Yu Tingim Yet?

Olsem wanem? Yu bin tingim gut ol tok bilong ol nupela Wastaua? Sapos olsem, ating yu bai amamas long tingim bek ol dispela tok hia:

◻ Olsem wanem yumi inap i ‘kam long Jisas’ olsem em i singautim yumi long mekim long Matyu 11:⁠28?

Jisas i tok: ‘Sapos wanpela man i laik bihainim mi, orait em i mas daunim laik bilong em yet, na em i mas karim diwai bilong en na bihainim mi.’ (Matyu 16:24) Olsem na sapos yumi laik ‘kam long Jisas,’ yumi mas daunim laik bilong yumi yet na bihainim laik bilong God na bilong Krais, na i gat sampela wok yumi mas mekim, na yumi mas mekim olsem oltaim.​—⁠8/15, pes 17.

◻ Bilong wanem ‘wan wan tasol’ i save bihainim dispela ‘liklik rot i go long ples bilong kisim laip,’ em Jisas i stori long en long Matyu 7:​13, 14?

Dispela liklik rot i gat planti lo bilong God i stap long en na i hatwok long wokabaut long en. Olsem na, ol man i laik tru long stretim pasin bilong ol na bai i stret wantaim mak God i putim bilong yumi mas bihainim, ol tasol i laik wokabaut long dispela rot. Dispela liklik rot, em ol man i ting i pas tumas na i hatwok long wokabaut long en, em i save mekim man i kamap fri long olgeta bikpela samting. Samting i makim arere bilong dispela rot, em “dispela lo i save . . . mekim yumi i stap fri.” (Jems 1:25)​—⁠9/1, pes 5.

◻ Olsem wanem yu inap kisim gutpela tingting?

I hatwok long kisim gutpela tingting, na taim mama i karim yumi, yumi no gat dispela pasin. Tasol sapos yu no les, na yu beten, na wok strong, na poroman wantaim ol man i gat gutpela tingting, na stadi long Baibel na tingim tingim long bel, na tingim spirit holi bilong Jehova bai helpim yu, yu tu inap kisim gutpela tingting.​—⁠9/1, pes 21.

◻ Olsem wanem pasin bilong bel nogut long sampela samting em inap mekim gutpela wok?

Em inap kirapim man long lukautim gut wanpela long famili na bai sampela pasin nogut i no ken paulim em. Na tu, i stret ol man i ken strong long lotuim Jehova wanpela tasol na ol i bel nogut long pasin bilong lotuim narapela god. (1 King 19:10)​—⁠9/15, pes 8, 9.

◻ Wanem insait bilong dispela tok long Stat 50:​23, em i stori long ol tumbuna pikinini bilong Josep olsem: “Em [Josep] i holim ol na putim long lek bilong en.”

Josep i laikim tru ol dispela pikinini, na em i pilai wantaim ol na holim ol na sindaunim ol long lek bilong em. Ol papa long nau i mas mekim wankain pasin sori long ol pikinini bilong ol.​—⁠9/15, pes 20, 21.

◻ Wanem samting i bikpela samting bilong helpim ol marit na ol famili na bai ol wok bilong ol i kamap gutpela?

Bilong wok bilong ol i ken kamap gutpela, ol poroman marit i mas putim laik bilong God i stap namba wan long olgeta taim. Ol marit i mekim olsem ol i save wok strong long i stap wantaim, na ol i wok long bihainim ol tok bilong God long Baibel bambai ol i ken stretim ol hevi bilong ol. Long dispela rot ol i save abrusim ol kain kain hevi i save kamap taim man i sakim laik bilong God. (Song 19:​7-11)​—⁠10/1, pes 11.

◻ Bilong wanem i bikpela samting tru long nau long tingim taim i sot pinis na yumi mas taitim bun?

Pasin bilong tingim taim i sot pinis na taitim bun, em i insait long pasin bilong givim bel olgeta long mekim wok bilong Jehova. Dispela i helpim ol wokboi bilong God long sakim ol samting Satan i mekim long ol na bai ol i “les long sanap strong.” (Hibru 12:⁠3) Na dispela i helpim yumi na yumi no insait tumas long ol samting bilong graun na larim ol mani kago bilong en i pulim yumi. Yumi wok long tingim “dispela laip em i laip tru.” (1 Timoti 6:19)​—⁠10/1, pes 28.

◻ Long tok piksa bilong ol sipsip na meme, wanem taim Jisas i sindaun long sia king bilong em, na bilong wanem yumi tok olsem? (Matyu 25:​31-33)

Dispela tok piksa i no makim olsem Jisas i sindaun bilong kamap King. Nogat. Em i sindaun olsem Jas. Dispela wok bai i no kisim bikpela hap taim i go inap planti yia, nogat; tok piksa i makim taim bihain, em taim Jisas bai kisim liklik hap taim tasol bilong makim na givim strafe long ol man.​—⁠10/15, pes 22, 23.

◻ Wanem insait bilong dispela tok “ol manmeri bilong dispela taim,” em Jisas i save kolim planti taim?

Jisas i kolim dispela tok bilong makim ol manmeri i stap long taim bilong em wantaim ol gopas bilong ol i olsem “ol aipas, na ol i laik soim rot long ol,” na olgeta wantaim em lain Juda. (Matyu 11:16; 15:14; 24:34)​—⁠11/1, pes 14.

◻ Long laspela truim bilong tok profet bilong Jisas long Matyu 24:​34-39, dispela tok “ol manmeri bilong dispela taim” i makim wanem?

Yumi ken ting olsem Jisas i stori long ol man bilong graun ol i lukim mak bilong Krais i stap pinis, tasol ol i no laik stretim pasin bilong ol.​—⁠11/1, pes 20, 31.

◻ Pasin bilong putim ol taun bilong hait na putim ol tambu, dispela i helpim ol manmeri long Israel bipo olsem wanem?

Dispela pasin i helpim ol Israel long pilim tru olsem ol i mas was gut taim ol i mekim ol wok samting, na ol i no ken mekim nating na ting laip bilong man i no bikpela samting. Na tu, taim yumi tingim pasin marimari bilong Jehova long putim ol taun bilong hait, dispela i kamapim klia olsem yumi mas mekim pasin marimari long man sapos i stret long mekim olsem. (Jems 2:13)​—⁠11/15, pes 14.

◻ Long nau dispela taun bilong hait em wanem samting?

Em samting God i bin putim bilong lukautim yumi na bai yumi no ken brukim lo bilong em long blut na yumi mas i dai. (Stat 9:⁠6)​—⁠11/15, pes 17.

◻ Olsem wanem ol lain brata Kristen inap helpim yumi long “stap strong”? (Aisaia 40:⁠31)

Namel long ol brata sista bilong yumi, yumi save sampela i gat ol wankain hevi olsem yumi. (1 Pita 5:⁠9) Taim yumi save, ol narapela tu i karim ol wankain hevi olsem yumi, na bel hevi bilong yumi i no narapela kain, dispela i strongim bel na bilip bilong yumi.​—⁠12/1, pes 15, 16.