Long Wanem Em i Beten

LONG 1 Tesalonaika 5:​17, 18, aposel Pol i tok: “Yupela i mas beten oltaim. Maski wanem samting i kamap long yupela, yupela i mas tenkyu long God. God i laik bai yupela ol manmeri i pas wantaim Krais Jisas i mas mekim dispela kain pasin.” Tasol olsem wanem sapos yu stap long ai bilong planti man, olsem long wanpela haus kaikai samting? Yu sem long beten na tok tenkyu long God? Tru yumi tingim tok bilong Jisas na yumi no laik beten long ai bilong ol man bambai ol i ken lukim yumi. (Matyu 6⁠:​5, 6) Tasol sapos yumi bihainim gutpela tingting na yumi beten long kain taim olsem na wanpela man i lukim yumi, dispela inap kirapim tingting bilong em.

Kain samting olsem i bin kamap long wanpela yangpela brata i wok long Betel long Bruklin, em hetkota bilong ol Witnes Bilong Jehova. Long wanpela moningtaim em i laik i go bung wantaim wanpela grup bilong kongrigesen bilong em na autim tok bilong Kingdom, tasol pastaim em i go long wanpela haus kaikai bilong kisim kaikai. Taim kaikai i redi na wokmeri bilong haus kaikai i kisim i kam long tebol, brata i beten pastaim olsem em i save mekim long olgeta taim. Taim em i opim ai, em i lukim dispela wokmeri i sanap klostu na i lukluk long em.

Wokmeri i tok: “Yu beten, a?” Brata i tok: “Em i stret.” Na wokmeri i tok: “Ating yu wanpela Witnes Bilong Jehova. Papamama bilong mi tu ol i Witnes. Mi no bihainim lotu bilong ol, tasol mi save mi mas bihainim. Ating mi mas kisim sabskripsen bilong Kirap! na Wastaua. Olsem wanem? Mi ken kisim long yu?”

Yangpela brata i tok: “Mi kirap nogut tru na klostu kaikai i pasim win bilong mi.” Tasol em i tilim tupela sabskripsen na tupela nupela magasin long dispela meri na em i stretim tok long i go bek lukim em gen. Dispela gutpela samting i bin kamap, long wanem em i beten.