Wok Yet Long Kamap Strongpela Kristen—“Bikpela De Bilong Jehova i Klostu”
“Yumi mas kisim olkain skul bilong ol man i bikpela pinis.”—HI. 6:2.
1, 2. Long taim bilong ol aposel, wanem rot i op na ol Kristen long Jerusalem na Judia i ken “ranawe i go long ples maunten”?
TAIM Jisas i stap long graun, ol disaipel i kam long em na i askim em: “Wanem mak bai i kamap pastaim, na mipela i ken save, yu . . . kam bek na [“pasin bilong,” NW] dispela graun i laik pinis?” Namba wan truim bilong tok profet Jisas i bin givim long ol disaipel olsem bekim bilong dispela askim, em i bin kamap long taim bilong ol aposel. Jisas i toktok long narakain samting bai kamap na dispela i makim olsem pinis i klostu. Taim ol i lukim dispela samting i kamap, “ol manmeri i stap long distrik Judia ol i mas ranawe i go long ples maunten.” (Mt. 24:1-3, 15-22) Olsem wanem? Ol disaipel bilong Jisas bai luksave long mak na bihainim tok Jisas i givim long ol?
2 Klostu 30 yia bihain, long 61 C.E., aposel Paul i raitim wanpela strongpela tok i go long ol Kristen Hibru i sindaun long Jerusalem na ol ples i stap klostu. Pol na ol wanbilip bilong em, ol i no bin save olsem dispela mak bilong kirapim “bikpela hevi tru” bai kamap 5-pela yia bihain tasol. (Mt. 24:21) Long 66 C.E., Sestius Galus, i kam wantaim ami bilong Rom na klostu ol i daunim Jerusalem. Tasol wantu ol i lusim Jerusalem na i go bek, na dispela i opim rot long ol manmeri long ranawe na abrusim bagarap.
3. Pol i givim wanem tok long ol Kristen Hibru? Bilong wanem em i givim dispela tok?
3 Ol dispela Kristen i mas luksave olsem ol samting i kamap i olsem truim bilong ol tok bilong Jisas, na ol i mas ranawe. Tasol tingting bilong sampela “i pas na i no klia.” Ol i stap olsem liklik pikinini long ol samting bilong spirit na ol i laik kisim “susu” tasol. (Ritim Hibru 5:11-13.) Maski sampela i bin i stap insait long tok i tru klostu 30 yia, ol i laik “lusim bilip na i givim baksait long God i gat laip.” (Hi. 3:12) Sampela i gat “pasin” bilong lusim ol miting Kristen maski taim nogut bilong “De bilong Krais em i kam klostu.” (Hi. 10:24, 25) Pol i givim strongpela tok long ol, olsem: “Yumi no ken toktok tasol long ol skul yumi save kisim pastaim long tok bilong Krais. . . . Nogat. Yumi mas kisim olkain skul bilong ol man i bikpela pinis.”—Hi. 6:1, 2.
4. Bilong wanem em i bikpela samting long yumi was i stap? Wanem samting bai helpim yumi long mekim olsem?
4 Yumi stap long taim bilong laspela truim bilong tok profet bilong Jisas. “Bikpela de bilong Jehova i klostu”—em dispela de we pasin bilong dispela graun bilong Satan bai pinis. (Sef. 1:14, NW) Nau, winim olgeta taim bipo, yumi mas was i stap long ol samting bilong spirit. (1 Pi. 5:8) Olsem wanem? Yumi save mekim olsem? Sapos yumi stap olsem strongpela Kristen, dispela bai helpim yumi long tingim gut dispela taim nau yumi stap long en.
Pasin Bilong Stap Strongpela Kristen Em Wanem Samting?
5, 6. (a) Wanem samting i insait long pasin bilong kamap strongpela Kristen? (b) Bilong wok yet long kamap strongpela Kristen yumi mas wok strong long wanem tupela samting?
5 Pol i strongim ol Kristen Hibru long taim bilong ol aposel long ol i mas wok yet long kamap strongpela Kristen, na tu, em i tokim ol long wanem samting i insait long pasin bilong kamap strongpela Kristen. (Ritim Hibru 5:14.) Ol “man i kamap bikpela pinis” i no amamas long dring “susu” tasol. Nogat. Ol i save kisim “strongpela kaikai.” Olsem na ol i save long “ol namba wan hap tru bilong tok bilong God” na “olgeta tingting hait” bilong tok i tru. (1 Ko. 2:10) Na ol i save skulim gut tingting—long rot bilong bihainim ol tok ol i save long en—na dispela i helpim ol long skelim wanem samting i stret na wanem samting i no stret. Taim ol i mas makim ol samting ol i laik mekim, dispela skul bai helpim ol long tingim ol stiatok bilong Baibel long dispela samting na olsem wanem ol i ken bihainim ol dispela stiatok.
6 Pol i tok: “Dispela tok yumi harim pinis, yumi mas holim strong long tingting na bihainim gut. Nogut yumi slek long bihainim dispela tok na yumi lusim olgeta.” (Hi. 2:1) Sapos yumi no was gut, yumi inap lusim bilip paslain long yumi luksave long en. Yumi inap abrusim dispela sapos yumi “holim strong long tingting na bihainim gut” ol tok yumi lain long en taim yumi stadi long Baibel. Olsem na yumi olgeta wan wan i mas askim yumi yet: ‘Mi save stadi tasol long ol as tok bilong Baibel? Mi save mekim nating ol samting, na mi no givim bel tru long tok i tru? Olsem wanem mi inap kamap strong long tok i tru?’ Bilong wok yet long kamap strongpela Kristen yumi mas wok strong long tupela samting. Yumi mas save gut long Baibel, na yumi mas lain long bihainim tok.
Save Gut Long Baibel
7. Olsem wanem pasin bilong save gut long Baibel inap helpim yumi?
7 Pol i tok: “Yumi save, ol dispela lain i save dring susu tasol, em ol liklik pikinini. Na ol i no save gut long wanem ol pasin i stret.” (Hi. 5:13) Bilong kamap strongpela Kristen, yumi mas save gut long tok bilong God. Dispela tok i stap long Baibel, olsem na yumi mas i stap olsem gutpela sumatin bilong Baibel na bilong ol buk na nius em “wokboi i gat gutpela tingting” i kamapim. (Mt. 24:45-47) Taim yumi kisim tingting bilong God long dispela rot, dispela inap helpim yumi long skulim gut tingting bilong yumi. Tingim stori bilong wanpela Kristen, nem bilong em Orchid.a Em i tok: “Wanpela tok i mekim bikpela samting tru long laip bilong mi, em dispela tok long yumi mas ritim Baibel long olgeta de. Mi lusim klostu 2-pela yia bilong ritim Baibel olgeta, tasol mi pilim olsem nau em namba wan taim mi kisim save tru long Man Bilong Wokim yumi. Mi lain long ol pasin bilong em, ol samting em i laikim na i no laikim, strong bilong em i bikpela olsem wanem, na bikpela savetingting bilong em. Pasin bilong ritim Baibel long olgeta de i bin helpim mi long stap strong taim mi karim bikpela hevi tru.”
8. Baibel inap mekim wanem long laip bilong yumi?
8 Taim yumi ritim wanpela hap bilong Baibel long olgeta de, dispela inap mekim na tok bilong en i “wok strong” long laip bilong yumi. (Ritim Hibru 4:12.) Dispela inap senisim tingting na laik i stap long bel bilong yumi na Jehova i ken laikim yumi. Olsem wanem? Yu gat wok long lusim sampela hap taim moa bilong ritim Baibel na tingim ol tok bilong en long bel?
9, 10. Bilong save gut long Baibel yumi mas mekim wanem? Stori long dispela.
9 Bilong save gut long Baibel, dispela i no makim olsem yumi save tasol long ol tok bilong en, nogat. Ol man husat i stap olsem liklik pikinini long ol samting bilong spirit long taim bilong aposel Pol, ating ol i gat sampela save long ol tok bilong Baibel. Tasol ol i no bihainim na lukim olsem ol tok bilong en i gutpela. Ol i no kisim save gut long tok bilong en, na larim ol dispela tok i stiaim ol long mekim ol gutpela disisen long laip bilong ol.
10 Pasin bilong save gut long Baibel i makim olsem yumi save long ol tok bilong en na yumi bihainim dispela save. Stori bilong wanpela sista Kristen, nem bilong em Kyle, i kamapim olsem wanem yumi ken mekim olsem. Kyle i gat wanpela kros wantaim wanpela wanwok bilong em. Em i mekim wanem bilong stretim dispela kros? Em i tok: “Mi tingim tok bilong Rom 12:18, i tok: ‘Oltaim yupela i mas painim rot bilong i stap wanbel wantaim olgeta man.’ Olsem na mi askim wanwok long toktok wantaim em bihain long wok.” Ol i toktok gut wantaim, na wanwok i kirap nogut long gutpela pasin bilong Kyle long stretim dispela kros. Kyle i tok: “Mi lain olsem long olgeta taim em stretpela pasin long bihainim ol stiatok bilong Baibel.”
Lain Long Bihainim Tok
11. Wanem samting i kamapim olsem i hatwok long bihainim tok taim i gat ol bikpela hevi?
11 Pasin bilong bihainim ol tok yumi lainim long Baibel i hatwok, na moa yet taim i gat ol bikpela hevi. Olsem: Bihain liklik long taim Jehova i helpim ol Israel long lusim kalabus long Isip, ol i “krosim Moses” na “traim strong bilong Bikpela.” Bilong wanem ol i krosim Moses? Long wanem, ol i no gat wara bilong dring. (Kis. 17:1-4) Inap tupela mun tasol bihain long God i mekim kontrak wantaim ol na ol i tok ol bai “mekim olgeta samting olsem Bikpela i tok,” ol i brukim lo bilong em na lotuim god giaman. (Kis. 24:3, 12-18; 32:1, 2, 7-9) Olsem wanem? Ol i pret, long wanem, inap longpela taim Moses i stap long maunten Horep we Jehova i givim ol tok long em? Ol i ting ol Amalek bai kam pait gen long ol na ol Israel i no gat strong sapos Moses i no stap, em bipo Moses i bin apim han na dispela i helpim ol long winim pait? (Kis. 17:8-16) Ating i olsem, tasol maski wanem samting i mekim na ol i pret, ol Israel i “no laik harim tok.” (Ap. 7:39-41) Pol i kirapim ol Kristen long “wok strong” na ol i no ken “bihainim dispela pasin bilong sakim tok” olsem ol Israel i bin mekim taim ol i pret long i go insait long Graun Bilong Promis.—Hi. 4:3, 11.
12. Olsem wanem Jisas i lain long bihainim tok? Wanem gutpela samting i kamap long dispela?
12 Bilong wok yet long kamap strongpela Kristen yumi mas wok strong long bihainim tok bilong Jehova. Olsem Jisas Krais i soim, planti taim man i lainim pasin bilong bihainim tok long rot bilong karim pen. (Ritim Hibru 5:8, 9.) Paslain long Jisas i kam long graun, em i bihainim tok bilong Papa bilong em. Tasol bilong bihainim laik bilong Papa bilong em taim em i stap long graun, em i mas karim bikpela hevi long tingting na skin. Pasin bilong em long bihainim tok taim em i karim ol bikpela hevi, dispela i mekim na em i kamap “nambawan man tru” long mekim wok God i laik em i mas mekim, olsem wok King na wok Hetpris.
13. Wanem samting i soim olsem yumi lain pinis long pasin bilong bihainim tok?
13 Olsem wanem long yumi? Yumi tingting strong long bihainim tok bilong Jehova, maski yumi gat ol bikpela hevi? (Ritim 1 Pita 1:6, 7.) Tok bilong God long stretpela pasin, no ken giaman, mekim stretpela wok long maus, pasin bilong ritim na stadi long Baibel, go long ol miting Kristen, na insait long wok autim tok, ol dispela tok i klia. (Jos. 1:8; Mt. 28:19, 20; Ef. 4:25, 28, 29; 5:3-5; Hi. 10:24, 25) Olsem wanem? Yumi save bihainim tok bilong Jehova long ol dispela samting maski yumi gat hevi? Taim yumi bihainim tok bilong Jehova long ol dispela samting, dispela i kamapim olsem yumi wok long kamap strong long ol samting bilong spirit.
Kamap Strongpela Kristen —Helpim Yumi Olsem Wanem?
14. Stori long olsem wanem pasin bilong wok yet long kamap strongpela Kristen inap lukautim yumi.
14 Sapos Kristen i skulim gut tingting na em inap skelim wanem samting i gutpela na wanem samting i nogut long dispela graun we ol man “i no save sem moa long pasin ol i save mekim,” dispela bai lukautim gut Kristen. (Ef. 4:19) Olsem: Wanpela brata, nem bilong em James, oltaim em i bin ritim ol buk na nius bilong Baibel na em i pilim tru ol tok bilong en, em i kisim wanpela wok we olgeta wanwok bilong em ol i meri tasol. James i tok: “Planti meri i kamapim long ples klia olsem ol i no bihainim stretpela pasin, tasol wanpela i soim olsem em i gat gutpela pasin na em i laik save long tok i tru bilong Baibel. Tasol taim mitupela tasol i stap long rum, em i laik holim mi na kis long mi. Pastaim mi ting em i giaman, tasol mi hatwok tru long stopim em. Wantu mi tingim wanpela ekspiriens long Wastaua long wanpela brata husat i gat wankain traim long ples wok bilong em. Dispela stori i bin kamapim stori bilong Josep na meri bilong Potifar.b Wantu mi sakim em strong, na em i ran i go ausait.” (Stt. 39:7-12) James i amamas olsem i no gat sampela samting moa i bin kamap na maus bilong bel bilong em i no gat tok.—1 Ti. 1:5.
15. Olsem wanem pasin bilong wok yet long kamap strongpela Kristen bai strongim bel bilong yumi?
15 Pasin bilong stap olsem strongpela Kristen i helpim yumi tu long strongim bel bilong yumi na yumi no ken “larim ol narakain narakain tok i pulim bel” bilong yumi. (Ritim Hibru 13:9.) Taim yumi wok long kamap strong long ol samting bilong spirit, tingting bilong yumi bai stap long “ol pasin i gutpela tru.” (Fl. 1:9, 10) Long dispela rot bai pasin bilong yumi long tenkyu long God na ol samting em i givim bilong helpim yumi bai i go bikpela moa. (Ro. 3:24) Kristen husat i gat “tingting bilong ol bikpela man,” em bai kisim dispela kain pasin bilong tenkyu na em bai pas gut wantaim Jehova.—1 Ko. 14:20.
16. Wanem samting i helpim wanpela sista long kisim ‘strongpela bel’?
16 Wanpela sista, nem bilong em Louise, em i tokaut olsem inap sampela hap taim bihain long em i kisim baptais, nambawan tingting bilong em long mekim ol wok Kristen em bilong amamasim ol narapela. Em i tok: “Mi no mekim wanpela samting i rong, nogat, tasol bel bilong mi i no gat strongpela laik long mekim wok bilong Jehova. Mi luksave olsem mi mas senisim sampela samting bambai mi ken pilim olsem mi givim olgeta samting mi inap givim long Jehova. Bikpela samting mi mas senisim, em mi mas givim bel olgeta long lotuim Jehova.” Em i wok strong long mekim olsem, na em i kisim ‘strongpela bel,’ na dispela i helpim em tru taim ol bikpela hevi bilong sik i kisim em. (Jem. 5:8) Louise i tok: “Mi bin hatwok tru, tasol mi go klostu long Jehova.”
‘Bihainim Tru Tok’
17. Bilong wanem pasin bilong bihainim tok i bikpela samting long taim bilong ol aposel?
17 Tok bilong Pol long “kisim olkain skul bilong ol man i bikpela pinis” i helpim ol Kristen i sindaun long Jerusalem na Judia long taim bilong ol aposel long abrusim bagarap. Ol man i bihainim dispela tok ol i luksave long dispela mak Jisas i bin givim long ol na ol i “ranawe i go long ples maunten.” Taim ol i lukim “dispela samting nogut tru . . . i sanap i stap long haus bilong God yet,” olsem ami bilong Rom i raunim na i laik go insait long Jerusalem, ol i save olsem ol i mas ranawe. (Mt. 24:15, 16) Ol Kristen i bihainim tok lukaut bilong Jisas, na ol i ranawe lusim Jerusalem paslain long Jerusalem i bagarap, na olsem saveman Eusebius i tok, ol i go sindaun long taun Pela long ples maunten bilong Gileat. Long dispela rot ol i abrusim bikpela bagarap tru i painim Jerusalem.
18, 19. (a) Bilong wanem pasin bilong bihainim tok i bikpela samting long nau? (b) Bai yumi skelim wanem samting long stadi i kamap bihain long dispela?
18 Pasin bilong wok yet long kamap strongpela Kristen na pasin bilong bihainim tok, dispela bai helpim yumi tu long abrusim bagarap taim nambawan bikpela truim bilong tok profet bilong Jisas long “bikpela hevi tru” i kamap. (Mt. 24:21) Olsem wanem? Bai yumi bihainim olgeta tok em “bosboi i gat gutpela tingting” i givim long yumi? (Lu. 12:42) Em i bikpela samting long yumi lain long givim bel long “bihainim tru” ol tok.—Ro. 6:17.
19 Bilong yumi kamap strongpela Kristen, yumi mas skulim gut tingting bilong yumi. Yumi inap mekim olsem taim yumi wok strong long kisim gut save long Tok Bilong God na lain long bihainim tok. Pasin bilong kamap strongpela Kristen i hatwok moa long ol yangpela. Stori i kamap bihain long dispela bai skelim olsem wanem ol inap winim ol dispela hatwok.
[Ol Futnot]
a Mipela i bin senisim sampela nem.
b Lukim stori, “Ol i Kisim Strong Long Tok Nogat Long Pasin i No Stret,” i stap long Wastaua bilong Oktoba 1, 1999.
Yu Lainim Wanem Samting?
• Pasin bilong stap strong long ol samting bilong spirit i makim wanem samting? Olsem wanem yumi inap kamap strong long ol samting bilong spirit?
• Olsem wanem pasin bilong save gut long Baibel i insait long pasin bilong wok yet long kamap strongpela Kristen?
• Olsem wanem yumi lain long bihainim tok?
• Sapos yumi stap strongpela Kristen, dispela inap helpim yumi long wanem ol rot?
[Piksa long pes 10]
Pasin bilong bihainim ol tok bilong Baibel i helpim yumi long karim ol hevi
[Piksa long pes 12, 13]
Pasin bilong bihainim tok bilong Jisas i helpim ol Kristen long taim bilong ol aposel long abrusim bagarap