King i Sindaun Long Donki na i Go Long Jerusalem

Long de bihain, Sande Nisan 9, Jisas wantaim ol disaipel i lusim Betani na ol i wokabaut i go long Jerusalem. Ol i kamap klostu long Betfage, long maunten Oliv, orait Jisas i tokim tupela disaipel olsem:

“Yutupela go insait long dispela liklik taun yutupela i lukim, na wantu yutupela bai lukim wanpela donki em ol i bin pasim long rop, na i gat wanpela yangpela donki i stap wantaim em. Rausim rop long tupela na bringim ol i kam long mi. Na sapos wanpela man i tromoi sampela tok long yutupela, orait yutupela i mas tok: ‘Bikpela i gat wok long dispela tupela donki.’ Na kwiktaim bai em i salim tupela i kam.”—Matyu 21:2, 3.

Ol disaipel i no luksave olsem samting Jisas i tok long mekim i truim wanpela tok profet bilong Baibel. Tasol bihain ol i luksave olsem em i truim tok profet Sekaraia i bin mekim long dispela King God i tok promis long salim i kam. Em i tok dispela man bai kam long Jerusalem olsem “man i no gat nem, na em i sindaun antap long wanpela donki. Em i sindaun long yangpela donki na i kam.”—Sekaraia 9:9.

Orait taim tupela disaipel i go insait long Betfage na ol i kisim dispela donki wantaim mama bilong en, sampela man i sanap klostu i tok: “Yutupela i laik mekim wanem na yutupela i lusim rop bilong donki?” (Mak 11:5) Tupela i tokim ol, Bikpela i gat wok long en, olsem na ol i larim tupela disaipel i bringim ol dispela donki i go long Jisas. Na tupela disaipel i putim longpela klos bilong ol antap long tupela donki, tasol Jisas i sindaun long pikinini bilong donki.

Jisas i sindaun long donki na i go long Jerusalem, na planti manmeri moa i bihainim em. Planti i rausim ol longpela klos bilong ol na putim long rot. Na sampela i katim “ol han bilong diwai i stap arere long rot” na putim long rot. Na ol i wok long singaut olsem: “Plis seivim em! Blesing i stap long man i kam long nem bilong Jehova! Blesing i stap long dispela Kingdom i laik kam, em Kingdom bilong papa bilong yumi, Devit!” (Mak 11:8-10) Tasol sampela Farisi i stap namel long bikpela lain manmeri i bel nogut long tok bilong ol. Na ol i tokim Jisas: “Tisa, krosim ol disaipel bilong yu.” Tasol Jisas i tokim ol: “Mi tokim yupela: Sapos ol i pasim maus, ol ston yet bai singaut.”—Luk 19:39, 40.

Orait Jisas i kamap klostu long Jerusalem na em i lukim taun na em i krai na i tok: “Sapos long dispela taim yu bin luksave long ol samting bilong bringim bel isi, em bai gutpela—tasol nau ol i stap hait long ai bilong yu.” Jerusalem i bin sakim tok, olsem na Jisas i tok profet olsem: “Ol birua bilong yu bai banisim yu long wanpela strongpela banis i gat ol pos i sap na ol bai banisim yu na givim hevi long yu long olgeta sait. Na ol bai tromoi yu na ol pikinini i stap insait long yu i go daun long graun, na ol bai i no larim wanpela ston bilong yu i stap antap long narapela ston.” (Luk 19:42-44) Olsem Jisas i tok, bagarap i bin painim Jerusalem long yia 70 C.E.

Taim Jisas i go insait long Jerusalem, “olgeta manmeri long taun i kirap nogut na ol i wok long askim olsem: ‘Dispela man em i husat?’” Na ol manmeri i bihainim Jisas i tokaut olsem: “Em Jisas, profet i kam long Nasaret bilong Galili!” (Matyu 21:10, 11) Planti manmeri long dispela bikpela lain ol i bin lukim Jisas i kirapim bek Lasarus, olsem na ol i wok long tokim ol narapela long dispela mirakel. Ol Farisi i lukim na ol i kros na ol i toktok namel long ol yet olsem: “Olgeta manmeri i go bihainim em.”—Jon 12:18, 19.

Taim Jisas i go insait long Jerusalem, em i go long tempel na skulim ol man. Na em i oraitim ol aipas na lek nogut. Tasol ol bikpris na ol saveman i lukim ol mirakel em i wokim, na ol i harim ol mangi i singaut insait long tempel olsem, “Plis seivim dispela Pikinini bilong Devit!” ol i kros nogut tru. Olsem na ol bikman bilong lotu i askim Jisas: “Yu harim tok ol i mekim?” Jisas i tokim ol: “Ating yupela i no bin ritim dispela tok, a? Olsem: ‘Yu bin kirapim ol pikinini na ol bebi long litimapim nem bilong yu.’”—Matyu 21:15, 16.

Jisas i lukluk raun long olgeta samting insait long tempel. Ples i wok long i go tudak, olsem na em wantaim ol aposel i lusim tempel na ol i go. Paslain long Nisan 10 i kirap, Jisas i go bek long Betani, em i stap long dispela hap long Sande nait.