bilong skelim pasin bilong ol Israel, na wanem samting i bin kamap?
SAMPELA handet yia paslain long Krais, lain Israel i bikhet long Jehova. Ol i no bin givim wanpela hap bilong ol samting long Jehova, na ol i bin bringim ol animal nogut long haus lotu olsem ofa. Tasol em i tokim ol, sapos ol i bringim wanpela hap bilong ol samting bilong ol long haus lotu, em bai inapim olgeta samting long ol. (Malakai 3:8-10) Na 500 yia bihain, long rot bilong “ensel bilong autim tok bilong kontrak,” em Jisas, Jehova i kam long haus lotu bilong skelim pasin bilong ol dispela Israel. (Malakai 3:1) Tasol Jehova i lukim klostu olgeta i lusim em—sampela tasol i kam bek long Jehova na em i mekim gut tru long ol. (Malakai 3:7) Em i makim ol long spirit, na nau dispela liklik hap lain ol i kamap olsem nupela lain Israel, em “Israel tru bilong God.”—Galesia 6:16; Rom 3:25, 26.
2. Namba 2 truim bilong Malakai 3:1-10 i bilong kamap long wanem taim? Olsem na Jehova i tokim yumi long mekim wanem?
2 Klostu 1,900 yia bihain, olsem long yia 1914, Jisas i kamap King bilong Kingdom bilong God long heven, na nau namba tu truim bilong Malakai 3:1-10 i mas kamap. Olsem na long nau Jehova i tokim ol Kristen long “bringim wanpela hap olgeta” bilong ol samting bilong ol i kam “long haus bilong” Jehova. Na sapos yumi mekim olsem, em bai mekim gut long yumi tu na bai yumi no ken sot.
3. (a) Long taim bilong Jisas, husat dispela “man bilong autim tok” long Jehova bai kam? (b) Na paslain long Namba Wan Pait em i husat?
3 Jehova i toktok long taim em i laik i kam long haus lotu, na em i tok: “Bai mi salim wanpela man bilong autim tok bilong mi na em bai i go pas bilong redim rot bilong mi.” (Malakai 3:1) Long bipo, Jon Bilong Baptais em dispela man, na em i autim tok na tokim ol man long tanim bel. (Mak 1:2, 3) Na long namba tu truim bilong Malakai 3:1 wanpela lain i kamap paslain liklik long taim bilong Namba Wan Pait, em ol Sumatin Bilong Baibel, na ol i kamapim long ples klia giaman bilong ol tok olsem bilong God Triwan na bikpaia samting, na ol i tokaut tu olsem taim bilong ol man bilong ol arapela lain bai pinis long 1914. Planti man i harim dispela tok i tru bilong ol.—Song 43:3; Matyu 5:14, 16.
4. Long “de bilong Bikpela,” Jehova i mas kamapim klia wanem samting?
4 Long 1914 em “de bilong Bikpela” i kirap. (KTH 1:10) Bihain long 1914 ol bikpela samting i mas kamap. Ol i mas save, “wanem wokboi i gat gutpela tingting, na i save mekim gut wok bilong en,” na Jisas i mas “makim dispela wokboi bilong bosim olgeta samting bilong” Jisas. (Matyu 24:45-47) Long 1914 planti tausen lotu i tok ol i Kristen, tasol Bikman Krais Jisas bai makim husat i olsem “dispela wokboi” bilong bosim olgeta samting bilong Jisas? Jehova i mas kamapim klia dispela samting taim em i kam “long haus bilong” em.
Em i Kam Long Haus Lotu Bilong Spirit
5, 6. (a) Jehova i bin kam long wanem haus na bai em i ken skelim ol man? (b) Jehova i makim wanem strafe bilong ol lotu ol i holim nating nem Kristen?
5 Jehova i bin kam long wanem “haus”? I no haus lotu long Jerusalem. Em i bagarap long yia 70, tasol em i makim narapela “haus” long ples holi long heven, na banis bilong en i stap hia long graun; dispela haus i winim tru haus lotu bilong Jerusalem. (Hibru 9:11, 12, 24; 10:19, 20) Jehova i bin kam long dispela bikpela haus bilong spirit na bai em i ken skelim ol man long kot.—Lukim KTH 11:1; 15:8.
6 Ol samting i kamap i makim olsem Jehova i bin mekim dispela samting long 1918. Em i skelim ol lotu i holim nating nem Kristen na em i lukim ol i gat bikpela rong long kilim i dai man, na prenim ol gavman olsem pamukmeri i save mekim long ol man, na ol i pren wantaim ol maniman, na putim bikpela hevi long ol rabisman, na lainim ol man long ol bilip giaman, na haitim ol tok i tru bilong lotu i tru. (Jems 1:27; 4:4) Jehova i bin tokim ol: “Mi bai kam bilong skelim pasin bilong yupela. Na kwiktaim bai mi kotim ol man i save wokim posin na ol man i save bagarapim marit na ol man i save autim tok giaman long kot . . . na ol man i save trikim ol meri, man bilong ol i dai pinis, na ol pikinini, papa bilong ol i dai pinis, na ol man bilong arapela kantri na kisim olgeta samting bilong ol. Dispela olgeta man i no save stap aninit long mi, olsem na bai mi kotim ol.” (Malakai 3:5) Ol dispela misin i gat asua long ol dispela samting, na dispela i kamap ples klia long 1919, na Jehova i makim ol wantaim olgeta narapela lotu giaman bilong Bikpela Babilon long ol i mas kisim bagarap. Olsem na Jehova i tokim ol man i gat gutpela bel: “Yupela ol manmeri bilong mi, yupela i mas lusim dispela ples na i kam ausait.”—KTH 18:1, 4.
7. Husat dispela wokboi i gat gutpela tingting na i mekim gut wok bilong em?
7 Na husat dispela “wokboi i gat gutpela tingting, na i save mekim gut wok bilong en”? Em i makim wanpela lain i bin kirap long taim Jon Bilong Baptais na Jisas i bin autim tok, na ol i harim tok bilong tupela na givim bel long en. Paslain long 1914 ol i kamap inap sampela tausen taim ol i harim tok bilong ol Sumatin Bilong Baibel. Ol i karim bikpela hevi long taim bilong Namba Wan Pait, tasol ol i pas gut long Jehova na ol i stap strong.
Bilong Stretim Ol
8, 9. Long 1918, wanem sampela rong i stap insait long lain bilong dispela “wokboi” na Jehova i mas stretim ol? Tasol Jehova i givim wanem tok promis long ol?
8 Tasol sampela samting bilong ol i no stret. Sampela bilong ol i birua long tok i tru na ol i mas raus. (Filipai 3:18) Na sampela moa i no laik mekim wok bilong Jehova, olsem na ol i lusim dispela lain na ol i go pinis. (Hibru 2:1) Na ol narapela i save bihainim sampela pasin bilong lotu giaman, na ol i mas lusim ol dispela pasin. Ol i mas klia long olgeta pasin bilong dispela graun. Na ol i mas stretim sampela pasin insait long oganaisesen bilong ol. Pasin bilong ol man bilong graun i wok long i go nogut nogut, olsem na ol i mas wok strong moa long sakim dispela pasin bilong graun na bai ol i ken stap strong long spirit na rong i no ken kamap insait long ol kongrigesen.—Lukim Jut 3, 4.
9 Ol dispela rong i stap, tasol Jehova i tok promis long samting Jisas bai mekim bilong stretim ol, olsem “rausim pipia” i stap long ol: “Bai em i kam bilong skelim pasin bilong olgeta manmeri olsem man i save kukim silva long paia na rausim pipia bilong en. Olsem tasol wokman bilong Bikpela bai i rausim pasin doti bilong ol pris na bai ol inap bringim ol gutpela ofa long Bikpela.” (Malakai 3:3) Kirap long 1918 Jehova i truim dispela tok, na long rot bilong “ensel bilong autim tok bilong kontrak” em i stretim lain bilong em, olsem dispela “wokboi.”
10. Lain bilong God i bringim wanem kain ofa long em? Jehova i bin tok wanem long ol?
10 Jehova i bin “rausim pipia” long ol na i olsem ol i kamap klin, na dispela i helpim ol brata bilong Krais wantaim bikpela lain i bung wantaim ol long mekim wok bilong Jehova. (KTH 7:9, 14, 15) Nau ol i stap wanpela oganaisesen na ol “i bringim ol gutpela ofa long” Jehova, na em “i amamas gen long ol ofa bilong ol.” (Malakai 3:4) Ol i mekim olsem Jehova i tokim ol: “Yupela i mas tilim olgeta samting bilong yupela long 10-pela hap na bringim wanpela hap olgeta long haus bilong mi. Olsem na ol wokman bilong mi bai i gat planti kaikai. Yupela i mekim olsem na bai mi ken givim planti gutpela samting long yupela na yupela i no ken sot. Bihainim dispela rot na bai yupela i ken save olsem tok bilong mi em i tru olgeta.”—Malakai 3:10.
Ol Ofa na Namba Ten Hap
11. Bilong wanem yumi no gat wok moa long givim kain ofa long God olsem Lo i bin makim bipo?
11 Long taim bilong Malakai ol i bin ofaim ol samting bilong gaden na sampela animal long God. Na long taim bilong Jisas tu ol Israel i stap gut long God ol i bin bringim ol ofa long haus lotu. Taim Jisas i dai pinis dispela Lo God i bin givim long ol Israel i pinis, olsem na lo bilong bringim ol ofa na namba 10 hap long haus lotu, em i pinis. (Efesus 2:15) Taim Jisas i dai dispela em inapim na truim ol dispela kain ofa. (Efesus 5:2; Hibru 10:1, 2, 10) Orait, wanem kain ofa o namba 10 hap ol Kristen i mas givim long God long nau?
12. Ol Kristen i save givim wanem kain ofa long God?
12 Ofa ol i givim, em i samting bilong spirit. (Lukim Filipai 2:17; 2 Timoti 4:6.) Pol i tok, wok bilong autim tok em i olsem wanpela ofa. Em i tok: “Oltaim yumi mas givim biknem long God long nem bilong Jisas, na dispela pasin i mas i stap olsem ofa yumi save givim long God. Yes, oltaim maus bilong yumi i mas litimapim nem bilong en.” Na Pol i kolim narapela kain ofa moa, em tu yumi mas givim. Em i tok: “Yupela i no ken lusim tingting long mekim ol dispela kain pasin, long wanem, em dispela kain ofa God i save laikim tru.” (Hibru 13:15, 16) Sapos papamama i laik kirapim pikinini long kamap painia, i olsem ol i laik givim pikinini long Jehova olsem ofa, kain olsem Jepta i bin mekim long pikinini meri bilong em; em i givim long God “olsem wanpela ofa bilong paia i kukim olgeta,” long wanem, God i bin helpim Jepta long winim pait.—Hetman 11:30, 31, 39.
13. Olsem wanem na i no gat lo i tok, Kristen i mas givim namba 10 hap bilong pe bilong em long oganaisesen bilong Jehova?
13 Tasol olsem wanem? Ol Kristen i mas givim namba 10 hap bilong pe bilong ol long oganaisesen bilong Jehova olsem ofa? Sampela misin i save mekim olsem. Tasol oganaisesen bilong Jehova i no gat dispela lo. Baibel i no tok ol Kristen i mas bihainim kain lo olsem. Taim Pol i kisim ol mani samting long ol kongrigesen bilong helpim ol Kristen bilong Judia i sot, em i no makim hamas mani ol brata i mas givim. Em i tokim ol brata: “Yupela olgeta wan wan i mas tingting gut pastaim na save gut long wanem samting yupela i laik givim. Nogut wanpela man i bel hevi long givim samting, na nogut em i ting ol man i strong tumas long em i mas givim. Dispela pasin bilong givim em i no gutpela. God i save laikim man i amamas na i givim samting long laik bilong em yet.” (2 Korin 9:7) Ol kontribusen i bin lukautim sampela na bai ol i ken mekim wok bilong God, tasol Pol i tok em yet i laik mekim wok bilong skin inap long lukautim em long kaikai samting. (Aposel 18:3, 4; 1 Korin 9:13-15) Ol i no gat lo long putim namba 10 hap bilong mani samting bilong mekim dispela wok.
14. (a) Olsem wanem namba 10 hap i no makim olgeta samting bilong yumi? (b) Namba 10 hap i makim wanem samting long nau?
14 Namba 10 hap i makim tasol wanpela samting, olsem piksa bilong samting. Long Baibel, ten i makim samting long graun em inap olgeta, tasol i no makim olsem yumi mas givim olgeta samting bilong yumi long Jehova, nogat. Yumi mekim dispela long taim yumi dediket na kisim baptais long wara, na nau olgeta samting bilong yumi i bilong Jehova tasol. Tasol Jehova i larim yumi i mekim wok bilong em long ol samting yumi holim, na namba 10 hap i makim dispela samting tasol, na i makim olsem yumi laikim em tumas, na yumi save em i papa bilong yumi. I no olsem yumi mas givim namba 10 hap stret, nogat. Samting bel i kirapim yumi long givim, yumi givim dispela samting. Sampela taim yumi ken givim hap i aninit long dispela, o yumi ken givim bikpela hap moa, winim namba 10 hap. Em samting bilong wan wan Kristen.
15, 16. Wanem ol samting yumi save givim long Jehova olsem ofa?
15 Wok bilong givim namba 10 hap long Jehova em i wok bilong spirit. Yumi mas givim taim bilong yumi na strong bilong yumi long mekim laik bilong Jehova. Yumi save mekim olsem long taim yumi go long ol miting na kibung, na taim yumi raun autim tok, na taim yumi go lukim ol sikman, na taim yumi helpim ol narapela, na taim yumi helpim ol long wokim Haus Kingdom, na taim yumi lukautim Haus Kingdom na klinim ol samting bilong en. Yumi givim taim na strong bilong yumi long mekim ol dispela samting.
16 Na yumi ken givim hap mani tu long mekim laik bilong Jehova. Long nau lain na oganaisesen bilong Jehova i go bikpela, na i mas i gat mani bilong baim ol samting. Ol i mas wokim ol nupela Haus Kingdom, na brens-ofis, na Haus Kibung, na ol i mas baim ol samting bilong lukautim gut ol narapela brens-ofis samting bipo ol i wokim. Na sampela brata sista i mekim wok bilong God long olgeta taim, na ol i mas i gat liklik mani bilong lukautim skin bilong ol, na oganaisesen i mas helpim ol long dispela samting. Long yia 1991 oganaisesen i lusim bikpela mani, winim 40 milion dola, long mekim ol dispela wok, na ol i kisim long kontribusen ol brata sista i save putim.
17. Yumi mas givim hamas samting long Jehova?
17 Yumi mas givim hamas samting long Jehova? Jehova i no makim wanem skel yumi mas givim long em, tasol yumi dediket long em, na givim bel long em, na laikim em tumas, na yumi laikim tumas ol brata tu, na yumi tingim laip bilong ol man yumi autim tok long ol, nogut ol i lus; olsem na ol dispela samting i kirapim yumi long givim “wanpela hap olgeta” long Jehova, na taitim bun long mekim wok bilong em na bihainim laik bilong em. Sapos yumi givim hap bel tasol long mekim ol dispela samting, bai i olsem yumi stilim samting bilong Jehova.—Lukim Luk 21:1-4.
Ol Bai i Gat Planti Samting na No Ken Sot
18, 19. Lain bilong Jehova i bin givim olgeta samting bilong ol long em, olsem na em i bin mekim wanem ol gutpela samting long ol?
18 Kirap long yia 1919 lain bilong Jehova i bin givim ol samting bilong ol long Jehova, olsem taim bilong ol, na strong bilong ol, na ol samting bilong skin tu, na ol i mekim wok autim tok. I olsem ol i “bringim wanpela hap olgeta long haus bilong” Jehova. Olsem na em i truim tok promis bilong em na em i mekim gut long ol inap long ol “i no ken sot.” Pastaim lain bilong mekim wok bilong Jehova i liklik inap sampela tausen tasol, olsem long 1918, tasol bihain ol i kamap planti, winim 4 milion, na ol i stap long 211 kantri. (Aisaia 60:22) Jehova i givim planti save moa long ol long ol samting bilong tok i tru. Nau ol i no longlong long ol samting Jehova i laik mekim, na ol i save, laik bilong em bai kamap tru. (2 Pita 1:19) Em yet i bin “skulim ol.”—Aisaia 54:13.
19 Na Jehova i mekim sampela gutpela samting moa long ol, olsem Malakai i tok: “Ol manmeri i save stap aninit long Bikpela na i harim tok bilong en, ol i toktok long ol yet, na Bikpela i harim toktok bilong ol. Na Bikpela i tok, na long heven ol i raitim wanpela buk i gat nem bilong ol manmeri i save stap aninit long Bikpela na i tingting long em oltaim.” (Malakai 3:16) Planti misin i tok ol i Kristen, tasol ol i no “tingting long [Jehova] oltaim” olsem ol Witnes Bilong Jehova i mekim. Ol Witnes i tingim Jehova long olgeta taim, na ol i autim nem bilong em long olgeta lain na litimapim nem long Em. (Song 34:3) Ol i amamas, long wanem, ol i save Jehova i lukim pasin na wok ol i mekim, na ol i save em i tingim ol dispela samting na em i no lusim tingting long en.
20, 21. (a) Jehova i ting olsem wanem long ol Kristen tru? (b) Long nau, wanem samting i kamap ples klia long ol lotu i gat nem Kristen?
20 Lain remnan i olsem wanpela gutpela samting tru long ai bilong Jehova, na i gat bikpela lain moa i wok long i kam bung wantaim remnan, na tupela lain i kamap olsem wanpela lain long lotuim Jehova, na em i mekim gut long olgeta wantaim. (Sekaraia 8:23) Jehova i mekim wanpela tok promis long ol, olsem Malakai i kolim: “Bikpela I Gat Olgeta Strong em i tok olsem, ‘Dispela ol lain bai i stap lain bilong mi tasol. Long dispela bikpela De mi bin makim, bai ol dispela lain i stap manmeri tru bilong mi. Na bai mi marimari long ol olsem wanpela papa i save marimari long pikinini i mekim wok bilong papa.’ ” (Malakai 3:17) Jehova i gat bikpela pasin sori long dispela lain bilong em, na em i tingting tumas long ol. Em gutpela samting tru, a?
21 Long nau ol Kristen tru i stap narapela kain long ol Kristen giaman, na dispela i kamap ples klia. Lain bilong Jehova i wok strong long bihainim ol lo bilong em, tasol pasin nogut i pulap long lain bilong ol Kristen giaman na ol i pas long ol pasin nogut na pasin sem bilong dispela graun, olsem Jehova i tok bai kamap long nau: “Long dispela taim bai yupela i ken lukim gen pasin mi save mekim long ol stretpela manmeri i save bihainim mi, na pasin mi save mekim long ol man nogut, em ol man i save sakim tok bilong mi.”—Malakai 3:18.
22. Jehova bai mekim wanem sapos yumi wok yet long “bringim wanpela hap olgeta long haus bilong” em?
22 Klostu nau Jehova bai mekim save long ol Kristen giaman. Baibel i tok: “Bikpela I Gat Olgeta Strong i tok olsem, ‘Harim gut. Wanpela De bai i kamap na bai paia i kukim olgeta manmeri bilong bikhet na olgeta manmeri nogut, olsem paia i save kukim kunai i drai. Long dispela De bai ol i bagarap long paia na bai ol i pinis olgeta.’ ” (Malakai 4:1) Lain bilong Jehova i save em bai lukautim ol long taim dispela samting i kamap, olsem bipo em i bin lukautim lain bilong em long yia 70. (Malakai 4:2) Olsem na ol i amamas! Orait, yumi mas “bringim wanpela hap olgeta long haus bilong” Jehova na bai em i ken save yumi amamas long ol gutpela samting em i givim long yumi, na em bai givim yet i go inap long yumi “i no ken sot.”
Stori Long Dispela
◻ Long nau, wanem taim Jehova i bin kam long haus bilong em wantaim “ensel bilong autim tok bilong kontrak”?
◻ Husat dispela “wokboi”? Wanem ol rong ol i mas stretim bihain long 1918?
◻ Ol Kristen tru i givim wanem ol samting bilong spirit long Jehova olsem ofa?
◻ Wanem dispela “hap” yumi mas bringim long Jehova?
◻ Wanem ol gutpela samting God i givim long ol man i givim ol samting bilong spirit long em olsem ofa?
[Piksa long pes 15]
Sapos yumi givim mani na strong samting long wokim Haus Kingdom, em olsem ofa yumi givim long Jehova
[Piksa long pes 16]
Jehova i bin blesim lain bilong em na ol i mas skruim planti brens-ofis i go bikpela na wokim ol nupela Haus Kingdom na Haus Kibung