Was Gut Long Bel Bilong Yu
“Gutpela tingting bilong stiaim laip bilong yu, em i save kamap long tingting bilong yu, . . . olsem na olgeta taim yu mas was gut tru long tingting [olsem bel ] bilong yu.”—SINDAUN 4:23.
1, 2. Bilong wanem yumi mas was gut long bel bilong yumi?
BIKPELA win na ren i kamap long wanpela ailan long hap bilong Karibian. Taim bikpela win i dai, wanpela lapun man i lusim ples hait bilong em. Taim em i skelim ol samting i bagarap pinis, em i lukim olsem wanpela traipela diwai i pundaun. Inap planti yia dispela diwai i bin sanap klostu long haus bilong em. Em i tingting planti. ‘Olsem wanem na dispela diwai i pundaun, tasol ol liklik diwai i stap klostu, nogat?’ Taim em i lukim as bilong diwai, nau em i save. Diwai i bin luk olsem em i sanap strong, tasol bel bilong en i sting pinis. Em nau, bikpela win i kamapim long ples klia dispela samting.
2 Yumi sori tru long lukim wanpela man i lotu tru long God na i luk olsem em i sanap strong long pasin Kristen, tasol taim samting i kamap bilong traim bilip bilong em, em i pundaun. Baibel i tok tru, “stat long taim ol manmeri i yangpela yet ol i save tingting long mekim ol pasin nogut.” (Stat 8:21) Dispela i makim olsem, maski yumi gat gutpela bel, sapos yumi no was gut oltaim, sampela samting inap kirapim bel bilong yumi long mekim rong. Yumi olgeta i sinman tasol, olsem na yumi no ken ting ol laik na tingting nogut i no inap kamap long bel bilong yumi. Olsem na yumi mas tingim gut dispela tok: “Olgeta taim yu mas was gut tru long tingting [olsem bel] bilong yu.” (Sindaun 4:23) Orait yumi ken mekim wanem bilong was gut long bel bilong yumi?
Oltaim Skelim Bel
3, 4. (a) Yumi ken mekim wanem ol askim long klok i stap long bel? (b) Wanem samting bai helpim yumi long skelim bel bilong yumi?
3 Taim yu go lukim dokta, em i save skelim klok i stap long bel bilong yu. Em i laik save, kaikai yu kisim i givim strong long klok? Olsem wanem long mak bilong blut? Klok i wok gut o nogat? Yu save eksasais? Yu save tingting planti tumas long ol samting na dispela i givim hatwok long klok?
4 Sapos oltaim dokta i mas skelim klok, orait olsem wanem long bel bilong yumi? Jehova yet i save skelim. (1 Stori 29:17) Yumi tu i mas mekim olsem. Yumi ken mekim olsem wanem? Long rot bilong kamapim sampela askim, olsem: Bel bilong mi i save kisim planti kaikai bilong spirit long rot bilong stadi oltaim na go long ol miting? (Song 1:1, 2; Hibru 10:24, 25) Tok bilong Jehova i bikpela samting long bel bilong mi olsem wanpela “paia i lait insait long ol bun,” na i kirapim mi long autim tok bilong Kingdom na kamapim ol disaipel? (Jeremaia 20:9; Matyu 28:19, 20; Rom 1:15, 16) Bel i kirapim mi long taitim bun tru, olsem wok fultaim long autim tok taim mi gat rot? (Luk 13:24) Mi save bung wantaim wanem kain man? Mi save poroman wantaim ol man i givim bel olgeta long lotu tru long God? (Sindaun 13:20; 1 Korin 15:33) Sapos i gat sampela samting yumi no strong tumas long en, orait kwiktaim yumi mas luksave long en na stretim hariap.
5. Ol samting i kamap bilong traim bilip bilong yumi, dispela inap mekim wanem wok?
5 Planti taim ol samting i save kamap bilong traim bilip bilong yumi. Ol dispela traim i givim rot long yumi long luksave olsem bel bilong yumi i stap olsem wanem. Taim ol Israel i laik go insait long Graun Bilong Promis, Moses i tokim ol: “Yupela i bin raun long ples wesan nating inap 40 yia. Na God i bin salim sampela hevi bilong traim yupela, bai em i ken save, yupela inap bihainim olgeta lo bilong em o nogat.” (Lo 8:2) Taim ol traim i kamap, o sampela hevi i kamap long wanpela taim yumi no tingim, ating yumi kirap nogut tru long ol tingting na laik na pasin ol dispela hevi i kamapim long bel bilong yumi, a? Ol hevi Jehova i larim i kamap i helpim yumi long luksave long ol pasin kranki bilong yumi na i givim rot long yumi long stretim. (Jems 1:2-4) Taim hevi i painim yumi, long pasin bilong beten yumi mas tingim ol samting dispela hevi i kirapim yumi long mekim!
Toktok i Kamapim Wanem Samting?
6. Ol samting yumi laik stori long en inap kamapim wanem samting bilong bel bilong yumi?
6 Olsem wanem yumi inap save long ol tingting i stap long bel bilong yumi? Jisas i tok: “Gutpela man i gat planti gutpela tingting i stap long bel bilong en. Olsem na em i save mekim gutpela pasin. Man nogut em i gat planti tingting nogut i stap long bel bilong en. Olsem na em i save mekim pasin nogut. Kain tingting i pulap long bel, em maus i save autim.” (Luk 6:45) Samting yumi save toktok long en i save kamapim ol samting bel i gat laik long mekim. Olsem wanem? Planti taim yumi save toktok long ol samting bilong skin na ol wok bilong graun yumi mekim? O yumi save toktok long ol samting bilong spirit na ol wok bilong God yumi laik mekim? Yumi save tokaut long ol popaia bilong ol narapela, o yumi mekim pasin sori na karamapim ol dispela popaia bilong ol? (Sindaun 10:11, 12) Planti taim yumi stori stori long ol narapela na ol samting i kamap long i stap bilong ol, na yumi no toktok tumas long ol samting bilong spirit na ol stretpela pasin? Sapos olsem, ating dispela inap makim olsem yumi gat bikpela laik tumas long save long ol samting bilong ol narapela, a?—1 Pita 4:15.
7. Samting 10-pela brata bilong Josep i mekim i givim wanem save long yumi long pasin bilong was gut long bel?
7 Tingim samting i bin kamap long wanpela bikpela famili. Tenpela pikinini man bilong Jekop i “no save mekim gutpela toktok” long liklik brata bilong ol, Josep. Bilong wanem? Long wanem, ol i lukim papa i laikim tru Josep, olsem na ol i bel nogut long em. Bihain, taim God i givim sampela driman long Josep na dispela i kamapim klia olsem Jehova i laikim em, “bel bilong ol i nogut moa yet.” (Stat 37:4, 5, 11) Ol i mekim pasin nogut na salim brata bilong ol long sampela lain na ol i baim em olsem wokboi nating. Bilong haitim rong bilong ol, ol i giamanim papa bilong ol na bai em i ting wanpela animal bilong bus i bin kilim i dai Josep. Em nau, long dispela taim ol tenpela brata bilong Josep ol i no was gut long bel bilong ol. Sapos oltaim yumi save sutim tok long pasin bilong ol narapela, ating dispela inap kamapim klia olsem pasin jeles o bel kaskas i stap long bel bilong yumi, a? Yumi mas skelim gut toktok bilong yumi na kwiktaim rausim ol tingting nogut i stap long bel.
8. Sapos yumi pundaun na mekim tok giaman, wanem samting bai helpim yumi long skelim bel bilong yumi?
8 “God i no inap tru long giaman,” tasol ol man bilong graun inap long giaman. (Hibru 6:18) Man bilong raitim Song i tok: “Mi no ken bilip long wanpela man.” (Song 116:11) Aposel Pita tu—3-pela taim em i giaman na tok em i no save long Jisas. (Matyu 26:69-75) Olsem na yumi mas was gut, nogut yumi giaman, long wanem, Jehova i no laikim tru “pasin bilong mekim tok giaman.” (Sindaun 6:16-19) Sapos yumi pundaun na mekim wanpela tok giaman, i gutpela sapos yumi skelim samting i bin kirapim yumi long mekim dispela tok giaman. Ating yumi pret long ol man? O yumi pret long kisim strafe? O ating yumi no laik bai gutnem bilong yumi i bagarap o yumi tingim tumas yumi yet? I gutpela sapos yumi tingim dispela samting yumi bin mekim, na long pasin daun tokaut long dispela, na beten askim Jehova long lusim rong bilong yumi, na askim em long helpim yumi na bai yumi no pundaun gen olsem! Ating ol elda bilong kongrigesen inap helpim gut yumi long dispela samting.—Jems 5:14.
9. Ol beten bilong yumi inap kamapim wanem tingting i stap long bel?
9 Taim yangpela King Solomon i askim Jehova long givim gutpela tingting na save long em, Jehova i tok: “Askim bilong yu i gutpela tumas. Yu no bin askim mi long planti mani samting o long kisim biknem, . . . olsem na nau bai mi givim yu planti gutpela tingting na save. Na tu bai mi givim yu planti mani samting na bai mi mekim ol manmeri i givim biknem long yu.” (2 Stori 1:11, 12) Ol samting Solomon i bin askim Jehova long en na ol samting em i no bin askim long en, dispela i mekim na Jehova i save long samting Solomon i laikim tru. Taim yumi beten long God, toktok bilong yumi i kamapim wanem samting bilong bel bilong yumi? Ol beten bilong yumi i kamapim long ples klia olsem yumi gat bikpela laik long kisim save, na gutpela tingting, na pasin bilong skelim gut ol samting? (Sindaun 2:1-6; Matyu 5:3) Yumi tingim ol wok bilong Kingdom? (Matyu 6:9, 10) Taim yumi beten, sapos yumi kolim nating ol wankain tok tasol, dispela inap makim olsem yumi mas lusim hap taim long tingim gut long bel ol gutpela samting Jehova i bin mekim. (Song 103:2) Olgeta Kristen i mas redi long luksave olsem beten bilong ol i save kamapim wanem samting i stap long bel.
Ol Samting Yumi Mekim
10, 11. (a) Pasin bilong bagarapim marit na pamuk i kirap long we? (b) Yumi ken mekim wanem na bai yumi no ‘mekim pasin pamuk long bel bilong yumi’?
10 Samting yumi mekim, dispela i save kamapim ol pasin tru bilong yumi, winim toktok bilong yumi. Olsem: Bilong was gut long bel, yumi no ken pamuk o bagarapim marit, tasol i no dispela samting tasol. Long bikpela tok Jisas i mekim antap long maunten, em i tok: “Sapos wanpela man i lukim wanpela meri na i gat mangal nogut long em, dispela man i mekim pasin pamuk pinis long bel bilong em.” (Matyu 5:28) Yumi ken mekim wanem na bai yumi no mekim pasin pamuk long bel bilong yumi?
11 Gutpela man Jop i stap olsem gutpela piksa long pasin ol man na meri Kristen i marit pinis ol i ken bihainim. Tru, sampela taim ating i gat sampela wok Jop i mas mekim wantaim ol yangpela meri, na em i helpim ol tu taim ol i gat hevi. Tasol em i no tingting liklik long mangal long ol, nogat tru. Bilong wanem? Long wanem, em i tok: “Mi bin mekim strongpela promis pinis olsem, mi no ken aigris long ol meri.” (Jop 31:1) Yumi tu i mas mekim strongpela tok promis olsem, na was gut long bel bilong yumi.
12. Bilong was gut long bel bilong yu, olsem wanem yu ken bihainim tok bilong Luk 16:10?
12 Pikinini bilong God i tok: “Sapos wanpela man i save lukaut gut long ol liklik samting, orait em bai i lukaut gut long ol bikpela samting tu. Na man i save mekim pasin i no stret long ol liklik samting, em bai i mekim pasin i no stret long ol bikpela samting tu.” (Luk 16:10) Tru tumas, yumi mas skelim pasin bilong yumi long ol liklik samting i save kamap long olgeta de, na ol samting i kamap insait long haus bilong yumi yet. (Song 101:2) Taim yumi stap long haus na lukim televisen o mekim wok long Intenet, yumi mas bihainim dispela tok bilong Baibel: “Yupela i no ken mekim pasin pamuk na olgeta kain pasin doti, na yupela i no ken mangalim ol samting bilong ol arapela. Tok bilong ol dispela pasin tu i no ken kamap liklik namel long yupela.” (Efesus 5:3, 4) Na olsem wanem long pasin bilong pait i save kamap long televisen o ol video-gem? Man bilong raitim Song i tok: “Jehova yet i save skelim ol stretpela man na ol man nogut. Na em i no laikim tru ol man i laikim pasin pait.”—Song 11:5, NW.
13. Taim yumi skelim ol tingting i stap long bel, yumi mas tingim wanem samting?
13 Jeremaia i tok: “Bel bilong olgeta man i save tingting oltaim long mekim pasin giaman. Tingting bilong man em i nogut tru.” (Jeremaia 17:9) Sampela taim dispela pasin olsem bel i save giaman em i kamap ples klia olsem: Yumi tok sampela samting i kirapim yumi long mekim dispela rong, o ol pasin kranki bilong yumi i no bikpela samting tumas, o i no asua bilong yumi na yumi gat ol bikpela pasin kranki, o yumi bilasim ol tok taim yumi stori long ol samting yumi bin mekim. Na bel i save giaman em inap mekim na yumi kisim pasin bilong tupela maus—yumi kirap mekim pasin i narapela kain long tok bilong yumi. (Song 12:2; Sindaun 23:7) Olsem na taim yumi skelim ol tingting i stap long bel, nogut yumi giamanim yumi yet!
Ai Bilong Yumi i Gutpela?
14, 15. (a) Ai i “gutpela,” em i makim wanem samting? (b) Sapos ai i gutpela, olsem wanem dispela inap helpim yumi long was gut long bel?
14 Jisas i tok: “Ai em i lam bilong bodi. Sapos ai bilong yu i gutpela, orait lait bai i pulap long olgeta hap bodi bilong yu.” (Matyu 6:22) Ai i gutpela em i save lukluk i go stret long wanpela samting tasol, na i no larim narapela samting i pulim ai. Ai bilong yumi i mas lukluk i go long “painim kingdom bilong God wantaim stretpela pasin bilong em.” (Matyu 6:33, Nupela Testamen na Ol Sam) Sapos yumi no was gut na ai bilong yumi i no stap gutpela, dispela bai mekim wanem long bel bilong yumi?
15 Tingim samting bilong wok mani. Ol Kristen i mas lukautim famili bilong ol long ol samting bilong skin. (1 Timoti 5:8) Tasol olsem wanem sapos bel i skrap long kisim ol nupela nupela samting, na ol samting i gutpela tru—gutpela kaikai, klos i gat stail, bikpela haus, na kain samting olsem? Ating dispela inap mekim na bel na tingting i pas strong long dispela samting tasol, na nau yumi givim hap bel tasol long lotuim God, a? (Song 119:113; Rom 16:18) Nogut yumi tingting strong tumas long painim ol samting bilong skin yumi mas kisim na nau yumi tingting tasol long famili, na wok mani, na mani kago samting. Tingim dispela gutpela tok: “Yupela lukaut gut. Nogut yupela i dring nabaut oltaim na yupela i spak. Na nogut yupela i wari long ol samting bilong bodi. Sapos kain pasin olsem i daunim yupela, orait dispela de bilong Bikpela bai i kamap long yupela wantu tasol, olsem umben i save holimpas abus.”—Luk 21:34, 35.
16. Jisas i givim wanem tok long yumi long ol samting bilong ai? Bilong wanem em i mekim olsem?
16 Ai em i wanpela bikpela rot bilong salim tok i go long tingting na bel. Samting ai i lukluk i go long en em inap stiaim tingting, na ol samting yumi pilim long bel, na ol samting yumi mekim. Jisas i mekim tok piksa long ai na em i tok: “Sapos ai long han sut bilong yu i pulim yu long mekim sin, orait yu mas kamautim na tromoi. Mobeta wanpela hap bodi bilong yu i lus na yu no mekim sin, na bai ol i no tromoi bodi bilong yu olgeta i go long hel [“Gehena,” NW ].” (Matyu 5:29) Yumi mas bosim gut ai na bai em i no ken lukluk i go long ol samting i no stret long lukim. Olsem: Yumi no ken larim ai i lukluk i go long ol samting i gat wok long kirapim ol laik nogut long bel long mekim pasin pamuk.
17. Taim yumi bihainim tok bilong Kolosi 3:5, olsem wanem dispela i helpim yumi long was gut long bel?
17 Tasol pasin bilong lukim ol samting, i no dispela samting tasol inap stiaim bel na tingting. Pasin bilong pilim samting yumi holim, na pasin bilong harim, em tu inap stiaim bel na tingting, olsem na yumi mas was gut long han na yau. Aposel Pol i tok: “Yupela i mas kilim i dai . . . olkain pasin olsem, pasin pamuk na pasin doti, na pasin bilong bel i kirap long mekim ol pasin nogut, na pasin bilong mangal long ol samting bilong narapela man.”—Kolosi 3:5.
18. Yumi mas mekim wanem sapos sampela tingting nogut i kamap long bel?
18 Laik nogut inap kirap long tingting bilong yumi. Sapos yumi wok long tingim tingim, dispela laik nogut inap kamap strong tru na stiaim bel bilong yumi. ‘Bihain, dispela pasin bilong laik nogut i save kamapim sin.’ (Jems 1:14, 15) Planti ol i tokaut olsem, long dispela rot yet, laik nogut i bin kirapim ol long pilai long sem bilong ol. Olsem na em i bikpela samting tru long yumi mas wok long tingim ol samting bilong spirit! (Filipai 4:8) Na sapos wanpela laik nogut i kamap long tingting, yumi mas wok strong long rausim.
Givim Bel Long Wok Bilong Jehova
19, 20. Yumi mas mekim wanem bambai yumi inap givim bel olgeta long mekim wok bilong Jehova?
19 Taim King Devit i lapun pinis, em i tokim pikinini bilong em: “Solomon, pikinini bilong mi, mi tok strong long yu olsem. Yu mas i gat wanpela tingting tasol, em long i stap aninit long God bilong papa bilong yu. Na yu mas wok strong tru [olsem givim bel olgeta] long bihainim laik bilong em. Yu mas mekim olsem, long wanem, Bikpela i save long olgeta tingting na laik bilong yumi.” (1 Stori 28:9) Solomon yet i beten askim God long givim em “gutpela bel i save bihainim tok.” (1 King 3:9, NW ) Tasol i go inap long taim em i dai, ol samting i kamap bilong traim pasin bilong em long holimpas kain gutpela bel olsem.
20 Bilong givim bel olgeta long mekim wok bilong Jehova, yumi mas kisim gutpela bel Jehova i laikim, na tu, yumi mas was gut long en. Bilong mekim olsem, yumi mas holimpas ol tok bilong God long bel bilong yumi—olsem “putim gut long tingting.” (Sindaun 4:20-22) Na tu, yumi mas kisim pasin bilong skelim bel bilong yumi—long pasin bilong beten yumi mas tingim ol toktok na ol samting yumi mekim, em i kamapim olsem yumi wanem kain man. Tasol olsem wanem dispela pasin bilong skelim bel inap helpim yumi sapos yumi no beten strong na askim Jehova long helpim yumi long stretim? Na yumi mas was gut long ol samting yumi lukim na harim! Taim yumi mekim olsem, yumi ken bilip tru olsem ‘bel isi God i save givim yumi, em bai i mekim bel na tingting bilong yumi i stap gut tru.’ (Filipai 4:6, 7) Em nau, yumi mas tingting strong long was gut tru long bel bilong yumi, winim ol narapela samting yumi mas was gut long en, na givim bel olgeta long mekim wok bilong Jehova.
Yu Inap Tingim?
• Bilong wanem yumi mas was gut long bel?
• Pasin bilong skelim ol tok yumi mekim, olsem wanem dispela inap helpim yumi long was gut long bel?
• I gat wanem as na ai bilong yumi i mas “gutpela”?
[Ol Piksa long pes 23]
Taim yumi stap long wok autim tok, na ol miting, na haus, yumi save toktok long wanem kain samting?
[Ol Piksa long pes 25]
Ai i gutpela i no save lukluk i go long ol narapela samting