“Yu Mas Laikim Jehova God Bilong Yu”

 1. Wanem samting i strongim pasin laikim namel long God na Pikinini bilong em?

JISAS KRAIS, pikinini bilong Jehova, em i tokaut olsem: “Mi laikim Papa.” (Jon 14:31) Jisas i tok tu olsem: “Papa i laikim tumas Pikinini.” (Jon 5:20) Yumi no ken kirap nogut long dispela. Inap planti milion yia paslain long Jisas i kam long graun, God i makim em long stap olsem “saveman i bosim wok.” (Snd. 8:30, 31) Taim Jehova na Jisas i wok wantaim, Pikinini i kisim planti save long ol pasin bilong Papa na planti samting i kirapim em long laikim Papa. Tupela i wok gut wantaim na dispela i strongim pasin laikim namel long tupela.

 2. (a) Yumi mas mekim wanem bilong soim olsem yumi gat pasin laikim? (b) Yumi bai skelim wanem ol askim?

² Taim wanpela i laikim narapela, dispela i makim olsem em i tingim tru narapela. Devit i tok: “Jehova, yu man bilong strongim mi, mi tingim yu tru.” (Sng. 18:1, NW) Yumi mas tingim tru God bikos em i tingim tru yumi. Sapos yumi bihainim tok bilong Jehova, orait em bai soim pasin laikim long yumi. (Ritim Lo 7:12, 13.) Tasol yumi no inap lukim God, olsem na yu ting yumi inap tru long laikim em? Yumi mas mekim wanem bilong laikim Jehova? Wai na yumi mas laikim em? Hau bai yumi inap soim olsem yumi laikim God?

3, 4. Hau na yumi inap laikim Jehova?

³ “God em i wanpela Spirit,” olsem na yumi no inap lukim em. (Jon 4:24) Tasol yumi inap laikim Jehova, na Baibel i tok yumi mas soim dispela pasin. Moses i tokim lain Israel: “Yupela i mas laikim tumas God, Bikpela bilong yumi. Yupela i mas laikim em tru long bel bilong yupela na long tingting bilong yupela na long strong bilong yupela.”—Lo 6:5.

⁴ Hau bai yumi inap laikim tru God? Taim God i wokim yumi, em i inapim yumi wantaim laik bilong kisim save long em, na yumi inap long soim pasin laikim. Taim yumi inapim dispela laik, pasin bilong yumi long laikim Jehova bai kamap strong, na dispela bai helpim yumi long i stap amamas. Jisas i tok: “Ol man i hangre long kisim save long God, ol i ken amamas, long wanem, Kingdom bilong heven em i bilong ol.” (Mat. 5:3) Sampela man i tok, yumi ol man i gat laik i stap long skin bilong yumi long lotuim God, na ol i tok: “Yumi mas pilim tru dispela samting olsem, ol man long olgeta hap i wok long painim nambawan bikpela man bilong ples antap, na ol i bilip long em.”—Buk, Man Does Not Stand Alone, by A. C. Morrison.

 5. Hau na yumi save olsem hatwok bilong yumi long painim God i no inap lus nating?

⁵ Yu ting hatwok bilong yumi long painim God bai lus nating? Nogat. Em i laik bai yumi painim em. Aposel Pol i kamapim klia dispela samting taim em i autim tok long ol man i bung long maunten Areopagus, klostu long Partenon. Partenon em tempel ol i dediketim long Atena, god meri bilong Atens bilong bipo. Tingim olsem yu stap long dispela hap taim Pol i toktok long “dispela God husat i bin wokim graun na olgeta samting i stap long en,” na em i tok olsem dispela God “i no save stap long ol tempel ol man i wokim long han.” Pol i tok moa olsem, “long rot bilong wanpela man [God] i kamapim olgeta lain man bai ol i ken i stap long olgeta hap bilong graun. Na em i makim taim bilong ol samting i ken kamap na em i makim ol hap we ol man i ken sindaun long en, bai ol i ken painim God, yes, ol i ken wok strong tru long mekim olsem na painim em tru. Tasol tru tru em i no stap longwe long yumi olgeta wan wan.” (Apo. 17:24-27) Yes, i gat rot long ol man inap painim God. Winim 7 milion Witnes Bilong Jehova i “painim God” pinis, na ol i laikim em tru.

 6. Jisas i tok wanem lo em “namba 1 lo na i winim ol arapela lo”?

⁶ Bel i mas kirapim yumi long laikim Jehova. Jisas i kamapim klia dispela samting taim wanpela Farisi i askim olsem: “Tisa, long Lo Bilong Moses, wanem lo i nambawan na i winim ol arapela lo?” Jisas i tok: “‘Yu mas laikim Jehova, God bilong yu. Yu mas laikim em long bel olgeta bilong yu, na long laip olgeta bilong yu, na long tingting olgeta bilong yu.’ Dispela em namba 1 lo na i winim ol arapela lo.”—Mat. 22:34-38.

 7. Yumi ken mekim wanem bilong soim olsem yumi laikim God long (a) “bel olgeta” bilong yumi? (b) “laip olgeta” bilong yumi? (c) na “tingting olgeta” bilong yumi?

⁷ Taim Jisas i tok yumi mas laikim God long “bel olgeta” bilong yumi, dispela i makim olsem yumi mas mekim wanem? Dispela i makim olsem yumi mas laikim Jehova wantaim olgeta laik na filings bilong yumi. Na tu, yumi mas laikim em long “laip olgeta” bilong yumi. Na moa yet, yumi mas laikim God “long tingting olgeta” bilong yumi. Yumi no ken surik long givim olgeta samting yumi gat bilong soim olsem yumi laikim tru Jehova.

 8. Sapos yumi laikim tru God, dispela bai kirapim yumi long mekim wanem?

⁸ Sapos yumi laikim God long bel olgeta, laip olgeta, na tingting olgeta bilong yumi, orait yumi bai stadi gut long Tok Bilong God, yumi bai givim bel olgeta long mekim samting em i tingting pinis long kamapim, na yumi bai givim bel tru long autim gutnius bilong Kingdom. (Mat. 24:14; Rom 12:1, 2) Sapos yumi laikim tru Jehova, dispela bai kirapim yumi long i go klostu moa long em. (Jems 4:8) I gat planti risen bilong yumi long laikim God. Tasol yumi bai skelim sampela tasol.

 9. Wai na yu laikim Jehova olsem Krieta na Man Bilong Givim ol samting?

⁹ Jehova em Krieta na Man Bilong Givim ol samting. Pol i tok: “Long rot bilong em yumi gat laip na yumi inap wokabaut na stap.” (Apo. 17:28) Jehova i wokim graun olsem naispela ples bilong yumi long i stap long en. (Sng. 115:16) Na tu, em i givim kaikai na ol narapela samting yumi nidim bilong i stap laip. Olsem na Pol inap tokim ol man i lotuim ol imis long taun Listra olsem, “God i gat laip . . . i bin mekim ol gutpela samting na ol dispela samting i tokaut long em. Em i mekim ren i lusim skai na i kam daun long yupela, na mekim planti gutpela kaikai i kamap na mekim bel bilong yupela i amamas.” (Apo. 14:15-17) Dispela em gutpela risen tru long yumi mas laikim Nambawan Bikpela Krieta bilong yumi na Man Bilong Givim ol samting!—Sav. 12:1.

10. God i opim rot long pinisim sin na dai, olsem na yumi mas mekim wanem?

¹⁰ God i opim rot long pinisim sin na dai yumi kisim long Adam. (Rom 5:12) “God i soim pasin laikim bilong em long yumi long dispela rot: Krais i dai bilong helpim yumi taim yumi stap sinman yet.” (Rom 5:8) Yumi laikim tumas Jehova bikos em i opim rot long fogivim sin bilong yumi sapos yumi tanim bel na bilip long ofa bilong Jisas long baim bek ol man.—Jon 3:16.

11, 12. Jehova i tok promis long mekim wanem?

¹¹ Jehova “i as bilong ol gutpela samting yumi bilip na wetim, na em i ken mekim amamas na bel isi i pulap” long yumi. (Rom 15:13) Dispela i strongim yumi long winim ol traim. Ol Kristen God i bin makim husat i ‘sanap strong long bilip i go inap long ol i dai,’ God ‘bai givim ol prais bilong laip.’ (Rev. 2:10) Ol man husat i stap gut long God na ol i bilip na wet long kisim laip oltaim long graun, ol bai kisim blesing taim God i truim tok promis bilong kamapim Paradais long graun. (Luk 23:43) Yumi pilim olsem wanem long ol dispela tok promis? Yumi pulap long amamas na bel isi, na yumi laikim tru Man Bilong Givim “olgeta gutpela presen na olgeta presen i nambawan tru”!—Jems 1:17.

¹² God i tok promis long kirapim bek ol man i dai pinis. (Apo. 24:15) Yumi save bel hevi tru taim wanfamili o pren i dai, tasol tok promis bilong kirap bek i mekim na yumi no “bel hevi wankain olsem ol arapela em ol i no bilip na wetim gutpela samting.” (1 Tes. 4:13) God Jehova i pulap tru long pasin laikim, olsem na em i laik tumas long kirapim bek ol man i dai pinis, moa yet em ol gutpela bilipman olsem Jop. (Jop 14:15) Tingim bikpela amamas bai kamap taim ol man i kirap bek na bungim gen ol wanfamili na pren bilong ol hia long graun. Yumi laikim tru Papa bilong yumi long heven bikos em i opim rot long yumi inap bilip na wet long lukim ol man i dai pinis i kirap bek!

13. Wanem samting i soim olsem God i save wari tru long yumi?

¹³ Jehova i save wari tru long yumi. (Ritim Song 34:6, 18, 19; 1 Pita 5:6, 7.) Yumi save olsem oltaim God i redi long helpim ol man i stap gut long em, olsem na yumi pilim olsem yumi stap gut ‘olsem ol sipsip bilong em.’ (Sng. 79:13) Na moa yet, pasin laikim bilong God bai kamap klia moa taim em i yusim Kingdom Bilong Mesaia long mekim ol samting bilong helpim yumi. God i makim Jisas Krais long stap King, na Jisas bai pinisim pasin bilong pait na bagarapim man, pasin bilong daunim ol narapela, na pasin nogut. Bihain, ol man husat i bihainim tok bilong God, ol bai stap gut na stap bel isi. (Sng. 72:7, 12-14, 16) Ol dispela blesing i kirapim yumi long laikim God long bel olgeta, laip olgeta, strong olgeta, na tingting olgeta bilong yumi!—Luk 10:27.

14. God i orait long yumi inap kisim wanem nambawan gutpela blesing?

¹⁴ Jehova i orait long yumi inap kisim nambawan gutpela blesing long i stap olsem ol Witnes bilong em. (Ais. 43:10-12) Yumi laikim God bikos em i orait long yumi inap sapotim wok King bilong em na helpim ol man long dispela taim nogut bilong nau long bilip na wet long gutpela samting bai kamap bihain. Na moa yet, yumi inap bilip tru long tok yumi autim bikos yumi autim gutnius i kam long Tok Bilong God, na olgeta tok promis bilong God i save kamap tru. (Ritim Josua 21:45; 23:14.) I gat planti moa blesing na ol samting we i stap olsem risen bilong yumi long laikim Jehova. Tasol hau bai yumi inap soim olsem yumi laikim em?

15. Taim yumi stadi long Tok Bilong God na bihainim, hau bai dispela i helpim yumi?

¹⁵ Stadi gut long Tok Bilong God na bihainim. Taim yumi mekim olsem, dispela i soim olsem yumi laikim Jehova na yumi laik tru bai tok bilong em i stap ‘olsem lait bilong soim rot long yumi.’ (Sng. 119:105) Sapos yumi bel hevi, ol dispela gutpela tok inap mekim gut bel bilong yumi, olsem: “Yu no givim baksait long man i pilim hevi long sin na i daunim em yet.” “Bikpela, yu sori tumas long mi na yu holim mi na mi no pundaun long sin. Na taim mi bel hevi na mi gat planti tingting long ol samting, yu save mekim bel bilong mi i stap isi na yu mekim mi i amamas.” (Sng. 51:17; 94:18, 19) Jehova i save marimari long ol man i karim hevi, na Jisas tu i save sori long ol man. (Ais. 49:13; Mat. 15:32) Taim yumi stadi long Baibel, dispela inap helpim yumi long luksave long pasin bilong Jehova long tingim tru yumi na dispela bai kirapim yumi long laikim em moa yet.

16. Taim yumi beten long olgeta taim, olsem wanem dispela inap mekim na pasin bilong yumi long laikim God i kamap strong moa?

¹⁶ Beten long God long olgeta taim. Beten i helpim yumi long i go klostu moa long Man bilong “harim beten.” (Sng. 65:2) Taim yumi luksave olsem God i bekim ol beten bilong yumi, dispela i kirapim yumi long laikim em moa yet. Ating yumi lukim olsem em i no save larim traim i kamap long yumi we i winim strong bilong yumi. (1 Kor. 10:13) Sapos yumi tingting planti na yumi beten strong na askim Jehova long helpim yumi, yumi inap kisim bikpela “bel isi bilong God.” (Fili. 4:6, 7) Sampela taim, yumi inap kolim beten long tingting olsem Nehemia i bin mekim, na yumi luksave olsem God i bekim beten bilong yumi. (Neh. 2:1-6) Taim yumi “holim strong pasin bilong beten,” na yumi lukim olsem Jehova i wok long bekim ol beten bilong yumi, pasin bilong yumi long laikim em bai kamap strong moa, na yumi bai bilip strong moa olsem em bai helpim yumi long winim ol traim.—Rom 12:12.

17. Sapos yumi laikim God, yumi bai pilim olsem wanem long pasin bilong i go long miting?

¹⁷ Kisim pasin bilong i go oltaim long ol miting na kibung. (Hib. 10:24, 25) Lain Israel i bung wantaim long harim tok bilong Jehova na kisim save long em bambai ol inap stap daun long em na bihainim Lo bilong em. (Lo 31:12) Sapos yumi laikim tru God, yumi bai pilim olsem i no hatwok long mekim laik bilong God. (Ritim 1 Jon 5:3.) Olsem na yumi no ken larim wanpela samting i mekim na yumi pilim olsem pasin bilong i go long miting em i samting nating. Yumi no laik bai wanpela samting i mekim na yumi lusim pasin bilong laikim Jehova olsem yumi gat long pastaim.—Rev. 2:4.

18. Pasin bilong laikim God i kirapim yumi long mekim wanem long gutnius yumi save pinis long en?

¹⁸ Givim bel tru long autim “tok i tru bilong gutnius” long ol narapela. (Gal. 2:5) Pasin bilong yumi long laikim God i kirapim yumi long tokim ol narapela long Kingdom Bilong Mesaia em Pikinini Bilong God i stap King long en, na em bai “go pait bilong sambai long tok i tru” long taim bilong Armagedon. (Sng. 45:4, NW; Rev. 16:14, 16) Yumi amamas tru long insait long wok bilong kamapim ol disaipel taim yumi helpim ol man long kisim save long pasin laikim bilong God na nupela taim God i tok promis long kamapim!—Mat. 28:19, 20.

19. Wai na yumi mas amamas long rot Jehova i stretim bilong lukautim lain sipsip bilong em?

¹⁹ Soim amamas bilong yu long rot God i stretim bilong lukautim lain sipsip bilong em. (Apo. 20:28) Jehova i givim ol elda bilong helpim yumi. Ol i stap olsem “ples hait ol manmeri i ken i go na hait long en long taim bilong bikpela win na ren. Na bai ol i stap tu olsem wara i ran i go long ples drai na olsem bikpela ston i haitim san long ples drai na ol man i kam sindaun long ples kol bilong en na malolo long taim bilong hatpela san.” (Ais. 32:1, 2) Yumi save amamas tru long stap long ples hait long taim bilong bikpela win na ren! Taim lait bilong san i hot tumas, yumi save amamas long hait long ples kol bilong traipela ston. Ol dispela tok piksa i helpim yumi long luksave olsem, ol elda i strongim yumi na helpim yumi long stap strong long bilip. Ol man i go pas long yumi, ol i stap olsem “ol presen.” Taim yumi bihainim tok bilong ol, yumi soim olsem yumi pilim tru wok bilong ol na yumi laikim God na Krais, em Het bilong kongrigesen.—Efe. 4:8; 5:23; Hib. 13:17.

20. Sapos yu laikim God, hau bai yu bihainim tok bilong Jems 1:22-25?

²⁰ Sapos yu pas gut wantaim Jehova, dispela bai helpim yu long ‘kamap man bilong bihainim tok, na yu no kamap man bilong harim nating tasol.’ (Ritim Jems 1:22-25.) “Man bilong bihainim tok” em i bilip na dispela i save kirapim em long mekim ol kain wok olsem givim bel tru long autim tok na insait long ol miting Kristen. Sapos yu laikim tru God, orait yu bai bihainim “dispela lo i gutpela olgeta” em Jehova i bin kamapim, na yu bai mekim olgeta samting em i laik yu mas mekim.—Sng. 19:7-11.

21. Taim yu pilim tru ol tok yu mekim long beten, dispela i kain olsem wanem samting?

²¹ Pasin bilong yu long laikim God Jehova bai kirapim yu long beten long olgeta taim na yu bai pilim tru ol tok yu kolim long beten. Devit i tingim pasin bilong kukim paura long olgeta de olsem kontrak bilong Lo i makim, olsem na em i singim song olsem: “Mi laik yu [God] kisim prea bilong mi olsem smok i gat gutpela smel i go long yu, na olsem ofa mi mekim long nait.” (Sng. 141:2; Kis. 30:7, 8) Taim yu bihainim pasin daun na beten askim God long helpim yu, o yu beten strong, o yu litimapim nem bilong God na tok tenkyu long em, dispela i ken kamap olsem paura i gat gutpela smel, olsem God i ken orait long beten bilong yu.—Rev. 5:8.

22. Long neks stadi, yumi bai stori long wanem kain pasin laikim?

²² Jisas i tok yumi mas laikim God na ol arapela man. (Mat. 22:37-39) Long neks stadi, yumi bai stori moa long olsem wanem pasin bilong laikim Jehova na ol stiatok bilong em bai helpim yumi long pas gut wantaim ol narapela na soim pasin laikim long ol.