Olsem Wanem? “Tingting Bilong Krais” i Stap Long Yu?
“God i ken helpim yupela long bihainim tru pasin bilong Krais Jisas na holim dispela wanpela tingting tasol.”—ROM 15:5.
1. Long planti piksa bilong ol Misin, Jisas i luk olsem wanem? Olsem wanem yumi save dispela i no stret?
“I NO gat wanpela taim ol man i lukim em i lap.” Wanpela rait i mekim dispela tok long Jisas, tasol man bilong raitim em i giaman na mekim olsem em i wanpela rait bilong wanpela bikman bilong Rom long bipo. Ol i tok, dispela rait bilong yia 1000 samting i bin stiaim tingting bilong planti man bilong wokim piksa.a Long planti piksa ol man i wokim, pes bilong Jisas i drai, olsem em i no save lap. Tasol dispela i no stret, long wanem, ol 4-pela Gutnius i kamapim Jisas olsem wanpela man i mekim gutpela pasin pren long ol narapela, na em i save helpim ol narapela na pilim tru ol samting long bel bilong em.
2. Olsem wanem yumi inap kisim “tingting bilong Krais”? Dispela bai helpim yumi long mekim wanem?
2 Olsem na bilong save long Jisas em i husat tru, yumi mas kisim stretpela save long Jisas em i wanem kain man taim em i stap long graun. Orait nau yumi ken skelim sampela tok bilong 4-pela Gutnius i helpim yumi long save long “tingting bilong Krais”—olsem tingting bilong em long ol samting, na ol samting em i pilim long bel bilong em, na pasin bilong em long skelim ol samting. (1 Korin 2:16) Taim yumi mekim olsem, yumi ken tingim olsem wanem yumi inap “bihainim tru [tingting] bilong Krais Jisas.” (Rom 15:5) Dispela bai helpim yumi long bihainim tru pasin Jisas i soim long yumi—long wokabaut bilong yumi na long ol samting yumi mekim long ol narapela.—Jon 13:15.
I No Hatwok Long Toktok Wantaim Em
3, 4. (a) Mak 10:13-16 i stori long wanem samting? (b) Jisas i mekim wanem taim ol disaipel i laik pasim ol pikinini long kam long em?
3 Ol man i gat laik long kam long Jisas. Long kain kain taim na ples, ol man i gat kain kain krismas na sindaun ol i save go klostu long em. Tingim samting Mak 10:13-16 i stori long en. Dispela samting i bin kamap klostu long pinis bilong wok bilong em, long laspela taim em i go long Jerusalem, bilong kisim bikpela pen na dai.—Mak 10:32-34.
4 Long tingting bilong yu, tingim dispela samting i bin kamap. Ol man i bringim ol pikinini na ol bebi tu i kam long Jisas bilong em i ken givim blesing long ol.b Tasol ol disaipel i wok long pasim ol pikinini long kam long Jisas. Ating ol disaipel i ting Jisas i gat planti wok tumas na em i no laik lusim taim long ol dispela pikinini. Tasol nogat. Taim Jisas i save long samting ol disaipel i mekim, em i no amamas. Jisas i singautim ol pikinini i kam long em, na em i tok: “Yupela larim ol pikinini i kam long mi. Yupela i no ken pasim ol.” (Mak 10:14) Orait nau em i mekim samting i kamapim gutpela pasin sori bilong em. Baibel i tok: “Em i holim ol pikinini long han bilong en, . . . na em i askim God long mekim gut long ol.” (Mak 10:16) Jisas i holim ol na ol i no pret.
5. Mak 10:13-16 i helpim yumi long save Jisas em i wanem kain man?
5 Dispela sotpela stori i helpim yumi long save long Jisas em i wanem kain man. Ol man i no pret long go toktok wantaim em. Pastaim em i bin holim bikpela namba long heven, tasol em i no pretim o daunim ol man bilong graun. (Jon 17:5) Ol pikinini tu i no pret long em. Sapos Jisas i pes drai na em i no amamas, ating ol i no laik go klostu long em, a? Ol manmeri i gat kain kain krismas ol i save go long Jisas, long wanem, ol i pilim olsem em i tingim ol na em i no ken salim ol i go.
6. Ol elda i ken mekim wanem na bai ol brata i no pret long go toktok wantaim ol?
6 Yumi ken tingim dispela stori na askim yumi yet olsem, ‘Tingting bilong Krais i stap long mi?’ ‘Mi wanpela man ol narapela i no pret long kam long mi?’ Long dispela taim nogut, ol sipsip bilong God i mas i gat ol wasman ol i no pret long go toktok wantaim ol, em ol man i olsem ‘ples hait long taim bilong bikpela win.’ (Aisaia 32:1, 2; 2 Timoti 3:1) Yupela elda, sapos yupela i wok long tingim tru ol brata bilong yupela na redi long givim hap taim na strong bilong yupela bilong helpim ol, ol bai pilim olsem yupela i tingim ol. Dispela samting bai kamap klia long pes, na long nek, na long gutpela pasin yupela i mekim. Dispela gutpela pasin sori bai helpim ol narapela, na ol pikinini tu, long bilip long yupela na long kam toktok wantaim yupela. Wanpela meri Kristen i stori long as na em inap kamapim ol samting i stap long bel bilong em long wanpela elda, na em i tok: ‘Em i toktok wantaim mi long gutpela pasin sori. Sapos em i no bin mekim olsem, ating mi no mekim wanpela tok. Gutpela pasin bilong em i mekim na mi no pret.’
Tingim Gut Ol Narapela
7. (a) Jisas i mekim wanem bilong soim olsem em i tingim gut ol narapela? (b) Ating i gat wanem as na isi isi Jisas i oraitim ai bilong wanpela aipas?
7 Jisas i save tingim gut ol narapela. Em i save pilim ol hevi bilong ol. Taim em i lukim ol man i gat hevi, dispela i kirapim em long helpim ol. (Matyu 14:14) Em i tingim tu strong bilong ol na ol samting em i mas mekim bilong helpim ol. (Jon 16:12) Wanpela taim ol man i bringim wanpela aipas i kam long em na ol i krai long Jisas i mas oraitim ai bilong em. Jisas i oraitim ai bilong em, tasol em i mekim isi isi. Pastaim, dispela man i no inap lukim gut ol man—em i “lukim ol i olsem ol diwai i wokabaut i go.” Orait nau Jisas i mekim na ai bilong em i kamap gutpela tru. Bilong wanem em i oraitim ai bilong dispela man isi isi? Ating em i mekim olsem bilong helpim ai bilong dispela man long lain long lait bilong san na long ol samting i stap, long wanem, ai bilong em i save long tudak tasol—nogut em i kirap nogut tru long lait bilong san na ol samting em i lukim.—Mak 8:22-26.
8, 9. (a) Wanem samting i kamap bihain liklik long taim Jisas na ol disaipel i kamap long hap bilong Dekapolis? (b) Stori long samting Jisas i mekim bilong oraitim wanpela yaupas.
8 Tingim tu wanpela samting i bin kamap bihain long Pasova long yia 32 C.E. Jisas na ol disaipel ol i go long hap bilong Dekapolis long hap is bilong raunwara Galili. Bikpela lain manmeri i lukim ol na bringim planti sikman i kam long Jisas, na em i mekim olgeta i kamap orait. (Matyu 15:29, 30) I gat wanpela man Jisas i pilim tru hevi bilong em. Mak tasol i stori long dispela samting long Gutnius em i raitim.—Mak 7:31-35.
9 Dispela man em i yaupas na em i no inap toktok gut. Ating Jisas i lukim pinis olsem dispela man i pret o sem. Orait nau Jisas i mekim samting i narapela kain. Em i kisim dispela man i go, na i lusim ol manmeri, na tupela tasol i stap. Nau Jisas i mekim sampela samting bilong helpim yaupasman long save long samting em bai mekim long em. Em i “putim pinga long tupela yau bilong dispela man. Na bihain Jisas i spet long pinga bilong em yet, na i putim pinga long tang bilong dispela man.” (Mak 7:33) Orait nau Jisas i lukluk i go antap long heven na em i pulim win strong. I olsem Jisas i tokim em, ‘Samting mi bai mekim bilong helpim yu em i kam long strong bilong God.’ Nau Jisas i tok: “Yu op.” (Mak 7:34) Orait nau man inap harim tok na em inap toktok gut.
10, 11. Yumi ken mekim wanem bilong soim olsem yumi tingim gut ol narapela long kongrigesen? insait long famili?
10 Jisas i tingim tru ol man, a? Em i pilim tru bel bilong ol, na dispela i kirapim em long mekim ol samting long pasin i no inap semim ol. Yumi ol Kristen i mas wok long kisim na bihainim dispela tingting bilong Krais. Baibel i tokim yumi: “Yupela olgeta i mas i stap wanbel na sori long olgeta man. Yupela i mas laikim tru ol arapela manmeri bilong God na marimari long ol, na lusim pasin bilong bikhet.” (1 Pita 3:8) Olsem na ol tok na ol pasin yumi mekim i mas makim olsem yumi pilim tru bel bilong ol narapela.
11 Long kongrigesen, bilong soim olsem yumi pilim tru tingting bilong ol narapela, yumi mas givim biknem long ol, na mekim wankain pasin long ol olsem yumi laik bai ol i mekim long yumi. (Matyu 7:12) Olsem na yumi mas was gut long ol tok yumi mekim na long pasin bilong yumi long mekim tok. (Kolosi 4:6) Yumi mas save, “Sapos man i no tingting gut na i tok, orait tok bilong en inap bagarapim bel bilong narapela man olsem bainat i sutim em.” (Sindaun 12:18) Olsem wanem insait long famili? Sapos namel long man na meri marit i gat pasin bilong laikim tru narapela, orait narapela bai pilim tru tingting na bel bilong narapela. (Efesus 5:33) Ol i no save mekim hatpela tok, o toktok planti long samting narapela i mekim, o mekim tok i sutim bel bilong narapela—ol dispela kain tok inap bagarapim tru bel bilong narapela na i hatwok long oraitim. Ol pikinini tu i save pilim ol samting long bel bilong ol, na gutpela papamama i mas tingim dispela. Taim papamama i mas stretim ol, ol i save tingim ol olsem ol i gat biknem na ol i stretim ol long pasin i no semim ol.c (Kolosi 3:21) Taim yumi mekim ol samting i makim olsem yumi tingim gut narapela, yumi soim olsem tingting bilong Krais i stap long yumi.
Redi Long Bilip Long Ol Narapela
12. Jisas i gat wanem stretpela tingting long ol disaipel bilong em?
12 Jisas i gat stretpela tingting long ol disaipel bilong em. Em i save ol i no gutpela olgeta. Em inap lukim tingting na laik i stap long bel bilong man. (Jon 2:24, 25) Tasol em i no tingim ol pasin kranki tasol bilong ol; em i tingim ol gutpela pasin bilong ol. Na tu, em i lukim ol samting ol dispela man inap mekim, em ol man Jehova i bin bringim ol i kam long em. (Jon 6:44) Jisas i bilip long ol disaipel bilong em na dispela i kamap ples klia long pasin em i mekim long ol.
13. Jisas i mekim wanem bilong soim olsem em i bilip long ol disaipel bilong em?
13 Jisas i bin mekim wanem bilong soim olsem em i bilip long ol? Taim em i laik lusim graun, em i givim bikpela wok long ol disaipel God i bin makim ol long spirit holi. Ol i mas lukautim wok bilong Kingdom long olgeta hap. (Matyu 25:14, 15; Luk 12:42-44) Taim em i mekim wok bilong em long graun, em i soim olsem em i bilip long ol. Taim em i wokim mirakel long sampela kaikai bilong givim long bikpela lain manmeri, wok bilong tilim dispela kaikai em i givim long ol disaipel bilong em.—Matyu 14:15-21; 15:32-37.
14. Bai yu stori olsem wanem long ol tok bilong Mak 4:35-41?
14 Tingim tu stori i stap long Mak 4:35-41. Jisas na ol disaipel i kalap long bot na brukim raunwara Galili. Bihain liklik long ol i lusim nambis, Jisas i go long stan bilong bot na em i slip. Tasol i no longtaim na “traipela win i kirap.” Planti taim ol kain win olsem i save kamap long raunwara Galili. Dispela raunwara i stap long ples daun (200 mita daunbilo long mak bilong solwara), olsem na win i hat liklik long raunwara na dispela i save kamapim bikpela win. Na tu, ol bikpela win i save lusim maunten Hermon long hap not na spit i kam daun long ples daun bilong Jordan. Sampela taim solwara i stap isi, na sampela taim biksi i kirap wantu tasol. Tingim: Jisas i go bikpela long Galili, olsem na em i save pinis bikpela win i save kamap planti taim. Tasol em i no tingting planti—em i slip i stap. Em i bilip long save bilong ol disaipel long stiaim gut bot—em sampela ol i man bilong kisim pis.—Matyu 4:18, 19.
15. Jisas i bilip long ol disaipel bilong em, olsem na yumi mas mekim wanem bilong bihainim pasin bilong em?
15 Olsem wanem? Yumi inap bihainim pasin bilong Jisas, em i bilip long ol disaipel bilong em? Sampela man i hatwok long tilim ol wok bilong ol i go long ol narapela. Ol yet i mas bosim ol wok. Ol inap ting, ‘Bilong samting i ken kamap stret, mi yet mas mekim!’ Tasol sapos yumi yet i mekim olgeta wok, yumi inap pinisim nating strong bilong yumi na ating yumi no gat hap taim long lusim wantaim famili bilong yumi. Na tu, sapos yumi no tilim sampela wok i go long ol narapela, yumi pasim ol na ol i no lain long mekim wok. Yumi mas kisim pasin bilong bilip long ol narapela, na givim sampela wok bilong yumi long ol. I gutpela sapos yumi askim yumi yet: ‘Mi kisim tingting bilong Krais long dispela samting? Mi redi long tilim sampela wok i go long ol narapela na mi bilip olsem ol bai mekim gut dispela wok?’
Em i Tokim Ol Disaipel Em i Bilip Long Ol
16, 17. Long laspela nait bilong Jisas i stap laip olsem man, em i givim wanem tok long ol aposel bilong strongim ol, maski em i save ol bai lusim em?
16 Narapela bikpela samting Jisas i mekim bilong soim ol disaipel em i bilip long ol, i olsem: Em i tokim ol em i bilip long ol. Dispela samting i kamap klia long ol tok em i givim long ol aposel long laspela nait bilong em long stap laip olsem man. Tingim samting i kamap.
17 I gat planti samting Jisas i mekim long dispela nait. Em i wasim lek bilong ol aposel bilong em, na long dispela pasin em i lainim ol long bihainim pasin daun. Bihain long dispela, em i kamapim wanpela kaikai bilong tingim i dai bilong em. Orait nau ol aposel i tok pait gen long husat i stap nambawan namel long ol. Tasol Jisas i no krosim ol, em i stap isi na toktok gut wantaim ol. Em i tokim ol long ol samting i mas kamap: “Yupela bai i lukim ol samting i kamap long mi long dispela nait na bilip bilong yupela olgeta bai i pundaun, long wanem, buk bilong God i gat tok olsem, ‘Mi kilim wasman, na bai ol sipsip i ranawe i go nabaut.’ ” (Matyu 26:31; Sekaraia 13:7) Em i save ol gutpela poroman bilong em bai lusim em long taim em i laik ol i stap wantaim em. Tasol em i no kotim ol. Em i tokim ol: “Tasol bai mi kirap bek, na bai mi go paslain long yupela long Galili.” (Matyu 26:32) Olsem na em i tokim ol, maski ol i lusim em, bai em i no lusim ol. Taim dispela bikpela hevi i pinis, bai em i bung gen wantaim ol.
18. Long Galili, Jisas i givim wanem bikpela wok long ol disaipel bilong em? Ol aposel i mekim dispela wok inap long wanem mak?
18 Jisas i bihainim dispela tok bilong em. Long Galili, taim Jisas i kirap bek pinis, em i kamap long 11-pela gutpela aposel ol i bung i stap wantaim planti man. (Matyu 28:16, 17; 1 Korin 15:6) Long dispela hap, Jisas i givim bikpela wok long ol: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela.” (Matyu 28:19, 20) Buk Aposel i kamapim klia olsem ol aposel i mekim tru dispela wok. Ol i go pas long mekim wok bilong autim gutnius long taim bilong ol aposel.—Aposel 2:41, 42; 4:33; 5:27-32.
19. Ol samting Jisas i mekim taim em i kirap bek pinis i skulim yumi long wanem samting bilong tingting bilong Krais?
19 Dispela stori i lainim yumi long wanem samting bilong tingting bilong Krais? Jisas i bin lukim ol aposel bilong em i mekim pasin i no gutpela, tasol em i “laikim ol moa yet i go inap long taim em i dai.” (Jon 13:1) Maski ol i mekim ol pasin kranki, em i tokim ol em i bilip long ol. Bilip bilong em long ol i no lus nating. Tok Jisas i bin givim long ol i strongim ol long mekim dispela wok em i bin tokim ol long mekim.
20, 21. Yumi ken mekim wanem bilong soim olsem yumi gat stretpela tingting long ol wanbilip bilong yumi?
20 Olsem wanem yumi ken bihainim tingting bilong Krais long kain samting olsem? Yumi no ken kisim tingting kranki long ol wanbilip bilong yumi. Sapos yumi mekim olsem, ol tok na pasin bilong yumi bai kamapim dispela samting. (Luk 6:45) Tasol Baibel i tokim yumi, man i gat pasin sori em “i no save larim wanpela samting i daunim em.” (1 Korin 13:7) Pasin sori i save strongim bel bilong ol man—em i no daunim ol. Pasin bilong sori long ol man na strongim bel bilong ol inap kirapim ol long mekim wok—pasin bilong pretim narapela i no inap mekim olsem. Sapos yumi tokim ol narapela yumi bilip long ol, dispela inap strongim bel bilong ol. (1 Tesalonaika 5:11) Olsem Jisas, sapos yumi kisim gutpela tingting long ol brata bilong yumi, bai yumi mekim ol samting long pasin bilong strongim ol na long kirapim ol long mekim gutpela wok.
21 Bilong kisim na bihainim tingting bilong Krais, i no olsem yumi bihainim sampela samting Jisas i bin mekim na em tasol, nogat. Olsem stori i kam paslain long dispela i tok, bilong bihainim tru Jisas, pastaim yumi mas kisim tingting bilong em long ol samting. Ol Gutnius i helpim yumi long save long narapela pasin bilong em, olsem em i gat wanem tingting long wok God i bin givim long em, na stori i kam bihain long dispela bai toktok long dispela.
[Ol Futnot]
a Dispela rait i stori long skin bilong Jisas i bin luk olsem wanem, na i stori tu long kala bilong gras na mausgras na ai bilong em. Man bilong tanim tok bilong Baibel, em Edgar J. Goodspeed, em i tok, dispela tok giaman i “bilong strongim ol tok i stori long skin bilong Jisas, em ol tok i stap long ol buk bilong ol man bilong wokim piksa.”
b Ating krismas bilong ol dispela pikinini i narapela narapela. Wanpela tok ol i kisim dispela tok “pikinini” long en, ol i bin mekim wok long en tu bilong makim pikinini meri i gat 12-pela krismas, em pikinini bilong Jairus. (Mak 5:39, 42; 10:13) Tasol long narapela stori bilong dispela samting, Luk i kolim wanpela tok em i makim tu bebi.—Luk 1:41; 2:12; 18:15.
c Lukim stori “Yu Save Givim Biknem Long Ol?” long Wastaua bilong Epril 1, 1998.
Yu Inap Stori Long Dispela?
• Jisas i mekim wanem taim ol disaipel i laik pasim ol pikinini long kam long em?
• Wanem sampela samting Jisas i bin mekim bilong soim olsem em i tingim gut ol narapela?
• Olsem wanem yumi inap bihainin pasin bilong Jisas, em i redi long bilip long ol disaipel bilong em?
• Olsem wanem yumi inap bihainim pasin bilong Jisas, em i tokim ol aposel em i bilip long ol?
[Piksa long pes 16]
Ol pikinini i no pret long stap wantaim Jisas
[Piksa long pes 17]
Jisas i mekim pasin sori long ol narapela
[Piksa long pes 18]
Ol elda yumi no pret long go toktok wantaim ol, ol i gutpela blesing