Yu Save Bihainim Tok Bilong Husat​—⁠God o Ol Man?

“Mipela i mas bihainim tok bilong God tasol. Mipela i no ken bihainim tok bilong ol man.”​—⁠APOSEL 5:⁠29.

 1. (a) Wanem as skripsa bilong dispela stadi? (b) Bilong wanem ol i holimpas ol aposel na putim ol long kalabus?

ATING ol jas bilong nambawan kot bilong ol Juda i belhat nogut tru. Ol kalabusman i no stap, em ol aposel bilong Jisas Krais, em wanpela man dispela nambawan kot i bin makim bilong kilim em i dai sampela wik paslain. Orait nau kot i redi long mekim save long ol aposel bilong Jisas. Tasol taim ol gad i go bilong kisim ol, ol i lukim olsem ol sel i no gat man, tasol ol dua i lok i stap. I no longtaim na ol gad i kisim save olsem ol aposel i stap long tempel long Jerusalem na ol i wok long skulim ol man long Jisas Krais​—⁠em dispela wok ol i bin mekim na ol i kalabus! Kwiktaim ol gad i go long tempel na holimpas ol aposel na bringim ol i kam long kot.​—⁠Aposel 5:​17-27.

 2. Ensel i tokim ol aposel long mekim wanem?

² Wanpela ensel i bin helpim ol aposel long lusim kalabus. Yu ting em i mekim olsem na bai ol man i no ken mekim nogut moa long ol? Nogat. Ol manmeri bilong Jerusalem i mas harim gutnius bilong Jisas Krais. Ensel i tokim ol aposel olsem ol i mas “autim tok long ol manmeri long olgeta pasin bilong dispela nupela laip.” (Aposel 5:​19, 20) Olsem na ol aposel i bihainim tok bilong ensel na mekim dispela wok i stap taim ol gad bilong tempel i kam painim ol.

3, 4. (a) Taim ol i tambuim Pita na Jon long autim tok, tupela i tok wanem? (b) Ol narapela aposel i tok wanem?

³ Tupela bilong ol dispela strongpela man bilong autim tok, em aposel Pita na aposel Jon, bipo ol i bin sanap long kot, olsem na nambawan jas, Josep Kaiafas, i tokaut strong long ol olsem: “Mipela i bin tambuim yupela tru long yupela i no ken autim tok long ol manmeri long nem bilong [Jisas]. Tasol yupela i wok yet long autim tok, na ol manmeri long olgeta hap bilong Jerusalem i harim pinis tok bilong yupela.” (Aposel 5:28) I no gat as long Kaiafas i kirap nogut long lukim Pita na Jon i sanap gen long kot. Taim em i tambuim tupela aposel long autim tok long namba wan taim, tupela i bekim tok olsem: “Yupela i ting wanem pasin i stret long ai bilong God? Mitupela i mas bihainim tok bilong God o mitupela i mas bihainim tok bilong yupela? Yupela yet i ken skelim. Tasol mitupela i no inap pasim maus. Mitupela i mas autim tok long olgeta samting mitupela i bin lukim na harim.” Olsem profet Jeremaia long bipo, Pita na Jon i no inap pasim maus​—⁠tupela i mas mekim wok bilong ol long autim tok.​—⁠Aposel 4:​18-20; Jeremaia 20:⁠9.

⁴ Tasol nau i no Pita na Jon tasol​—⁠olgeta aposel, wantaim nupela aposel ol i bin makim, em Matias​—⁠ol i gat rot long tokaut long tingting bilong ol long kot. (Aposel 1:​21-26) Taim kot i tambuim ol long autim tok, ol i bekim tok olsem: “Mipela i mas bihainim tok bilong God tasol. Mipela i no ken bihainim tok bilong ol man.”​—⁠Aposel 5:⁠29.

Bihainim Tok Bilong God o Tok Bilong Ol Man?

5, 6. Bilong wanem ol aposel i no bihainim tok bilong kot?

⁵ Ol aposel i save bihainim ol lo bilong gavman na em i no pasin bilong ol long sakim wanpela tok bilong kot. Tasol maski wanpela man i gat bikpela namba na strong, em i no gat rait long tokim narapela man long sakim wanpela tok bilong God. Jehova em i ‘God Antap Tru, na em i bosim olgeta hap bilong graun.’ (Song 83:18) Em i “Jas bilong olgeta graun” na em i Man Bilong Givim Lo, na King bilong oltaim oltaim. Sapos wanpela kot i putim lo i laik daunim tok bilong God, orait dispela lo i no gat strong long ai bilong God.​—⁠Stat 18:25; Aisaia 33:⁠22.

⁶ Sampela saveman bilong lo i wanbel long dispela samting. Olsem: William Blackstone, em i wanpela jas i bin stap olsem 200 yia i go pinis, em i tok lo bilong ol man i no ken sakim lo bilong Baibel. Olsem na kaunsil i kalapim lo taim ol i tambuim ol aposel long autim tok. Ol aposel i no inap bihainim dispela tok.

 7. Bilong wanem ol bikpris i belhat long wok bilong autim tok?

⁷ Ol aposel i strong long autim tok na dispela i mekim ol bikpris i belhat. Sampela pris​—⁠na Kaiafas yet​—⁠ol i bilong lain Sadyusi, na ol i no bilip long ol man i dai pinis bai kirap bek. (Aposel 4:​1, 2; 5:17) Tasol ol aposel i wok long tokaut strong olsem Jisas i kirap bek pinis long matmat. Na tu, sampela bikpris i bin wok strong tru long grisim ol bikman bilong Rom na bai ol i ken laikim ol. Taim Jisas i sanap long kot, ol pris i gat rot long orait long em olsem king bilong ol, tasol ol i singaut strong olsem: “Mipela i no gat narapela king. Sisar wanpela tasol!” (Jon 19:15)a Ol aposel i wok long tokaut olsem Jisas i kirap bek pinis, na i no dispela tasol; ol i skulim ol man olsem: “I no gat narapela man i inap kisim bek yumi. Nogat. Long nem bilong Jisas wanpela tasol yumi olgeta manmeri bilong graun inap i stap gut.” (Aposel 2:36; 4:12) Ol pris i ting olsem sapos ol man i kisim Jisas olsem Lida bilong ol, ol Rom bai kam na ‘bagarapim tempel bilong ol wantaim ol lain bilong ol.’​—⁠Jon 11:⁠48.

 8. Gamaliel i givim wanem gutpela savetok long ol kaunsil?

⁸ I luk olsem taim nogut i laik painim ol aposel bilong Jisas Krais. Ol jas bilong haus kot i strong long kilim ol i dai. (Aposel 5:33) Tasol narapela kain samting i kamap. Gamaliel, wanpela saveman bilong Lo, em i kirap sanap na i tokaut strong long ol wanwok kaunsil long ol i mas tingting gut pastaim. Em i givim gutpela savetok long ol olsem: “Sapos dispela wok ol i mekim em i kirap long tingting bilong ol man tasol, orait em bai i bagarap. Tasol sapos God yet i kirapim dispela wok, orait yupela bai i no inap pasim ol.” Na Gamaliel i tok moa olsem: “Nogut yupela i pait long God!”​—⁠Aposel 5:​34, 38, 39.

 9. Wanem samting i kamapim klia olsem God yet i bin kirapim wok bilong ol aposel?

⁹ Kot i orait long tok bilong Gamaliel. Ol kaunsil i “singautim ol aposel i kam, na ol i tokim ol man long wipim ol. Na ol i tambuim ol long ol i no ken autim tok moa long nem bilong Jisas. Na ol i lusim ol i go.” Tasol dispela i no pretim ol aposel. Ol i strong long bihainim tok bilong ensel long autim tok. So taim ol kaunsil i lusim ol i go, “long olgeta de, ol i save go long tempel na long ol haus bilong ol manmeri, na ol i wok long skulim ol manmeri. Ol i no lusim wok bilong autim gutnius . . . olsem, Jisas em i dispela man God i bin promis long salim i kam bilong kisim bek ol manmeri bilong en.” (Aposel 5:​40, 42) Jehova i mekim na wok bilong ol i kamap gutpela. Olsem na “tok bilong God i go nabaut long olgeta hap. Na planti manmeri moa i kamap disaipel long Jerusalem.” Na “planti pris tu ol i bihainim tok bilong God na ol i bilip.” (Aposel 6:⁠7) Man! Ating dispela i bagarapim tru bel bilong ol bikpris! Samting i wok long kamap klia em olsem: God yet i bin kirapim dispela wok bilong ol aposel!

Ol Man i Pait Long God Ol Bai Lus

10. Bilong wanem Kaiafas inap ting em bai stap strong long wok bilong em? Tasol bilong wanem na em i popaia tru?

¹⁰ Long taim bilong ol aposel, gavman Rom i save makim ol Juda long kamap hetpris. Valerius Gratus i bin makim maniman Josep Kaiafas long kamap hetpris, na em i holim wok hetpris inap planti yia, winim ol hetpris i bin kamap paslain long em. Kaiafas i gat save long toktok gut na em i pren bilong Pailat, na ating em i tingim olsem dispela i bin helpim em long holim wok bilong em, na i no olsem God i bin helpim em long mekim. Tasol maski em i gat wanem tingting, em i popaia tru long bilip long strong bilong ol man. Inap 3-pela yia tasol bihain long taim ol aposel i bin sanap long ai bilong kaunsil, ol bikman bilong Rom i no amamas moa long em na ol i rausim em long wok hetpris.

11. Wanem samting i painim Pontius Pailat na ol pasin na lo ol Juda i stap aninit long en? Yu kisim wanem tingting long dispela samting?

¹¹ Man i bin putim tok long rausim Kaiafas long wok hetpris, em bos bilong Pailat, nem bilong em Lukius Vitelius, em gavena bilong Siria. Pailat, em gutpela pren bilong Kaiafas, em i no inap pasim dispela samting. Inap wanpela yia tasol bihain long taim ol i rausim Kaiafas long wok hetpris, ol i rausim Pailat long wok bilong em na singautim em i go bek long Rom na kot long sampela bikpela rong ol i tok em i bin mekim. Ol Rom i kam na ‘bagarapim tempel na lain’ bilong ol bikman Juda em ol i bin bilip long Sisar. Dispela samting i kamap long yia 70 C.E., taim ol Rom i bagarapim tru taun Jerusalem wantaim tempel na haus kot bilong ol kaunsil. Tok bilong man bilong raitim song i kamap tru long ol, em i tok: “Ol king na ol man bilong graun i no inap kisim bek yu. Olsem na nogut yu bilip long ol.”​—⁠Jon 11:48; Song 146:⁠3.

12. Samting i bin painim Jisas, olsem wanem em i kamapim klia olsem em i savepasin long bihainim tok bilong God?

¹² Tasol God i makim Jisas Krais husat i kirap bek pinis, long kamap Hetpris bilong wanpela bikpela tempel spirit. I no gat wanpela man inap rausim em long dispela wok. Tru tumas, Jisas “i holim wok pris oltaim, na i no gat senis bilong en.” (Hibru 2:9; 7:​17, 24; 9:11) Na tu, God i bin makim Jisas olsem Jas bilong ol man i stap laip na ol man i dai pinis. (1 Pita 4:⁠5) Olsem na Jisas bai skelim olsem Josep Kaiafas na Pontius Pailat inap i stap laip gen long bihain o nogat.​—⁠Matyu 23:33; Aposel 24:⁠15.

Ol i No Pret Long Autim Tok Long Nau

13. Long taim bilong yumi, ol man i bin kirapim wanem wok? God i bin kirapim wanem wok? Yu save olsem wanem?

¹³ Olsem long taim bilong ol aposel, long nau i gat planti man i save “pait long God.” (Aposel 5:39) Olsem: Taim ol Witnes Bilong Jehova long Jemani i no laik litimapim nem bilong Adolf Hitler olsem Lida bilong ol, Hitler i tok tru antap olsem em bai bagarapim na pinisim lain bilong ol. (Matyu 23:10) Hitler i gat planti lain na ol samting bilong kilim i dai ol man, so i luk olsem em inap tru long pinisim ol Witnes. Tru, ol Natsi i bin holimpas planti tausen Witnes na salim ol i go long ol banis kalabus, na ol i bin kilim i dai sampela Witnes. Tasol ol Natsi i no inap daunim strongpela tingting bilong ol Witnes long lotuim God wanpela tasol, na ol i no bin pinisim lain wokman bilong God. Ol Kristen i bin kisim wok bilong ol long God yet​—⁠ol i no kisim long ol man​—⁠na i no gat wanpela man inap daunim wok bilong God. Inap 60 yia bihain, ol wokman bilong God em ol i bin abrusim bagarap long ol banis kalabus bilong Hitler, ol i mekim yet wok bilong Jehova long bel na tingting olgeta bilong ol. Tasol Hitler wantaim lain Natsi bilong em ol i no stap moa, na nem nogut ol i bin kisim, dispela tasol i stap yet.​—⁠Matyu 22:⁠37.

14. (a) Ol birua i bin mekim wanem bilong bagarapim nem bilong ol wokman bilong God? Wanem samting i kamap long dispela? (b) Yu ting dispela wok bilong ol birua bai nogutim lain bilong God i go inap oltaim oltaim? (Hibru 13:​5, 6)

¹⁴ Long ol yia bihain long dispela wok bilong Hitler, i gat sampela moa ol i bin pait long Jehova wantaim lain bilong em, tasol ol i lus long pait. Long planti kantri long Yurop, sampela lain bilong lotu na politik i wokim olkain pasin trik na sutim tok giaman long ol Witnes Bilong Jehova olsem ol i wanpela lotu nogut, wankain olsem tok ol i bin sutim long ol Kristen long taim bilong ol aposel. (Aposel 28:22) Tasol Yuropian Kot ov Human Raits i tokaut pinis olsem ol Witnes Bilong Jehova ol i no wanpela liklik lotu nating, nogat. Ol lain i birua long ol Witnes ol i mas save long dispela samting. Tasol ol i strong yet long sutim tok giaman na bagarapim nem bilong ol Witnes. Olsem na sampela kampani i rausim sampela Witnes long wok bilong ol. Long sampela skul ol i mekim nogut long ol pikinini Witnes. Na sampela papa bilong ol haus bung i pinisim kontrak ol i bin mekim wantaim ol Witnes long yusim ol haus bung long mekim ol miting, maski ol Witnes i bin yusim ol dispela haus inap planti yia pinis. Long wan wan taim, sampela lain bilong gavman i no larim sampela man i kamap olsem manmeri bilong wanpela kantri, long wanem, ol i Witnes Bilong Jehova! Tasol ol Witnes i strong yet long mekim wok bilong ol.

15, 16. Ol Witnes Bilong Jehova long Frans i bin mekim wanem long taim sampela lain i birua long wok Kristen bilong ol? Bilong wanem ol i wok yet long autim tok?

¹⁵ Long Frans ol man i save isi long ol man na ol i laikim ol samting i stret. Tasol wan wan birua i bin kamapim ol lo bilong bagarapim wok bilong Kingdom. Ol Witnes Bilong Jehova i bin mekim wanem long dispela? Ol i wok strong moa yet long autim tok long ol man na gutpela samting tru i kamap long en. (Jems 4:⁠7) Insait long 6-pela mun tasol, namba bilong ol Baibel stadi i go antap inap 33 pesen long dispela kantri! Ating Satan i belhat nogut tru long lukim ol man bilong Frans i gat gutpela bel ol i putim yau long harim gutnius. (KTH 12:17) Ol wanlain Kristen bilong yumi long Frans i bilip olsem tok bilong profet Aisaia bai kamap tru long ol: “I no gat wanpela bilong ol dispela samting bilong pait inap bagarapim yu. Na bai yu sanap strong na bekim tok bilong ol man i sutim ol kain kain tok long yu.”​—⁠Aisaia 54:⁠17.

¹⁶ Ol Witnes Bilong Jehova i no amamas long ol man i mekim nogut long ol. Tasol ol i bihainim tok God i bin givim long ol Kristen, olsem na ol i no inap pasim maus; ol i mas autim tok bilong ol samting ol i bin harim. Ol i wok strong long bihainim tok bilong gavman, tasol sapos lo bilong ol man i pait wantaim lo bilong God, ol i mas bihainim tok bilong God.

No Ken Pret Long Ol

¹⁷ Ol birua bilong yumi i mas lukaut. Ol i pait long God. Olsem na yumi no pret long ol, nogat. Tasol olsem Jisas i bin tokim yumi long mekim, yumi beten long God i ken marimari long ol man i mekim nogut long yumi. (Matyu 5:44) Yumi beten olsem, sapos sampela man i birua long God tasol ol i no bin kisim stretpela save​—⁠olsem Sol bilong Tarsus​—⁠Jehova i ken opim ai bilong ol na bai ol i ken save long tok i tru. (2 Korin 4:⁠4) Sol i kamap Kristen na kisim nem olsem aposel Pol, na ol bikman long taim bilong em i bin mekim nogut tru long em. Tasol em i tokim ol wanbilip bilong em long “ol i mas stap aninit long ol king na ol gavman, na ol i mas bihainim tok bilong ol. Na oltaim ol i mas redi long mekim olgeta kain gutpela wok. Ol i no ken tok nogut long wanpela man [ol i no ken tok nogut tu long ol man i birua long ol], na ol i no ken tok pait. Oltaim ol i mas stap isi tasol na mekim gutpela pasin long olgeta manmeri.” (Taitus 3:​1, 2) Ol Witnes Bilong Jehova long Frans na long ol narapela hap ol i wok strong long bihainim dispela tok.

¹⁸ God i tokim profet Jeremaia: “Mi stap wantaim yu na bai mi lukautim yu.” (Jeremaia 1:⁠8) Olsem wanem Jehova inap kisim bek yumi long ol lain i mekim nogut long yumi long nau? Em inap mekim na wanpela man i gat stretpela tingting em i mekim wok jas, kain olsem Gamaliel. O em inap mekim na bai ol i rausim wanpela bikman bilong gavman long wok bilong em na givim long narapela man i save isi long ol man. Tasol sampela taim Jehova inap larim ol man i mekim nogut long lain bilong em. (2 Timoti 3:12) Sapos God i larim ol man i mekim nogut long yumi, oltaim em bai strongim yumi long karim dispela hevi. (1 Korin 10:13) Na maski God i larim wanem ol hevi i painim yumi, yumi save pinis long samting bai kamap bihain: Ol man i pait long lain bilong God ol i pait long God yet, na ol bai lus long pait.

¹⁹ Jisas i bin tokim ol disaipel olsem ol hevi bai painim ol. (Jon 16:33) Olsem na tok bilong Aposel 5:29 i stret tru long taim bilong yumi, em i tok: ‘Mipela i mas bihainim tok bilong God tasol, bilong ol man, nogat.’ Long dispela as ol i bin makim ol dispela gutpela tok i stap olsem yiateks bilong ol Witnes Bilong Jehova bilong 2006. Em nau, long dispela yia na i go inap long olgeta taim bihain, yumi mas pasim tok long bel olsem yumi bai bihainim tok bilong God, maski wanem samting i kamap!

[Futnot]

Yu Inap Bekim?

• Taim birua i painim ol aposel, olsem wanem ol i stap olsem gutpela piksa yumi ken bihainim?

• Bilong wanem oltaim yumi mas bihainim tok bilong God, na tok bilong ol man nogat?

• Ol man i birua long yumi ol i pait long husat?

• Yumi ken ting wanem samting bai painim ol Kristen i sanap strong taim ol man i birua long ol?

17. (a) Bilong wanem yumi no ken pret long ol birua bilong yumi? (b) Yumi mas i gat wanem tingting long ol man i mekim nogut long yumi?

18. (a) Jehova inap kisim bek lain bilong em long wanem ol rot? (b) Wanem samting bai kamap bihain?

19. Wanem yiateks bilong 2006? Bilong wanem em i stret tru long nau?

[Rait long pes 23]

Yiateks bilong 2006 bai i olsem: ‘Mipela i mas bihainim tok bilong God tasol, bilong ol man, nogat.’​—⁠Aposel 5:⁠29

[Piksa long pes 19]

‘Mipela i mas bihainim tok bilong God tasol, bilong ol man, nogat’

[Piksa long pes 21]

Kaiafas i bilip long strong bilong ol man, em i no bilip long strong bilong God