Baibel i Tok Wanem Long Krais Em i Wankain Olsem God?
LONG bipo na i kam inap nau, planti planti manmeri bilong graun ol i bilip long Krais Jisas na em insait long ol samting ol i mekim bilong lotu. Yumi save long dispela, long wanem planti milion manmeri ol i save tok ol i bihainim Jisas. Tasol ol i no wanbel long Jisas em i husat tru.
Sampela man i tok ol i bilip long tok bilong Jisas, na ol i bilip olsem Jisas em i Pikinini bilong God—ol i no bilip olsem Jisas em i Man bilong wokim olgeta samting. Tasol sampela ol i bilip olsem Jisas yet em i God. Ol i tok bipo bipo yet Jisas i bin i stap na i no gat wanpela man i bin wokim em, na taim em i stap long graun, em i no wanpela man nating tasol. Olsem wanem? Tok bilong ol i stret? Baibel i tok wanem?
Taim Jisas i No Kamap Man Yet Long Graun
Jisas yet i tok em i bin i stap laip long heven. Em i tok: “I no gat narapela man i bin i go antap long heven. Nogat. Pikinini Bilong Man em wanpela tasol i bin lusim heven na i kam daun.” (Jon 3:13) Na em i tok moa, olsem: “Mi dispela bret i gat laip na i lusim heven na i kam daun. Sapos wanpela man i kaikai dispela bret, em bai i gat laip i stap oltaim. Na dispela bret mi bai givim long em, em i bodi bilong mi. Mi givim bai ol manmeri bilong graun ol i ken kisim laip.”—Jon 6:51.
Yumi save, taim Jisas i no kamap man yet long graun, em i bin i stap laip, long wanem em yet i tok: “Taim Abraham i no kamap yet, mi bin i stap.” (Jon 8:58, NW) Abraham i bin i stap laip long yia 2018 i go inap long yia 1843 paslain long Krais, tasol Jisas i bin i stap man long graun kirap long yia 2 B.C.E. i go inap long yia 33 C.E. Taim Jisas i laik i dai, em i beten olsem: “Papa, taim graun i no kamap yet, mi stap wantaim yu na mi gat biknem. Nau mi laik bai yu givim dispela biknem long mi gen na bai mi stap wantaim yu.”—Jon 17:5.
Ol disaipel bilong Jisas i mekim wankain tok olsem Jisas. Aposel Jon i tok: “Bipo bipo tru, taim olgeta samting i no kamap yet, Tok i stap. Tok i stap wantaim God na Tok em yet i [wanpela] God. Long em God i mekim kamap olgeta samting. Na i no gat wanpela samting i kamap long narapela rot. . . . Tok em i bin kamap man, na em i kam i stap namel long mipela. Mipela i lukim pinis bikpela namba na strong bilong em. Em i namba bilong dispela wanpela Pikinini tasol, Papa i salim em i kam. Marimari na pasin i tru i pulap long em.” (Jon 1:1, 3, 14) Tru tumas, “Tok em i bin kamap man,” em dispela man Krais Jisas.
Tok bilong Pol i makim olsem Jisas i bin stap laip paslain long taim em i bin i kam long graun. Pol i tok: “Yupela i mas holim wankain tingting olsem Krais Jisas i bin holim. . . . em i no ting long holimpas dispela pasin bilong i stap wankain olsem God. Nogat. Em i lusim dispela pasin, na em i kamap olsem wokboi nating. Em i kamap olsem man.” (Filipai 2:5-7) Pol i tok Jisas em i “namba wan pikinini bilong God, . . . Long han bilong dispela Pikinini, God i bin wokim olgeta samting.”—Kolosi 1:13-16.
Taim Em i Stap Long Graun, Em i No Wanpela God
Baibel i kamapim klia olsem taim mama i karim Jisas na i go inap long taim em i dai, em i wanpela man tru bilong graun. Jon i no tok Jisas i kisim skin bilong man tasol. Nogat. Em i bin “kamap man” tru—em i no hap man na hap God. Nogat. Sapos Jisas em i hap man na hap God tu wantaim, orait Baibel i no inap tok “em i stap aninit long ol ensel.”—Hibru 2:9; Buk Song 8:4, 5.
Taim Jisas i stap long graun, sapos em i hap man na hap God, bilong wanem oltaim em i beten long Jehova? Pol i tok: “Taim Jisas i stap man long graun, em i save mekim prea na beten long God. Em i save, God inap long kisim bek em, na em i no mas i dai, olsem na em i beten strong long God, na em i singaut strong na i krai planti. Em i save daunim laik bilong em yet na i aninit long God, olsem na God i harim beten bilong em.”—Hibru 5:7.
Yumi save, taim Jisas i stap long graun em i no hap spirit, long wanem Pita i tok: “Long graun em i stap man, na ol i kilim em i dai, tasol em i kirap bek na em i stap spirit long heven.” (1 Pita 3:18) Jisas em i kamap man tru bilong graun, olsem na em inap pilim tru hevi bilong ol man bilong graun. Sapos em i no bin kamap man tru bilong graun, orait bai em i no inap mekim gutpela wok olsem hetpris na sori tru long ol man bilong graun. Pol i tok: “Yumi no ken ting, dispela hetpris bilong yumi em i no inap sori long yumi. Nogat. Olgeta traim i save kamap long yumi, dispela olgeta i bin kamap pinis long em bilong traim em tu. Tasol em i no mekim sin.”—Hibru 4:15.
Jisas em i “Pikinini Sipsip Bilong God. Em i kam bilong tekewe sin bilong olgeta manmeri bilong graun,” olsem na em i “bin givim laip bilong em yet bilong baim bek olgeta manmeri.” (Jon 1:29; 1 Timoti 2:6) Long dispela rot Jisas i baim bek olgeta samting Adam i bin lusim—em gutpela laip bilong i stap oltaim. Lo bilong God i tok, ‘laip i pe o bekim bilong laip,’ olsem na laip bilong Jisas i mas wankain stret olsem laip bilong Adam long pastaim—wanpela man i gutpela olgeta, i no hap man na hap God.—Lo 19:21; 1 Korin 15:22.
No Ken Kisim Tingting Kranki Long Tok Bilong Baibel
Sampela man i tok Jisas em i hap man na hap God, na ol i tok em i hap bilong God Triwan na em i gat wankain strong na biknem olsem God yet na em i save stap oltaim olsem God. Ol dispela man i save mekim wok long ol narapela narapela hap tok bilong Baibel bilong traim painim rot bilong truim tok bilong ol. Tasol taim yumi skelim gut tok bilong ol dispela ves bilong Baibel, yumi kisim save olsem ol dispela man i bilip olsem Krais i wankain olsem God, ol i kaunim ol dispela ves na ol i kisim tingting kranki long en.
Sampela i tok, taim Baibel i tok “yumi,” dispela i makim olsem taim Jisas (Tok) i stap yet long heven, em i bikpela olsem God. Tasol dispela tok “yumi” i no makim olsem God i toktok wantaim wanpela man i bikpela olsem em. Dispela i makim olsem namel long ol ensel long heven, i gat wanpela ensel em God i putim em i stap na em i winim ol narapela ensel. Taim Jisas i no kam daun yet long graun, em i “stap wantaim” God na em i “saveman i bosim wok,” na em i olsem Maus bilong God.—Stat 1:26; 11:7; Sindaun 8:30, 31; Jon 1:3.
Ol samting i kamap taim Jisas i kisim baptais, i no makim olsem God na Krais na spirit holi i wankain tasol. Nogat. Jisas i bin kamap man na em i kisim baptais, na dispela i makim olsem em i givim skin bilong em yet long Papa bilong em long heven. Taim em i kisim baptais, “heven i op,” na spirit bilong God i kam daun long em olsem wanpela pisin ol i kolim balus, na “long heven” Jehova i singaut olsem: “Dispela em i Pikinini bilong mi. Mi laikim em tumas. Bel bilong mi em i amamas long em.”—Matyu 3:13-17.
Orait, wanem insait bilong dispela tok Jisas i bin givim long ol disaipel bilong em, em i tokim ol, ol i mas baptaisim ol man “long nem bilong Papa na bilong Pikinini na bilong Holi Spirit”? (Matyu 28:19, 20) Jisas i no tok em wantaim Papa bilong em na spirit holi ol i bikpela wantaim. Nogat. Tasol ol man i laik kisim baptais ol i save Jehova em i As bilong laip na em i Nambawan Bikpela God, na ol i mas givim laip bilong ol long em. Na ol i bilip olsem Jisas em i dispela man God i bin salim i kam bilong baim bek ol manmeri i bilip long em. Na ol i save spirit holi em i strong bilong God, na ol i mas daun long en. Tasol ol dispela man i laik kisim baptais, ol i no ken ting Jehova na Jisas na spirit holi ol i hap bilong wanpela God Triwan. Nogat.
Tasol Jisas i bin wokim planti mirakel, na ating dispela samting i makim olsem em i hap man na hap God, a? Nogat. Long wanem, Moses na Elaija na Elisa na aposel Pita na aposel Pol na sampela moa ol i bin wokim sampela mirakel, na ol i no hap man na hap God. (Kisim Bek 14:15-31; 1 King 18:18-40; 2 King 4:17-37; Aposel 9:36-42; 19:11, 12) Jisas em i wankain olsem ol dispela man—em i wanpela man bilong graun, na God i givim strong long em bambai em inap wokim ol mirakel.—Luk 11:14-19.
Aisaia i tok profet long Jisas na i tok em i “God i gat bikpela strong.” (Aisaia 9:6) Na long Aisaia 10:21, dispela profet Aisaia i tok Jehova em i “God i gat bikpela strong.” Sampela man i mekim wok long dispela tupela ves bilong makim olsem Jisas em i God. Tasol yumi mas was gut, nogut yumi kisim tingting kranki long dispela tupela ves. Long tok Hibru em pastaim ol i bin raitim Baibel long en, dispela tok “God i gat bikpela strong” i no makim Jehova wanpela tasol. Tasol dispela tok “God I Gat Olgeta Strong” i makim Jehova wanpela tasol. (Stat 17:1) Tupela tok i narapela narapela kain. Man i gat olgeta strong i winim man i gat bikpela strong.
Long Aisaia 43:10 Jehova i tok: “Bipo i no gat wanpela god i bin kamap na i stap pastaim long mi. Na bihain tu bai i no gat wanpela god i kisim ples bilong mi.” Tasol dispela tok i no makim olsem Jisas em i God. Bikpela samting em olsem, i no gat wanpela god i bin kamap paslain long Jehova, long wanem em i bilong bipo bipo yet na em bai stap long bihain bihain tu. Na bai i no gat wanpela god i kamap bihain long Jehova, long wanem em bai stap oltaim oltaim—em i Nambawan Bikpela God. Tasol Jehova i bin wokim sampela moa, na em i kolim ol olsem god. Baibel i stori long sampela man i gat nem olsem god, olsem: “Mi tok olsem, ‘Yupela i god. Yupela i pikinini bilong God Antap Tru. Tasol bai yupela i dai wankain olsem ol man i save dai. Bai laip bilong yupela i pinis, olsem laip bilong ol pikinini bilong king i save pinis.’ ” (Buk Song 82:6, 7) Jehova i bin wokim namba wan ensel Tok (em Jisas), na em i wanpela god, tasol dispela i no makim olsem em i bikpela olsem God I Gat Olgeta Strong.
Jisas i Stap Namba Wan Tru o Olsem Wanem?
Sampela man i tok God i kisim skin bilong man na kamap hap man na hap God. Tasol ol dispela man i mas lukim gut tok bilong Baibel, long wanem Baibel i no tok Jisas i bin kisim dispela kain tingting long em yet. Olgeta tok bilong Baibel i kamapim klia olsem long olgeta taim Jisas i stap aninit long Papa bilong em. Taim Jisas i stap long graun, em i tok em i Pikinini bilong God, em i no tok em i bikpela olsem God. Nogat. Jisas yet i tok: “Papa i stap namba wan tru na i winim mi.”—Jon 14:28.
Pol i mekim wanpela tok bilong kamapim klia olsem Jehova i narapela na Jisas i narapela. Pol i tok: “Yumi gat wanpela God tasol, em God Papa. Em i as bilong olgeta samting, na yumi stap olsem ol manmeri bilong em stret. Na i gat wanpela Bikpela tasol, em Jisas Krais. Em i bin wokim olgeta samting, na yumi bin kisim laip long em.” (1 Korin 8:6) Na Pol i tok moa: “Yupela i bilong Krais. Na Krais em i bilong God.” (1 Korin 3:23) Tru tumas, ol Kristen i gat Bos bilong ol, em Krais Jisas, na Jisas em i gat Het o bos bilong em, em God Jehova.
Pol i mekim wankain tok long dispela, na em i tok: “Het bilong olgeta man em Krais, na het bilong meri em man bilong en, na het bilong Krais em God.” (1 Korin 11:3) Jisas bai stap daun long God inap long olgeta taim bihain, long wanem, long pinis bilong Taim Bilong 1,000 Yia bilong em i mekim wok king, “bai em i putim kingdom long han bilong God Papa” na “putim em yet aninit long God. Pastaim God i bin putim olgeta samting aninit long Pikinini bilong en, tasol taim Pikinini Bilong God i putim em yet aninit long God, orait God bai i stap het tru bilong olgeta samting.”—1 Korin 15:24, 28; Kamapim Tok Hait 20:6.
Sampela Tok Moa Bilong Baibel
Matyu i stori long taim mama i karim Jisas, na em i tok: “Dispela olgeta samting i kamap bilong inapim wanpela tok Bikpela i bin mekim long maus bilong profet [Aisaia 7:14]. Profet i bin tok olsem, ‘Harim. Wanpela meri i no bin slip wantaim man, em bai i gat bel na i karim wanpela pikinini man. Na bai ol i kolim nem bilong en Emanuel.’ As bilong dispela nem i olsem, God i stap wantaim yumi.” (Matyu 1:22, 23) Mama bilong Jisas i no givim nem Emanuel long em, tasol olgeta samting em i mekim taim em i stap long graun i truim insait bilong dispela nem. Taim Jisas i stap long graun, em i dispela “pikinini” bilong lain bilong Devit na em bai sindaun long sia king bilong Devit, na ol man i lotu tru long Jehova, ol i save God i stap wantaim ol na i wok long helpim ol long olgeta samting ol i mekim.—Stat 28:15; Kisim Bek 3:11, 12; Josua 1:5, 9; Buk Song 46:5-7; Jeremaia 1:19.
Aposel Tomas i toktok wantaim Jisas taim em i kirap bek pinis, na em i tok: “Yu Bikpela bilong mi. Yu God bilong mi.” (Jon 20:28) Ol i bin raitim dispela tok wantaim sampela tok moa, na bai yumi “ken bilip long Jisas em dispela man God i makim bilong kisim bek ol manmeri bilong en. Em i Pikinini Bilong God.” Tasol tok bilong Tomas i no daunim tok bilong Jisas, em Jisas i bin salim tok i go long ol disaipel bilong em na em i tok: “Mi bai go antap, na . . . mi go long God bilong mi na God bilong yupela.” (Jon 20:17, 30, 31) Olsem na Tomas i no ting Jisas em i God I Gat Olgeta Strong. Ating Tomas i kolim Jisas olsem “God bilong mi,” long wanem em i save Jisas em i wanpela god, tasol em i save Jisas em i no God I Gat Olgeta Strong. (Jon 1:1; 17:1-3) O taim Tomas i tok “God bilong mi,” ating em i laik tok olsem Jisas em i Maus bilong God. Bipo bipo taim God i salim wanpela ensel i kam olsem maus bilong em, ol man i kolim em “Bikpela,” olsem em i Jehova.—Lukim Stat 18:1-5, 22-33; 31:11-13; 32:24-30; Hetman 2:1-5; 6:11-15; 13:20-22.
Olsem yumi lukim pinis long Baibel, taim Jisas i no kam daun yet long graun, em i bin i stap laip long heven na nem bilong em Tok. Taim em i stap long graun, em i no hap man na hap God. Em i wanpela man tru, tasol em i gutpela olgeta, wankain olsem Adam long pastaim. Taim Jisas i kirap bek na i go long heven, em i wanpela spirit i gat laip i stap oltaim oltaim—em i no inap i dai, tasol long olgeta taim bai em i stap daun long God. Olsem na Baibel i no tok Krais em i wankain olsem God.
[Blok long pes 23]
Olsem Wanem? Ol Ensel i Save Lotuim Jisas?
SAMPELA Baibel, na Baibel Pisin tu, i tanim tok bilong Hibru 1:6 olsem: “Olgeta ensel bilong God i mas lotu long [Jisas].” (King James Version; The Jerusalem Bible) Tasol taim aposel Pol i laik raitim dispela tok, ating em i bin lukim tok bilong Baibel Septuagint na em i raitim dispela tok olsem i stap long Buk Song 97:7: “Yupela olgeta ensel bilong Em, yupela i mas lotuim Em [God].”—C. Thomson.
Long Hibru 1:6, ol i tanim dispela tok Grik pro·sky·neʹo, olsem “lotu long.” Na long Baibel Septuagint long Buk Song 97:7 ol i tanim dispela tok Hibru sha·hhahʹ olsem “lotuim,” na insait bilong en i olsem “brukim skru long.” Ol man inap brukim skru long narapela bilong makim olsem em i daun long em. (Stat 23:7; 1 Samuel 24:8; 2 King 2:15) Em inap makim olsem man i brukim skru bilong lotuim God tru, o em i brukim skru bilong lotu long ol god giaman.—Kisim Bek 23:24; 24:1; 34:14; Lo 8:19.
Dispela samting ol i mekim long Jisas (pro·sky·neʹo) i wankain samting olsem man i mekim long man i gat namba o narapela man. (Skelim tok bilong Matyu 2:2, 8; 8:2; 9:18; 15:25; 20:20 wantaim 1 Samuel 25:23, 24; 2 Samuel 14:4-7; 1 King 1:16; 2 King 4:36, 37.) Planti tok bilong Baibel i kamapim klia olsem ol man i bin brukim skru long Jisas, long wanem em i “Pikinini Bilong God” o “Pikinini Bilong Man,” na i no olsem em i God.—Matyu 14:32, 33; Luk 24:50-52; Jon 9:35-38.
Hibru 1:6 i makim namba em Jisas i holim aninit long God. (Filipai 2:9-11) Sampela Baibel i tanim dispela tok pro·sky·neʹo olsem “givim biknem long” (The New English Bible), “brukim skru long” (New World Translation), o “lindaun long ai bilong” (An American Translation). Sapos man i laik mekim wok long dispela tok, “lotu long” bilong helpim bilip bilong em, em i mas save, yumi no ken givim lotu long Jisas, long wanem Jisas i tokim Satan: “Yu mas aninit long God, Bikpela bilong yu. Na yu mas lotu [pro·sky·neʹo] long em wanpela tasol.”—Matyu 4:8-10.
Buk Song 97:7 i tok long lotuim God, tasol long Hibru 1:6 Pol i kolim dispela tok bilong makim Krais Jisas. Tasol Pol i bin helpim yumi long save, taim Jisas i kirap bek na i go i stap long heven em i “soim bikpela lait bilong God na em i lait moa yet long yumi, na em i wankain tru olsem God yet.” (Hibru 1:1-3) Olsem na sapos ol ensel i brukim skru long Pikinini bilong God, i olsem ol i lotuim Jehova long rot bilong Pikinini bilong em.