Kamapim Gut Tim Bilong Tok

OL BRATA i save gut long mekim tok ol i save em i bikpela samting long kamapim wanpela tim bilong tok. Taim ol i wok long redim wanpela tok na ol i tingim tim bilong en, dispela i save helpim ol long tingting long tok i stret tru long dispela tim na i helpim ol long tingting gut long en. Long dispela rot ol i no stori antap antap long ol planti tok, nogat, ol i kamapim ol tok long pasin i helpim tru odiens. Taim olgeta wan wan bikpela tok i stori stret long tim na i wok long kamapim gut dispela tim, dispela i save helpim odiens long holim ol bikpela tok long tingting na i helpim ol long save olsem wanem ol dispela tok em i bikpela samting.

Tru, yumi ken tok olsem tim em i samting yu stori long en, tasol ol tok yu mekim bai kamap gutpela moa sapos yu kisim tingting olsem tim em i olsem wanpela bikpela tingting yu laik kamapim taim yu wok long kamapim samting yu laik stori long en. Kingdom, Baibel, na kirap bek em ol samting yumi save stori long en. Yumi inap kamapim kain kain tim long ol dispela stori. Olsem: “Kingdom Em i Wanpela Gavman Tru,” “Kingdom Bilong God Bai Kamapim Paradais,” “Spirit Bilong God i As Bilong Ol Tok Bilong Baibel,” “Baibel Em i Gutpela Stia Long Taim Bilong Yumi,” “Kirap Bek​—Em Gutpela Samting Ol Man i Krai Sori Ol i Ken Wetim,” na “Bilip Bilong Kirap Bek i Helpim Yumi Long Sanap Strong Taim Ol Man i Mekim Nogut Long Yumi.” Insait long tok yu mas wok long kamapim ol dispela tim long ol narapela narapela kain pasin.

Wok autim tok Jisas Krais i bin mekim taim em i stap long graun i stret wantaim nambawan tim bilong Baibel, na em i kamapim dispela tim, olsem: “Kingdom bilong heven em i kam klostu pinis.” (Mt. 4:17) Em i kamapim dispela tim olsem wanem? Winim 110 taim long 4-pela Gutnius, ol i mekim sampela tok bilong dispela Kingdom. Jisas i kolim dispela tok “kingdom” planti taim, tasol em i mekim sampela samting moa. Long rot bilong ol samting em i lainim ol man long en na ol mirakel em i wokim, Jisas i kamapim long ples klia olsem em i Pikinini bilong God, na em i Mesaia, em man Jehova bai givim Kingdom long en. Na tu, Jisas i soim olsem long rot bilong em rot i op bilong sampela moa i ken wok wantaim em long dispela Kingdom. Em i makim ol pasin ol man i mas bihainim bilong kisim dispela gutpela wok. Long rot bilong ol samting em i lainim ol man na ol strongpela wok em i mekim, em i kamapim klia ol samting Kingdom bilong God bai mekim long sindaun bilong ol man; na em i soim olsem taim em i rausim ol spirit nogut long rot bilong spirit bilong God, “kingdom bilong God i kam pinis” long ol man i harim tok bilong em. (Lu. 11:20) Em dispela Kingdom Jisas i tokim ol disaipel long autim tok long en.​—Mt. 10:7; 24:14.

Kisim Wanpela Tim i Stret Long Tok. Yu no gat wok long kamapim wanpela tim i go i go inap long mak olsem Baibel i mekim, tasol em i bikpela samting long kisim wanpela tim i stret long tok bilong yu.

Sapos em i wok bilong yu long makim tim bilong tok, pastaim tingim wanem wok bilong dispela tok. Orait taim yu wok long makim ol bikpela tok em ol bai stap olsem autlain bilong yu, skelim gut olsem ol dispela bikpela tok i save helpim tim bilong tok yu bin makim o nogat.

Sapos ol i makim pinis tim bilong tok bilong yu, orait skelim gut olsem dispela tim i makim wanem kain pasin yu mas bihainim bilong kamapim ol tok yu mas stori long en. Ating yu mas wok hat long pilim tru gutpela wok dispela tim bilong tok inap mekim. Sapos yu mas painim ol tok insait long ol buk samting bilong kamapim dispela tim ol i makim bilong yu, orait skelim na makim gut ol dispela tok na bai ol i stret wantaim tim bilong tok. Tasol sapos ol i makim ol buk samting bilong painim ol tok bilong kamapim, orait yu mas skelim gut olsem wanem yu bai kamapim ol dispela tok long pasin i stret wantaim tim. Yu mas tingim tu, bilong wanem ol dispela tok em i bikpela samting long odiens na wanem wok bilong dispela tok yu kamapim. Dispela bai helpim yu long save wanem tok yu mas kamapim strong taim yu mekim tok.

Pasin Bilong Kamapim Strong Tim. Bilong kamapim strong tim bilong tok, pastaim yu mas makim gut wanem ol tok yu laik kamapim na stretim gut dispela. Sapos yu kamapim ol tok i save helpim tim bilong tok tasol na yu bihainim ol lo bilong redim wanpela gutpela autlain, long dispela rot bai yu kamapim strong tim bilong tok na yu no gat hatwok liklik long mekim.

Pasin bilong kolim gen tok i ken strongim tim bilong tok. Yumi ken tok piksa olsem: Olgeta singsing i gat nek bilong ol yet. Ol bai pilaim gen dispela nek inap planti taim insait long singsing. Sampela taim ol bai pilaim gen hap tasol bilong dispela nek o ol bai senisim liklik. Tasol ol man i harim ol i save em dispela singsing tasol. Yumi laik bai tim bilong tok i wankain. Yumi kolim gen ol bikpela tok bilong tim, o yumi kolim sampela tok mining bilong ol i wankain olsem ol tok i stap long tim. Taim yumi mekim olsem, orait taim tok i pinis, nambawan bikpela tok bai stap long tingting bilong odiens, em tim bilong tok.

Yu ken bihainim ol dispela tok taim yu mekim ol tok long pletfom na taim yu autim tok long ol man. Sapos yu kamapim klia tim bilong tok, ol man bai tingim dispela inap longpela taim, maski yu toktok wantaim ol sotpela taim tasol. Sapos yu kamapim strong wanpela tim bilong tok, bai i no hatwok long man i tingim gen gutpela tok yu givim long em taim yu mekim Baibel-stadi wantaim em. Sapos yu wok strong long makim na kamapim ol gutpela tim, dispela bai helpim wok bilong yu long mekim ol tok na wok bilong yu olsem tisa bilong Tok Bilong God.