I Stap na Wok Bilong Jisas

Bret na Yis

BIKPELA lain i kam bung long hap bilong Dekapolis bilong lukim Jisas. Planti ol i bin wokabaut longwe i kam long dispela hap em planti man bilong ol narapela lain i sindaun long en. Ol i kam bilong harim tok bilong Jisas na em i ken oraitim sik bilong ol. Ol i karim ol bikpela basket kaikai i kam, long wanem ol i kam namel long ol man bilong ol narapela lain.

Tasol sampela de bihain kaikai bilong ol i pinis na Jisas i tokim ol disaipel: “Mi sori long dispela ol manmeri. Ol i stap wantaim mi inap tripela de pinis, na ol i no gat kaikai. Na sapos ol i stap hangre na mi salim ol i go long haus bilong ol, bai ai bilong ol i raun na ol i pundaun long rot. Sampela ol i bin wokabaut longwe na i kam.”

Ol disaipel i tok: “Dispela hap i no gat man. Na bai yumi inap kisim bret we na yumi givim kaikai long ol?”

Jisas i askim ol, “Yupela i gat hamas bret i stap?”

Ol i tok, “Mipela i gat 7-pela bret na ol wan wan liklik pis.”

Jisas i tokim ol manmeri long sindaun, na nau em i beten na brukim ol bret na pis na givim long ol disaipel, na ol i tilim long ol manmeri na olgeta i kaikai na i pulap. Inap 4,000 man i kaikai, na ol i no kaunim ol meri na pikinini. Tasol taim ol i bungim ol liklik hap kaikai i stap yet, ol i pulimapim 7-pela basket!

Jisas i salim ol manmeri i go, na em i kalap long bot wantaim ol disaipel, na ol i go long hap bilong wes bilong raunwara Galili. Taim em i kamap pinis, ol Farisi na ol Sadyusi i kam na ol i laik traim em. Ol i tokim em long wokim wanpela mirakel bilong makim olsem em i mekim wok bilong God.

Jisas i save ol i laik traim em, olsem na em i tok: “Long apinun yupela i save tok, ‘Skai i retpela. Bai gutpela taim nau.’ Na long moningtaim yupela i save tok, ‘Klaut i blak na skai i retpela. Olsem na nau bai i gat win na ren.’ Yes, yupela i save lukim ol mak bilong skai na skelim gut. Tasol yupela i no save lukim na skelim ol mak bilong dispela taim nau.”

Jisas i tok ol i lain nogut na ol i no givim bel tru long God. Na em i givim wankain tok long ol olsem em i bin givim long ol Farisi long bipo. Em i tok, ol bai lukim wanpela mak tasol, em mak bilong profet Jona. Jisas i lusim ol na em wantaim ol disaipel i kalap long bot gen na i go long Betsaida, long hap bilong not long raunwara Galili. Ol disaipel i lusim tingting na ol i no kisim bret i go wantaim ol; ol i gat wanpela bret tasol i stap long bot.

Jisas i tingim ol samting i bin kamap taim ol Farisi na Sadyusi (em ol i lain bilong Herot) i laik traim em, na em i tokim ol disaipel: “Yupela lukaut long yis bilong ol Farisi na long yis bilong Herot.” Ol disaipel i toktok namel long ol yet olsem, ‘Ating em i mekim dispela tok, long wanem yumi no bin kisim bret i kam.’ Jisas i save long dispela toktok ol i mekim, olsem na em i tok: “Bilong wanem yupela i toktok nabaut olsem, ‘Yumi no gat bret’?”

Long hap asde tasol Jisas i bin wokim wanpela mirakel na givim bret long planti tausen manmeri, olsem na ol disaipel i mas save Jisas i no tingim bret tru. Em i tokim ol: “Yupela i lusim tingting pinis, a? Taim mi brukim 5-pela bret long ol 5,000 man, yupela i pulapim hamas basket long hap bret i stap yet?”

Ol i tok: “12-pela.”

Orait Jisas i tok: “Na taim mi brukim 7-pela bret long ol 4,000 man, yupela i pulapim hamas basket?”

Ol i tok: “7-pela.”

Jisas i tok: “Yupela i no save yet, a?” “Yupela i no save olsem, mi no tingting long bret na mi givim tok long yupela? Mi tok, yupela i mas lukaut gut long yis bilong ol Farisi na ol Sadyusi.”

Nau ol disaipel i kisim gut tok bilong Jisas. Jisas i tok piksa long yis bilong makim samting i nogut. Olsem na nau ol disaipel i save, em i tokim ol ol i mas was gut long “tok bilong ol Farisi na ol Sadyusi,” long wanem tok bilong ol i nogut na em inap paulim tingting bilong ol man. Mak 8⁠:​1-21; Matyu 15⁠:​32–16:⁠12.

◆ Bilong wanem ol manmeri i kisim ol bikpela basket kaikai i kam wantaim ol?

◆ Jisas i lusim hap bilong Dekapolis na i go long wanem hap?

◆ Taim Jisas i stori long yis, tingting bilong ol disaipel i paul olsem wanem?

◆ Taim Jisas i tok long “yis bilong ol Farisi na ol Sadyusi” em i tok long wanem samting tru?