“Yupela i Mas Tingim Ol Man Husat i Go Pas Long Yupela”

DISPELA hap tok bilong aposel Pol long Hibru 13:7, ol inap tanim tu olsem: “Yupela i mas tingim ol man em ol i bosim yupela.” Kirap long Pentikos 33 C.E., ol gutpela aposel bilong Bikpela Jisas Krais ol i inapim dispela wok olsem lain hetman i go pas long givim ol tok bilong stiaim nupela kongrigesen Kristen i kamap. (Apo. 6:2-4) Long yia 49 C.E. samting, ol arapela man tu i insait long dispela lain hetman, i no ol aposel bilong Jisas tasol. Taim tok pait i kamap long pasin bilong katim skin, lain gavening bodi em “ol aposel na ol hetman long Jerusalem” i stretim tok long dispela samting. (Apo. 15:1, 2) Em wok bilong ol long skelim ol samting i wok long painim ol Kristen long olgeta hap. Ol i salim ol pas na ol lo ol i pasim tok long en, ol dispela samting i strongim ol kongrigesen na i helpim ol disaipel long i stap wanbel long tingting na long pasin. Ol kongrigesen i bihainim tok bilong dispela lain hetman na daun long ol, olsem na Jehova i blesim ol na ol kongrigesen i kamap strong.—Apo. 8:1, 14, 15; 15:22-31; 16:4, 5; Hib. 13:17.

² Bihain long dai bilong ol aposel, pasin apostet i kamap bikpela insait long kongrigesen Kristen. (2 Tes. 2:3-12) Olsem Jisas i bin tok profet long en, long tok piksa bilong ol wit na ol gras nogut, ol wit (ol Kristen God i bin makim) ol i planim wantaim ol gras nogut (ol giaman Kristen). Inap planti handret yia, ol i larim dispela lain i stap wantaim i go inap long taim bilong bungim kaikai, em long “pinis bilong dispela taim.” (Mat. 13:24-30, 36-43) Ol Kristen God i bin makim ol i amamas long Jisas i lukautim ol long dispela taim, tasol i no gat gavening bodi, i no gat lain long graun em Jisas i bin yusim bilong stiaim lain bilong em. (Mat. 28:20) Tasol em i tok profet olsem long taim bilong bungim kaikai bai i gat senis i kamap.

³ “Husat tru em i gutpela wokboi i gat savetingting?” Long rot bilong dispela askim, Jisas Krais i kamapim wanpela tok piksa, i olsem hap bilong “sain” em i kolim bilong makim “pinis bilong dispela taim i kamap pinis.” (Mat. 24:3, 42-47) Jisas i tok dispela gutpela wokboi bai wok strong long givim tok bilong God long lain bilong em “long taim stret.” Jisas i bin yusim wanpela lain man—i no wanpela man tasol—long go pas long lukautim ol manmeri long taim bilong ol aposel, olsem tasol gutpela wokboi em Jisas i yusim long dispela taim bilong pinis i no wanpela man tasol, nogat.

⁴ Jisas i bin makim husat long givim tok bilong God long ol disaipel bilong em? I stret olsem em bai yusim ol Kristen God i bin makim em ol i stap long graun. Baibel i kolim ol dispela lain olsem “ol pris i mekim wok king” na ol i kisim wok bilong “‘tokaut long olgeta hap long ol gutpela pasin’ bilong dispela man i bin singautim [ol] long lusim tudak na kam insait long gutpela lait bilong em.” (1 Pita 2:9; Mal. 2:7; Rev. 12:17) Yu ting olgeta Kristen God i bin makim em ol i stap long graun, ol i insait long dispela gutpela wokboi? Nogat. Taim Jisas i wokim mirakel na givim kaikai long 5,000 man—em ol i no kaunim ol meri na ol pikinini—em i tilim ol kaikai long ol disaipel, na bihain ol disaipel i tilim long ol manmeri. (Mat. 14:19) Em i givim kaikai long planti manmeri long rot bilong sampela man tasol. Long nau, Jisas i mekim wankain pasin taim em i givim tok bilong God long ol manmeri.

⁵ Olsem na “gutpela bosboi i gat savetingting,” em liklik lain tasol bilong ol Kristen God i bin makim long holi spirit em ol i insait long wok bilong redim na givim tok bilong God olsem kaikai long dispela taim bilong Krais i kam i stap. (Luk 12:42) Insait long taim bilong las de, ol dispela brata em God i bin makim, ol i kamap “gutpela wokboi i gat savetingting” na ol i wok wantaim long hetkota. Long nau, ol dispela brata em God i bin makim ol long holi spirit, ol i stap olsem Gavening Bodi Bilong Ol Witnes Bilong Jehova.

⁶ Krais i yusim dispela lain long kamapim ol tok i stori long truim bilong ol tok profet bilong Baibel na long givim ol stiatok bilong Baibel long taim stret we yumi ken bihainim long laip bilong yumi. Jisas i givim tok bilong God long yumi long rot bilong ol kongrigesen bilong ol Witnes Bilong Jehova long olgeta hap. (Ais. 43:10; Gal. 6:16) Long taim bilong ol man i bin raitim Baibel, wanpela wokboi o bosboi em bosman i trastim i stap olsem man i lukautim olgeta samting bilong haus. Olsem tasol, gutpela wokboi i gat savetingting i kisim wok bilong lukautim ol wanbilip bilong ol. So gutpela wokboi i lukautim tu mani samting, wok bilong autim tok, ol program bilong kibung sekit na rijinel kibung, na wok bilong makim ol wasman long mekim kain kain wok insait long oganaisesen, na wok bilong kamapim ol buk na nius bilong Baibel, olgeta dispela samting i helpim “ol arapela wokboi.”—Mat. 24:45.

⁷ Husat em “ol arapela wokboi”? Yumi ken tok, em olgeta manmeri i kisim tok bilong God. Pastaim, yumi bin tok ol arapela wokboi i makim olgeta bilong lain Kristen God i bin makim. Bihain, bikpela lain em “ol arapela sipsip,” ol tu i insait long dispela lain. (Jon 10:16) Tupela lain wantaim i save kisim tok bilong God em gutpela wokboi i save givim.

⁸ Long taim bilong traipela hevi tru, taim Jisas i kam bilong tokaut long kot bilong God na pinisim ol pasin nogut bilong nau, em bai makim gutpela wokboi long “lukautim olgeta samting bilong em.” (Mat. 24:46, 47) Ol Kristen i stap olsem gutpela wokboi, ol bai kisim gutpela pe bilong ol long heven. Lain 144,000 em gutpela wokboi tu i insait long en, ol bai mekim wok king wantaim Krais long heven. Tru, bai i no gat moa gutpela wokboi i gat savetingting hia long graun, tasol Jehova na Jisas bai stiaim ol samting hia long graun aninit long Kingdom Bilong Mesaia long rot bilong ol man em i makim bilong mekim wok olsem “ol prins.”—Sng. 45:16.

⁹ I gat planti as na yumi mas “tingim ol man husat i go pas” long ol wok na yumi ken soim olsem yumi trastim ol. Taim yumi mekim olsem, wanem gutpela samting bai kamap? Aposel Pol i tok: “Oltaim ol i was long yupela, na bihain ol i mas tokim God long dispela wok ol i bin mekim. Yupela i mas stap aninit long ol, bai ol i ken mekim dispela wok wantaim amamas na ol i no ken bel hevi. Sapos ol i bel hevi, dispela inap bagarapim yupela.” (Hib. 13:17) Olsem na em i bikpela samting long yumi mas bihainim tok na stap aninit long ol man i go pas long yumi bikos ol i lukautim yumi long ol samting bilong bilip na helpim yumi long i stap gut.

¹⁰ Olsem tok i stap long 1 Korin 16:14 i kamapim, Pol i tok: “Olgeta samting yupela i mekim, yupela i mas mekim wantaim pasin laikim.” Pasin laikim i stiaim ol disisen em lain i go pas long lain bilong God i mekim. Namba 1 Korin 13:4-8 i tok long pasin laikim, olsem: “Man i gat pasin laikim em i no save les kwik, na em i save mekim gutpela pasin. Em i no save jeles, em i no save hambak, em i no gat pasin antap, em i no save bikhet nabaut, em i no save tingim em yet, na em i no save belhat kwik. Em i no save tingim rong ol arapela i mekim long em. Em i no save amamas long ol pasin i no stret, nogat, em i save amamas long ol pasin i tru. Em i no save larim wanpela samting i daunim em, em i save bilip long olgeta samting, em i save wetim ol gutpela samting i kamap, na em i save sanap strong long olgeta hevi i kamap long em. Pasin laikim i no inap pinis.” Pasin laikim i as bilong olgeta disisen ol i mekim bilong helpim ol wokman bilong Jehova, olsem na i gat as tru na bel bilong yumi i stap isi aninit long kain wok bos olsem. Dispela i soim ples klia pasin laikim bilong Jehova.

¹¹ Wankain olsem long taim bilong ol aposel, ol man em Jehova i yusim ol long stiaim lain bilong em, ol i sinman. Tasol Jehova i bin yusim ol sinman long bipo long mekim laik bilong em. Noa i bin wokim wanpela sip na em i autim tok long bikpela bagarap bai kamap long taim bilong em. (Stt. 6:13, 14, 22; 2 Pita 2:5) Jehova i bin makim Moses long kisim lain bilong Em i go lusim Isip. (Kis. 3:10) God i stiaim ol man i gat sin long raitim tok bilong em long Baibel. (2 Tim. 3:16; 2 Pita 1:21) Maski Jehova i yusim ol man i gat sin long stiaim wok bilong autim tok na kamapim ol disaipel long nau, yumi bilip tru long oganaisesen bilong God. Yumi gat dispela bilip, long wanem, yumi save olsem Jehova i sapotim dispela oganaisesen, olsem na oganaisesen i inapim olgeta wok bilong en. Gutpela wokboi i bin karim planti hevi tasol ol i bin sanap strong, na dispela i kamapim klia olsem spirit bilong God i stiaim ol samting. Jehova i givim planti blesing long hap oganaisesen bilong em i stap long graun long nau. Olsem na yumi givim bel olgeta long sapotim na trastim dispela oganaisesen.

¹² Ol brata ol i makim bilong holim ol wok insait long kongrigesen, ol i amamas long mekim ol wok na stap gut long en na long dispela rot ol i kamapim pasin bilong ol long trastim lain wokboi. (Apo. 20:28) Yumi ol man bilong autim tok bilong Kingdom i givim bel long autim tok long ol haus, mekim ol gobek na Baibel stadi. (Mat. 24:14; 28:19, 20) Bilong ol gutpela tok bilong God em gutpela wokboi i redim i ken helpim yumi, yumi redi gut na go long ol miting Kristen, na ol kibung tu. Yumi strongim narapela narapela taim yumi bung wantaim ol brata long ol dispela bung Kristen na dispela i helpim yumi tru.—Hib. 10:24, 25.

¹³ Taim yumi givim mani samting bilong sapotim wok bilong oganaisesen, yumi kamapim olsem yumi trastim oganaisesen. (Prov. 3:9, 10) Taim yumi save ol brata bilong yumi i sot long ol samting bilong skin, kwiktaim yumi helpim ol. (Gal. 6:10; 1 Tim. 6:18) Pasin bilong laikim tru ol brata i kirapim yumi long mekim olsem, oltaim yumi painim rot bilong tok tenkyu long Jehova na oganaisesen bilong em long ol gutpela samting yumi bin kisim.—Jon 13:35.

¹⁴ Yumi soim tu olsem yumi trastim oganaisesen taim yumi sapotim ol disisen em i mekim. Dispela i makim tu olsem yumi daun na bihainim ol tok bilong ol man i gat wok long lukautim yumi, olsem ol wasman sekit na ol elda bilong kongrigesen. Ol dispela brata ol i insait long lain “i go pas” long lukautim yumi, em ol man yumi mas bihainim tok bilong ol na daun long ol. (Hib. 13:7, 17) Maski sapos yumi no kliagut long as bilong sampela disisen ol i mekim, yumi save olsem pasin bilong bihainim ol dispela disisen bai helpim yumi inap oltaim. Dispela i mekim na Jehova i blesim yumi bikos yumi bihainim Tok bilong em na oganaisesen bilong em. Long dispela rot yumi soim olsem yumi daun long Bikman, Jisas Krais.

¹⁵ Yes, i gat as tru na yumi trastim gutpela wokboi i gat savetingting. Satan, em god giaman bilong dispela graun, i wok strong tru long bagarapim nem bilong Jehova na oganaisesen bilong em. (2 Kor. 4:4) No ken pundaun long ol trik nogut bilong Satan! (2 Kor. 2:11) Em i save em i gat “sotpela taim tasol bilong i stap” paslain long em bai kalabus long hul i no gat as, na em i strong tru long pulim planti wokman bilong Jehova i go longwe long God. (Rev. 12:12) Tasol taim Satan i wok strong tru long mekim olsem, yumi mas i go klostu moa long Jehova. Yumi mas bilip tru long Jehova na long rot em i yusim bilong stiaim lain bilong em long nau. Taim yumi mekim olsem, yumi stap wanbel olsem wanpela lain brata.