Yu Redi Long Kamap Man Bilong Kisim Ol Manmeri?

 1. Jisas i singautim 4-pela man bilong kisim pis long mekim wanem, na ol i mekim wanem?

OL DISAIPEL em Pita, Andru, Jems, na Jon, ol i save wok bisnis long kisim pis. Tingim samting ol i pilim taim Jisas i singautim ol olsem: “Kam bihainim mi, bai mi mekim yupela ol man bilong kisim pis i kamap ol man bilong kisim ol manmeri.”b Ol i mekim wanem? Baibel i tok: “Kwiktaim ol i lusim umben bilong ol na bihainim em.” (Mat. 4:18-22) Dispela disisen i senisim tru laip bilong ol. Nau ol i no kisim pis moa, ol i “wok long kisim ol man.” (Luk 5:10) Long nau, Jisas i mekim wankain singaut long ol man i gat gutpela bel na ol i laikim tok i tru. (Mat. 28:19, 20) Yu bin orait long singaut bilong Jisas long kamap man bilong kisim ol manmeri?

 2. (a) Wai na yumi mas skelim gut disisen yumi mekim bilong kamap pablisa bilong autim gutnius? (b) Wanem samting bai helpim yumi long mekim dispela disisen?

² Ating yu wok long stadi long Baibel na mekim ol senis na nau yu wokim disisen olsem yu laik kamap wanpela pablisa bilong autim gutnius. Sapos yu surik long bihainim singaut bilong Jisas, no ken bel hevi long dispela. Ating yu surik long mekim olsem bikos yu luksave olsem em wanpela bikpela samting tru. Tru Baibel i tok Pita na ol poroman bilong em i lusim umben “kwiktaim.” Tasol Pita na brata bilong em i bin skelim gut paslain long ol i mekim dispela disisen. Ol i bin kisim save long Jisas na bilip long em olsem Mesaia inap 6-pela mun paslain long dispela. (Jon 1:35-42) Olsem tasol, ating yu bin kisim save long Jehova na Jisas na nau yu laik pas gut moa wantaim Jehova. Tasol yu no ken mekim dispela disisen hariap, yu mas skelim gut. Wanem samting i helpim Pita, Andru, na ol narapela long mekim disisen?

 3. Wanem ol pasin bai strongim laik bilong yu long bihainim singaut bilong Jisas?

³ Ol disaipel bilong Jisas long bipo, ol i gat laik long mekim samting, ol i gat save, ol i gat strongpela bel, na ol i bosim bel. Ol dispela pasin i bin helpim ol gut long kamap man bilong kisim ol manmeri. Dispela atikol bai stori long hau yu ken kisim ol dispela pasin na bai yu ken mekim gut wok bilong autim gutnius na skulim ol man.

 4. Wanem samting i kirapim Pita long kamap man bilong kisim pis?

⁴ Pita i save kisim pis bambai em i ken sapotim famili bilong em, na dispela i no wanpela wok tasol. Pita i save laikim tru wok bilong kisim pis. (Jon 21:3, 9-15) Olsem na em i laikim tu wok bilong kisim ol manmeri. Jehova i sapotim em na em i mekim gut tru dispela wok.—Apo. 2:14, 41.

 5. (a) Olsem Luk 5:8-11 i stori, bilong wanem Pita i pret? (b) Wanem samting inap helpim yumi long daunim pret?

⁵ Yumi autim tok bikos yumi laikim Jehova; dispela em nambawan risen i kirapim yumi long mekim dispela wok. Pasin bilong yumi long laikim Jehova bai helpim yumi long daunim ol tingting kranki olsem yumi no gat save inap long mekim dispela wok. Taim Jisas i singautim Pita long kamap man bilong kisim ol man, em i tokim Pita: “No ken pret.” (Ritim Luk 5:8-11.) Pita i no pret long wanem samting bai kamap sapos em i kamap disaipel. Tasol em i kirap nogut long mirakel Jisas i bin mekim na ol i kisim planti pis tru, na Pita i pilim olsem em i no gutpela man inap long wok wantaim Jisas. Ating yu tu bai pilim hatwok taim yu luksave long ol samting yu mas mekim bilong stap olsem disaipel bilong Krais. Sapos olsem, strongim pasin bilong yu long laikim Jehova, Jisas, na ol narapela, na dispela bai kirapim yu long bihainim singaut bilong Jisas long kamap man bilong kisim ol manmeri.—Mat. 22:37, 39; Jon 14:15.

 6. I gat wanem ol narapela risen na yumi autim tok?

⁶ Skelim sampela narapela risen we i kirapim yumi long autim tok. Yumi laik bihainim tok bilong Jisas olsem: “Yupela i mas i go na kamapim ol disaipel.” (Mat. 28:19, 20) Na tu, yumi autim tok bikos ol manmeri “i stap nogut tru olsem ol sipsip i no gat wasman.” (Mat. 9:36) Jehova i laik bai olgeta kain man i kisim stretpela save long tok i tru na bai em i kisim bek ol.—1 Tim. 2:4.

 7. Olsem wanem tok bilong Rom 10:13-15 i soim olsem wok autim em i bikpela samting?

⁷ Yumi bai amamas long mekim dispela wok taim yumi save olsem wok autim tok bilong yumi inap helpim man long kisim laip. Ol man bilong kisim pis i save salim pis o kaikai pis em ol i kisim, tasol yumi save kisim ol manmeri bilong seivim laip bilong ol.—Ritim Rom 10:13-15; 1 Tim. 4:16.

8-9. Man bilong kisim pis i mas save long wanem samting, na bilong wanem?

⁸ Long taim bilong Jisas, man bilong kisim pis—em man Israel—i mas save long wanem kain pis em inap kisim. (Wkp. 11:9-12) Em i mas save tu long wanem hap pis bai stap. Ol pis i save stap long wara ol i laikim na hap we i gat planti kaikai. Taim bilong de we man bilong kisim pis i go bilong kisim pis, dispela tu em bikpela samting. Bilong save long wanem gutpela taim bilong kisim pis, lukim tok em wanpela brata long wanpela Pasifik ailan i mekim taim em i invaitim wanpela misineri long go kisim pis wantaim em. Misineri i tok: “Bai mi bungim yu tumoro long 9 o’klok.” Brata i tok: “Yu no save. Mipela i save go kisim pis long rait taim bilong ol pis, i no long taim mipela i ting em i rait taim.”

⁹ Olsem tasol, ol man bilong kisim ol manmeri long taim bilong ol aposel, ol i save go long ol hap we ol manmeri bai stap long en na long taim we ol bai stap. Olsem, ol disaipel bilong Jisas i save autim tok long ol tempel na long ol sinagog, na long ol haus, na long ol ples maket. (Apo. 5:42; 17:17; 18:4) Yumi tu i mas kliagut long wanem taim ol manmeri i save stap long haus. Yumi mas redi long senisim ol sediul bilong yumi bambai yumi ken autim tok long taim na ples we ol manmeri i stap long en.—1 Kor. 9:19-23.

10. Oganaisesen bilong Jehova i givim wanem ol tul long yumi?

¹⁰ Man bilong kisim pis i mas i gat ol rait tul na em i mas save hau long yusim. Olsem tasol, yumi tu i mas i gat ol rait tul long autim tok. Na yumi mas save hau long yusim. Jisas i skulim gut ol disaipel bilong em long pasin bilong autim tok. Em i tokim ol long samting ol i mas karim, wanem hap ol i mas autim tok, na wanem tok ol i mas mekim. (Mat. 10:5-7; Luk 10:1-11) Long nau, oganaisesen bilong Jehova i kamapim Ol Tul Bilong Skulim Man, em ol tul we i wok gut tru.c Na yumi bin kisim skul long hau yumi ken yusim ol dispela tul. Dispela skul i helpim yumi long strongim bel na lain long kamap gutpela tisa moa.—2 Tim. 2:15.

11. Bilong wanem ol man bilong kisim ol manmeri i mas strongim bel?

¹¹ Ol man bilong wok bisnis long kisim pis, ol i mas i gat strongpela bel. Sampela taim ol i save bungim taim nogut long solwara. Planti taim ol i save wok long nait na long solwara we i gat ol strongpela win na ren. Ol man bilong kisim ol manmeri i mas strongim bel. Taim yumi stat long autim tok na kamapim klia olsem yumi Witnes Bilong Jehova, yumi inap bungim taim nogut olsem, famili i birua long yumi, ol pren i tok bilas long yumi, na ol narapela i no laik harim tok yumi autim. Tasol yumi no kirap nogut long dispela. Jisas i bin tok lukaut olsem em bai salim ol disaipel bilong em i go autim tok long ol man husat bai sakim ol.—Mat. 10:16.

12. Olsem Josua 1:7-9 i kamapim, wanem samting bai helpim yumi long kisim pasin bilong strongim bel?

¹² Olsem wanem yu inap kisim pasin bilong strongim bel? Namba wan samting, yu mas bilip tru olsem Jisas i stap long heven na em i wok yet long stiaim wok autim tok. (Jon 16:33; Rev. 14:14-16) Namba tu samting, strongim bilip bilong yu long tok promis bilong Jehova olsem em bai lukautim yu. (Mat. 6:32-34) Taim bilip bilong yu i kamap strong, yu bai i gat strongpela bel moa. Pita na ol poroman bilong em i soim olsem ol i gat strongpela bilip taim ol i lusim wok bisnis bilong ol long kisim pis na ol i bihainim Jisas. Olsem tasol, yu soim olsem yu gat strongpela bilip taim yu tokim ol pren na famili bilong yu olsem yu stadi long Baibel wantaim ol Witnes Bilong Jehova na yu wok long go long ol miting bilong ol! Na yu mekim ol bikpela senis tru long pasin na sindaun bilong yu bambai yu ken bihainim ol stretpela lo bilong Jehova. Bilip na pasin bilong strongim bel i kirapim yu long mekim olsem. Taim yu wok yet long kisim pasin bilong strongim bel, yu ken bilip tru olsem “Jehova, God bilong yu, bai stap wantaim yu long olgeta hap yu go long en.”—Ritim Josua 1:7-9.

13. Olsem wanem pasin bilong beten na tingim tingim ol samting long bel inap helpim yu long strongim bel?

¹³ Wanem narapela rot yu inap kisim pasin bilong strongim bel? Beten long kisim pasin bilong strongim bel. (Apo. 4:29, 31) Jehova bai harim ol beten bilong yu na em i no inap lusim yu. Oltaim em i stap bilong sapotim yu. Na tu, yu ken tingim tingim long bel hau Jehova i bin lukautim ol narapela long bipo. Tingim tu hau em i bin helpim yu long taim bilong hevi na em i givim yu strong long mekim ol senis long sindaun bilong yu. Tru tumas, dispela God husat i bin kisim lain bilong em i go brukim Solwara Retsi, em inap helpim yu long kamap disaipel bilong Krais. (Kis. 14:13) Holimpas wankain bilip olsem man bilong raitim song i tok: “Jehova i stap long sait bilong mi; olsem na mi no inap pret. Ol man bai mekim wanem long mi?”—Sng. 118:6.

14. Yu kisim wanem skul long stori bilong Masae na Tomoyo?

¹⁴ Narapela rot bilong kisim pasin bilong strongim bel em long kisim skul long hau Jehova i bin helpim ol narapela em ol i gat pasin bilong sem, tasol ol i lain long strongim bel. Tingim stori bilong wanpela sista nem bilong em Masae. Em i sem na em i pilim olsem em i no inap tokaut long bilip bilong em long ol narapela. Em i pilim olsem i hatwok tru long toktok long ol narapela em i no save long ol, dispela i olsem wanpela banis i go antap tru we em i no inap kalapim. So em i wok strong tru long strongim pasin bilong em long laikim God na ol narapela. Em i tingim olsem em i bikpela samting long autim tok bikos taim i sot pinis na em i beten long kisim laik bilong autim tok. Em i daunim pasin bilong pret na em i mekim wok painia oltaim. Jehova i ken helpim ol nupela pablisa long “strongim bel.” Tingim stori bilong wanpela sista, nem bilong em Tomoyo. Taim em i kirap long autim tok long ol haus, meri long fes haus em i go long en i bikmaus olsem: “Mi no laik toktok wantaim ol Witnes Bilong Jehova!” na em i pasim dua strong. Tomoyo i no pret na em i tokim poroman bilong em: “Yu harim dispela? Mi no mekim wanpela tok, na em i luksave olsem mi Witnes Bilong Jehova. Mi amamas tru!” Nau Tomoyo i mekim wok painia oltaim.

15. (a) Pasin bilong bosim bel i makim wanem samting? (b) Bilong wanem ol Kristen i mas kisim dispela pasin?

¹⁵ Ol man bilong painim pis ol i save bosim bel. Pasin bilong bosim bel i makim “pasin bilong subim yu yet long mekim ol samting em yu mas mekim.” Ol man bilong painim pis i mas subim ol yet long kirap long bikmoning, na wok inap long wok i pinis, na ol i mas wok yet maski weda i bagarap. Yumi tu i mas gat pasin bilong bosim bel sapos yumi laik sanap strong na pinisim gut wok bilong yumi.—Mat. 10:22.

16. Wanem samting inap helpim yumi long mekim ol samting i hatwok long mekim?

¹⁶ Yumi no kisim pasin bilong bosim bel taim mama i karim yumi. Na oltaim bel i save kirapim yumi long mekim ol samting i isi long mekim. Tasol sampela taim ol bikpela samting yumi mas mekim, ol i no isi long mekim, so yumi mas lain long bosim bel. Olsem na yumi mas kisim helpim long trenim yumi yet long mekim ol samting i hatwok long mekim. Jehova i givim yumi dispela helpim long rot bilong holi spirit.—Gal. 5:22, 23.

17. Olsem 1 Korin 9:25-27 i kamapim, aposel Pol i tok em i save mekim wanem bilong bosim bel?

¹⁷ Aposel Pol i gat pasin bilong bosim bel. Tasol em i tokaut olsem em i mas “paitim tru” bodi bilong em bambai em i ken mekim ol samting i stret. (Ritim 1 Korin 9:25-27.) Em i tokim ol narapela long bosim bel bilong ol yet na mekim olgeta samting “i mas wok stret na i ron gut.” (1 Kor. 14:40) Yumi mas kisim pasin bilong bosim bel bambai yumi ken mekim yet ol wok lotu bilong yumi na oltaim insait long wok autim tok.—Apo. 2:46.

18. Wanem samting bai mekim na Jehova i tingim olsem wok bilong yumi i kamap gut?

¹⁸ Man bilong kisim pis i save wok bilong em i kamap gut taim em i kisim planti pis. Tasol long wok autim tok, maski sapos yumi helpim planti man long kam insait long oganaisesen bilong God, dispela i no makim olsem wok bilong yumi i kamap gut o nogat. (Luk 8:11-15) Taim yumi sanap strong yet long autim gutnius na skulim ol narapela, Jehova bai tingim olsem wok bilong yumi i kamap gut. Bilong wanem? Long wanem, yumi bihainim tok bilong em na bilong Pikinini bilong em.—Mak 13:10; Apo. 5:28, 29.

19-20. I gat wanem as na yumi mas autim tok long nau?

¹⁹ Long sampela kantri, ol man bilong kisim pis inap kisim pis insait long sampela mun tasol. Long kain kantri olsem, taim sisen bilong kisim pis i laik pinis, man bilong kisim pis bai wok hat moa long kisim pis. Yumi ol man bilong kisim ol manmeri, as na yumi mas wok strong moa yet long autim tok long nau em: Pinis bilong dispela haptaim i kam klostu tru! Liklik haptaim tasol i stap bilong autim gutnius we inap seivim laip bilong ol man. No ken wet o ting olsem olgeta samting long sindaun bilong yu bai gutpela pastaim na nau yu ken insait long dispela bikpela wok.—Ekl. 11:4.

²⁰ Mekim ol samting nau bilong strongim laik bilong yu long mekim samting, kisim sampela save moa long Baibel, kisim pasin bilong strongim bel, na wok yet long bosim bel. Wok wantaim winim 8 milion manmeri bilong autim gutnius, na yu bai pilim amamas em Jehova i save givim. (Neh. 8:10) Strongim tingting long autim tok yet i go inap long taim Jehova i tok wok i pinis. Atikol i kamap bihain bai stori long 3-pela rot we yumi ken strongim laik bilong yumi long autim tok bilong Kingdom olsem ol man bilong kisim ol manmeri.