Kisim Tingting Bilong Krais Long Samting i Makim Olsem Man i Gat Biknem
“Man i laik i stap bikman namel long yupela, em i mas i stap wokman bilong yupela.”—MATYU 20:26.
1. Wanem tingting bilong ol man bilong graun long samting i makim olsem man i gat biknem?
KLOSTU long taun Tebes bilong bipo long Isip (nau em taun Karnak), 500 kilomita long hap saut bilong Cairo, wanpela imis bilong King Amenhotep Namba 3 i sanap, longpela bilong en i go antap inap 18 mita. Taim ol man i lukim dispela traipela imis, ol i pilim olsem ol i liklik samting tasol. Dispela imis, em ol i bin wokim bilong kirapim ol man long tingim king em i bikman tru, em i makim tingting bilong ol man bilong graun long samting i makim olsem man i gat biknem—man i mas mekim olsem em i wanpela bikman tru na ol arapela i samting nating tasol.
2. Jisas i mekim wanem pasin ol disaipel bilong em i ken bihainim? Yumi ken givim wanem ol askim long yumi yet?
2 Skelim dispela tingting wantaim tingting Jisas Krais i bin lainim ol man long en. Maski em i “Bikpela na . . . Tisa” bilong ol disaipel bilong em, Jisas i bin lainim ol olsem bilong kisim biknem, ol i mas mekim wok bilong helpim ol arapela. Long laspela de em i stap laip long graun, Jisas i kamapim mining bilong dispela taim em i wasim lek bilong ol disaipel. Em i mekim gutpela pasin daun, a? (Jon 13:4, 5, 14) Orait wanem pasin yu laikim moa—pasin bilong mekim wok bilong helpim arapela o arapela i mekim wok bilong helpim yu? Pasin bilong Krais i kirapim yu na yu gat laik long bihainim pasin daun olsem em i bin bihainim? Orait nau yumi ken skelim tingting bilong Krais wantaim tingting bilong ol man bilong graun long samting i makim olsem man i gat biknem.
Sakim Tingting Bilong Ol Man Bilong Graun
3. Wanem ol stori long Baibel i soim olsem samting nogut i save painim ol man i gat bikpela laik long arapela i givim biknem bilong ol?
3 I gat planti stori long Baibel i soim olsem tingting bilong ol man bilong graun long samting i mekim na man i gat biknem, dispela i save kamapim bagarap. Tingim Haman, em i holim bikpela wok insait long haus bilong king bilong Persia long taim bilong Esta na Mordekai. Laik bilong Haman long kisim biknem i mekim na em i kisim sem na em i dai. (Esta 3:5; 6:10-12; 7:9, 10) Na olsem wanem long hambakman Nebukatnesar, taim em i kamap strong em i kamap longlong? Tingting kranki bilong em long samting em i ting i mekim na man i gat biknem em i kamap long dispela tok: “Man, Babilon em i bikpela taun na i nambawan tru. Long strong bilong mi yet, mi bin kirapim dispela taun, bilong soim bikpela strong na biknem bilong mi long olgeta lain manmeri.” (Daniel 4:30) Na tingim tu hambakman Herot Agripa Namba 1, em i larim ol man i givim biknem long em, tasol em i no givim biknem long God. Bihain “ol liklik snek i kaikai em, na em i dai.” (Aposel 12:21-23) Ol dispela man i no gat tingting bilong Jehova long samting i makim olsem man i gat biknem, na dispela i mekim na ol i kisim nogut.
4. Husat i as bilong pasin hambak em ol man bilong dispela graun i save bihainim?
4 I stret yumi gat laik long kisim gutnem na rispek. Tasol Satan i mekim wok nogut long dispela laik bilong kirapim yumi long mekim pasin hambak olsem em yet i save mekim. (Matyu 4:8, 9) Yumi no ken lusim tingting olsem em i “giaman god bilong dispela graun,” na em i strong long kamapim tingting bilong em hia long graun. (2 Korin 4:4; Efesus 2:2; KTH 12:9) Ol Kristen i save long as bilong dispela kain tingting, olsem na ol i sakim tingting bilong ol man bilong graun long samting ol i ting i mekim na man i gat biknem.
5. Sapos ol wok bilong man i kamap gutpela tru, na em i gat biknem na planti mani, yu ting dispela inap helpim em long painim amamas tru? Stori long dispela.
5 Wanpela tingting Satan i wok long kamapim i olsem: Sapos man i gat nem long ai bilong ol arapela, na planti mani, na ol man i litimapim nem bilong em, em bai stap amamas. Yu ting dispela tingting i stret? Sapos ol wok bilong man i kamap gutpela tru, na em i gat biknem long ai bilong ol arapela, na planti mani, yu ting dispela i mekim na em i stap bel gut tru? Baibel i tok yumi no ken larim kain tingting olsem i giamanim yumi. Saveman King Solomon i tok: “Mi bin lukim narapela pasin. Ol man i save hatwok tru na ol i wokim olkain gutpela samting. Tasol as bilong dispela i olsem. Ol i ting long ol wantok i gat biknem na planti samting. Na ol i mekim planti wok bilong kamap wankain olsem ol wantok. Dispela em i longlong pasin tru. I olsem man i ran i go bilong holimpas win.” (Saveman 4:4) Planti man i bin givim bel tru long kisim biknem na mani, ol inap tokim yumi olsem dispela tok bilong Baibel em i tru. Wanpela man olsem i bin insait long wok bilong wokim roket em ol man i bin yusim bilong i go long mun. Em i tok: “Mi bin wok strong na mi bin kisim bikpela save. Tasol dispela samting i no bin helpim mi long painim amamas tru na bel isi. Ol wok mi bin mekim, na ol save mi bin kisim, em i samting nating tasol.”a Samting ol man bilong graun i ting i mekim na man i gat biknem—long bisnis, spot, o musik samting—dispela i no helpim ol long painim amamas tru, nogat.
Mekim Wok Em Pasin Laikim i As Bilong En
6. Wanem samting i soim olsem Jems na Jon i gat tingting kranki long samting i makim olsem man i gat biknem?
6 Samting i bin kamap long i stap bilong Jisas i kamapim klia wanem samting tru i mekim na man i gat biknem. Jisas na ol disaipel bilong em ol i wokabaut i go long Jerusalem bilong mekim Pasova long 33 C.E. Taim ol i wokabaut i go, tupela kasen bilong Jisas, Jems na Jon, i kamapim wanpela tingting kranki long samting i makim olsem man i gat biknem. Long maus bilong mama bilong ol, ol i askim Jisas: ‘Mipela laik bai yu tok olsem mipela i ken sindaun klostu long yu long kingdom bilong yu, narapela long han sut na narapela long han kais.’ (Matyu 20:21) Ol Juda i bin ting olsem sapos man i sindaun long han sut o han kais, dispela i givim biknem long ol. (1 King 2:19) Jems na Jon i laik painim rot long kisim biknem tru. Ol i laik kisim namba. Jisas i save long tingting bilong ol, olsem na em i mekim wok long dispela bilong stretim tingting kranki bilong ol long samting i makim olsem man i gat biknem.
7. Jisas i tok Kristen i laik kisim biknem em i mas mekim wanem?
7 Jisas i save olsem, long dispela graun em pasin hambak i pulap long en, i gat dispela tingting: Man i gat biknem em man i bosim ol arapela, na taim em i tokim ol long mekim wanpela samting, wantu ol i kirap na mekim. Tasol samting i makim olsem ol disaipel bilong Jisas i gat biknem o nogat, i olsem: Long pasin daun ol i mas mekim wok bilong helpim ol arapela. Jisas i tok: “Man i laik i stap bikman namel long yupela, em i mas i stap wokman bilong yupela. Na man i laik i stap namba wan bilong yupela, em i mas i stap olsem wokboi nating bilong yupela.”—Matyu 20:26, 27.
8. Man i stap wokman, em i mas mekim wanem? Wanem sampela askim yumi ken givim long yumi yet?
8 Tok Grik ol i tanim olsem “wokman” long Baibel i makim olsem man i givim bel tru long mekim wok bilong helpim ol arapela. Jisas i bin skulim ol disaipel long wanpela bikpela samting: Taim man i tokim ol arapela long mekim wanpela wok, dispela i no mekim na em i gat biknem, nogat; man i mekim wok bilong helpim ol arapela taim pasin laikim i kirapim em, em dispela samting i mekim na man i gat biknem. Askim yu yet: ‘Sapos mi Jems o Jon, bai mi mekim wanem long dispela tok bilong Jisas? Bai mi kisimgut dispela tok olsem man i kisim biknem, em man i mekim wok bilong helpim ol arapela, em pasin laikim i kirapim em long mekim?’—1 Korin 13:3.
9. Jisas i mekim wanem long ol arapela na em i stap gutpela piksa long dispela samting?
9 Jisas i soim ol disaipel olsem tingting bilong ol man bilong graun long samting i mekim na man i gat biknem, dispela i no tingting bilong Krais. I no gat wanpela taim em i mekim olsem em i antap long ol man em i helpim ol, na em i no mekim ol i pilim olsem ol i no gutpela olsem em. Olgeta kain man—man, meri, pikinini, ol maniman, ol rabisman, ol man i gat strong, na ol sinman tu—ol i save stap isi taim ol i stap wantaim em. (Mak 10:13-16; Luk 7:37-50) Planti taim ol man i save les kwik long ol arapela i no winim mak. Tasol Jisas i no olsem. Maski sampela taim ol disaipel i no tingim gut ol arapela na ol i tok pait, em i no les kwik long ol—em i skulim ol na soim olsem em i gat pasin daun na pasin isi.—Sekaraia 9:9; Matyu 11:29; Luk 22:24-27.
10. Olsem wanem olgeta samting Jisas i mekim i bilong helpim ol arapela?
10 Gutpela pasin bilong dispela nambawan Pikinini Bilong God, em i no tingim em yet tasol, dispela i kamapim klia samting i mekim na man i gat biknem tru. Jisas i no kam long graun bilong ol arapela i ken helpim em, nogat; em i kam bilong em yet i ken helpim ol—em i oraitim “kain kain sik” na helpim ol man long lusim strong bilong ol spirit nogut. Tru, skin bilong em i save les na em i mas malolo, tasol olgeta taim em i putim laik bilong ol arapela i go pas long laik bilong em yet, na em i wok strong long mekim gut bel bilong ol. (Mak 1:32-34; 6:30-34; Jon 11:11, 17, 33) Pasin laikim i kirapim em long helpim ol man long ol samting bilong spirit, em i wokabaut planti handet kilomita long ol rot i gat das bilong autim gutnius bilong Kingdom. (Mak 1:38, 39) Tru tumas, Jisas i tingim wok bilong helpim ol arapela em i bikpela samting.
Bihainim Pasin Daun Bilong Krais
11. Ol brata i mekim wok elda insait long kongrigesen ol i mas i gat wanem kain pasin?
11 Long 1890 samting, pasin ol wasman Kristen i mas kisim i bin kamap ples klia taim ol i makim ol man long kamap wasman raun bilong mekim wok bilong helpim ol manmeri bilong God. Olsem Zion’s Watch Tower bilong Septemba 1, 1894, i tok, ol i mas “daunim ol yet—bambai ol i no ken hambak . . . , ol i mas mekim pasin daun na mekim tok bilong helpim Krais, i no bilong helpim ol yet—ol i no ken kamapim save bilong ol yet, ol i mas kamapim Tok bilong em i klia tru na i gat strong.” Tru tumas, ol Kristen tru i no ken tingting long kisim bikpela wok bilong inapim laik bilong ol yet o bilong kisim namba na strong long bosim ol arapela. Wasman i gat pasin daun i mas tingim bikpela wok em i mekim em wanpela “gutpela wok,” i no bilong kisim bikpela namba bilong givim biknem long em yet, nogat. (1 Timoti 3:1, 2) Long pasin daun ol elda na ol kongrigesen sevan i mas wok strong long helpim ol arapela na go pas long mekim wok bilong God—ol i mas stap gutpela piksa bilong ol arapela i ken bihainim.—1 Korin 9:19; Galesia 5:13; 2 Timoti 4:5.
12. Wanem sampela askim ol brata i laik kisim bikpela wok insait long kongrigesen i mas askim ol yet?
12 Brata i laik mekim bikpela wok i mas askim em yet: ‘Mi wok long painim ol rot bilong helpim ol arapela, o mi laik bai ol arapela i helpim mi yet? Mi redi long mekim ol wok bilong helpim ol arapela, em ol wok ol man i no inap luksave olsem mi bin mekim? Olsem: Ating yangpela man i amamas long mekim ol tok long kongrigesen Kristen tasol em i surik long helpim ol lapun. Ating em i amamas long wok wantaim ol brata i holim wok insait long kongrigesen tasol em i les long mekim wok autim tok. Kain yangpela olsem i mas askim em yet: ‘Mi tingting tasol long mekim ol wok bilong God i gat nem bambai ol man i ken tingim mi olsem mi gat namba na litimapim nem bilong mi? Mi wok strong long kisim biknem long ai bilong ol arapela?’ Sapos yumi wok long givim biknem long yumi yet, dispela i no bihainim pasin bilong Krais.—Jon 5:41.
13. (a) Olsem wanem pasin daun bilong wasman inap mekim sampela samting long ol arapela? (b) Olsem wanem yumi ken tok, pasin daun, o pasin bilong daunim yumi yet, em wanpela pasin ol Kristen i mas mekim?
13 Taim yumi wok strong long bihainim pasin daun bilong Krais, bel i save kirapim yumi long mekim wok bilong helpim ol arapela. Tingim wanpela wasman son em i bin raun skelim wok bilong wanpela brens ofis bilong ol Witnes Bilong Jehova. Maski em i gat planti bikpela wok em i mas mekim, dispela wasman i lusim samting em i mekim bilong helpim wanpela yangpela brata i hatwok long stretim samting long masin bilong samapim ol buk. Brata i tok: “Mi kirap nogut tru! Em i tok em i bin wok long wankain masin long Betel taim em i yangpela na em tu i bin hatwok long stretim dispela samting. Em i helpim mi long stretim, maski em yet i gat planti bikpela wok em i mas mekim. Mi pilim tru dispela samting.” Dispela brata, nau em i wanpela wasman long wanpela brens ofis bilong ol Witnes Bilong Jehova, em i tingim yet dispela gutpela pasin daun wasman son i bin mekim. Olsem na nogut yumi pilim olsem yumi winim ol arapela na no ken mekim ol wok i no gat nem, o ting yumi bikpela man tumas na no ken mekim ol wok nating. Yumi mas ‘daunim yumi yet.’ Em samting yumi mas mekim. Em i wanpela pasin bilong “nupela man,” olsem na bilong kamap nupela man, Kristen i mas mekim pasin daun.—Filipai 2:3; Kolosi 3:10, 12; Rom 12:16.
Rot Bilong Kisim Tingting Bilong Krais
14. Taim yumi tingim tingim pasin bilong yumi long pas gut wantaim God na ol arapela, olsem wanem dispela inap helpim yumi long kisim stretpela tingting long samting i makim olsem man i gat biknem?
14 Olsem wanem yumi inap kisim stretpela tingting long samting i makim olsem man i gat biknem? Wanpela samting em yumi mas tingim tingim long bel pasin bilong yumi long pas gut wantaim God Jehova. Bikpela namba, strong, na savetingting bilong em, i mekim na em i winim tru ol man nating bilong graun. (Aisaia 40:22) Pasin bilong tingim tingim i stap bilong yumi wantaim ol arapela, dispela tu bai helpim yumi long kisim pasin daun. Olsem: Ating long sampela samting yumi winim ol arapela, tasol long sampela samting i bikpela samting moa, ating ol yet i winim yumi, o ating ol brata Kristen bilong yumi i gat sampela pasin em yumi yet i sot long en. Planti man em God i laikim tumas ol i no stap long ples klia, long wanem, ol i save daunim ol yet.—Sindaun 3:34; Jems 4:6.
15. Olsem wanem pasin bilong ol manmeri bilong God long stap gut long em i soim olsem i no gat as na wanpela i ken pilim olsem em i winim ol arapela?
15 Stori bilong ol Witnes Bilong Jehova taim traim i painim ol, long wanem, ol i laik holimpas bilip, i kamapim klia dispela samting. Planti taim, ol lain ol man bilong graun i tingim ol i olsem man nating, ol i bin stap gut long God taim bikpela traim i painim ol. Pasin bilong tingim tingim long bel ol dispela stori inap helpim yumi long bihainim pasin daun na inap lainim yumi long ‘no ken ting save na pasin bilong yumi i winim ol arapela.’—Rom 12:3.b
16. Olsem wanem olgeta long kongrigesen i ken bihainim tingting bilong Jisas long samting i makim olsem man i gat biknem?
16 Olgeta Kristen, ol yangpela na lapun tu, ol i mas wok long kisim tingting bilong Krais long samting i makim olsem man i gat biknem. Long kongrigesen, i gat kain kain wok bilong mekim. No ken bel nogut taim narapela i askim yu long mekim ol samting i olsem wanpela wok i no gat nem. (1 Samuel 25:41; 2 King 3:11) Yupela papamama, yupela i save strongim ol pikinini bilong yupela, maski ol i liklik o bikpela, long amamas long mekim wok em narapela i givim long ol long Haus Kingdom o ples kibung? Ol i lukim yupela yet i mekim ol wok i no gat nem? Wanpela brata, nau em i mekim wok long hetkota bilong ol Witnes Bilong Jehova, em i tingim yet gutpela pasin bilong papamama bilong em. Em i tok: “Pasin na tingting ol i kamapim taim ol i klinim Haus Kingdom o haus kibung, i tokaut olsem ol i tingim dispela wok em i bikpela samting. Planti taim ol i volantia long mekim ol wok bilong helpim kongrigesen o lain brata, maski em wok i no gat nem. Dispela tingting i bin helpim mi long amamas long kisim ol wok hia long Betel, maski em wanem wok.”
17. Olsem wanem ol meri i gat pasin daun i ken helpim tru kongrigesen?
17 Esta, em i kamap kwin bilong Persia 500 yia samting paslain long Krais, em i stap gutpela piksa tru long putim laik bilong ol arapela i go pas long laik bilong em yet. Maski em i stap long haus bilong king, em i redi long bihainim laik bilong God na lusim laip bilong em bilong helpim ol manmeri bilong God. (Esta 1:5, 6; 4:14-16) Maski ol meri Kristen long nau i gat planti mani o nogat, ol i ken mekim pasin wankain olsem Esta na strongim bel bilong ol arapela i bel hevi, na go lukim ol sikman, na autim tok, na wok gut wantaim ol elda. Ol dispela sista i gat pasin daun ol i helpim tru kongrigesen, a?
Ol Blesing
18. Taim yu bihainim tingting bilong Krais long samting i makim olsem man i gat biknem, dispela i kamapim wanem ol blesing?
18 Taim yu bihainim tingting bilong Krais long samting i makim olsem man i gat biknem, yu inap kisim planti blesing. Taim yu mekim wok bilong helpim ol arapela na yu no tingim yu yet tasol, dispela i kamapim amamas, long yu yet na long ol arapela. (Aposel 20:35) Taim yu amamas long mekim wok bilong helpim ol brata bilong yu, ol bai laikim yu moa moa yet. (Aposel 20:37) Na bikpela samting moa, Jehova i save tingim samting yu mekim bilong helpim ol arapela i olsem wanpela gutpela ofa bilong litimapim nem bilong em.—Filipai 2:17.
19. Yumi mas tingting strong long mekim wanem bilong bihainim tingting bilong Krais long samting i makim olsem man i gat biknem?
19 Yumi olgeta wan wan i mas skelim bel bilong yumi yet na askim: ‘Bai mi toktok tasol long kisim tingting bilong Krais long samting i makim olsem man i gat biknem, o bai mi wok strong long bihainim?’ Jehova i bin kamapim klia tru tingting bilong em long ol man i apim nem bilong ol yet. (Sindaun 16:5; 1 Pita 5:5) I gutpela sapos ol wok yumi mekim i soim olsem yumi amamas long bihainim tingting bilong Krais long samting i makim olsem man i gat biknem, maski em long kongrigesen Kristen, long famili, o long ol samting yumi mekim olgeta de wantaim ol arapela—olgeta samting yumi mekim i mas givim glori na biknem long God.—1 Korin 10:31.
[Ol Futnot]
a Lukim Wastaua, Februeri 1, 1983, pes 27-30, “Mi Laik Painim Biknem.”
b Lukim 1992 Yearbook of Jehovah’s Witnesses, pes 181-182, na Wastaua bilong Septemba 1, 1993, pes 27-31.
Yu Inap Stori Long Dispela?
• Bilong wanem yumi mas sakim tingting bilong ol man bilong graun long samting i mekim na man i gat biknem?
• Wanem tingting bilong Jisas long samting i makim olsem man i gat biknem o nogat?
• Olsem wanem ol wasman i ken bihainim pasin daun bilong Krais?
• Wanem samting inap helpim yumi long kisim biknem olsem Krais i bin makim?
[Blok long pes 17]
Husat i Gat Biknem Olsem Krais i Bin Makim?
Man i laik bai ol arapela i helpim em o man i amamas long helpim ol arapela?
Man i laik bai ol arapela i litimapim nem bilong em, o man i redi long kisim wok i no gat nem?
Man i apim nem bilong em yet o man i apim nem bilong ol arapela?
[Piksa long pes 14]
Traipela imis bilong King Amenhotep Namba 3
[Piksa long pes 15]
Yu save wanem samting i mekim na Haman i kisim bagarap
[Ol Piksa long pes 16]
Yu wok long painim ol rot bilong helpim ol arapela?