“Husat Tru Em i Gutpela Wokboi i Gat Savetingting?”

1, 2. Long nau Jisas i yusim wanem rot long givim kaikai long yumi? Bilong wanem em i bikpela samting long yumi mas luksave long dispela rot?

WANPELA sista i bin salim pas i go long ol brata long hetkota bilong yumi na em i tok: “Ol brata, planti taim tru yupela i save kamapim ol atikol we i stret tru long mi, na mi save kisim long taim stret.” Olsem wanem? Yu tu i pilim wankain olsem dispela sista? Ating planti bilong yumi i pilim olsem. Yumi no kirap nogut long dispela, a?

² Yumi kisim tok bilong God olsem kaikai i kam long taim stret na dispela i soim klia olsem Jisas, Het bilong kongrigesen, em i truim tok promis bilong em long givim kaikai long yumi. Em i yusim husat long givim kaikai long yumi? Taim Jisas i kolim mak bai kamap bilong soim olsem em i kam i stap, em i tok em bai yusim “gutpela wokboi i gat savetingting” long ‘givim kaikai long taim stret’ long ol arapela wokboi bilong em. (Ritim Matyu 24:45-47.) Dispela gutpela wokboi i stap olsem rot bilong Jisas long givim kaikai long ol disaipel tru bilong em long dispela taim bilong pinis. Em i bikpela samting long yumi mas luksave long dispela gutpela wokboi. Tok yumi kisim long rot bilong dispela wokboi bai helpim yumi long stap strong long bilip na pas gut wantaim God.—Mat. 4:4; Jon 17:3.a

 3. Bipo ol buk na nius bilong yumi i bin stori olsem wanem long tok piksa bilong gutpela wokboi?

³ Orait yumi inap kisim wanem skul long tok piksa bilong Jisas long gutpela wokboi? Bipo ol buk na nius bilong yumi i bin stori olsem: Long Pentikos 33 C.E., Jisas i bin makim gutpela wokboi long lukautim ol arapela wokboi. Wokboi i olsem tok piksa bilong makim lain olgeta bilong ol Kristen God i bin makim, taim ol i stap yet long graun. Ol arapela wokboi i olsem tok piksa bilong makim olgeta wan wan bilong ol dispela Kristen God i bin makim. Long 1919, Jisas i bin makim gutpela wokboi long “lukautim olgeta samting bilong en,” em ol wok bilong Kingdom hia long graun. Tasol pasin bilong stadi gut, beten, na skelim gut ol tok long bel, dispela i helpim yumi long luksave olsem yumi mas stretim sampela save bilong yumi long tok bilong Jisas long gutpela wokboi i gat savetingting. (Snd. 4:18, 19) Orait nau yumi ken skelim gut dispela tok piksa na kliagut long olsem wanem yumi tu i insait long en, maski yumi bilip na wet long kisim laip long heven o long graun.

4-6. Long tok piksa bilong Jisas long gutpela wokboi, bilong wanem yumi ken tok truim bilong en i kamap bihain long taim bilong las de i kirap long 1914?

⁴ Ol narapela tok i stap klostu long tok piksa bilong gutpela wokboi i gat savetingting i soim olsem truim bilong en i kamap nau long dispela taim bilong pinis, na i no long Pentikos 33 C.E. Orait nau yumi ken skelim ol tok bilong Baibel we i kirapim yumi long tok olsem.

⁵ Tok piksa bilong Jisas long gutpela wokboi em hap bilong tok profet bilong Jisas long “sain bai kamap bilong soim olsem [em] kam i stap na pinis bilong dispela taim i kamap pinis.” (Mat. 24:3) Namba 1 hap bilong tok profet long Matyu 24:4-22 i gat 2-pela truim bilong en—namba 1 truim i bin kamap long yia 33 C.E. i go inap 70 C.E., na namba 2 truim i kamap nau long taim bilong yumi. Yu ting dispela i makim olsem tok piksa bilong Jisas long gutpela wokboi tu i gat 2-pela truim bilong en? Nogat.

⁶ Kirap long tok i stap long Matyu 24:29, Jisas i stori moa long ol samting bai kamap nau long taim bilong yumi. (Ritim Matyu 24:30, 42, 44.) Taim Jisas i stori long ol samting bai kamap long taim bilong traipela hevi tru, em i tok ol manmeri “bai lukim Pikinini bilong man i stap antap long ol klaut na kam.” Bihain, em i tingim ol manmeri husat bai stap long taim bilong las de, na em i kirapim ol long was i stap na em i tok: “Yupela i no save long wanem de Bikpela bilong yupela bai i kam” na “Long taim yupela i no ting long en, Pikinini bilong man bai i kam.” Taim Jisas i stori long ol samting bai kamap long taim bilong las de, em i mekim tok piksa bilong gutpela wokboi. Olsem na long tok piksa bilong Jisas long gutpela wokboi, yumi ken tok truim bilong en i kamap bihain long taim bilong las de i kirap long 1914. I stret long yumi ken tok olsem. Bilong wanem?b

 7. Wanem bikpela askim i kamap long haptaim bilong bungim kaikai? Bilong wanem?

⁷ Tingim dispela askim: “Husat tru em i gutpela wokboi i gat savetingting?” Long taim bilong ol aposel, i no gat wok long mekim kain askim olsem. Olsem yumi stori pinis long stadi i kamap paslain long dispela, ol aposel inap wokim ol mirakel, na tu, ol inap givim strong long ol arapela long wokim ol mirakel. Dispela i kamapim klia olsem God i stap wantaim ol. (Apo. 5:12) Olsem na i no gat wok long wanpela i askim bilong save long husat lain em Krais i makim bilong go pas long wok. Tasol kain samting olsem i no bin kamap long 1914. Haptaim bilong bungim kaikai i bin kirap long 1914. Taim i kamap pinis long rausim ol gras nogut namel long ol wit. (Mat. 13:36-43) Haptaim bilong bungim kaikai i kirap, olsem na wanpela bikpela askim i kamap: Planti giaman Kristen i tok ol i disaipel tru bilong Jisas, olsem na wanem samting i helpim yumi long luksave long ol wit—em ol Kristen God i bin makim? Tok piksa bilong gutpela wokboi i helpim yumi long luksave long ol. Ol disaipel bilong Krais em God i bin makim, ol bai kisim kaikai bilong strongim bilip.

 8. Bilong wanem i stret long ol Kristen God i bin makim ol i stap olsem dispela gutpela wokboi?

⁸ Ol Kristen God i bin makim em ol i stap long graun, ol i stap olsem dispela gutpela wokboi. Dispela lain i stap olsem “ol pris i mekim wok king” na ol i kisim wok bilong “‘tokaut long olgeta hap long ol gutpela pasin’ bilong dispela man i bin singautim [ol] long lusim tudak na kam insait long gutpela lait bilong em.” (1 Pita 2:9) Ol lain husat bai stap olsem “ol pris i mekim wok king,” i stret long ol i skulim ol wanbilip long tok i tru.—Mal. 2:7; Rev. 12:17.

 9. Yu ting olgeta Kristen God i bin makim ol i stap olsem dispela gutpela wokboi? Stori long dispela.

⁹ Yu ting olgeta Kristen God i bin makim ol i stap olsem dispela gutpela wokboi? Nogat. I no olgeta long dispela lain Kristen i mekim wok bilong skulim ol wanbilip long olgeta hap long Tok Bilong God. Namel long ol Kristen husat i stap olsem ol wit, i gat ol brata em God i bin makim na ol i mekim wok olsem kongrigesen sevan o elda. Ol i skulim ol man long kongrigesen na long taim ol i autim tok long ol haus, na ol i bihainim gut tok i kam long hetkota. Tasol ol yet i no mekim wok bilong givim kaikai long lain brata long olgeta hap bilong graun, olsem skulim ol long Tok Bilong God. Na tu, namel long ol Kristen God i bin makim, i gat ol sista husat i gat pasin daun na ol i no tingting liklik long kisim wok bilong skulim ol narapela insait long kongrigesen.—1 Kor. 11:3; 14:34.

10. Husat dispela gutpela wokboi i gat savetingting?

¹⁰ Orait, husat dispela gutpela wokboi i gat savetingting? Wankain olsem Jisas i bin yusim liklik lain man long givim kaikai long planti manmeri, dispela wokboi em sampela tasol bilong ol brata God i bin makim na ol i mekim stret wok bilong redim tok bilong Baibel na givim olsem kaikai long ol narapela long taim Krais i kam i stap. Long taim bilong las de, ol brata God i bin makim ol i stap na wok wantaim long hetkota bilong yumi. Long nau, dispela wokboi em lain Gavening Bodi Bilong Ol Witnes Bilong Jehova. Tingim, dispela tok “wokboi” long tok piksa bilong Jisas i makim 1-pela wokboi, na dispela i makim olsem sampela brata i wok bung wantaim na i stap olsem dispela wokboi. Olgeta memba bilong Gavening Bodi i save bung wantaim na mekim ol disisen.

11, 12. (a) Gutpela wokboi i gat savetingting i kisim wanem 2-pela wok? (b) Wanem taim Jisas i makim gutpela wokboi long lukautim ol arapela wokboi? Em i makim husat long mekim dispela wok?

¹¹ Tingim olsem long tok piksa bilong Jisas, gutpela wokboi i gat savetingting i kisim 2-pela wok. Namba 1 wok em long lukautim ol arapela wokboi, na namba 2 wok em long lukautim olgeta samting bilong bosman. Truim bilong dispela tok piksa bai kamap long dispela haptaim bilong pinis, olsem na dispela 2-pela wok bai kamap bihain long Jisas i kam i stap olsem king long 1914.

¹² Wanem taim Jisas i makim gutpela wokboi long lukautim ol arapela wokboi? Bilong bekim dispela askim, yumi mas skelim ol samting i kamap long 1914, em kirap bilong haptaim bilong bungim kaikai. Olsem yumi kisim save pinis, long dispela taim planti lain i tok ol i Kristen. Orait, Jisas bai makim wanem lain long stap olsem gutpela wokboi? Bekim bilong dispela askim i kamap taim Jisas na Papa bilong em i kam bilong skelim tempel, o pasin bilong mekim lotu, long 1914 i go inap long kirap bilong 1919. (Mal. 3:1) Ol i amamas long lukim liklik grup bilong ol Sumatin Bilong Baibel husat i soim olsem ol i laikim tru Jehova na tok bilong Baibel. Em tru olsem i gat sampela samting ol i mas klinim. Long dispela taim, ol i bihainim pasin daun na larim ol samting i kamap bilong traim na stretim stretim ol. (Mal. 3:2-4) Ol dispela Sumatin Bilong Baibel i stap olsem ol wit. Long 1919, Jisas i makim sampela brata God i bin makim, long stap olsem gutpela wokboi i gat savetingting na lukautim ol arapela wokboi.c

13. Husat lain tu i stap olsem ol arapela wokboi? Bilong wanem?

¹³ Husat em ol arapela wokboi? Yumi ken tok em ol dispela lain husat i kisim kaikai, olsem ol samting i strongim ol long pas gut wantaim God. Bihain liklik long 1914, olgeta husat i stap olsem ol arapela wokboi em ol Kristen God i bin makim. Bihain, bikpela lain bilong ol arapela sipsip tu i stap olsem ol arapela wokboi. Long nau, “wanpela lain sipsip” tasol i stap aninit long wok bos bilong Krais, na planti bilong ol em ol arapela sipsip. (Jon 10:16) Tupela lain wantaim i kisim wankain kaikai i kam long gutpela wokboi. Olsem wanem long ol memba bilong Gavening Bodi em nau ol i stap olsem gutpela wokboi i gat savetingting? Ol dispela brata tu i mas kisim kaikai. Olsem na ol i luksave olsem olgeta wan wan bilong ol i stap olsem ol arapela wokboi wankain olsem olgeta arapela disaipel bilong Jisas.

14. (a) Gutpela wokboi i kisim wanem wok? Wanem ol samting i insait long dispela wok? (b) Jisas i givim wanem tok lukaut long gutpela wokboi i gat savetingting? (Lukim blok “Sapos Wokboi Nogut i Tok . . . ”)

¹⁴ Jisas i givim bikpela wok tru long gutpela wokboi i gat savetingting. Long taim ol i raitim Baibel, gutpela wokboi, o bosboi, i save lukautim ol wok i kamap long haus bilong bosman bilong em. (Luk 12:42) Olsem na gutpela wokboi i gat savetingting i kisim wok bilong lukautim ol wanlain bilipman. Ol i lukautim tu mani, ol faktori samting, wok autim tok, na redim program bilong ol kibung. Na tu, ol i lukautim wok bilong prinim ol buk na nius bilong Baibel em yumi save yusim long wok autim tok, mekim stadi bilong yumi yet, na stadi long kongrigesen. Ol arapela wokboi i save wet long kisim ol dispela kaikai em gutpela wokboi i redim na givim.

15, 16. Wanem taim Jisas i makim gutpela wokboi long lukautim olgeta samting bilong em?

¹⁵ Wanem taim Jisas i givim namba 2 wok “long lukautim olgeta samting bilong en”? Jisas i tok: “Kain wokboi olsem i ken amamas tru sapos Bosman bilong en i kam na lukim em i mekim olsem! Mi tok tru long yupela: Bosman bai makim em long lukautim olgeta samting bilong en.” (Mat. 24:46, 47) Tingim, Jisas i givim namba 2 wok bihain long em i kam “na lukim [wokboi] i mekim olsem,” em i lukim wokboi i redim tok bilong Baibel na givim olsem kaikai long ol arapela. Olsem na i gat haptaim i lus paslain long em i givim namba 2 wok. Bilong save long olsem wanem na wanem taim Jisas i makim wokboi long lukautim olgeta samting bilong em, yumi mas save long 2-pela samting: wanem taim em i kam, na wanem ol samting i stap olsem ol samting bilong em.

¹⁶ Wanem taim Jisas i kam? Bai yumi kisim bekim bilong en taim yumi skelim ol narapela tok i stap klostu long dispela tok profet. Tingim, taim ol ves i kamap paslain i stori olsem Jisas bai “kam,” dispela tok i makim taim we em bai kam bilong mekim kot na givim strafe long pinis bilong dispela haptaim bilong nau. (Mat. 24:30, 42, 44) Olsem na tok bilong Jisas long em bai “kam” olsem i stap long tok piksa bilong gutpela wokboi, truim bilong en bai kamap long taim bilong traipela hevi tru.d

17. Wanem ol samting tu i stap olsem ol samting bilong Jisas?

¹⁷ Wanem samting tu i stap olsem “olgeta samting bilong [Jisas]”? Olgeta samting bilong Jisas i no stap long graun tasol, nogat. Jisas i gat bikpela namba long bosim tu ol samting i stap long heven. Em i tok: “God i givim mi namba long bosim olgeta samting long heven na long graun.” (Mat. 28:18; Efe. 1:20-23) Ol samting bilong em i makim tu Kingdom Bilong Mesaia, we em i stap king long en kirap long 1914, na ol Kristen God i bin makim ol tu bai mekim wok king wantaim em.—Rev. 11:15.

18. Bilong wanem Jisas bai amamas long givim wok long gutpela wokboi long lukautim olgeta samting bilong em?

¹⁸ Ol samting yumi stori pinis long en i givim wanem save long yumi? Taim Jisas i kam bilong mekim kot long taim bilong traipela hevi tru, em bai lukim olsem gutpela wokboi i mekim gut wok bilong givim kaikai long ol arapela wokboi. Long dispela taim, Jisas bai amamas long givim namba 2 wok long wokboi, em wok bilong lukautim olgeta samting bilong em. Ol lain husat i stap olsem gutpela wokboi, ol bai kisim dispela wok taim ol i kisim pe bilong ol long heven na mekim wok king wantaim Krais.

19. Olsem wanem? Gutpela wokboi bai kisim pe long heven we i bikpela moa winim ol arapela Kristen God i bin makim? Stori long dispela.

¹⁹ Olsem wanem? Gutpela wokboi bai kisim pe long heven we i bikpela moa winim ol arapela Kristen God i bin makim? Nogat. Wanpela man inap tok promis long givim pe long wanpela liklik lain, na bihain ol arapela tu inap kisim wankain pe. Olsem: Tingim tok em Jisas i mekim long 11-pela aposel bilong em long nait paslain long em i dai. (Ritim Luk 22:28-30.) Jisas i tok promis long dispela liklik lain olsem ol bai kisim gutpela pe long pasin bilong ol long stap gut long em. Ol tu bai sindaun long ol sia king na mekim wok king wantaim em. Tasol planti yia bihain, Jisas i kamapim olsem olgeta bilong lain 144,000 bai sindaun long ol sia king na mekim wok king wantaim em. (Rev. 1:1; 3:21) Olsem tasol, long Matyu 24:47 Jisas i tok promis olsem liklik lain tasol, em ol Kristen God i bin makim na ol i stap olsem gutpela wokboi, ol bai kisim wok bilong lukautim olgeta samting bilong em. Olsem na olgeta long lain 144,000 bai kisim bikpela namba long mekim wok bos long heven.—Rev. 20:4, 6.

20. Bilong wanem Jisas i makim gutpela wokboi long mekim wok? Yu tingting strong long mekim wanem?

²⁰ Long rot bilong gutpela wokboi i gat savetingting, Jisas i bihainim pasin olsem em i bin mekim long taim bilong ol aposel, em i yusim liklik lain long givim kaikai long planti manmeri. Jisas i makim dispela gutpela wokboi long mekim gut wok bambai ol disaipel tru bilong em, maski ol i bilong lain Kristen God i bin makim o ol i bilong ol arapela sipsip, olgeta i mas kisim kaikai long taim stret long taim bilong las de. Yumi mas helpim gut wok bilong ol brata em God i bin makim na ol i stap olsem gutpela wokboi i gat savetingting, na long dispela rot yumi soim olsem yumi tenkyu tru long wok ol i mekim.—Hib. 13:7, 17.