Yumi Kisim Save Long Taim Krais i Kam i Stap
“Taim Pikinini Bilong Man i kam bek olsem king . . . em bai i tilim ol na putim ol long tupela lain.”—MATYU 25:31, 32.
TRIPELA de paslain long taim ol i kilim i dai Jisas, 4-pela disaipel i askim em: “Wanem taim ol dispela samting bai i kamap? Wanem mak bai i kamap pastaim, na mipela i ken save, yu laik i kam bek [tok Grik, pa·rou·siʹa] na dispela graun i laik pinis?” Inap planti handet yia ol misin i bin tok, insait bilong dispela tok bilong ol disaipel long Matyu 24:3 i olsem: Jisas bai kamap man gen long graun na ol man bai lukim em, na bai i gat planti bilaspasin bilong lotu i kamap bilong amamas long em i kam bek. Ol misin i tok em namba 2 kambek bilong Krais. Tok bilong ol i stret o olsem wanem?
2 Long yia 1889 lain bilong Jehova i stap olsem lain bilong givim lait long ol man, na ol i kisim save pinis bilong stretim tingting bilong ol long Krais i kam bek olsem wanem. Long bipo, namba wan presiden bilong Sosaiti Was Taua i bin tok: “Dispela tok pa·rou·siʹa i makim taim Jisas i kam pinis na i stap, na i no makim Jisas bai kam long graun. Jisas i bin tok, ‘Kain pasin ol i bin mekim long taim bilong Noa, ol bai mekim wankain pasin tasol long taim Pikinini Bilong Man i kamap [na i stap pinis, olsem pa·rou·siʹa].’ Jisas i no tok, taim Noa i kam em i kain olsem taim em yet bai kam, nogat. Em i toktok long taim Noa i bin stap namel long ol man paslain long tait, na dispela i wankain taim olsem taim em yet i stap pinis olsem king paslain long ‘bikpela hevi tru’ long De bilong Bikpela [Jehova], em pinis bilong dispela taim nogut bilong nau.”—Matyu 24:21, 37.
3 Olsem na lain bilong Jehova long dispela taim bipo ol i save, pa·rou·siʹa i makim taim Krais i stap pinis, tasol ol man i no inap lukim em. Na ol i kisim save tu olsem ‘taim bilong ol man bilong ol arapela lain’ i pinis long yia 1914. Na bihain moa ol i kisim save olsem Krais Jisas i kamap King bilong Kingdom long heven long yia 1914.—Sindaun 4:18; Daniel 7:13, 14; Luk 21:24; KTH 11:15.
“Taim . . . Krais Em i Kam Bek”
4 Orait, long nau yumi mas ting olsem wanem long dispela tok bilong Baibel, em i tok long “taim Bikpela bilong yumi Jisas Krais em i kam bek”? (1 Tesalonaika 5:23) Dispela tok “kam bek,” long tok Grik ol i kolim pa·rou·siʹa, na wanpela saveman i tok, long bipo, sapos wanpela bikman olsem king samting i kam long provins, ol man i tok, em i stap pinis, olsem pa·rou·siʹa. Olsem na pa·rou·siʹa i makim Bikpela Krais Jisas i stap pinis long mekim wok king long heven, kirap long yia 1914 na bihain long en. Em i truim wanpela tok bilong Baibel i tok, em i “bosim ol birua bilong” em. (Song 110:2) Long dispela taim na i kam inap nau, 79 yia i go pinis, na insait long dispela 79 yia ol man bilong graun i bin pilim ol samting em wok king bilong Krais i mekim nau long taim em i stap King, maski ol i no inap lukim Krais i stap.
5 Dispela 3-pela stori hia bai helpim yumi long tingim ol samting i bin kamap insait long taim Kingdom bilong Krais i bin kirap na i stap. Dispela namba wan stori bai toktok long sampela samting Baibel i tok i mas kamap, na i kamap pinis o i wok yet long kamap. Na namba 2 stori bai toktok long bikpela wok em dispela gutpela wokboi i mekim, em i rot bilong Jisas long mekim ol wok bilong em taim em i stap King. Na namba 3 stori bai toktok long ol bikpela samting bai kamap long taim bilong “bikpela hevi tru,” em taim Jisas bai kirap na pinisim ol man nogut na mekim gut long ol stretpela man. (Matyu 24:21, 29-31) Na long dispela taim olgeta man bai save Krais Jisas i stap King. Pol i toktok long dispela taim bilong bikpela bagarap na em i tok: “[God] bai i tekewe dispela hevi nau yupela i karim, na givim malolo long yupela na long mipela wantaim. God bai i mekim olsem long taim Bikpela Jisas wantaim olgeta strongpela ensel bilong en i lusim heven na i kamap ples klia. Em bai i kam long bikpela paia tru na em bai i mekim save long ol man i no laik save long God na i no bihainim gutnius bilong Jisas, Bikpela bilong yumi.”—2 Tesalonaika 1:7, 8.
Wanpela Mak
6 Naintin handet yia bipo ol disaipel bilong Jisas i bin askim em long kolim wanpela mak na bai ol man bilong bihain i ken save long taim em bai stap King long Kingdom. Tok em i bekim long ol i stap long Matyu sapta 24 na sapta 25, na em i kolim ol samting i olsem mak, na ol dispela samting i wok long kamap long olgeta hap bilong graun, na i taim nogut bilong planti hevi na traim. Jisas i tok: “Yupela lukaut. Nogut wanpela man i giamanim yupela. Long wanem, planti man bai i kam na kolim nem bilong mi na tok, ‘Mi yet mi dispela man God i bin promis long salim i kam bilong kisim bek ol manmeri bilong en.’ Na bai ol i giamanim planti manmeri. Yupela bai i harim nois bilong ol bikpela pait, na yupela bai i harim tok win long ol bikpela pait i kamap. Orait yupela lukaut. Yupela i no ken kirap nogut. Ol dispela samting i mas kamap, tasol las de i no yet.”—Matyu 24:4-6.
7 Na Jisas i tok, ol bikpela pait bai kamap, na tupela i kamap pinis, em wanpela long 1914 i go inap 1918, na wanpela i kamap long 1939 i go inap 1945. Na Jisas tok, kaikai bai i sot, na planti guria bai kamap, na ol man bai mekim nogut long ol Kristen tru. Na tru tumas, ol i bin mekim olsem long ol man i stap olsem lait, em ol Witnes Bilong Jehova, taim ol i autim gutnius bilong Kingdom “long olgeta hap bilong graun.” (Matyu 24:7-14) Yiabuk bilong ol Witnes Bilong Jehova i kamapim klia dispela samting.
8 Jisas i stap King bilong olgeta hap, olsem na long nau yumi lukim trupela lotu i kamap strong long olgeta kantri. Taim Jisas i kamap King, em i gat wok long skelim olgeta man bilong graun. (1 Pita 2:12) Tasol olsem wanem? Jisas bai sindaun long wanpela taun na bai ol man i ken i go toktok wantaim em? Em i tok profet long ol Krais giaman bai kamap. Em i tok: “Sapos ol i tokim yupela, ‘Lukim, em i stap long hap i no gat man,’ orait yupela i no ken i go long dispela hap. Na sapos ol i tok, ‘Lukim, em i stap insait long dispela haus,’ orait yupela i no ken bilip long tok bilong ol. Yupela i save, taim klaut i lait, dispela lait i save kamap long hap bilong sankamap na i lait i go olgeta long hap bilong san i go daun. Orait Pikinini Bilong Man bai i mekim olsem tasol long taim em i kamap [pa·rou·siʹa], na olgeta manmeri bai i lukim.”—Matyu 24:24, 26, 27.
9 Jisas em i “Pikinini Bilong Man,” na em i bin save em bai stap we taim em i kamap King. Em i save em i no ken sindaun i stap long sampela hap bilong dispela graun, nogat. Na em i no ken kamap long wanpela “hap i no gat man” na bai ol man i laik painim Mesaia ol i mas i kam long dispela hap na i no gat wanpela bikman bilong gavman i lukim ol, na em i ken skulim lain bilong em na redim ol bilong pait na daunim gavman na putim em olsem King bilong graun. Nogat. Jisas i no laik mekim olsem. Na em i no ken hait ‘insait long wanpela haus’ na bai lain bilong em tasol i ken save em i stap, na em i ken stretim tok wantaim ol long daunim ol gavman bilong graun na ol i ken putim em i stap King, em dispela Man God i bin promis long salim i kam. Jisas i no laik mekim olsem tu, nogat tru!
10 Taim em i kamap King, dispela i mas kamap ples klia na bai olgeta man i ken save em i stap pinis na i holim dispela wok. Em i no ken i stap hait. Em i tok, ‘taim klaut i lait, dispela lait i save go long olgeta hap.’ Na olsem tasol lait bilong tok i tru bilong Baibel bai go kamap long olgeta hap. Tru tumas, ol Witnes Bilong Jehova i man bilong givim lait long ol man, olsem Jehova i tokim ol: “Bai mi mekim yu i kamap olsem lait bilong olgeta kantri, na bai yu helpim ol manmeri bilong olgeta hap bilong graun na bai mi kisim bek ol.”—Aisaia 49:6.
Ol Ensel i Mekim Wok
11 Na Baibel i tok, taim Jisas i stap King long Kingdom ol ensel bai stap wantaim em, olsem “em bai i salim ol . . . i go bilong” mekim wok. (Matyu 16:27; 24:31) Jisas i tok piksa long wit na gras nogut, na em i tok, “gaden em i dispela graun,” na “taim bilong kisim kaikai, em las de bilong dispela graun,” na “ol wokman em ol ensel tasol.” Tasol yumi no ken ting, taim em i kisim strong na namba bilong bosim Kingdom, em i gat wok long ol ensel tasol bilong bringim tok bilong Kingdom long ol man. I gat sampela samting moa i makim olsem em i stap King. Namba Wan Pait i bin putim hevi long ol Witnes em wit i makim, na ol i bruk i go nabaut. Tasol kirap long yia 1919 Jisas i wok long bungim ol gen na redim ol bilong mekim wok long nem bilong em. (Matyu 13:38, 39) Bihain long 1920 planti tausen moa i givim bel long Kingdom, na God i makim ol long spirit holi na ol i go insait long dispela liklik hap lain em Jisas i bin bungim ol pinis, na olgeta wantaim i kamap olsem wokboi i gat gutpela tingting, na ol i stap olsem inap long nau.
12 Na Baibel i toktok long ol ensel i mekim wok bihain long taim Jisas i kamap King long 1914. Kamapim Tok Hait 12:7-9 i tok: “Maikel [Krais Jisas] wantaim ol ensel bilong en ol i pait long dispela traipela snek. Na snek wantaim ol ensel bilong en ol i bekim pait long ol, tasol ol i no gat strong bilong winim pait. Olsem na ol i no inap i stap moa long heven, na ol ensel bilong God i tromoi dispela snek i go daun. . . . Em i man bilong giamanim olgeta manmeri bilong graun. Ol i tromoi em i go daun long graun, na ol i tromoi ol ensel bilong en i go daun wantaim em.” Nau heven i klin pinis, tasol bihain Jisas i mas klinim graun tu na bai dispela i mekim gut nem bilong Jehova. Nau long dispela yia 1993 ol man i mas tingim yet dispela toksave bilong God, olsem: “Yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.”—KTH 12:12.
Kirap Bek Bilong Go Long Heven
13 Na narapela bikpela samting tu i bin kamap long taim Jisas i kamap king, olsem: Ol man bilong i go long heven na ol i dai pinis na i stap long matmat, ol i kirap bek. Aposel Pol i tok, ol i mas paslain long ol narapela long kirap bek na kamap spirit na go i stap wantaim Krais Jisas long heven. Inap longtaim pinis yumi bin wok long kisim save olsem dispela samting i bin kamap long 1918 na bihain long en. Pol i tok: “Olgeta man bilong lain bilong Krais bai ol i kisim laip. Tasol yumi olgeta bai yumi kirap bek na kisim laip long taim bilong yumi yet. Namba wan em Krais. Na bihain, taim em i kam bek [olsem pa·rou·siʹa], yumi olgeta lain bilong en bai yumi kirap bek.” (1 Korin 15:22, 23) Na long 1 Tesalonaika 4:15-17 Pol i tok: “Taim Bikpela i kam bek [olsem pa·rou·siʹa], yumi manmeri i gat laip na i stap yet, yumi bai i no inap i go paslain long ol manmeri i dai pinis. Nogat.” Dispela lain bilong Krais ol inap olsem 144,000, na olgeta bai i kisim dispela gutpela pe.—KTH 14:1.
14 Olsem Pol i tok, ol Kristen bilong bipo, olsem ol Kristen i bin i stap strong inap long ol man i kilim ol i dai, na ol disaipel bilong bipo, ol i paslain long i go insait long Kingdom bilong heven, na hap lain olsem remnan i stap yet long graun ol bai go bihain long ol. Aposel Jon tu i stori long dispela lain ol i bilong i go long heven na ol i dai nau long dispela taim. Em i tok: “ ‘Nau na olgeta taim bihain, ol manmeri i bilip long Bikpela na ol i dai, ol i ken amamas.’ Na Holi Spirit em tu i tok, ‘Ol i ken amamas tru, long wanem, ol i lusim dispela hatwok ol i bin mekim, na ol i ken malolo. Na ol i no i go nating. Nogat. Gutpela pasin ol i bin mekim, em i go wantaim ol,’ ” olsem taim ol i kirap bek na i stap laip long heven. (KTH 14:13) Na Pol i tok: “Bai yumi olgeta i no i dai. Tasol bai yumi olgeta i senis na i kamap narakain. Dispela bai i kamap wantu tasol, long taim bilong las biugel i krai. . . . Na ol man i dai pinis bai i kirap, na ol i no inap bagarap moa. Na yumi man i no i dai yet, yumi bai i senis na i kamap narakain.” (1 Korin 15:51, 52) Em bikpela mirakel tru, a?
15 Wanpela taim Jisas i skulim ol disaipel long Kingdom na em i laik stretim tingting bilong ol, olsem na em i givim wanpela tok piksa long ol. Em i tok: “Wanpela bikman i laik i go long wanpela longwe ples, bai ol i ken makim em i kamap king. Na bihain bai em i kam bek long as ples na bosim ol lain bilong en. . . . Na em i tilim 20 kina 20 kina long ol. Na em i tokim ol olsem, ‘Yupela kisim dispela mani na wok bisnis long en, inap long taim mi kam bek.’ . . . Ol i makim em i kamap king, na bihain em i kam bek. Em i kam bek pinis, orait em i tok olsem, ‘Singautim ol dispela wokboi bipo mi bin givim mani long ol. Mi laik save hamas winmani olgeta wan wan man i bin kisim.’ ”—Luk 19:11-15.
16 Jisas em i dispela “bikman,” na dispela “longwe ples” em heven. Long heven em i kisim dispela Kingdom long yia 1914. Bihain liklik em i kirap skelim wok bilong ol lain i tok ol i lain bilong em—em i laik save, ol i mekim wanem long dispela wok bilong Kingdom em i bin givim long ol? Ol i mekim gut dispela wok o nogat? Liklik lain tasol ol i mekim gut dispela wok, olsem na em i tokim ol: “Yu gutpela wokboi, na yu bin mekim gutpela wok tru. Yu bin lukautim gut dispela samting i liklik tru, olsem na nau mi givim namba long yu bilong bosim 10-pela taun.” (Luk 19:17) Olsem na bihain long taim Krais i kamap king, wok bilong autim tok bilong Kingdom i go bikpela, na ol i gat wok long tokaut long God bai mekim save long ol man nogut, na Jisas i givim wok long dispela “gutpela wokboi” long lukautim dispela wok.
Autim Tok Long Olgeta Hap
17 Wanem samting moa i mas kamap insait long taim bilong pa·rou·siʹa? Em taim bilong amamas long autim tok na helpim ol nupela man na bai ol i ken winim taim bilong bikpela hevi. Dispela ‘bikpela lain’ i helpim lain remnan long autim tok, ol “i stap olsem pas bilong tokim ol man long pasin bilong” remnan. (KTH 7:9; 2 Korin 3:1-3) Pol i toktok long amamas bilong mekim dispela wok, na em i tok: “Taim Bikpela bilong yumi Jisas i kam bek [pa·rou·siʹa], wanem samting bai i mekim mipela i sanap strong na amamas long ai bilong em? Mipela bai i bringim wanem samting bilong soim olsem mipela i bin mekim gut wok bilong mipela? Mipela bai i amamas long yupela tasol.”—1 Tesalonaika 2:19.
Stap Klin na No Gat Asua
18 Na Pol i beten bambai ol Kristen i stap nau long taim Krais i stap king ol i ken i stap gut long God. Pol i tok: “God . . . i ken mekim yupela i . . . kamap holi olgeta . . . bai yupela stap gutpela olgeta, na bai yupela i no gat asua long taim bilong Bikpela bilong yumi Jisas Krais em i kam bek [pa·rou·siʹa].” (1 Tesalonaika 5:23) Long nau, maski yumi bilong lain remnan o lain bilong i stap long graun, yumi olgeta i pas gut wantaim na i stap wanbel, na narapela i helpim narapela long i stap gut. Na yumi no ken les. Jems i tok: “Ol brata, yupela i mas strongim bel . . . na karim ol hevi, na wetim Bikpela i kam bek [pa·rou·siʹa].”—Jems 5:7, 8.
19 Aposel Pita tu i givim sampela tok long yumi ol man bilong nau. Em i tok, yumi mas lukaut long ol man bilong tok bilas. I gat planti man olsem long olgeta hap. Pita i tok: “Long taim bilong las de, ol man bilong tok bilas bai i kamap, na ol bai i bihainim laik nogut bilong bel bilong ol. Bai ol i tok bilas olsem, ‘Em i bin tok olsem em bai i kam bek gen, a? Orait em i stap we? Em i no inap i kam. Taim ol tumbuna i dai, na i kam inap long nau, olgeta samting i stap wankain olsem bipo tru, taim graun i kamap.’ ” (2 Pita 3:3, 4) Nau long taim Krais i stap king, maski ol man i tok bilas, lain bilong Jehova bai wok yet long givim lait long ol man na bai planti ol i ken abrusim bagarap na i stap laip oltaim.
Sampela Askim
◻ Lain bilong Jehova i wok long kisim wanem save long kambek bilong Jisas, olsem pa·rou·siʹa?
◻ Olsem wanem truim bilong Matyu 24:4-8 i wok long kamap long taim bilong yumi?
◻ Ol ensel i mekim wanem na ol i wok gut wantaim Krais taim em i kamap king?
◻ Wanem bikpela mirakel tru i kamap long taim bilong pa·rou·siʹa?
◻ Wanem amamas i kamap long dispela taim? Husat i insait long en?
[Askim Bilong Stadi]
1. Ol misin i tok wanem long Matyu 24:3?
2, 3. (a) Namba wan presiden bilong Sosaiti Was Taua i bin tok wanem long insait bilong dispela tok pa·rou·siʹa? (b) Lain bilong Jehova i kisim wanem save long kambek o pa·rou·siʹa bilong Krais?
4. Dispela tok, ‘taim Krais i kam bek,’ em i makim wanem samting?
5. Tripela stori bilong dispela nius bai toktok long wanem ol samting bilong taim bilong pa·rou·siʹa?
6. Wanem mak i stap long Matyu sapta 24 na sapta 25?
7. Kirap long yia 1914, wanem ol hap bilong mak i kamap pinis?
8, 9. (a) Taim Jisas i stap king, wanem samting i mas kamap? (b) Tok profet bilong Jisas long ol Krais giaman bai kamap, dispela i givim wanem save long yumi long ples em bai stap long en na pasin em bai mekim taim em i kam i stap?
10. Olsem wanem tok i tru bilong Baibel bai go long olgeta hap olsem klaut i lait?
11. (a) Long dispela wok bilong givim lait bilong Kingdom long ol man, ol ensel i gat wanem wok? (b) Wanem taim ol i bungim ol man olsem wit? Ol i bungim ol i go insait long wanem lain?
12. Ol ensel i insait long wanem wok? Olsem na wanem samting i kamap long graun?
13, 14. (a) Baibel i makim wanem samting i kamap long 1918 na bihain long en? (b) Pol na Jon i tok wanem long lain remnan long nau?
15, 16. (a) Jisas i mekim wanem tok piksa long Luk 19:11-15? Bilong wanem em i mekim dispela tok piksa? (b) Wanem samting i wok long kamap long nau na i truim dispela tok profet?
17. Wanem amamas i kamap long taim bilong pa·rou·siʹa?
18. (a) Pol i mekim wanem beten i toktok long dispela taim bilong pa·rou·siʹa? (b) Yumi mas mekim wanem nau long dispela taim?
19. Pita i givim wanem toksave long yumi long dispela taim bilong pa·rou·siʹa? Taim yumi harim dispela toksave, yumi mas mekim wanem?