Laikim Tru Dispela God i Laikim Yu
“Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela.”—MATYU 22:37.
1, 2. Ating wanem samting i bin kirapim ol Farisi long askim Jisas long wanem lo i nambawan?
ATING ol Farisi long taim bilong Jisas i bin toktok planti long dispela askim, olsem: Lo Bilong Moses i gat olsem 600 lo, orait wanem lo i nambawan na i winim ol arapela? Olsem wanem? Em lo i toktok long ol ofa? Ol i bin mekim ol ofa bambai God i ken lusim ol rong bilong ol na bilong tok tenkyu long em. O nambawan bikpela lo em lo bilong katim skin? Dispela tu i bikpela samting, long wanem, pasin bilong katim skin em i mak bilong kontrak Jehova i bin mekim wantaim Abraham.—Stat 17:9-13.
2 Tasol ol farisi i laik bihainim ol pasin bilong bipo, ol i tok olgeta lo God i givim i bikpela samting—maski i luk olsem sampela lo i no bikpela samting tumas—olsem na i no stret long tok wanpela lo i winim ol arapela lo. Ol Farisi i laik givim dispela bikpela askim long Jisas. Ating em bai mekim sampela tok i kirapim ol man long kisim tupela tingting long em. Wanpela Farisi i kam long Jisas na i askim em: “Wanem lo i namba wan na i winim olgeta arapela lo?”—Matyu 22:34-36.
3. Jisas i tok wanem lo i nambawan bikpela lo?
3 Bekim Jisas i givim i bikpela samting tru long yumi long nau. Long bekim bilong em, em i kamapim samting i nambawan bikpela samting bilong lotu i tru—long bipo tru na i go inap long olgeta taim bihain. Jisas i kamapim tok bilong Lo 6:5, na em i tok: “‘Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela.’ Dispela lo em i bikpela, na em i namba wan tru.” Maski dispela Farisi i askim Jisas long wanpela lo tasol, Jisas i kolim narapela lo tu long em. Em i kamapim tok bilong Wok Pris 19:18, na i tok: “Namba 2 lo em i wankain olsem dispela. Em i olsem, ‘Yu mas laikim ol wantok [“narapela man,” NW] olsem yu laikim yu yet.’” Jisas i tok dispela tupela lo i insait long olgeta samting bilong lotu i tru. Jisas i pasim rot bilong ol Farisi long tokim em long em i mas kolim wanem ol narapela lo i bikpela samting na wanem ol lo i no bikpela samting tumas, na em i tok: “Dispela tupela lo i as bilong olgeta tok bilong lo na bilong ol profet.” (Matyu 22:37-40) Long dispela stadi bai yumi skelim nambawan bikpela lo bilong dispela tupela lo. Bilong wanem yumi mas laikim tru God? Olsem wanem yumi soim olsem yumi laikim em tru? Na olsem wanem yumi ken kisim dispela pasin? Em i bikpela samting long yumi mas save long bekim bilong ol dispela askim, long wanem, bilong Jehova i ken orait long yumi, yumi mas laikim em tru long bel, strong, na tingting olgeta bilong yumi.
Pasin Laikim i Bikpela Samting
4, 5. (a) Bilong wanem wanpela Farisi i no kirap nogut long tok bilong Jisas? (b) Wanem samting i bikpela samting moa long God na i winim olkain ofa?
4 I luk olsem dispela Farisi husat i askim Jisas long nambawan bikpela lo, em i no bel hevi o kirap nogut long bekim em i kisim. Em i save olsem pasin bilong laikim tru God em i bikpela samting long lotu i tru, maski planti man i no save kamapim dispela pasin. Insait long ol haus lotu bilong ol Juda, ol i save kolim long maus beten Sema, em wanpela beten bilong autim bilip. Ol tok bilong Lo 6:4-9, em Jisas i kolim ol tok bilong en, i stap insait long dispela beten. Mak i kamapim wankain stori, na bihain long en Farisi i tokim Jisas: “Tisa, tok bilong yu i gutpela. I tru, Bikpela wanpela tasol em i God, na i no gat narapela God i stap. Yumi mas laikim em tru long bel bilong yumi na long save bilong yumi na long strong bilong yumi. Na yumi mas laikim ol wantok olsem yumi save laikim yumi yet. Sapos yumi bihainim dispela tupela lo, orait dispela pasin em i winim olgeta ofa ol i save kukim olgeta long paia, na i winim olgeta kain ofa.”—Mak 12:32, 33.
5 Lo i tok ol man i mas givim olkain ofa, tasol bikpela samting long God em gutpela bel bilong ol wokman bilong em. Man i laikim tru God na i givim bel long em na dispela i kirapim em long givim wanpela liklik pisin, dispela i winim planti tausen sipsip em man i no gat gutpela bel em i givim. (Maika 6:6-8) Tingim stori bilong wanpela rabismeri, man bilong em i dai pinis, em Jisas i lukim long tempel long Jerusalem. Tupela liklik koin em i putim long bokis mani i no karamapim pe bilong wanpela liklik pisin. Tasol dispela tupela mani em pasin bilong meri hia long laikim tru Jehova i kirapim em long givim i bikpela samting tru long Jehova, winim bikpela mani ol maniman i gat planti samting ol i givim. (Mak 12:41-44) Em i strongim tru bel bilong yumi long save olsem nambawan bikpela samting long Jehova, em samting yumi olgeta i ken kamapim maski yumi gat wanem kain sindaun—em pasin bilong yumi long laikim em!
6. Pol i tok wanem bilong soim olsem pasin laikim i bikpela samting?
6 Aposel Pol i kamapim klia olsem pasin laikim i bikpela samting long lotu i tru, em i tok: “Sapos mi save toktok long ol manmeri long kain kain tok ples bilong man na long tok bilong ol ensel tu, tasol mi no givim bel bilong mi long ol, orait mi olsem belo i mekim planti nois, na mi olsem garamut i pairap nating. Na sapos mi save autim tok profet na mi save pinis long olgeta tingting hait bilong God na mi gat olgeta arapela save tu, na sapos mi gat strongpela bilip tru inap long mekim ol maunten i surik i go long narapela hap, tasol sapos mi no givim bel bilong mi long ol manmeri, orait mi olsem samting nating. Na sapos mi givim olgeta samting bilong mi long ol rabisman, na sapos mi larim ol man i holimpas mi na kukim bodi bilong mi long paia na mi dai pinis, tasol sapos mi no bin givim bel bilong mi long ol, orait dispela olgeta pasin bilong mi bai i no inap helpim mi liklik.” (1 Korin 13:1-3) Tru tumas, pasin bilong givim bel, olsem pasin laikim, em i bikpela samting bambai God i ken orait long lotu bilong yumi. Tasol olsem wanem yumi soim olsem yumi laikim tru Jehova?
Rot Bilong Soim Olsem Yumi Laikim Tru Jehova
7, 8. Olsem wanem yumi ken soim olsem yumi laikim tru Jehova?
7 Planti man i ting pasin laikim em i wanpela samting yumi pilim long bel na yumi no inap bosim dispela samting, olsem man o meri i kirap laikim narapela. Tasol pasin laikim tru i no samting yumi pilim tasol long bel. Pasin laikim tru i kamap klia long pasin man i mekim na em i no wanpela tingting tasol. Baibel i tok pasin laikim em i “wanpela pasin i nambawan tru” na em i samting yumi mas “strong” long kamapim. (1 Korin 12:31; 14:1) Baibel i tok ol Kristen i no ken ‘laikim ol brata long tok tasol o long maus tasol. Ol i mas givim bel bilong ol long ol na mekim gutpela pasin long ol.’—1 Jon 3:18.
8 Pasin bilong laikim tru God i kirapim yumi long mekim ol samting em i laikim na long sambai na sapotim wok king bilong em, long rot bilong ol tok na pasin bilong yumi. Dispela pasin i kirapim yumi long sakim pasin bilong laikim dispela graun na ol pasin nogut bilong en. (1 Jon 2:15, 16) Ol man i laikim tru God, ol i nolaik tru long pasin nogut. (Song 97:10) Pasin bilong laikim tru God i makim tu olsem yumi mas laikim tru ol narapela man, na yumi bai skelim dispela samting long stadi i kamap bihain long dispela. Na tu, pasin bilong laikim tru God i makim olsem yumi mas bihainim ol tok bilong em. Baibel i tok: “Sapos yumi laikim tru God, orait yumi save bihainim ol lo bilong en.”—1 Jon 5:3.
9. Olsem wanem Jisas i kamapim klia pasin bilong em long laikim tru God?
9 Jisas i kamapim klia pasin bilong laikim tru God i makim wanem samting. Pasin laikim i kirapim em long lusim ples bilong em long heven na kam i stap long graun olsem wanpela man. Dispela pasin i kirapim em long litimapim nem bilong Papa bilong em long rot bilong ol samting em i mekim na i lainim ol man long en. Pasin laikim i kirapim em long “bihainim tok bilong God, i go inap long em i dai.” (Filipai 2:8) Dispela pasin bilong bihainim tok i kamapim pasin laikim bilong em, na i opim rot long ol gutpela man i ken i stap stret long ai bilong God. Pol i tok: “Wanpela man [Adam] i bin sakim tok, na long dispela pasin bilong em planti manmeri i kamap manmeri bilong mekim sin. Olsem tasol, wanpela man [Krais Jisas] i bihainim tok, na long dispela pasin bilong em planti manmeri bai i kamap stretpela manmeri.”—Rom 5:19.
10. Bilong wanem pasin bilong laikim tru God i makim olsem yumi mas bihainim tok bilong em?
10 Olsem Jisas i bin mekim, yumi kamapim klia pasin laikim bilong yumi long rot bilong bihainim tok bilong God. Gutpela aposel bilong Jisas, em Jon, em i tok: “Pasin bilong laikim tru ol arapela, em i olsem. Yumi mas bihainim ol lo bilong God.” (2 Jon 6) Ol man i laikim tru Jehova, ol i gat bikpela laik long Jehova i stiaim ol. Ol i save ol i no inap bosim wokabaut bilong ol yet, olsem na ol i bilip long savetingting bilong God na ol i daun long ol gutpela tok bilong Jehova long stiaim ol. (Jeremaia 10:23) Ol i olsem ol gutpela manmeri long Beria long bipo husat i ‘harim na i laikim tru’ tok bilong God, na ol i gat bikpela laik long mekim laik bilong God. (Aposel 17:11) Ol i skelim gut ol buk bilong God bambai ol i ken kliagut moa long laik bilong em, em dispela samting i helpim ol long kamapim pasin laikim bilong ol long rot bilong bihainim tok bilong God.
11. Olsem wanem yumi laikim tru God long bel, tingting, na strong olgeta bilong yumi?
11 Olsem Jisas i tok, yumi mas laikim tru God long bel, tingting, na strong olgeta bilong yumi. (Mak 12:30) Dispela kain pasin laikim i kamap long bel—laik, tingting i stap long bel, na samting yumi pilim i insait long en—na yumi gat bikpela laik tru long mekim ol samting Jehova i laikim. Yumi laikim em tru long tingting bilong yumi. Yumi no givim nating bel bilong yumi long Jehova. Yumi kisim save long Jehova—long ol pasin, ol lo, na ol samting em i tingting pinis long mekim. Yumi yusim laip olgeta bilong yumi bilong mekim wok bilong em na litimapim nem bilong em. Na yumi yusim tu strong bilong yumi long mekim olsem.
As na Yumi Mas Laikim Tru Jehova
12. Bilong wanem God i laik bai yumi mas laikim em tru?
12 Wanpela as na yumi mas laikim tru Jehova em olsem: Em i laik bai yumi kamapim ol pasin bilong em. God em i nambawan gutpela piksa na as bilong pasin laikim. Aposel Jon i tok: “God em i pasin laikim.” (1 Jon 4:8, NW) God i wokim ol man i kamap olsem em yet; em i wokim yumi bilong kamapim pasin laikim. As bilong wok king bilong Jehova em pasin laikim. Em i laik bai ol man i stap aninit long em i mekim wok bilong em, long wanem, ol i laikim tumas stretpela pasin bilong em long mekim wok king. Tru tumas, pasin laikim i bikpela samting na bai olgeta samting God i bin wokim i ken stap bel isi na wanbel wantaim.
13. (a) Bilong wanem Jisas i tokim ol Israel: “Yupela i mas laikim God, Bikpela bilong yumi”? (b) Bilong wanem i stret Jehova i laik bai yumi mas laikim em tru?
13 Narapela as na yumi mas laikim tru Jehova, em yumi tenkyu tru long ol samting em i bin mekim bilong helpim yumi. Tingim tok Jisas i bin mekim long ol Juda: “Yupela i mas laikim God, Bikpela bilong yumi.” I no olsem ol i mas laikim tru wanpela god husat i no tingim ol na ol i no save long em. Nogat. Ol i mas laikim dispela God husat i bin kamapim pasin bilong em long laikim ol. Jehova em i God bilong ol. Em i dispela God i bin kisim ol long Isip na bringim ol i go insait long Graun Bilong Promis. Em i dispela God i bin lukautim, sapotim, laikim tru ol, na stretim ol long pasin laikim. Na long nau, Jehova em i God bilong yumi, em dispela God i bin givim Pikinini man bilong em olsem pe bilong baim bek yumi bambai yumi ken kisim laip oltaim. Olsem na i stret tru long Jehova i laik bai yumi mas laikim em, a? Pasin laikim bilong God i kirapim yumi long laikim em; yumi mas laikim tru dispela God i save laikim tru yumi. Yumi laikim tru dispela Man i “bin laikim yumi pastaim.”—1 Jon 4:19.
14. Olsem wanem pasin laikim bilong Jehova i wankain olsem pasin laikim bilong wanpela gutpela papa o mama?
14 Pasin bilong Jehova long laikim ol manmeri i wankain olsem pasin bilong gutpela papa o mama long laikim tru ol pikinini bilong em. Maski ol i gat sin, ol gutpela papamama i save wok strong inap planti yia bilong lukautim ol pikinini bilong ol. Ol i save lusim bikpela mani na ol narapela samting bilong mekim olsem. Ol papamama i save skulim, strongim, sapotim, na stretim ol pikinini, long wanem, ol i laik bai ol pikinini i stap gut na amamas. Ol papamama i laik bai ol pikinini i mekim wanem long ol? Ol i laik bai ol pikinini i laikim ol tru na putim long bel ol tok papamama i bin givim bilong helpim ol. I stret gutpela Papa bilong yumi long heven i laik bai yumi tenkyu tru long olgeta samting em i bin mekim bilong helpim yumi, a?
Kisim Pasin Bilong Laikim Tru God
15. Pastaim yumi mas mekim wanem bambai yumi ken kisim pasin bilong laikim tru God?
15 Yumi no bin lukim God o harim nek bilong em. (Jon 1:18) Tasol em i singautim yumi long pas gut wantaim em. (Jems 4:8) Olsem wanem yumi ken mekim olsem? Namba wan samting yumi mas mekim bambai yumi ken laikim wanpela man, em yumi mas kisim save long em. I hatwok long laikim tru wanpela man yumi no save long em. Jehova i bin givim Tok bilong em, em Baibel, bambai yumi ken kisim save long em. Long dispela as, Jehova i save strongim yumi long rot bilong oganaisesen bilong em long ritim Baibel long olgeta de. Baibel i lainim yumi long God, ol pasin bilong em na ol samting em i bin mekim long ol man insait long planti tausen yia. Taim yumi tingim tingim long bel ol dispela stori, pasin bilong yumi long laikim em na save long em bai i go bikpela.—Rom 15:4.
16. Olsem wanem pasin bilong tingim wok autim tok bilong Jisas i helpim yumi long laikim God moa yet?
16 Nambawan rot bilong mekim pasin bilong yumi long laikim tru Jehova i go bikpela, em yumi mas tingim laip na wok autim tok bilong Jisas. Jisas i bihainim tru pasin bilong Papa bilong em, olsem na em inap tok: “Man i lukim mi, em i lukim Papa.” (Jon 14:9) Ating yu pilim tru pasin sori bilong Jisas taim em i kirapim bek pikinini man bilong wanpela meri wanpis. (Luk 7:11-15) Yumi amamas long save olsem Pikinini Bilong God, em nambawan man tru i winim olgeta narapela man i bin stap long graun, em i bin daunim em yet na wasim lek bilong ol disaipel bilong em. (Jon 13:3-5) Ating yu pilim tru gutpela pasin bilong em, olsem maski em i bikpela man na em i gat bikpela savetingting winim olgeta narapela man, ol man na ol pikinini tu i no pret long i go long em. (Mak 10:13, 14) Taim yumi tingim tingim long bel ol dispela samting, bai yumi kamap olsem ol Kristen em Pita i tok long ol olsem: “Yupela i no bin lukim [Jisas] yet, tasol yupela i save laikim em.” (1 Pita 1:8) Taim pasin bilong yumi long laikim tru Jisas i go bikpela, bai yumi laikim Jehova moa yet.
17, 18. Pasin bilong tingim tingim long bel wanem ol gutpela samting Jehova i bin givim i ken kirapim yumi long laikim em moa yet?
17 Narapela rot bilong mekim pasin bilong yumi long laikim tru God i go bikpela, em yumi mas tingim tingim long bel ol gutpela samting em i bin wokim bambai yumi ken amamas long i stap laip—ol naispela wara na maunten samting, kain kain switpela kaikai, pasin bilong bung wantaim ol gutpela pren, na planti narapela samting i save mekim bel bilong yumi i stap gut na amamas. (Aposel 14:17) Taim yumi kisim save moa long God bilong yumi, bai yumi lukim olsem i gat planti as moa long yumi mas amamas tru long ol gutpela pasin bilong em na pasin bilong em long givim ol samting. Tingim ol samting Jehova i bin mekim bilong helpim yu yet. Ating yu wanbel long tok olsem i stret yu mas laikim em tru?
18 Wanpela bilong planti presen em God i save givim, em long olgeta taim yumi inap i go klostu long em long rot bilong beten; yumi save em i “harim beten” bilong yumi. (Song 65:2) Jehova i bin givim namba long Pikinini bilong em long mekim wok king na jas. Tasol em i no bin givim wok bilong harim ol beten long wanpela narapela man, long Pikinini bilong em tu, nogat. Em yet i save harim beten bilong yumi. Pasin bilong Jehova long laikim na tingim tru yumi i pulim yumi i go klostu long em.
19. Wanem ol tok promis bilong Jehova i pulim yumi i go klostu long em?
19 Taim yumi tingim ol samting Jehova bai mekim bihain bilong helpim ol manmeri, dispela tu i pulim yumi i go klostu long em. Em i bin tok promis long pinisim sik, bel hevi, na dai. (KTH 21:3, 4) Taim ol manmeri i kamap gutpela olgeta, ol bai i no gat sik bilong bel hevi, ol samting bai i no daunim ol, na bagarap i no inap painim ol. Bai i no gat man i stap hangre, rabis, na bai i no gat pait moa. (Song 46:9; 72:16) Graun bai kamap wanpela paradais. (Luk 23:43, NW) Jehova bai kamapim ol dispela gutpela samting, long wanem, em i laikim tru yumi, na i no olsem em i mas mekim ol dispela samting.
20. Moses i tok wanem long ol gutpela samting bai kamap long pasin bilong laikim tru Jehova?
20 Olsem na i gat as tru na yumi mas laikim tru God bilong yumi na larim dispela pasin i go bikpela. Olsem wanem? Bai yu wok long strongim pasin bilong yu long laikim tru God, na larim em i stiaim wokabaut bilong yu? Yu yet i mas makim dispela samting. Moses i luksave long ol gutpela samting i save kamap taim man i kisim na i holimpas pasin bilong laikim tru Jehova. Long lain Israel long bipo, Moses i tok: “Yupela i mas bihainim rot bilong i stap gut. Yupela i mas laikim tru God, Bikpela bilong yumi, na yupela i mas harim tok bilong en na bel tru long em oltaim. Olsem na bai yupela na ol lain pikinini bilong yupela inap i stap longpela taim.”—Lo 30:19, 20.
Yu Inap Tingim?
• Bilong wanem em i bikpela samting long yumi laikim tru Jehova?
• Olsem wanem yumi ken soim olsem yumi laikim tru God?
• I gat wanem ol as na yumi mas laikim tru Jehova?
• Olsem wanem yumi ken kisim pasin bilong laikim tru God?
[Piksa long pes 20]
Jehova i tingim tru samting yumi olgeta i ken kamapim—pasin bilong yumi long laikim em
[Ol Piksa long pes 23]
“Man i lukim mi, em i lukim Papa.”—Jon 14:9