Krais i Bin Kamap Narakain—Dispela i Mekim Wanem Long Yu?
Nau tasol 4-pela man i wokabaut i go antap long wanpela maunten i antap moa. Taim ol i stap long maunten wanpela narapela kain samting i kamap. Tripela disaipel bilong Krais Jisas ol i kirap nogut, long wanem ol i lukim bodi bilong Jisas i senis na i kamap narapela kain. Mak i raitim stori bilong dispela samting, olsem:
“JISAS i kisim Pita na Jems na Jon, na em i bringim ol i go long wanpela maunten i antap moa. Na ol tasol i stap. Na taim ol i lukluk i stap, bodi bilong Jisas i senis na em i kamap narakain. Ol laplap samting bilong en i kamap olsem lait, na i waitpela tru. I no gat wanpela man long graun em inap long mekim laplap i kamap waitpela olsem. Na Elaija wantaim Moses tupela i kamap, na ol disaipel i lukim tupela i toktok wantaim Jisas. Pita i lukim dispela na em i tokim Jisas olsem, ‘Tisa, yumi stap hia, em i gutpela. Mipela i ken wokim tripela haus win, wanpela bilong yu na wanpela bilong Moses na wanpela bilong Elaija.’ Pita i tok olsem, long wanem, ol i pret tru, na Pita em i no save, bai em i mekim wanem tok. Orait wanpela klaut i kamap na i karamapim ol. Na wanpela maus insait long dispela klaut i tok olsem, ‘Dispela em i Pikinini bilong mi, mi laikim em tumas. Yupela harim tok bilong em.’ Na wantu tasol ol disaipel i lukluk nabaut, na ol i no lukim narapela man. Jisas wanpela tasol i stap wantaim ol.”—Mak 9:2-8.
Olaman! Pes bilong Jisas i lait olsem san. (Matyu 17:2) Na laplap bilong em i kamap waitpela olsem lait—“i no gat wanpela man long graun em inap long mekim laplap i kamap waitpela olsem.” Na ol i harim nek bilong God yet i singaut na i tok, Jisas em i Pikinini bilong em. Em narapela kain samting tru!
Insait bilong hap tok Grik ol i tanim olsem ‘senis na kamap narakain’ i olsem “senis na kamap narapela kain samting.” Dispela tok i stap tu long Rom 12:2, em dispela ves i tok ol Kristen i mas senisim tingting bilong ol na bai tingting na pasin bilong ol i “kamap nupela.”—Buk An Expository Dictionary of New Testament Words, bilong W. E. Vine, Volyum 4, pes 148.
Tru tumas, dispela samting i kamap bihain liklik long bung bilong Pasova long yia 32, olsem bodi bilong Jisas i senis, em i narapela kain samting tru. Wanem ol samting i bin kamap paslain long dispela mirakel? Dispela samting i bin painim Jisas i gat wok bilong en o nogat? Bilong wanem Moses na Elaija i insait long en? Jisas i bin kamap narapela kain na dispela i mekim wanem long yu?
Ol Samting i Kamap Pastaim
Paslain long taim Jisas na ol disaipel bilong em i go antap long maunten, ol i bin i stap long hap bilong Sisaria Filipai. Dispela taun i stap longwe long maunten Hermon inap olsem 25 kilomita, olsem na ating ol i bin go antap long wanpela hap bilong dispela maunten i antap moa na nau bodi bilong Jisas i senis na kamap narapela kain.
Taim ol i wokabaut i go long dispela “maunten i antap moa,” Jisas i askim ol disaipel bilong em, olsem: “Ol manmeri i save tok, mi husat tru?” Ol disaipel i tokim em: “Sampela ol i save tok, yu Jon Bilong Baptais. Na sampela i tok, yu Elaija. Na sampela i save tok, yu wanpela profet.” Na Jisas i askim ol: “Yupela yet i tok mi husat?” Pita i bekim tok olsem: “Yu dispela man God i bin makim bilong kisim bek ol manmeri bilong en.” Nau “Jisas i tambuim ol long ol i no ken tokim wanpela man long em i husat tru. Orait Jisas i stat long skulim ol disaipel olsem, ‘Pikinini Bilong Man em i mas karim planti pen, na ol hetman na ol bikpris na ol saveman bilong lo bai ol i givim baksait long em na kilim em i dai. Na long de namba 3 bai em i kirap bek.’ ”—Mak 8:27-31.
Nau Jisas i mekim wanpela tok promis, olsem: “Mi tok tru long yupela, sampela man i sanap hia bai ol i no i dai yet, na bai ol i lukim kingdom bilong God i kamap wantaim bikpela strong bilong en.” (Mak 9:1; Matyu 16:28) Inap olsem “6-pela de” bihain truim bilong dispela tok promis i kamap long taim Jisas i beten na bodi bilong em i senis na i kamap narapela kain na Pita na Jems na Jon ol i lukim. Luk i tok dispela samting i kamap “8-pela de bihain.” Ating Luk i tingim de Jisas i bin mekim dispela tok promis, na de truim bilong en i kamap, na 6-pela de namel long dispela tupela de na em olsem 8-pela de olgeta.—Matyu 17:1, 2; Mak 9:2; Luk 9:28.
Dispela Samting i Bin Kamap Tru
Tripela aposel bilong Jisas ol i no slip na lukim dispela samting long driman. Nogat. Tripela wantaim i no inap kisim wankain driman. Long Matyu 17:9, Jisas i tok ol i bin “lukim” dispela samting. Hap tok Grik ol i tanim olsem “lukim” long dispela ves, long sampela ves bilong Baibel, dispela tok i makim samting man i ‘lukim tru long ai.’ (Aposel 7:31) Olsem na 3-pela i no slip na ol inap lukim na harim tru ol samting i bin kamap.—Luk 9:32.
Pita i no slip, tasol em i no save wanem kain tok em i mas mekim, olsem na em i tok long wokim tripela haus win—wanpela bilong Jisas na wanpela bilong Moses na wanpela bilong Elaija. (Luk 9:33) Taim Pita i wok long toktok, wanpela klaut i kamap na i karamapim ol. Ating dispela klaut i makim olsem God i stap long dispela maunten, wankain olsem long taim klaut i karamapim haus lotu sel bilong ol Israel. (Kisim Bek 40:34-38; Luk 9:34) Na yumi save, ol aposel i no ken slip taim “God Papa” i tok: “Dispela em i Pikinini bilong mi. Mi makim em pinis bilong mekim wok bilong mi. Yupela harim tok bilong em.”—2 Pita 1:17, 18; Luk 9:35.
Bilong Wanem Ol i Lukim Moses?
Taim bodi bilong Jisas i senis na i kamap narapela kain, Moses “i no inap save long wanpela samting,” long wanem em i dai pinis planti handet yia bipo. (Saveman 9:5, 10) Long dispela taim em i stap yet long matmat, olsem Devit. God i no bin kirapim bek em, olsem na em i no stap tru wantaim Jisas. (Aposel 2:29-31) Orait, bilong wanem ol i lukim Moses i sanap wantaim Krais long dispela taim?
God i bin tokim Moses: “Bai mi makim wanpela man namel long ol manmeri yet, na bai em i kamap profet olsem yu. Na bai mi givim tok bilong mi long em, na taim mi tokim em long autim wanpela tok long ol manmeri, orait bai em i autim.” (Lo 18:18) Pita i tok, dispela tok profet i makim Krais Jisas. (Aposel 3:20-23) Moses em i wanpela bikpela profet, winim olgeta narapela profet Jehova i bin salim i go long lain Israel, tasol Krais Jisas em i bikpela profet, winim Moses.
Sampela samting i bin painim Moses, wankain samting i bin painim Man I Winim Moses, em Krais Jisas. Olsem: Taim Moses i liklik, wanpela bos nogut bilong graun i laik kilim em i dai, tasol God i wokim rot bambai em i ken abrusim bagarap. Wankain samting i bin painim Jisas. (Kisim Bek 1:20–2:10; Matyu 2:7-23) Taim Moses i laik kirap mekim wok bilong God, pastaim em i go i stap long ples nating inap 40 de na em i no kaikai o dring. Jisas tu i bin mekim olsem. (Kisim Bek 24:18; 34:28; Lo 9:18, 25; Matyu 4:1, 2) Na God i givim strong long tupela na tupela inap wokim mirakel.—Kisim Bek 14:21-31; 16:11-36; Buk Song 78:12-54; Mak 4:41; Luk 7:18-23; Jon 14:11.
God i givim wok long Moses bilong helpim lain Israel long lusim kalabus long Isip, na Jisas i helpim ol man long lusim kalabus bilong spirit. (Kisim Bek 12:37–14:31; Jon 8:31, 32) Jehova i mekim kontrak bilong Lo wantaim lain Israel, na Moses i namelman bilong dispela kontrak, na Jisas i stap Namelman bilong nupela kontrak. (Kisim Bek 19:3-9; 34:3-7; Jeremaia 31:31-34; Luk 22:20; Hibru 8:3-6; 9:15) Jehova i givim wok long Moses bilong litimapim nem bilong Em long ai bilong ol Israel na ol Isip na sampela lain moa. Jisas tu i bin litimapim nem holi bilong Jehova. (Kisim Bek 9:13-17; 1 Samuel 6:6; Jon 12:28-30; 17:5, 6, 25, 26) Taim bodi bilong Jisas i kamap narapela kain, Jehova i mekim na i olsem Moses i sanap wantaim Jisas. Dispela i makim olsem Jisas bai mekim ol wok olsem Moses i bin mekim, tasol wok em i mekim bai winim wok bilong Moses.
Bilong Wanem Elaija i Kamap long Ai Bilong Ol?
Profet Elaija i dai pinis na em i stap long matmat—em i no kirap bek, tasol i stret em i kamap long ai bilong ol long taim bodi bilong Jisas i kamap narapela kain. Elaija i bin mekim bikpela wok long kamapim bek lotu i tru na litimapim nem bilong Jehova namel long ol Israel. Taim Krais Jisas i stap long graun, em i mekim wankain wok, na long rot bilong Kingdom em bai mekim bikpela wok moa yet long kamapim bek lotu i tru na litimapim nem bilong Papa bilong em.
Profet Malakai i tok, wok Elaija i bin mekim i makim wanpela bikpela wok bai kamap long bihain. Long rot bilong Malakai, God i tok: “Dispela De bilong mi em i bikpela De na bai mi mekim olgeta manmeri i pret nogut tru. Tasol pastaim bai mi salim profet Elaija i kam long yupela na bihain dispela De bai i kamap. Na bai em i mekim ol papa na ol pikinini i kamap wanbel, na bai mi no ken bagarapim kantri bilong yupela.”—Malakai 4:5, 6.
Liklik truim bilong dispela tok profet i kamap long ol wok Jon Bilong Baptais i bin mekim. Jisas i stori long dispela samting bihain long taim bodi bilong em i kamap narapela kain. Ol disaipel i kam askim Jisas, ‘Bilong wanem ol saveman bilong lo i save tok long Elaija i mas i kam pastaim na bihain bai dispela Man bilong kisim bek mipela em bai i kam?’ Jisas i tokim ol: “ ‘Dispela tok em i tru. Elaija em i mas i kam na stretim bek olgeta samting. Tasol mi tokim yupela olsem, Elaija em i kam pinis, na ol man i no bin save long em. Nogat. Ol i bihainim laik bilong ol yet na ol i mekim ol kain kain pasin long em. Na long wankain pasin bai ol i mekim nogut long Pikinini Bilong Man.’ Jisas i tok olsem, na ol disaipel i save, em i toktok long Jon Bilong Baptais.”—Matyu 17:10-13.
Taim Jon i givim baptais long ol Juda, em ol i hevi long rong ol i bin mekim long Lo bilong Moses na ol i tanim bel, Jon i mekim wok kain olsem bilong Elaija. Tasol bikpela samting em olsem: Jon em i man bilong wokabaut i go pas long man bilong kisim bek ol, na Jon i tokaut olsem Krais Jisas em i dispela Man. (Matyu 11:11-15; Luk 1:11-17; Jon 1:29) Olsem wanem na wok bilong Jon em i liklik truim tasol bilong ol tok bilong Malakai?
Ol disaipel i lukim Elaija i sanap toktok wantaim Jisas. Dispela samting i kamap bihain long taim Jon Bilong Baptais i dai, olsem na yumi save dispela i makim olsem bihain bai wanpela wok kain olsem wok bilong Elaija i mas kamap. Na tok profet bilong Malakai i makim olsem dispela wok i mas kamap paslain long “bikpela De” bilong Jehova. Dispela De i wok long i kam klostu hariap na pait bilong Armagedon em wanpela samting i mas kamap long dispela De. (Kamapim Tok Hait 16:14-16) Olsem na yumi save, paslain long taim Kingdom bilong God i kamap long heven, em planti handet yia bihain long taim bodi bilong Jisas i kamap narapela kain, wanpela wok kain olsem bilong Elaija na Elisa i mas kamap. Long nau, winim 100 yia pinis ol Witnes Bilong Jehova i bin mekim wok bilong kamapim bek lotu i tru na litimapim nem bilong God.—Buk Song 145:9-13; Matyu 24:14.
Wok Bilong En
Ol samting i bin kamap taim bodi bilong Jisas i kamap narapela kain, dispela i mas strongim em long karim pen i dai i laik painim em liklik taim bihain. Na taim em i harim nek bilong Papa bilong em i tok em i amamas long Pikinini bilong em, dispela samting i mas strongim bilip bilong Jisas. Tasol ol samting i bin kamap long dispela taim i mekim wanem long ol narapela?
Ol dispela samting i strongim bilip bilong ol man i bin lukim. Nau ol i save tru olsem Krais Jisas em i Pikinini bilong God. Tok o Maus bilong God i stap wantaim ol, olsem na ol i harim nek bilong God yet i tok, “Dispela em i Pikinini bilong mi, mi laikim em tumas.” Jehova i bin mekim wankain tok olsem taim Jisas i bin kisim baptais, tasol nau, taim bodi bilong Jisas i kamap narapela kain, Jehova i tok moa olsem ol disaipel i mas harim tok bilong Pikinini bilong Em.—Matyu 3:13-17; 17:5; Jon 1:1-3, 14.
Ol samting ol i lukim i strongim bilip bilong ol long narapela rot tu. Taim ol i lukim “Moses” na “Elaija” i sanap wantaim Jisas, ol i harim “tupela i toktok long ol samting Jisas bai i mekim long Jerusalem, na em bai i lusim dispela graun na i go.” (Luk 9:31) Ol i kisim dispela tok “lusim” long wanpela hap tok Grik (as bilong en em tok Grik eʹxo·dos). Dispela tok i makim olsem Jisas bai i dai na God bai kirapim bek em na em bai i stap laip olsem spirit long heven. (1 Pita 3:18) Olsem na ol samting ol i lukim na harim taim bodi bilong Jisas i kamap narapela kain, dispela i strongim bilip bilong ol long Krais bai kirap bek. Na i helpim ol long save tru, Jisas bai kamap King long Kingdom bilong God, na bai Kingdom i gat biknem tru.
Na ol samting ol i lukim i strongim bilip bilong ol long ol tok profet bilong Baibel. Inap olsem 32 yia bihain (long yia 64 C.E. samting), Pita i tingim yet ol samting em i bin lukim, na em i tok: “Mipela i tokim yupela pinis long strong bilong Bikpela bilong yumi Jisas Krais, na long em bai i kam bek gen. Tasol taim mipela i tokim yupela long dispela tok bilong Krais, mipela i no bihainim ol stori nating i bin kamap long tingting bilong ol man. Nogat. Long ai bilong mipela yet, mipela i bin lukim lait na strong bilong God i kamap long em, olsem na mipela i tok. God Papa i bin givim biknem long em, na i mekim dispela gutpela lait i kamap long em. Na God yet i stap long dispela nambawan lait bilong heven na em i mekim tok long Jisas olsem, ‘Dispela em i Pikinini bilong mi, mi laikim em tumas, na mi amamas long em.’ Mipela i bin i stap wantaim em long dispela maunten God i bin i stap long en, na mipela i harim dispela tok i kam long heven. Olsem na mipela i save bilip strong moa long tok bilong ol profet, na sapos yupela tu i holim strong tok bilong ol, em i gutpela. Tok bilong ol profet em i olsem lam i lait i stap long ples tudak, i go inap long tulait i kamap na sta bilong moningtaim em i kirap insait long bel bilong yupela.”—2 Pita 1:16-19.
Samting Em i Mekim long Yu
Ol samting Pita i lukim taim bodi bilong Jisas i kamap narapela kain dispela i kirapim em long bilip strong moa long ol tok profet bilong God. Ating aposel Jon tu i tingim ol samting em i bin lukim long dispela taim na em i tok: “Tok em i bin kamap man, na em i kam i stap namel long mipela. Mipela i lukim pinis bikpela namba na strong bilong em. Em i namba bilong dispela wanpela Pikinini tasol, Papa i salim em i kam. Marimari na pasin i tru i pulap long em.” (Jon 1:14) Dispela samting inap helpim yu tu long bilip strong long ol tok profet bilong Jehova.
Ol samting i bin kamap taim bodi bilong Jisas i kamap narapela kain, dispela inap strongim bilip bilong yu na bai yu bilip tru olsem Krais Jisas em i Pikinini bilong God, na em i dispela man God i bin tok promis long salim i kam bilong baim bek ol manmeri. Na em inap helpim yu long bilip tru olsem Jisas i kirap bek pinis na em i kisim laip long heven olsem wanpela spirit. Na dispela narapela kain samting ol i lukim i mas helpim yu long bilip tru long gavman o Kingdom bilong God, long wanem ol samting i kamap taim bodi bilong Jisas i kamap narapela kain, dispela i olsem piksa bilong bikpela namba na strong Jisas bai kisim taim em i kamap King bilong dispela Kingdom.
Na ol samting i bin kamap taim Jisas i kamap narapela kain, dispela i strongim tru bilip bilong yumi, long wanem, ol dispela samting i makim taim bilong yumi, taim Krais i kam bek pinis olsem king. (Matyu 24:3-14) Em i kirap mekim wok King long heven long yia 1914. God i givim bikpela namba na strong long em, na klostu nau bai em i kirap mekim wok long dispela bilong rausim olgeta birua bilong wok king bilong God, na bilong kamapim nupela taim. (2 Pita 3:13) Ol samting i bin kamap taim Jisas i kamap narapela kain, sapos yu bilip long ol gutpela samting dispela i makim, orait bai yu inap kisim ol blesing long dispela nupela taim inap oltaim oltaim.