Yu No Inap Save Wanem Kaikai Bai Kamap Gut!

“Yu mas planim sampela lain kaikai long moningtaim na sampela long apinun tu. Yu no inap save, lain kaikai yu planim long moning o lain kaikai bilong apinun tasol bai i kamap gut.”​​—SAV. 11:6.

 1. Taim yumi lukim kaikai i kamap, olsem wanem na dispela em i wanpela gutpela samting tru na i mas kirapim yumi long kisim stretpela tingting long yumi yet?

FAMA i gat gaden i mas i stap isi na wet. (Jem. 5:7) Taim em i planim pinis pikinini kaikai, em i mas wet long kaikai i kru na i kamap bikpela. Isi isi, taim ren wantaim san i mekim wok bilong ol, kru i kamap na i brukim graun. Orait nau kru i go bikpela na kaikai i kamap. Bihain moa, kaikai i redi pinis bilong kisim. Em i wanpela gutpela samting tru long lukim kaikai i kamap! Tasol taim yumi luksave long husat i As bilong mekim kaikai i kamap, dispela i mas kirapim yumi long kisim stretpela tingting long yumi yet. Yumi inap lukautim pikinini kaikai. Yumi inap givim wara long en. Tasol em God tasol inap mekim kaikai i kamap.​​—Skelim 1 Korin 3:6.

 2. Long 2-pela tok piksa yumi skelim long stadi i kamap paslain long dispela, Jisas i tok wanem long wei man i kamap disaipel?

² Long stadi i kamap paslain long dispela, Jisas i tok wok bilong autim tok bilong Kingdom i kain olsem wok bilong planim pikinini kaikai. Long tok piksa bilong kain kain graun, Jisas i kamapim klia olsem maski fama i planim gutpela pikinini wit, dispela wit i kamap bikpela na karim kaikai o nogat, em samting bilong bel bilong man. (Mk. 4:​3-9) Long tok piksa bilong man i planim pikinini kaikai na em i slip, Jisas i kamapim klia olsem dispela fama i no klia olgeta long man i kamap disaipel olsem wanem. Dispela i olsem, long wanem, samting i mekim na man i kamap disaipel, em samting strong bilong God i mekim, na i no samting bilong yumi yet. (Mk. 4:​26-​29) Orait nau yumi ken skelim 3-pela tok piksa moa bilong Jisas​​—em tok piksa bilong pikinini mastet, yis, na umben.a

Tok Piksa Bilong Pikinini Mastet

3, 4. Tok piksa bilong pikinini mastet i kamapim klia wanem samting bilong tok bilong Kingdom?

³ Tok piksa bilong pikinini mastet, em tu i stap long Mak sapta  4, i kamapim klia tupela samting: namba 1, lain i harim tok bilong Kingdom i go bikpela tru; namba 2, God i lukautim ol man i kisim tok bilong Kingdom na ol i stap gut. Jisas i tok: “Bai yumi tok, kingdom bilong God i olsem wanem samting? Yumi ken mekim wanem kain tok piksa? Em i olsem pikinini bilong dispela kain sayor ol i kolim mastet. Pikinini bilong mastet em i no olsem ol arapela pikinini kaikai bilong graun. Nogat. Em i liklik tru. Ol i save planim dispela long graun. Ol i planim pinis, na em i kamap na i go bikpela, na i winim olgeta kain sayor long gaden. Em i gat ol bikpela han, na ol pisin inap i kam long ol han bilong en na wokim haus bilong ol long ples kol.”​​—Mk. 4:​30-​32.

⁴ Long dispela tok piksa, “kingdom bilong God” i go bikpela​—wok bilong autim tok bilong Kingdom i kamap long planti hap, na kongrigesen Kristen i go bikpela, kirap long Pentikos 33 C.E. na i kam. Pikinini mastet em i liklik tru na inap makim samting i liklik tru. (Skelim Luk 17:6.) Tasol bihain, dispela sayor mastet i kamap bikpela inap olsem 3 i go 5 mita na i gat ol strongpela han, na em i olsem diwai.​​—Mt. 13:​31, 32.

 5. Kongrigesen Kristen long taim bilong ol aposel i bin wok long go bikpela olsem wanem?

⁵ Kongrigesen Kristen i bin kirap long 33 C.E. taim 120 disaipel i kisim holi spirit, olsem na pastaim dispela lain i liklik tru. Insait long sotpela haptaim tasol, dispela liklik lain disaipel i kamap planti, inap olsem sampela tausen. (Ritim Aposel 2:​41; 4:4; 5:​28; 6:7; 12:24; 19:20.) Insait long 30 yia, namba bilong ol wokman bilong bungim kaikai i kamap bikpela tru, olsem na aposel Pol inap tokim kongrigesen long Kolosi olsem ol i bin autim gutnius long “olgeta manmeri i stap long graun.” (Kl. 1:23) Man! Dispela lain i bin i go bikpela hariap!

6, 7. (a) Wok bilong Kingdom i bin kamap bikpela olsem wanem bihain long 1914? (b) Bihain, dispela wok bai kamap bikpela moa olsem wanem?

⁶ Kirap long taim Kingdom Bilong God i kamap long heven long 1914, ol han bilong “diwai” mastet i bin kamap bikpela moa yet, winim tru samting ol manmeri bilong God i bin ting bai kamap. Ol i bin lukim truim bilong tok profet bilong Aisaia: “Ol lain i liklik tru bai ol i kamap planti moa.” (Ais. 60:22) Long 1914 samting, liklik lain Kristen em God i bin makim ol long holi spirit na ol i insait long wok autim tok, ol i no bin tingim olsem long yia 2008, bai i gat olsem 7 milion Witnes i insait long dispela wok long 230 samting kantri. Olsem pikinini mastet long tok piksa bilong Jisas, dispela lain i bin go bikpela tru!

⁷ Tasol wok bilong Kingdom long kamap bikpela i no ken pinis long dispela mak tasol, nogat. Bihain, olgeta manmeri long graun bai stap aninit long Kingdom Bilong God. Olgeta birua bilong Kingdom bai i no stap moa. Tasol dispela samting i no ken kamap long rot bilong ol samting ol man i mekim, nogat; em bai kamap long samting Bikpela King Jehova bai mekim. (Ritim Daniel 2:​34, 35.) Long dispela taim bai yumi lukim laspela truim bilong narapela tok profet bilong Aisaia: “Olgeta samting long graun bai i save tru long Bikpela. Dispela save bai inapim olgeta hap graun olsem solwara i inapim mak bilong en olgeta.”​​—Ais. 11:9.

 8. (a) Ol pisin long tok piksa bilong Jisas i makim husat? (b) Long nau yet, olsem wanem yumi stap gut?

⁸ Jisas i tok ol pisin inap kam long ol han bilong diwai, olsem Kingdom, na stap gut aninit long en. Ol dispela pisin i no makim ol birua bilong Kingdom em ol i laik kisim ol gutpela pikinini wit, na ol i no olsem ol pisin i bin kisim kaikai long tok piksa bilong man i tromoi pikinini wit long kain kain graun, nogat. (Mk. 4:4) Long tok piksa bilong pikinini mastet, ol pisin i makim ol man i gat gutpela bel em ol i kam insait long kongrigesen Kristen bilong ol i ken stap gut. Long nau yet ol i stap gut, long wanem, ol i sakim ol pasin nogut bilong dispela graun em inap mekim ol i kamap doti long ai bilong God. (Skelim Aisaia 32:​1, 2.) Jehova tu i bin tok Kingdom Bilong Mesaia i olsem wanpela diwai, na em i bin tok profet olsem: “Bai mi katim wanpela kru long het bilong wanpela longpela diwai sida. Na bai mi planim long dispela maunten long Israel i antap tru na i winim olgeta arapela maunten bilong Israel. Na bai dispela diwai i kamap bikpela. Bai em i gat longpela han, na bai em i karim pikinini bilong en. Na bai em i kamap nambawan diwai sida tru. Ol kain kain pisin bai i kam sindaun long han bilong en bilong hait long san. Na bai ol i wokim haus long ol dispela han.”​​—Ese. 17:23.

Tok Piksa Bilong Yis

9, 10. (a) Long tok piksa bilong yis, Jisas i laik kamapim wanem poin? (b) Long Baibel, planti taim yis i makim wanem samting, na dispela i kamapim wanem askim?

⁹ Sampela taim, taim samting i wok long kamap bikpela, ai bilong yumi i no lukim. Jisas i kamapim dispela poin long narapela tok piksa. Em i tok: “Kingdom bilong heven em i olsem yis. Wanpela meri i kisim dispela yis na i tanim wantaim bikpela dram plaua. Na bihain dispela plaua olgeta i solap.” (Mt. 13:33) Yis i makim wanem samting? Na olsem wanem yis em i insait long wok bilong Kingdom i kamap bikpela?

¹⁰ Long Baibel, planti taim yis i makim sin. Aposel Pol i soim olsem yis inap makim sin taim em i stori long wanpela sinman em pasin bilong em i bin bagarapim pasin bilong ol bratasista long kongrigesen long Korin bilong bipo. (1 Ko. 5:​6-8) Olsem na taim Jisas i tok long yis, dispela i makim samting nogut o olsem wanem?

11. Long Israel long bipo, ol i save mekim wanem wok long yis?

¹¹ Paslain long bekim dispela askim, yumi mas tingim 3-pela samting. Namba 1, maski Jehova i no larim ol Israel i mekim wok long yis long taim bilong Pasova, i gat sampela taim na em i orait long ol ofa i gat yis long en. Ol i mekim wok long yis long ol ofa bilong kamap wanbel wantaim God. Man i mekim dispela ofa em i mekim long laik bilong em yet bilong kamapim olsem em i tenkyu long Jehova long ol planti blesing em i bin kisim long Em. Em wanpela kaikai bilong amamas.​​—Wkp. 7:​11-​15.

12. Yumi inap kisim wanem save long wei Baibel i stori long samting i olsem piksa bilong narapela samting?

¹² Namba 2, maski wanpela taim Baibel i tok piksa long samting bilong makim samting nogut, narapela taim, dispela wankain samting inap makim gutpela samting. Olsem: Long 1 Pita 5:​8, Satan i olsem wanpela laion, na dispela i makim pasin bilong em olsem wanpela man nogut i laik bagarapim ol manmeri. Tasol long Kamapim Tok Hait 5:​5, Jisas i olsem wanpela laion​​—em “dispela Laion i bin kamap long lain Juda.” Hia laion i makim pasin bilong strongim bel na mekim pasin i stret.

13. Tok piksa bilong Jisas long yis i makim wanem samting bilong man i kamap disaipel?

¹³ Namba 3, long tok piksa bilong Jisas, em i no tok yis i bagarapim plaua olgeta na nau meri i no inap mekim wok long en, nogat. Em i stori tasol long pasin bilong wokim bret. Meri yet i kisim yis na tanim wantaim plaua, na gutpela samting i kamap. Tasol yis i mekim wok bilong en olsem wanem, dispela meri i no save, dispela samting i hait long ai bilong em. Dispela i kirapim yumi long tingim man i planim pikinini kaikai na long nait em i slip. Jisas i tok “ol dispela pikinini kaikai i kamap na i go bikpela olsem wanem, em dispela man i no save.” (Mk. 4:​27) Dispela i makim olsem man i kamap disaipel bilong Krais na pas gut wantaim God, dispela samting i kamap olsem wanem, em samting yumi no inap lukim long ai! Ating pastaim yumi no lukim ol senis, tasol bihain, yumi lukim ol samting i kamap.

14. Yis i mekim plaua olgeta i solap na dispela i makim wanem samting bilong wok autim tok?

¹⁴ Man i kamap disaipel olsem wanem, em samting yumi no inap lukim, tasol i no dispela samting tasol em tok piksa bilong yis i makim. Em i makim tu olsem wok bilong kamapim disaipel i save kamap long olgeta hap bilong graun. Yis i mekim plaua olgeta, em “bikpela dram plaua,” i solap. (Lu. 13:21) Wok autim tok bilong Kingdom i bin kamapim planti disaipel, na olsem yis, dispela wok i bin go bikpela moa yet na nau em “i go inap long olgeta hap bilong graun.” (Ap. 1:8; Mt. 24:14) Em wanpela gutpela samting tru yumi inap helpim wok bilong Kingdom i kamap bikpela tru!

Umben

15, 16. (a) Stori liklik long tok piksa bilong umben. (b) Umben i makim wanem samting? Planti man i kamap disaipel, tasol wanem samting i bikpela samting moa?

¹⁵ Tru, planti man i kamap disaipel bilong Jisas Krais, tasol samting i bikpela samting moa, em ol i wanem kain disaipel. Jisas i stori long dispela samting bilong Kingdom taim em i mekim narapela tok piksa, em tok piksa bilong umben. Em i tok: “Kingdom bilong heven em i olsem wanpela umben ol i tromoi i go daun long raunwara, na i kisim ol kain kain pis.”​​—Mt. 13:47.

¹⁶ Umben, em i makim wok autim tok bilong Kingdom, em i kisim ol kain kain pis. Jisas i tok moa: “Umben i pulap, orait ol i pulim i kam sua. Na ol i sindaun na bungim ol gutpela gutpela pis long sampela dis. Tasol ol pis nogut ol i tromoi. Long las de bilong dispela graun bai i olsem tasol. Ol ensel bai i kam na kisim ol man nogut i stap namel long ol stretpela man. Na ol bai i tromoi ol i go long bikpela paia. Long dispela paia ol bai i krai nogut na skrapim tit bilong ol.”​​—Mt. 13:​48-​50.

17. Wok bilong tilim ol pis i go tupela lain, em tok piksa bilong umben i stori long en, em i kamap long wanem taim?

¹⁷ Olsem wanem? Dispela wok bilong bungim ol gutpela pis na tromoi ol pis nogut, dispela i makim laspela kot bilong ol sipsip na meme em Jisas i tok bai kamap long taim em i kam bilong mekim kot? Nogat. (Mt. 25:​31-​33) Dispela laspela kot bai kamap taim Jisas i kam long taim bilong bikpela hevi tru. Tasol wok bilong tilim ol gutpela pis na ol pis nogut long tok piksa bilong umben, dispela wok i kamap long taim bilong “las de bilong dispela graun.”b Em dispela taim nau yumi stap long en​​—em pinis bilong en bai kamap long taim bilong bikpela hevi tru. Orait, dispela wok bilong tilim ol pis i wok long kamap olsem wanem long nau?

18, 19. (a) Long nau i gat wanem wok bilong tilim ol man? (b) Ol man i gat gutpela bel ol i mas mekim wanem? (Lukim tu futnot long pes 21.)

¹⁸ Long taim bilong yumi, planti milion manmeri i kain olsem pis ol i bin kam long kongrigesen bilong Jehova. Sampela i kam long Memorial, na sampela i kam long ol miting bilong yumi, na sampela i orait long stadi wantaim yumi long Baibel. Tasol olsem wanem? Olgeta i kamap Kristen tru? Tru, i olsem ol i “kam sua,” tasol Jisas i tok ol ensel bai bungim “ol gutpela pis” tasol long ol dis, em ol dis i makim ol kongrigesen Kristen. Ol pis nogut ol i tromoi, na bihain ol bai go long bikpela paia em i makim bagarap na pinis olgeta.

¹⁹ Kain olsem ol pis nogut, planti man em bipo ol i bin stadi wantaim lain bilong Jehova long Baibel, ol i bin lusim stadi. Sampela, em papamama bilong ol i Kristen, i no gat wanpela taim ol i gat laik tru long kamap disaipel bilong Jisas. Ol i no laik pasim tok long bel long mekim wok bilong Jehova, o ating ol i bin mekim olsem inap liklik taim, tasol ol i no mekim moa.c (Ese. 33:​32, 33) Olsem na paslain long laspela de bilong kot, olgeta man i gat gutpela bel ol i mas larim ol ensel i kisim ol i kam long ol kongrigesen i kain olsem dis na stap long ples bilong i stap gut.

20, 21. (a) Yumi bin kisim wanem save long ol tok piksa bilong Jisas long ol samting i kamap bikpela? (b) Yu gat strongpela tingting long mekim wanem?

²⁰ Orait, yumi bin lainim wanem samting long ol tok piksa bilong Jisas long samting i kamap bikpela? Namba 1, olsem pikinini bilong mastet i bin kamap na i go bikpela, planti manmeri moa yet i bin kisim tok bilong Kingdom. I no gat wanpela samting inap pasim wok bilong Jehova! (Ais. 54:17) Na tu, ol man i bin “kam long ol han bilong [diwai],” God i lukautim ol na ol i stap gut. Namba 2, em God tasol i save mekim samting i kamap bikpela. Olsem yis, em meri i no inap lukim insait long plaua na i mekim plaua olgeta i solap, sampela taim yumi no save gut long olsem wanem wok bilong Kingdom i bin kamap bikpela! Namba 3, i no olgeta manmeri i harim tok bilong Kingdom i stap olsem gutpela pis. Sampela i bin kamap kain olsem ol pis nogut em Jisas i bin tok piksa long en.

²¹ Tasol em i gutpela samting tru long lukim planti man i gat gutpela bel i kam long Jehova! (Jo. 6:​44) Dispela i bin mekim na lain disaipel i go bikpela hariap long planti kantri. God Jehova yet i mas kisim biknem long ol dispela samting, long wanem, em yet i mekim dispela samting i kamap. Yumi lukim pinis dispela samting, na dispela i mas kirapim yumi olgeta long bihainim tok Solomon i bin raitim planti handet yia i go pinis: “Yu mas planim sampela lain kaikai long moningtaim na sampela long apinun tu. Yu no inap save, lain kaikai yu planim long moning o lain kaikai bilong apinun tasol bai i kamap gut, o tupela lain wantaim bai i kamap gut.”​​—Sav. 11:6.

[Ol Futnot]

Bai Yu Bekim Olsem Wanem?

• Long tok piksa bilong Jisas long pikinini mastet, yumi lainim wanem samting long wok bilong Kingdom i go bikpela na yumi stap gut?

• Yis long tok piksa bilong Jisas i makim wanem samting? Wanem samting long wok bilong Kingdom i kamap bikpela em Jisas i kamapim klia?

• Wanem samting long wok bilong Kingdom i kamap bikpela i kamap ples klia long tok piksa bilong umben?

• Yumi mas mekim wanem na bai yumi ken stap namel long ol lain i stap insait long “ol dis”?

[Ol Piksa long pes 18]

Tok piksa bilong pikinini mastet i lainim yumi long wanem samting bilong wok bilong Kingdom i kamap bikpela?

[Piksa long pes 19]

Yumi lainim wanem samting long tok piksa bilong yis?

[Piksa long pes 21]

Wok bilong tilim gutpela pis na pis nogut i go tupela lain, i makim wanem samting?