Tok i Tru i Gutpela Samting Tru Long Yu?
“Yupela bai i save long tok tru, na tok tru bai i mekim yupela i kamap fri.”—JON 8:32.
1. Dispela “tok tru” em Pailat i toktok long en, ating em i narapela kain olsem wanem long “tok tru” em Jisas i toktok long en?
“TOK tru, em wanem samting tru?” Taim Pailat i givim dispela askim long Jisas, i olsem em i no tingim tok i tru bilong Baibel—em i tingim ol narapela tok i tru. Tasol Jisas i tokim em pinis: “Mama i karim mi na mi kam long dispela graun bilong mekim wanpela wok tasol, em bilong autim tok tru, bai olgeta manmeri i ken harim.” (Jon 18:37, 38) Dispela “tok tru” Jisas i toktok long en i narapela kain long tok tru em Pailat i tingim. Jisas i toktok long tok i tru bilong God.
Tingting Bilong Graun Long Tok i Tru
2. Wanem tok bilong Jisas i soim olsem tok i tru em i gutpela samting tru?
2 Pol i tok: “Planti man ol i no bilip.” (2 Tesalonaika 3:2) Na i wankain tu long tok i tru. Planti man, maski ol i gat rot long save long tok i tru em Baibel i as bilong en, ol i givim baksait long en. Tasol tok i tru em i wanpela gutpela samting tru! Jisas i tok: “Yupela bai i save long tok tru, na tok tru bai i mekim yupela i kamap fri.”—Jon 8:32.
3. Yumi mas harim gut wanem tok lukaut long olkain tok i laik giamanim yumi?
3 Aposel Pol i tok, yumi no inap painim tok i tru long tok bilong ol man bilong graun na tok bilong ol tumbuna. (Kolosi 2:8) Ol kain tok olsem i save giamanim man. Pol i givim tok lukaut long ol Kristen long Efesus olsem, sapos ol i bilip long ol dispela tok bilong ol man, bai ol i kain olsem ol pikinini long ol samting bilong spirit, em “olgeta pasin bilong trik na giaman” i save “sakim [ol] nabaut olsem win na si i save sakim kanu long solwara, na kanu i trip nabaut.” (Efesus 4:14) Long nau, ol man i birua long tok i tru bilong God ol i save kamapim “olgeta pasin bilong trik na giaman” bilong grisim man. Kain tok olsem i save paulim tok i tru na mekim i kamap olsem tok giaman, na i laik kirapim ol man long bilip olsem tok giaman em tok i tru. Bilong painim tok i tru nau long taim i gat ol dispela tok i laik paulim ol man, yumi mas wok strong long stadi long Baibel.
Ol Kristen na Dispela Graun
4. Husat ol i gat rot long kisim tok i tru? Ol man i kisim, ol i gat wok long mekim wanem?
4 Jisas Krais i tingim ol man i bin kamap disaipel bilong em na em i beten long Jehova olsem: “Tok bilong yu i tru olgeta, na mi laik bai yu mekim tok tru bilong yu i wok insait long bel bilong ol, na mekim ol i kamap ol lain bilong yu stret.” (Jon 17:17) Ol dispela man bai stap narapela kain, olsem lain bilong God stret, bilong mekim wok bilong Jehova na kamapim nem bilong em na Kingdom bilong em long ol man. (Matyu 6:9, 10; 24:14) Tru, planti man ol i no bilip long tok i tru, tasol ol man i wok long painim tok i tru, Jehova i save givim nating long ol olsem presen, maski ol i bilong wanem lain o wanem skin o ol i go bikpela insait long wanem kain pasin. Aposel Pita i tok: “God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.”—Aposel 10:34, 35.
5. Bilong wanem planti man i save mekim nogut long ol Kristen?
5 Ol Kristen i save givim tok i tru bilong Baibel long ol man, tasol i no olgeta man i amamas long ol. Jisas i toksave olsem: “Bai ol i kisim yupela bilong givim pen na hevi long yupela, na bai ol i kilim yupela i dai. Na olgeta lain manmeri bai ol i bel nogut tru long yupela, long wanem, nem bilong mi em i stap long yupela.” (Matyu 24:9) Long yia 1817, wanpela pris bilong Aialan, em John R. Cotter, i stori long dispela ves na i tok: “Long rot bilong wok bilong ol long autim tok, ol [Kristen] i laik helpim ol man long senisim pasin bilong ol, tasol ol man i no tenkyu long dispela wok, nogat; ol i bel nogut long ol disaipel na mekim nogut long ol, long wanem, ol i kamapim long ples klia ol pasin nogut bilong ol dispela man.” Ol dispela man, “taim God i givim tok tru long ol, bai em i ken kisim bek ol, ol i no laikim tru dispela tok.” Long dispela as “God i paulim tru tingting bilong ol, bai ol i bilipim tok giaman. Olsem na olgeta man i no bin bilipim tok tru, na ol i bin amamas long mekim pasin nogut tasol, ol bai i kisim pe nogut long kot bilong God.”—2 Tesalonaika 2:10-12.
6. Kristen i no ken kisim pasin bilong laikim wanem ol samting?
6 Aposel Jon i givim tok long ol Kristen i stap namel long ol lain bilong dispela graun na em i tok: “Yupela i no ken laikim ol pasin bilong graun na olgeta samting bilong graun. . . . Olgeta pasin bilong ol man bilong graun, em pasin bilong bel kirap na aigris na bikhet, ol dispela pasin i no kam long Papa. Nogat. Ol i pasin bilong graun tasol.” (1 Jon 2:15, 16) Em nau, Jon i tok long “olgeta pasin”—i no sampela tasol. Olsem na yumi no ken kisim pasin bilong laikim wanpela samting bilong graun em inap pulim yumi na yumi lusim tok i tru. Sapos yumi harim gut tok bilong Jon, dispela bai i gat strong long stiaim ol samting yumi mekim. Em bai stiaim yumi olsem wanem?
7. Ol man i gat stretpela bel, taim ol i kisim save long tok i tru dispela i kirapim ol long mekim wanem?
7 Long yia 2001, ol Witnes Bilong Jehova long olgeta hap ol i bin mekim 4 na hap milion Baibel-stadi wantaim ol man long olgeta wan wan mun—ol i skulim ol wan wan man na ol liklik grup long ol samting God i laik bai ol i mas mekim bilong kisim laip. Olsem na 263,431 manmeri ol i kisim baptais. Lait bilong tok i tru i kamap olsem gutpela samting tru long ol dispela nupela disaipel, na ol i sakim ol poroman nogut na pasin pamuk na ol narapela pasin nogut i pulap long dispela graun na i save bagarapim nem bilong God. Ol i baptais pinis, tasol ol i wok yet long bihainim ol lo Jehova i putim bilong olgeta Kristen. (Efesus 5:5) Olsem wanem? Tok i tru em i gutpela samting tru long yu?
Jehova i Save Lukautim Yumi
8. Jehova i save ting olsem wanem long dediket bilong yumi? Bilong wanem em i pasin bilong gutpela tingting long “wok pastaim long painim kingdom”?
8 Maski yumi gat sin, long pasin sori Jehova i orait long dediket bilong yumi, na i olsem em i putim han i go daun bilong pulim yumi i kam long em. Long dispela rot em i skulim yumi long putim ol mak yumi laik winim, na ol laik bilong yumi, i stap antap long ol samting bilong dispela graun. (Song 113:6-8) Na tu, Jehova i save larim yumi i stap pren bilong em, na em i tok promis olsem em bai lukautim yumi sapos yumi “wok pastaim long painim kingdom bilong God wantaim stretpela pasin bilong em.” Sapos yumi mekim olsem na yumi was gut bambai yumi ken stap gut long ol samting bilong spirit, em i tok promis olsem: “Bai em i givim dispela olgeta arapela samting tu long yupela.”—Matyu 6:33, Nupela Testamen na Ol Sam.
9. Husat dispela “wokboi i gat gutpela tingting”? Olsem wanem Jehova i save lukautim yumi long rot bilong dispela “wokboi”?
9 Jisas Krais i makim 12-pela aposel bilong em na ol i stap olsem as bilong lain Kristen God i bin makim, em ol i kisim nem olsem “lain Israel tru bilong God.” (Galesia 6:16; KTH 21:9, 14) Bihain Baibel i kolim ol olsem “sios bilong God bilong i stap oltaim, na dispela sios i olsem strongpela pos i karim tok tru.” (1 Timoti 3:15) Jisas i kamapim klia olsem dispela lain em “wokboi i gat gutpela tingting,” na “bosboi i gat gutpela tingting, na i save mekim gut wok bilong en.” Jisas i tok, dispela gutpela wokboi bai i gat wok long “skelim kaikai” bilong ol Kristen “long taim bikman i makim.” (Matyu 24:3, 45-47; Luk 12:42) Sapos yumi no kaikai, bai yumi dai. Na olsem tasol, sapos yumi no kisim kaikai bilong spirit, bai strong bilong yumi i pinis na yumi dai long ol samting bilong spirit. Olsem na dispela “wokboi i gat gutpela tingting” em i narapela mak bilong kamapim olsem Jehova i save lukautim yumi. Oltaim yumi mas amamas long ol gutpela kaikai bilong spirit Jehova i save givim yumi long rot bilong dispela “wokboi.”—Matyu 5:3.
10. Bilong wanem yumi mas i go oltaim long ol miting?
10 Bilong kisim kaikai bilong spirit, yumi mas stadi. Na tu, yumi mas bung wantaim ol narapela Kristen na go long ol miting bilong kongrigesen. Yu inap tingim wanem kaikai tru yu bin kisim inap 6-pela mun, o 6-pela wik, i go pinis? Ating nogat. Tasol dispela kaikai yu bin kisim em i gat ol gutpela marasin bilong strongim yu. Na bihain ating yu bin kisim wankain kaikai gen. Na i olsem tu long kaikai bilong spirit yumi kisim long ol miting bilong kongrigesen. Ating yumi no inap tingim olgeta wan wan tok yumi bin harim long ol miting. Na ating yumi bin kisim wankain tok planti taim. Tasol em i kaikai bilong spirit na yumi mas kisim bilong i stap strong. Long ol miting bilong yumi, long olgeta taim yumi save kisim ol gutpela kaikai bilong spirit, em ol i save skelim long taim stret.
11. Taim yumi go long ol miting Kristen, yumi gat wanem wok?
11 Na taim yumi go long ol miting Kristen, yumi gat wok bilong mekim. Baibel i tokim ol Kristen long “strongim bel bilong ol arapela,” na kirapim ol manmeri bilong kongrigesen long “laikim ol arapela na mekim ol gutpela pasin long ol.” Taim yumi redim ol tok na go oltaim long ol miting na bekim tok, dispela i save strongim bilip bilong yumi wan wan na strongim bel bilong ol narapela. (Hibru 10:23-25) Wankain olsem sampela pikinini em ol i save les long kaikai, oltaim yumi mas wok long kirapim sampela long kisim kaikai bilong spirit. (Efesus 4:13) Em i pasin sori long kirapim ol long kisim dispela kaikai bambai ol i ken kamap strongpela Kristen, em aposel Pol i tok long ol olsem: “Strongpela kaikai em i bilong ol man i kamap bikpela pinis. Ol kain man olsem ol i bin traim planti taim long skelim wanem ol pasin i gutpela na wanem ol pasin i nogut, na nau ol i save gut pinis na tingting bilong ol i klia.”—Hibru 5:14.
Lukautim Yumi Yet Long Ol Samting Bilong Spirit
12. Bilong i stap insait long tok i tru na no ken lusim, em wok bilong husat? Stori long dispela.
12 Poroman marit o papamama ol inap strongim yumi long bihainim rot bilong tok i tru. Na olsem tasol, ol elda bilong kongrigesen ol inap lukautim yumi olsem lain sipsip i stap long han bilong ol. (Aposel 20:28) Tasol bilong i stap strong na bihainim yet rot bilong tok i tru, em wok bilong husat? Em wok bilong yumi wan wan, na yumi mas mekim olsem long gutpela taim na long taim nogut tu. Tingim dispela stori:
13, 14. Olsem stori bilong wanpela pikinini sipsip i kamapim, bilong kisim helpim long ol samting bilong spirit yumi ken mekim wanem?
13 Long Skotlan sampela pikinini sipsip i kaikai gras i stap na wanpela i lusim rot na i go long arere bilong wanpela liklik maunten na em i pundaun insait long baret daunbilo. Em i no kisim bagarap, tasol em i pret na em i no inap kam antap gen. Olsem na em i wok long singaut singaut. Mama bilong en i harim na em tu i kirap singaut singaut i go inap long taim wasman bilong sipsip i kam na i kisim bek pikinini sipsip.
14 Orait tingim ol samting i bin kamap. Pikinini sipsip i singaut long kisim helpim, na mama tu i wok long singaut, na wasman i harim na wantu em i kirap na i go bilong kisim bek pikinini sipsip. Orait sapos pikinini sipsip na mama bilong en inap pilim olsem bagarap i laik kamap, na wantu ol i singaut bilong kisim helpim, yumi tu i mas mekim olsem taim yumi pundaun long ol samting bilong spirit o dispela graun bilong Satan i laik bagarapim yumi, a? (Jems 5:14, 15; 1 Pita 5:8) Na yumi mas strong moa long mekim olsem sapos yumi yangpela yet o yumi nupela long tok i tru na yumi no gat save long ol samting yumi mas mekim.
Bihainim Rot God i Makim na Stap Amamas
15. Taim wanpela meri i kirap na bung wantaim kongrigesen Kristen, em i pilim olsem wanem?
15 Gutpela save bilong Baibel i save helpim tru ol man i mekim wok bilong God bilong tok tru, na dispela save i mekim tingting na bel bilong ol i stap isi. Olsem: Wanpela meri i gat 70 krismas em i bin lotu long Sios Bilong Inglan kirap long taim em i liklik yet, na em i orait long stadi long Baibel wantaim ol Witnes Bilong Jehova. I no longtaim na em i kisim save olsem nem bilong God em Jehova, na em i save tok “Amen” taim ol i mekim beten long Haus Kingdom. Em i tok: “Yupela i no mekim olsem God i stap antap moa yet long yumi ol man nating bilong graun, nogat. I olsem yupela i bringim em i kam namel long yumi olsem wanpela gutpela pren tru. Bipo dispela kain samting i no bin painim mi.” Yumi ken ting dispela gutpela meri i no inap lusim tingting long samting tok i tru i bin mekim long em taim em i harim long namba wan taim. Na yumi tu i no ken lusim tingting long taim yumi bin kisim tok i tru nupela yet na em i gutpela samting tru long yumi.
16. (a) Sapos yumi putim wok bilong kisim mani i stap olsem nambawan samting bilong yumi, wanem samting inap kamap? (b) Olsem wanem yumi ken painim amamas tru?
16 Planti manmeri i ting sapos ol i gat bikpela mani ol bai stap amamas tru. Tasol sapos yumi putim wok bilong kisim mani i stap olsem nambawan samting bilong yumi, ating bai yumi “karim bikpela hevi moa.” (1 Timoti 6:10) Tingim ol man i save baim laki tiket, o tromoi mani bilong ol long haus laki, o putim nating mani bilong ol long stok-maket na i no skelim gut pastaim, na ol i ting ol bai kisim bikpela mani tru long dispela rot. Tasol planti ol i no save kisim dispela bikpela mani ol i bin ting ol bai kisim. Na ol man i bin kisim bikpela mani, planti ol i lukim olsem dispela mani ol i kisim i no givim amamas long ol. Yumi save kisim amamas tru long mekim laik bilong Jehova na wok wantaim kongrigesen Kristen na larim spirit holi bilong Jehova i stiaim yumi na ol ensel i helpim yumi. (Song 1:1-3; 84:4, 5; 89:15) Taim yumi mekim olsem, ol gutpela samting tru inap painim yumi. Tasol olsem wanem? Tok i tru em i gutpela samting tru long yu na bai yu ken kisim ol dispela gutpela blesing long en?
17. Pita i stap wantaim Saimon, em man bilong redim skin bilong bulmakau, na dispela i kamapim klia wanem kain tingting bilong Pita?
17 Tingim samting i bin painim aposel Pita. Long yia 36 C.E., em i bin mekim wanpela raun bilong wok misineri long stretpela hap graun bilong Saron. Em i stap liklik taim long Lida na em i oraitim Ainias, em skin bilong em i dai, na bihain em i kirap i go long Jopa. Long dispela hap em i kirapim bek Dorkas, em i bin i dai. Aposel 9:43 i tok: “Pita i stap planti de long Jopa. Em i stap wantaim wanpela man nem bilong en Saimon. Dispela man i save kisim ol skin bilong bulmakau samting na redim bilong ol arapela kain wok.” Dispela liklik hap tok i kamapim olsem taim Pita i mekim wok bilong em long dispela taun, em i no save laikim sampela lain tasol na givim baksait long sampela, nogat. Dispela i kamap klia long tok bilong wanpela saveman bilong Baibel, em Frederic W. Farrar, em i tok: “Ol man i save strong tumas long bihainim Lo Bilong Moses ol i kisim long maus bilong ol man, ol i no inap tru long sindaun long haus bilong ol man i save mekim wok long skin bilong ol bulmakau samting. Long olgeta de ol i mas holim skin na bodi bilong ol animal ol i bin kilim bambai ol i ken mekim wok bilong ol . . . na dispela em i samting nogut tru long ai bilong olgeta man i strong long bihainim Lo.” Haus bilong Saimon “i stap arere long solwara,” tasol maski haus i no stap klostu long ples em i save redim skin bilong ol bulmakau long en, Saimon i mekim ‘wanpela wok mani ol man i ting em i samting nogut, na olgeta man i mekim dispela kain wok ol i pilim olsem em i daunim nem bilong ol.’ Em Farrar i tok olsem.—Aposel 10:6.
18, 19. (a) Bilong wanem Pita i tingting planti long driman em i bin lukim? (b) Pita i kisim wanem gutpela blesing?
18 Pita i amamas long Saimon i lukautim em, na taim em i stap long dispela haus God i soim em long ol samting em i mas mekim. Long samting olsem driman God i tokim em long kaikai ol abus i gat tambu long en long lo bilong ol Juda. Pita i no laik mekim na em i tok, “I no gat wanpela taim mi bin kaikai wanpela samting i no klin long ai bilong yu na i tambu long mipela i kaikai.” Tasol 3-pela taim ensel i tok: “Samting God i bin mekim i kamap klin, dispela yu no ken kolim i no klin.” Olsem na “Pita i tingting planti na i tok, ‘As bilong dispela driman mi lukim, em i olsem wanem?’ ”—Aposel 10:5-17; 11:7-10.
19 Long de paslain long dispela long Sisaria—em i longwe long Jopa inap 50 kilomita—wanpela man bilong ol narapela lain, em Kornilius, em tu i bin lukim samting olsem driman, tasol Pita i no save long dispela. Ensel bilong Jehova i bin tokim Kornilius long salim sampela wokboi i go painim Pita long haus bilong Saimon, man bilong mekim wok long skin bulmakau. Orait Kornilius i salim ol wokboi bilong em i go long haus bilong Saimon, na Pita i go bek wantaim ol long Sisaria. Em i autim tok long Kornilius na ol wanblut na pren bilong em. Olsem na namel long ol narapela lain bilipman i no bin katim skin, ol i kamap namba wan lain bilong kisim spirit holi olsem lain bilong Kingdom. Maski ol man long dispela haus ol i no bin katim skin, olgeta man i harim tok bilong Pita ol i kisim baptais. Dispela i opim rot na ol manmeri bilong ol narapela lain em ol Juda i ting ol i no klin, ol inap i go insait long lain Kristen. (Aposel 10:1-48; 11:18) Em wanpela gutpela wok tru Pita i bin kisim, long wanem, tok i tru i gutpela samting tru long em, na dispela i mekim na em i bihainim tok Jehova i givim long em bilong stiaim em na em i bilip na mekim dispela samting!
20. Taim yumi putim tok i tru i stap olsem nambawan samting bilong yumi, yumi save kisim wanem helpim i kam long God?
20 Pol i tok: “Yumi mas bihainim pasin bilong laikim tru ol arapela na mekim tok tru tasol long ol. Olsem bai yumi kamap strongpela manmeri na bai yumi pas tru wantaim Krais, em i het bilong yumi.” (Efesus 4:15) Tru tumas, long nau tok i tru bai givim bikpela amamas long yumi sapos yumi putim olsem nambawan samting long i stap bilong yumi na yumi larim Jehova i stiaim wokabaut bilong yumi long rot bilong spirit holi. Na yumi mas tingim tu olsem ol ensel holi i save helpim yumi long mekim wok bilong autim gutnius. (KTH 14:6, 7; 22:6) Em i gutpela samting tru long yumi gat dispela helpim bilong mekim wok Jehova i bin givim long yumi! Sapos yumi stap gut long Jehova, dispela bai mekim na yumi inap litimapim nem bilong Jehova, em God bilong tok tru, i go inap oltaim oltaim. Em i wanpela gutpela samting tru yumi inap mekim, i winim olgeta narapela samting!—Jon 17:3.
Yumi Lainim Wanem Samting?
• Bilong wanem planti man i no bilip long tok i tru?
• Ol Kristen i mas ting olsem wanem long ol samting bilong dispela graun bilong Satan?
• Yumi mas i gat wanem tingting long ol miting? Bilong wanem yumi mas ting olsem?
• Yumi gat wanem wok bilong lukautim yumi yet long ol samting bilong spirit?
[Mep/Piksa long pes 18]
(Bilong save ol dispela rait i stap we long pes, lukim buk o magasin)
SOLWARA MEDITERENIAN
Sisaria
STRETPELA HAP GRAUN BILONG SARON
Jopa
Lida
Jerusalem
[Piksa]
Pita i bihainim rot God i soim long em na em i kisim ol gutpela blesing long en
[Kredit Lain]
Map: Mountain High Maps® Copyright © 1997 Digital Wisdom, Inc.
[Piksa long pes 13]
Jisas i autim tok i tru
[Piksa long pes 15]
Wankain olsem kaikai tru tru, yumi mas kisim kaikai bilong spirit bambai yumi ken i stap strong