Wanpela Tok Hait Ol Kristen i Mas Kamapim!
“Mi bin givim tok long ol manmeri long ples klia. . . . Mi no bin mekim wanpela tok long ples hait.”—JON 18:20.
WANPELA tok Grik, em my·steʹri·on, Baibel Pisin i save tanim olsem “tok hait bilong God,” na “tok i stap hait,” na “tok hait,” na kain tok olsem. Olsem na yumi save, taim Baibel i kolim wanpela tok hait olsem tok hait bilong God, dispela tok hait em i bikpela samting tru! Ol man i kisim save long as bilong kain tok hait olsem, ol i mas ting dispela em i bikpela samting tru, long wanem, em i makim olsem Nambawan Bikpela God bilong heven na graun i orait long kamapim wanpela tok hait bilong em long ol.
2 Wanpela buk dikseneri (Expository Dictionary of Old and New Testament Words, bilong Vine) i tok, dispela tok olsem “tok hait bilong God,” em i stret na i winim dispela tok olsem “tok hait.” Em i stori long dispela tok my·steʹri·on olsem: “Long [Ol Skripsa Grik] dispela tok i makim wanpela kain tok hait ol man bilong graun i no inap save long as bilong en—God tasol inap kamapim dispela save long ol, na em i kamapim long pasin em yet i makim na long taim stret em i makim, na em i kamapim long ol man em Spirit bilong Em i givim lait long ol, na i no long ol narapela man, nogat. Long tok nating bilong ol man, dispela tok olsem ‘tok hait’ i makim wanpela save ol i haitim; tasol long Baibel em i makim tok i tru i kamap ples klia. Olsem na i gat sampela tok i poroman wantaim dispela tok, “tok hait,” olsem ‘tokaut,’ ‘kamapim long ples klia,’ ‘kamap ples klia,’ ‘autim,’ ‘save.’ ”
3 Dispela i kamapim klia olsem ol liklik lain bilong lotu i bin wok hait long taim bilong ol aposel ol i narapela kain tru long nupela lain Kristen i bin kamap long dispela taim bipo. Ol man i go insait long ol lain i save wok hait, ol i mas mekim tok tru antap olsem ol i no ken kamapim ol tok bilong lotu bilong ol. Tasol ol Kristen long dispela taim bipo i no gat wok long mekim wanpela tok tru antap olsem. Tru, aposel Pol i bin toktok long “gutpela tingting na save bilong God . . . i stap hait,” olsem em i stap hait long ol “hetman bilong dispela graun.” Tasol em i no stap hait long ol Kristen em spirit bilong God i bin kamapim klia dispela save long ol bambai ol i ken autim long ol man.—1 Korin 2:7-12; skelim wantaim Sindaun 1:20.
“Tok Hait Bilong God” i Kamap Ples Klia
4 Dispela “tok hait bilong God” em ol samting bilong Krais Jisas. Pol i tok: “Bipo God i tingting pinis long dispela samting em i laik mekim long wok bilong Krais. Tasol dispela tingting bilong en i bin i stap hait, na nau em i soim yumi pinis dispela tingting bilong en. Dispela samting em i laik mekim em i olsem. Em i laik stiaim olgeta samting i go i go, na long dispela taim em i makim pinis, em bai i bungim olgeta samting long Krais, ol samting bilong heven na bilong graun tu.” (Efesus 1:9, 10) Pol i kamapim klia moa ol samting bilong dispela “tok hait bilong God” taim em i tokaut olsem ol i mas “save gut long as bilong tok hait bilong God. Krais yet em i as bilong dispela tok hait.”—Kolosi 2:2.
5 Tasol i no dispela samting tasol, long wanem, dispela “tok hait bilong God” em i wanpela tok hait i gat planti samting bilong en. Em i no wanpela tok hait tasol long Jisas em i dispela Pikinini God i tok promis long salim i kam, olsem Mesaia; em i wanpela tok hait tu long ol wok Jisas i mas mekim bilong kamapim laik bilong God. Em i tok hait bilong wanpela gavman bilong heven, em Kingdom bilong God i stap long han bilong Mesaia, olsem Jisas i bin tokaut klia long en taim em i tokim ol disaipel: “God i larim yupela i save pinis long as bilong tok hait bilong kingdom bilong heven. Tasol em i no soim long ol dispela manmeri.”—Matyu 13:11.
6 I gat bikpela hap taim i mas lus, kirap long namba wan taim God i bin kamapim laik bilong em long wokim rot bilong kamapim Kingdom bilong Mesaia na i go inap long taim “tok bilong [God] i bin hait i stap . . . i kamap tru.” (KTH 10:7; Stat 3:15) Em bai kamap tru taim Kingdom i kamap, olsem Kamapim Tok Hait 10:7 na 11:15 i soim yumi. I gat olsem 4,000 yia i lus, kirap long taim namba wan tok promis bilong Kingdom i bin kamap long Iden na i go inap long taim dispela man bilong kamap King em i kamap ples klia long yia 29 C.E. Na i gat 1,885 yia moa i lus inap long taim Kingdom i kamap long heven long 1914. Olsem na isi isi dispela “tok hait bilong God” i wok long kamap ples klia insait long bikpela hap taim, klostu olsem 6,000 yia. (Lukim pes 16.) Tru tumas, Pol i tok stret taim em i toktok long “dispela gutnius i bin i stap hait long olgeta taim bipo, tasol nau God i bin kamapim ples klia.”—Rom 16:25-27; Efesus 3:4-11.
7 Ol man bilong graun i save stap sotpela taim tasol na ol i pilim olsem ol i no gat taim bilong mekim ol samting. Tasol Jehova i no pilim olsem em i stap sotpela taim tasol na em i mas kamapim hariap ol tok hait bilong em, maski i no taim bilong mekim olsem. Dispela i mas helpim yumi na taim yumi gat sampela askim long wanpela tok bilong Baibel na yumi no inap painim gutpela bekim bilong en, bai yumi no les, o kros—yumi wet tasol. Lain wokboi i gat gutpela tingting em ol i gat wok long givim kaikai bilong spirit long lain Kristen long taim stret bilong en, ol i gat pasin daun na dispela i pasim ol na ol i no kirap nating na ol yet i wok long skelim skelim ol samting i no kamap ples klia yet. Ol i no save mekim olsem. Dispela lain wokboi i no save strong long kamapim tingting bilong ol yet na tok dispela tingting i stret. Ol i tingim tok bilong Sindaun 4:18, na long pasin daun ol i tokaut olsem nau long dispela taim ol i no inap bekim olgeta askim. Tasol yumi amamas tru long save, long taim na long pasin Jehova yet i makim, em bai wok yet long kamapim klia ol tok hait bilong em long ol samting em i laik mekim! Yumi no ken les long dispela pasin Jehova i putim bilong kamapim klia ol laik bilong em, na long tingting bilong yumi yet yumi laik go pas long God bilong kamapim as bilong ol tok hait bilong em. Yumi save, dispela lain Jehova i mekim wok long rot bilong ol long nau, ol i no save mekim olsem, na dispela i strongim bel bilong yumi! Dispela lain i gat gutpela tingting na i save stap gut long Jehova.—Matyu 24:45; 1 Korin 4:6.
Tok Hait i Kamap Klia Yumi Mas Autim!
8 Jehova i no bin kamapim klia ‘tok hait bilong em’ long ol Kristen bambai ol i ken haitim i stap, nogat. Ol i mas autim dispela tok hait long ol man, olsem Jisas i bin tokim olgeta disaipel bilong em ol i mas mekim—i no wan wan pris pasto tasol i mas mekim. Jisas i tok: “Yupela i olsem lait bilong graun. Tingim. Wanpela taun i stap antap long maunten, em i no inap hait. Na tu, ol man i no save laitim lam na putim aninit long wanpela baket. Nogat. Ol i save putim antap long tebol, na em i givim lait long olgeta man i stap long haus. Olsem tasol, lait bilong yupela i mas lait long ai bilong ol manmeri, bai ol i lukim ol gutpela pasin yupela i mekim, na bai ol i litimapim nem bilong Papa bilong yupela i stap long heven.”—Matyu 5:14-16; 28:19, 20.
9 Taim Jisas i stap long graun, em i no gat tingting long daunim gavman na kisim wanpela lain bilong em bilong mekim ol laik bilong em i stap hait, nogat. Long wanpela buk (Early Christianity and Society), Robert M. Grant i kamapim wanpela tok em Jastin Matir i bin mekim bihain liklik long taim bilong ol aposel bilong helpim ol Kristen; em i tok: “Sapos ol Kristen i laik pait bilong daunim gavman, ol bai wok hait i stap bilong kamapim laik bilong ol.” Tasol olsem wanem ol Kristen inap “wok hait i stap” na wok tu long i stap olsem “wanpela taun i stap antap long maunten”? Ol i no ken haitim lait bilong ol aninit long wanpela baket! Olsem na gavman i no ken pret long wok bilong ol. Man bilong raitim dispela buk i tok moa olsem: “Ol i nambawan lain bilong helpim king long kirapim ol man long i stap isi na bihainim lo.”
10 Jisas i no laik bai ol disaipel bilong em i haitim nem bilong ol olsem wanpela lain ol man i kolim olsem narakain lain bilong lotu. (Aposel 24:14; 28:22) Long nau tu, sapos yumi no larim lait bilong yumi i lait long ai bilong ol manmeri, Krais na Papa bilong em, em God bilong kamapim as bilong ol tok hait, ol i no ken amamas long yumi, na nau yumi tu i no ken amamas.
11 Jehova “i no laik bai wanpela man i lus. Em i laik bai olgeta man i mas tanim bel.” (2 Pita 3:9; Esekiel 18:23; 33:11; Aposel 17:30) Bilong Jehova i ken lusim rong bilong ol man i tanim bel pinis, ol i mas bilip long ofa bilong Krais Jisas, em i bin givim skin bilong em bilong baim bek olgeta man—i no wan wan tasol—bambai “olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:16) Em i bikpela samting long yumi mas helpim ol man long mekim ol samting ol i mas mekim, olsem na long taim bilong skelim ol man long kot, kot bai makim ol i olsem sipsip, na i no olsem meme.—Matyu 25:31-46.
12 Yumi no ken haitim lotu Kristen tru; yumi mas autim tok bilong en long olgeta taim i gat rot long mekim. Jisas yet i makim pasin yumi mas bihainim. Taim hetpris i askim em long ol disaipel bilong em na ol tok em i skulim ol man long en, em i tok: “Mi bin givim tok long ol manmeri long ples klia. Oltaim mi bin skulim ol manmeri insait long ol haus lotu na insait long banis bilong tempel, long ol ples olgeta Juda i save bung long en. Mi no bin mekim wanpela tok long ples hait.” (Jon 18:19, 20) Ol man i pret long God na ol i tingim dispela pasin bilong Jisas, ol i no laik haitim ol tok em God i tok ol i mas autim long ol man, a? Husat bai haitim “ki bilong dua i go insait long ples bilong kisim save” i bringim man long laip i stap oltaim? Nogat, a? Sapos em i mekim olsem, em bai kamap olsem ol bikman bilong lotu i gat tupela maus, em ol i stap long taim bilong ol aposel.—Luk 11:52; Jon 17:3.
13 Nogut wanpela man inap tok, yumi ol Witnes Bilong Jehova i bin haitim tok bilong Kingdom bilong God! Maski ol man i laik harim dispela tok o ol i sakim, olgeta man i mas save yumi bin autim dispela tok. (Skelim wantaim Esekiel 2:5; 33:33.) Olsem na long olgeta taim yumi mas wok long painim rot bilong autim tok i tru long olgeta man, long wanem wanem hap yumi bungim ol.
Putim Huk Long Wasket Bilong Satan
14 Nau long planti hap bilong graun ol man i wok long lukluk long ol Witnes Bilong Jehova na wok bilong ol. Olsem ol man i bin mekim long ol Kristen bilong pastaim, long nau tu planti man i save giaman na tok ol Witnes i olsem ol lain bilong lotu i narapela kain na ol oganaisesen i save wok hait. (Aposel 28:22) Orait, sapos yumi autim tok long ples klia na yumi no haitim dispela tok, ating dispela bai kirapim ol man long birua moa yet long yumi, a? Tru, sapos yumi wok long tok pait wantaim ol man long tok bilong Baibel na yumi no gat wok long mekim olsem, em i no pasin bilong gutpela tingting, na yumi no bihainim tok bilong Jisas. (Sindaun 26:17; Matyu 10:16) Tasol yumi no ken haitim gutpela wok bilong autim tok bilong Kingdom na helpim ol man long stretim ol samting long i stap bilong ol na mekim i kamap gutpela. Taim yumi mekim dispela wok, em i save givim biknem long Jehova na litimapim nem bilong em, na yumi stiaim tingting bilong ol man i go long em na Kingdom bilong em. Nau long dispela taim planti manmeri long hap bilong Isten Yurop na sampela hap bilong Afrika ol i laik harim tok i tru bilong Baibel na ol i givim bel long en, na ating wanpela as bilong dispela i olsem: Nau ol Witnes inap autim tok i tru long ples klia long ol dispela hap.
15 Tru, ol Witnes bilong Jehova i save autim tok long ai bilong ol manmeri, na ol i stap long paradais bilong spirit, na ol i gat planti manmeri bilong mekim dispela wok, na ol i gat planti samting olsem haus na haus faktori samting na dispela i no stap hait long ol man. Ol man i gat gutpela bel ol i lukim ol dispela samting na ol i laik kam insait long lain bilong ol, tasol ol man i birua long ol Witnes, ol i nolaik tru long lukim ol dispela samting. (2 Korin 2:14-17) Ating bihain ol dispela gutpela samting em lain bilong God i holim, em bai kirapim lain bilong Satan long kam pait long ol.
16 Tasol olsem wanem? Yumi ken tingting planti long dispela samting? Tok profet bilong Jehova long Esekiel sapta 38 i kamapim klia olsem yumi no ken tingting planti. Em i tok profet olsem Gok bilong graun Magok, em Satan yet taim ol i rausim em pinis i kam long graun bihain long taim Kingdom i kamap long 1914, em bai bringim lain bilong em i kam pait long lain bilong God. (KTH 12:7-9) Jehova i tokim Gok: “Bai yu ting ol dispela lain i no man bilong pait na ol samting nogut i no save kamap long ol. Na ol taun bilong ol i no gat banis i raunim ol. Olsem na yu ting bai yu go pait long ol na kisim ol gutpela samting bilong ol. Ol dispela manmeri i bin lusim ol arapela kantri na i kam bek na wokim gen ol taun bilong ol, na ol i gat . . . kain kain samting. Na kantri bilong ol i stap namel tru long olgeta kantri bilong graun.” (Esekiel 38:11, 12) Ves 4 i soim yumi olsem lain bilong God i no ken pret taim Satan i kam pait long ol, long wanem, Jehova yet i kirapim em long mekim. Tasol bilong wanem God bai larim—na kirapim—Satan wantaim lain bilong em long i kam pait long lain bilong God? Long ves 23 Jehova i bekim dispela askim, olsem: “Long dispela pasin bai mi soim olgeta lain manmeri olsem, mi gat bikpela strong na pasin bilong mi i gutpela na stretpela olgeta. Na bai ol i save tru long mi. Na bai ol i save gut olsem, mi yet mi Bikpela [Jehova].”
17 Olsem na lain bilong Jehova i no pret long dispela taim Gok bai kirapim dispela pait, nogat. Ol i wetim dispela de i kam, na ol i tingting long dispela narapela tok profet bilong Baibel bai kamap tru. Yumi amamas tru long save, taim Jehova i mekim gut long lain bilong em long graun na ol i gat planti samting, i olsem em i putim huk long wasket bilong Satan na pulim em wantaim ol ami bilong em i kam pait na ol bai lus tru!—Esekiel 38:4.
Nau Em Taim Bilong Mekim Moa Yet!
18 Nau long taim bilong yumi, ol Witnes Bilong Jehova i autim long ples klia tru ol bilip bilong ol em Baibel i as bilong en, maski planti man i no laikim dispela tok. Inap planti yia pinis ol i bin tokaut olsem pasin bilong smok na kisim drak inap long nogutim skin bilong man, na ol hevi inap kamap long pasin bilong larim pikinini na i no stretim em gut, na ol samting nogut inap kamap taim ol man i lukim ol pilai na video samting i gat piksa bilong pasin pamuk na bagarapim man, na pasin bilong kisim blut em inap givim sik long man. Na ol i bin tokaut tu olsem tok bilong evolusen, olsem olgeta samting i bin kamap nating, em i no gat as bilong en. Em nau, planti manmeri moa ol i wok long tok olsem: “Tok bilong ol Witnes i stret.” Tasol ol i no inap tok olsem sapos yumi no bin tokaut klia long olgeta man long ol dispela bilip bilong yumi. Na tingim dispela samting tu: Taim ol i mekim dispela tok, i olsem ol i laik kirap na tok, “Satan, yu man bilong giaman; tok bilong Jehova i stret.” Dispela em i wanpela strongpela samting bilong kirapim yumi long bihainim yet pasin bilong Jisas long autim tok i tru long ol man!—Sindaun 27:11.
19 Inap longtaim pinis lain bilong Jehova i save long dispela wok ol i mas mekim. Long wanpela bikpela kibung long 1922, J. F. Rutherford, em i bin i stap presiden bilong Sosaiti Was Taua long dispela taim, em i mekim wanpela tok i kirapim tru ol manmeri i sindaun harim. Em i tok: “Tingting gut na was gut! Wok strong na no ken pret! Stap gut olsem witnes tru bilong Bikpela. Kirap givim bel long autim tok i go inap long olgeta samting bilong Babilon i pinis olgeta. Bringim tok bilong Kingdom i go long olgeta hap bilong graun. Olgeta man i mas save Jehova em i God na Krais Jisas em i bikpela King winim ol narapela king . . . Nau em i bikpela taim. Harim, King i kirap pinis long mekim wok! Yupela i gat wok bilong autim tok long dispela samting. Olsem na yupela mas autim tok, autim tok, autim tok, na tokim ol man long dispela King na Kingdom bilong em.”
20 Long 1922 dispela tok i bikpela samting, tasol nau yumi stap 75 yia bihain long dispela taim na nau dispela tok em i bikpela samting tru, long wanem, taim bilong Krais i kamap ples klia olsem King na Jas na Man bilong bekim rong, em i kam klostu moa yet! Dispela tok bilong Kingdom bilong Jehova na paradais bilong spirit em lain bilong God i stap long en, em i wanpela “tok hait bilong God” i gutpela tru na yumi no ken haitim. Olsem Jisas yet i tok klia long en, spirit holi bai helpim ol disaipel bilong em na ol i mas autim tok “long olgeta hap bilong graun” long bikpela wok em i holim bilong kamapim laik bilong Jehova bilong i stap oltaim oltaim. (Aposel 1:8; Efesus 3:8-12) Yumi ol wokman bilong Jehova, em God bilong kamapim as bilong ol tok i stap hait, yumi no ken tru haitim dispela tok!
Bai Yu Bekim Olsem Wanem?
◻ Wanem dispela “tok hait bilong God”?
◻ Olsem wanem yumi save yumi mas autim dispela tok hait?
◻ Wanem samting bai kirapim Gok long kam pait long lain bilong Jehova? Yumi mas ting olsem wanem long dispela samting?
◻ Yumi olgeta wan wan i mas tingting strong long mekim wanem?
[Askim Bilong Stadi]
1, 2. Long Baibel, wanem insait bilong dispela tok Grik my·steʹri·on?
3. Olsem wanem lain Kristen long taim bilong ol aposel ol i narapela kain long sampela liklik lain bilong lotu ol i wok hait?
4. “Tok hait bilong God” em ol samting bilong husat? Olsem wanem dispela tok hait em ol samting bilong em?
5. Wanem ol samting i insait long dispela “tok hait bilong God”?
6. (a) Olsem wanem na i stret yumi ken tok, dispela “tok hait bilong God” “i bin i stap hait long olgeta taim bipo”? (b) Olsem wanem em i bin wok long kamap ples klia isi isi?
7. Bilong wanem yumi inap bilip tru long lain wokboi i gat gutpela tingting?
8. Olsem wanem yumi save, ol i mas autim dispela “tok hait bilong God” long ol man?
9. Olsem wanem yumi save, Jisas em i no wanpela paitman i gat tingting long daunim gavman, olsem sampela man i tok?
10. Bilong wanem ol Kristen i no ken haitim nem bilong ol?
11, 12. (a) Bilong wanem Jehova i laik bai ol man i mas save long lotu Kristen? (b) Jisas i bin mekim wanem na yumi mas bihainim pasin bilong em?
13. Bilong wanem yumi mas autim tok long olgeta taim i gat rot long mekim?
14. Bilong wanem yumi no ken surik long lotuim Jehova long ples klia?
15, 16. (a) Yumi save autim tok long ol man long ples klia, na yumi gat planti samting bilong spirit, na dispela i gat wanem wok bilong en? Tasol yumi ken tingting planti long dispela samting? (b) Bilong wanem Jehova i putim huk long wasket bilong Satan?
17. Klostu nau na Satan bai kam pait long lain bilong God, na yumi mas ting olsem wanem long dispela samting?
18. (a) Long nau planti manmeri i wok long kisim wanem tingting? Olsem wanem na ol i kisim dispela kain tingting? (b) Tingting bilong ol man long tok bilong Kingdom ol i harim, olsem wanem dispela em i wanpela strongpela samting bilong kirapim man?
19, 20. (a) Long 1922, lain bilong Jehova i tokaut strong long ol bai mekim wanem? Yumi mas bihainim yet dispela tok o nogat? (b) Yumi mas ting olsem wanem long tok hait bilong Jehova?
[Blok long pes 16]
Isi Isi Wanpela “Tok Hait Bilong God” i Kamap Ples Klia
◻ Bihain long 4026 B.C.E.: God i tok promis long kamapim wanpela Pikinini bilong bagarapim Satan.—Stat 3:15
◻ 1943 B.C.E.: God i strongim kontrak em i bin mekim wantaim Abraham, na em i tok promis olsem dispela Pikinini bai kamap long lain bilong Abraham.—Stat 12:1-7
◻ 1918 B.C.E.: Mama i karim Aisak, em man bilong kisim ol samting bilong kontrak.—Stat 17:19; 21:1-5
◻ 1761 B.C.E. samting: Jehova i tokaut gen olsem dispela Pikinini bai kamap long lain bilong pikinini bilong Aisak, em Jekop.—Stat 28:10-15
◻ 1711 B.C.E.: Jekop i makim olsem dispela Pikinini bai kamap long lain bilong pikinini bilong em, Juda.—Stat 49:10
◻ 1070-1038 B.C.E.: King Devit i kisim save olsem dispela Pikinini bai i kamap tumbuna pikinini bilong em na em bai stap King inap oltaim oltaim.—2 Samuel 7:13-16; Song 89:35, 36
◻ 29-33 C.E.: Ol i kisim save olsem Jisas em i dispela Pikinini, na Mesaia, na Jas bilong bihain, na man bilong kamap King.—Jon 1:17; 4:25, 26; Aposel 10:42, 43; 2 Korin 1:20; 1 Timoti 3:16
◻ Jisas i kamapim long ples klia olsem em bai i gat ol wanwok king na jas, na bai i gat ol manmeri long graun ol i stap aninit long Kingdom bilong heven, na olgeta disaipel bilong em ol i mas autim tok bilong Kingdom.—Matyu 5:3-5; 6:10; 28:19, 20; Luk 10:1-9; 12:32; 22:29, 30; Jon 10:16; 14:2, 3
◻ Jisas i kamapim long ples klia olsem Kingdom bai kamap long wanpela taim stret, na ol samting i kamap long graun long nau i strongim dispela tok.—Matyu 24:3-22; Luk 21:24
◻ 36 C.E.: Pita i kisim save olsem ol man i no bilong lain Juda ol tu bai stap king wantaim Jisas long Kingdom.—Aposel 10:30-48
◻ 55 C.E.: Pol i tok ol man bilong i stap King long Kingdom bai ol i kirap bek long taim Krais i kam i stap, na ol i no inap i dai moa, na bodi bilong ol i no inap bagarap.—1 Korin 15:51-54
◻ 96 C.E.: Jisas i kirap pinis long mekim wok king na bosim lain bilong em, em God i bin makim ol, na em i kamapim klia olsem bihain dispela lain bai inap olsem 144,000.—Efesus 5:32; Kolosi 1:13-20; KTH 1:1; 14:1-3
◻ 1879 C.E.: Nius Zion’s Watch Tower i makim olsem 1914 em i wanpela bikpela yia tru insait long ol samting God i mekim bilong kamapim klia tok hait bilong em
◻ 1925 C.E.: Wastaua (tok Inglis) i tok Kingdom i bin kamap long 1914; ol i mas tokaut long ol man long tok hait bilong God long Kingdom.—KTH 12:1-5, 10, 17
[Ol Piksa long pes 15]
Olsem Gopas bilong ol, Jisas, i bin mekim, ol Witnes Bilong Jehova i save autim tok bilong Kingdom bilong Jehova long ol man