“Krais i Kamapim Ples Klia Strong Bilong God”

1-3. (a) Wanem samting nogut i painim ol disaipel long Raunwara Galili? Jisas i mekim wanem? (b) Bilong wanem i stret Pol i tok olsem “Krais i kamapim ples klia strong bilong God”?

OL DISAIPEL i pret nogut tru. Ol i raun long Raunwara Galili taim strongpela win i kirap wantu tasol. Ating ol i bin lukim bipo ol strongpela win i kamap long dispela raunwara, long wanem, sampela bilong ol dispela man ol i man bilong kisim pis.a (Matyu 4:18, 19) Tasol dispela em i “traipela win,” na kwiktaim em i mekim na biksi i kirap. Ol man i wok strong bilong stiaim bot, tasol win i strong tumas. “Biksi i wok long sakim strong bot,” na wara i kirap long pulimapim bot. Maski planti pairap samting i wok long kamap, Jisas i slip i dai long baksait bilong bot, de olgeta em i bin skulim ol lain man na em i taiet tru. Ol disaipel i pret, nogut laip bilong ol i lus, olsem na ol i kirapim Jisas na tok: “Bikpela, seivim mipela, klostu bai mipela i dai!”​—Mak 4:35-38; Matyu 8:23-25.

² Jisas i no pret. Em i tokim win na raunwara olsem: “Inap nau! No ken pairap!” Wantu tasol win na raunwara i bihainim tok—strongpela win i pinis, biksi i dai, na “raunwara i stap isi tru.” Nau ol disaipel i pret nogut tru. Ol i tok: “Dispela man em i husat tru?” Tru tumas, wanem kain man inap krosim win na raunwara kain olsem em i krosim wanpela pikinini i bikhet?​—Mak 4:39-41; Matyu 8:26, 27.

³ Tasol Jisas i no wanpela man nating. Strong bilong Jehova i mekim bikpela samting tru long Jisas na i mekim ol narakain samting long rot bilong em. I stret aposel Pol i tok olsem “Krais i kamapim ples klia strong bilong God.” (1 Korin 1:24) Olsem wanem strong bilong God i kamap ples klia long rot bilong Jisas? Na ol samting Jisas i mekim long rot bilong dispela strong inap mekim wanem long laip bilong yumi?

4, 5. (a) Jehova i givim wanem strong na namba long dispela wanpela Pikinini tru bilong em? (b) Pikinini i kisim wanem helpim bilong wokim ol samting Papa i tingting pinis long kamapim?

⁴ Tingim strong Jisas i holim taim em i no kam daun yet long graun. Jehova i yusim “bikpela strong bilong em i stap oltaim” taim em i wokim dispela wanpela Pikinini tru bilong em, bihain ol i kolim em Jisas Krais. (Rom 1:20; Kolosi 1:15) Bihain, Jehova i givim bikpela strong na namba long dispela Pikinini, na i makim em long wokim ol samting Em i tingting pinis long kamapim. Baibel i tok long dispela Pikinini olsem: “Olgeta samting i kamap long rot bilong em, na i no gat wanpela samting i bin kamap long narapela rot.”​—Jon 1:3.

⁵ Yumi hatwok long kliagut long dispela wok i bikpela olsem wanem. Tingim bikpela strong dispela Pikinini i mas i gat bilong wokim planti milion strongpela ensel, ples antap wantaim planti bilion galaksi, na graun wantaim kain kain samting i gat laip. Bilong mekim dispela wok, dispela wanpela Pikinini tru inap mekim wok long nambawan bikpela strong long heven na graun—em holi spirit bilong God. Dispela Pikinini i amamas long stap olsem Saveman Bilong Wok em Jehova i yusim em bilong wokim olgeta narapela samting.​—Provep 8:22-31.

 6. Bihain long Jisas i dai na kirap bek, em i bin kisim wanem strong na namba?

⁶ Olsem wanem? Dispela wanpela Pikinini tru inap kisim bikpela strong na namba i antap moa? Bihain long taim Jisas i dai na kirap bek, em i tok: “God i givim mi namba long bosim olgeta samting long heven na long graun.” (Matyu 28:18) Yes, Jisas i bin kisim strong na rait bilong bosim heven na graun. Em i “King bilong olgeta king na Bikpela bilong olgeta bikpela,” na em i bin kisim namba long “pinisim olgeta gavman na olgeta wok bos na olgeta samting i gat strong”—ol samting yumi inap lukim na ol samting yumi no inap lukim—em ol i birua long Papa. (Revelesen 19:16; 1 Korin 15:24-26) God i “no larim wanpela samting i stap nating na i no aninit long” Jisas—Jehova wanpela tasol i no stap aninit long em.​—Hibru 2:8; 1 Korin 15:27.

 7. Bilong wanem yumi ken save olsem Jisas bai no inap tru long mekim wok nogut long strong Jehova i bin givim long em?

⁷ Olsem wanem? Yumi gat wok long tingting planti, nogut Jisas i mekim wok nogut long strong bilong em? Nogat tru! Jisas i laikim tru Papa bilong em na em bai no mekim wanpela samting Papa i no laikim. (Jon 8:29; 14:31) Jisas i save tru olsem Jehova i no inap tru long mekim wok nogut long bikpela strong bilong Em. Jisas i bin lukim olsem Jehova i painim rot bilong “soim strong bilong em long helpim ol man husat i givim bel olgeta long em.” (2 Stori 16:9) Tru tumas, Jisas i laikim tru ol manmeri olsem Papa bilong em i save laikim ol, olsem na yumi ken bilip tru olsem oltaim Jisas bai mekim wok long strong bilong em bilong kamapim ol gutpela samting. (Jon 13:1) Jisas i gat nem long mekim kain gutpela pasin olsem. Nau yumi ken tingim strong em i holim taim em i stap long graun na olsem wanem em i kamapim dispela strong.

 8. Bihain long God i makim Jisas long holi spirit, em i kisim strong bilong mekim wanem? Jisas i bihainim wanem pasin taim em i mekim wok long strong bilong em?

⁸ Jisas i no wokim ol mirakel taim em i liklik mangi i wok long kamap bikpela long Nasaret. Tasol dispela samting i senis bihain long em i kisim baptais long 29 C.E., taim em i gat 30 krismas. (Luk 3:21-23) Baibel i tok: “God i bin makim em long holi spirit na givim strong long em, na em i go long olgeta ples na mekim gut long ol man na oraitim olgeta man em Devil i daunim ol.” (Aposel 10:38) “Mekim gut long ol man”—dispela i makim olsem Jisas i bihainim stretpela pasin long mekim wok long strong bilong em, a? Bihain long God i makim em long holi spirit, em i kamap “wanpela profet i mekim ol strongpela wok na ol strongpela tok.”​—Luk 24:19.

9-11. (a) Planti taim Jisas i lainim ol man long wanem ol hap? Wanem samting inap givim hatwok long Jisas? (b) Bilong wanem ol manmeri i kirap nogut long pasin bilong Jisas long lainim ol?

⁹ Olsem wanem Jisas i mekim strongpela tok? Planti taim em i stap ausait na skulim ol manmeri—klostu long ol raunwara na ol maunten, na long ol rot na long ol ples bung long maket. (Mak 6:53-56; Luk 5:1-3; 13:26) Ol manmeri i harim tok bilong em ol inap lusim dispela hap sapos tok bilong em i no kirapim tingting bilong ol. Long dispela taim i no gat ol buk, olsem na ol man i amamas long harim tok bilong em, ol i mas putim tok em i autim long tingting na bel bilong ol. Long dispela as, tok bilong Jisas i mas kirapim tru tingting bilong ol, tok i mas klia, na i no hatwok long ol man i tingim. Tasol dispela i no putim hevi long Jisas. Tingim tok bilong em antap long maunten.

¹⁰ Long wanpela moning long kirap bilong 31 C.E., bikpela lain manmeri i bung long maunten klostu long Raunwara Galili. Sampela i bin kam long Judia na Jerusalem, em longwe long dispela hap inap 100 i go 110 kilomita. Sampela narapela i bin kam long hap bilong nambis bilong Tair na Saidon, long hap not. Planti sikman i go klostu long Jisas na i putim han long em, na em i oraitim olgeta dispela man. Taim i no gat moa wanpela man i gat bikpela sik, em i kirap skulim ol. (Luk 6:17-19) Bihain, taim em i pinis long toktok, ol i kirap nogut long ol samting ol i bin harim. Bilong wanem?

¹¹ Sampela yia bihain, wanpela man i bin harim dispela tok long maunten, i tok: “Bikpela lain manmeri i kirap nogut long pasin bilong em long skulim ol man. Long wanem, em i skulim ol olsem man em God i givim namba long em.” (Matyu 7:28, 29) Tok bilong Jisas i gat strong em ol man inap pilim. Em i kamapim tok bilong God olsem mausman bilong em na i strongim tok bilong em long rot bilong Tok Bilong God. (Jon 7:16) Tok bilong Jisas i klia, na i pulim tingting bilong ol man, na ol man i no inap kamapim sampela tok i daunim tok bilong em. Tok bilong em i kamapim klia wanem as bilong ol hevi, na i go daun long bel bilong ol man. Em i lainim ol long rot bilong painim amamas, pasin bilong beten, pasin bilong painim Kingdom Bilong God, na rot bilong kisim gutpela sindaun long bihain. (Matyu 5:3–7:27) Tok bilong em i kirapim bel bilong ol man i hangre long tok i tru na stretpela pasin. Ol kain man olsem ol i redi long “givim baksait” long ol laik bilong ol yet na lusim olgeta samting bilong bihainim em. (Matyu 16:24; Luk 5:10, 11) Dispela i kamapim klia olsem tok bilong Jisas i gat strong!

12, 13. Olsem wanem Jisas i “mekim ol strongpela wok”? Em i wokim wanem kain ol mirakel?

¹² Jisas i “mekim ol strongpela wok” tu. (Luk 24:19) Ol Gutnius i stori long winim 30 mirakel Jisas i bin wokim—em i wokim olgeta long “strong bilong Jehova.”b (Luk 5:17) Ol mirakel bilong Jisas i mekim bikpela samting long laip bilong planti tausen man. Tingim tupela mirakel tasol—em i givim kaikai long 5,000 man na bihain long 4,000 man. Na ol meri na ol pikinini wantaim, namba bilong olgeta yet em planti tausen!​—Matyu 14:13-21; 15:32-38.

¹³ Jisas i wokim kain kain mirakel. Em i gat namba long bosim ol spirit nogut, em i no hatwok long rausim ol. (Luk 9:37-43) Em i gat strong long bosim wara na win samting, em i tanim wara i kamap wain. (Jon 2:1-11) Piksaim long tingting hau ol disaipel i kirap nogut taim “ol i lukim Jisas i wokabaut antap long raunwara.” (Jon 6:18, 19) Em i gat strong long daunim ol sik, em inap oraitim ol bagarap bilong skin, ol bikpela sik, na ol sik inap kilim man i dai. (Mak 3:1-5; Jon 4:46-54) Em i oraitim ol sik long kain kain rot. Em i oraitim sampela man taim em i stap longwe, tasol bilong oraitim sampela em i putim han bilong em long ol. (Matyu 8:2, 3, 5-13) Sampela i kamap orait wantu tasol, sampela i kamap orait isi isi.​—Mak 8:22-25; Luk 8:43, 44.

14. Wanem samting i kamap na Jisas i soim olsem em i gat strong long kirapim bek man i dai pinis?

¹⁴ Wanpela bikpela samting tru em Jisas i gat strong long kirapim bek ol man i dai pinis. Baibel i stori long tripela taim Jisas i bin mekim olsem. Long rot bilong kirap bek em i givim wanpela pikinini meri i gat 12-pela krismas i go bek long papamama bilong em, wanpela pikinini i go bek long wido mama i no gat narapela pikinini, na gutpela brata i go bek long ol susa bilong em. (Luk 7:11-15; 8:49-56; Jon 11:38-44) I no gat wanpela samting i mekim na Jisas i hatwok tumas long wokim mirakel. Em i kirapim bek pikinini meri i gat 12-pela krismas long bet bilong em bihain liklik long em i dai. Em i kirapim bek pikinini man bilong wido meri long bet bilong karim daiman, ating long dispela de pikinini i bin dai. Na em i kirapim bek Lasarus long matmat bihain long em i bin stap long matmat inap 4-pela de.

15, 16. Wanem samting i kamapim klia olsem Jisas i no tingim em yet taim em i yusim strong bilong em?

¹⁵ Olsem wanem? Yu inap tingim wanem kain wok nogut inap kamap sapos strong bilong Jisas i go long han bilong wanpela bikman i gat pasin kranki? Tasol Jisas i no gat sin. (1 Pita 2:22) Em i no laik tingim em yet, kisim biknem, o mangal long ol samting, em ol dispela pasin i save kirapim ol man i gat sin long yusim strong bilong ol bilong nogutim ol narapela.

¹⁶ Jisas i no tingim em yet taim em i yusim strong bilong em, em i no mekim wok long en bilong helpim em yet. Taim em i hangre, em i no laik tanim ol ston i kamap bret bilong em i ken kaikai. (Matyu 4:1-4) Em i no gat planti samting bilong skin na dispela i soim olsem em i no mekim wok long strong bilong em bilong kisim mani samting. (Matyu 8:20) I gat ol narapela samting tu i soim olsem em i no tingim em yet taim em i mekim ol strongpela wok. Taim em i wokim ol mirakel, em i mas givim sampela samting bilong em yet. Taim em i oraitim ol sikman, sampela strong i lusim em. Skin bilong em i pilim dispela samting, maski em i oraitim wanpela man tasol. (Mak 5:25-34) Tasol em i larim ol manmeri i putim han long em, na sik bilong ol i pinis. (Luk 6:19) Tru tumas, em i no tingim em yet!

17. Olsem wanem Jisas i soim olsem em i bihainim gutpela tingting taim em i yusim strong bilong em?

¹⁷ Jisas i bihainim gutpela tingting taim em i yusim strong bilong em. Em i no mekim ol strongpela wok bilong hambak o bilong pulim nating ai bilong ol man. (Matyu 4:5-7) Em i no orait long wokim mirakel bilong inapim laik bilong Herot long lukim mirakel. (Luk 23:8, 9) Jisas i no laik tokaut long strong bilong em, na planti taim em i tokim ol man husat em i bin oraitim long ol i no ken tokim wanpela man long dispela samting. (Mak 5:43; 7:36) Em i no laik ol narakain stori i mekim na ol man i kisim kain kain tingting long em.​—Matyu 12:15-19.

18-20. (a) Wanem samting i stiaim pasin bilong Jisas long mekim wok long strong bilong em? (b) Yu ting olsem wanem long pasin bilong Jisas long oraitim wanpela man i yaupas?

¹⁸ Dispela strongpela man, Jisas, i no olsem ol bikman husat i hambak na yusim strong bilong ol na i no tingim ol samting ol narapela man i sot long en o hevi ol i karim. Jisas i tingim ol manmeri. Em i lukim ol man i karim hevi na em i pilim tru long bel na dispela i kirapim em long helpim ol. (Matyu 14:14) Em i tingim bel na laik bilong ol narapela, na dispela gutpela pasin sori i stiaim pasin bilong em long yusim strong bilong em. Wanpela stori i kamapim klia dispela i stap long Mak 7:31-37.

¹⁹ Long dispela taim, ol manmeri i painim Jisas na bringim planti sikman i kam long em, na em i oraitim ol. (Matyu 15:29, 30) Tasol Jisas i makim wanpela man na i mekim gutpela pasin tru long em. Dispela man i yaupas na i no inap toktok gut. Ating Jisas i save dispela man i pret o sem. Jisas i tingting gut na i kisim man i go, na i lusim ol manmeri, na tupela tasol i stap. Orait nau Jisas i mekim sampela mak bilong soim man ol samting em i laik mekim. Em i “putim pinga bilong em long yau bilong man. Na em i spet na i tatsim tang bilong man.”c (Mak 7:33) Bihain, Jisas i lukluk i go antap long heven na beten. I olsem Jisas i tokim dispela man, ‘Samting mi bai mekim bilong helpim yu, mi mekim long strong bilong God.’ Nau Jisas i tok: “Yu op.” (Mak 7:34) Orait man inap harim tok na em inap toktok gut.

²⁰ Yumi pilim tru gutpela pasin bilong Jisas taim em i yusim strong God i givim em bilong oraitim ol sikman, em i tingim tru bel bilong ol man! Em i gutpela long save olsem Jehova i bin putim Kingdom Bilong Mesaia long han bilong kain King olsem i save sori na tingim tru ol man, a?

21, 22. (a) Ol mirakel bilong Jisas i makim wanem samting? (b) Jisas inap bosim ol strong bilong graun, olsem na yumi inap save long wanem samting bai kamap taim Kingdom i bosim graun?

²¹ Ol strongpela wok Jisas i mekim long graun i olsem piksa long ol bikpela blesing bai kamap bihain taim em i bosim graun olsem king. Long nupela taim God bai kamapim, Jisas bai wokim gen ol mirakel—tasol em bai mekim long olgeta hap bilong graun! Tingim sampela gutpela samting bai kamap bihain.

²² Jisas bai stretim bek ol samting bilong graun olsem wara na win na bikbus samting. Taim em i mekim strongpela win i dai em i kamapim klia pinis olsem em inap bosim ol strong bilong graun. Olsem na taim Kingdom Bilong Krais i bosim dispela graun, ol manmeri i no gat wok long pret long ol strongpela win, graun i guria, ol volkeno i pairap, o ol narapela hevi olsem. Jisas em i Saveman Bilong Wok em Jehova i bin yusim em bilong wokim graun na olgeta samting i gat laip i stap long en, olsem na em i save gut tru long ol samting bilong graun i wok olsem wanem. Em i save long pasin bilong mekim gutpela wok long ol samting bilong graun. Taim em i bosim graun, dispela graun olgeta bai kamap Paradais.

23. Jisas em i King, olsem wanem em bai inapim laik bilong ol manmeri?

²³ Olsem wanem long ol samting ol manmeri i mas kisim? Jisas i mekim wok long sampela liklik kaikai tasol bilong givim bikpela kaikai long planti tausen man, na dispela i soim olsem taim em i bosim graun ol man bai i no hangre moa. Tru tumas, taim i gat planti kaikai na ol i tilim stret i go long olgeta man, dispela bai pinisim tru hangre. (Buk Song 72:16) Em i gat strong long oraitim ol sik, olsem na yumi ken save ol sikman, aipas, yaupas, lek nogut, na ol man i gat ol narapela bagarap bilong skin ol bai orait gen—ol bai orait olgeta na i no inap kisim sik gen. (Aisaia 33:24; 35:5, 6) Em i bin kirapim bek ol man i dai pinis, dispela i helpim yumi long save olsem dispela King bilong heven i gat strong long kirapim bek planti milion manmeri em Papa bilong em i amamas long tingim ol.​—Jon 5:28, 29.

24. Taim yumi tingim strong bilong Jisas, yumi mas tingim wanem samting? Bilong wanem yumi mas tingim dispela?

²⁴ Taim yumi tingim strong bilong Jisas, yumi mas tingim olsem dispela Pikinini i bihainim stret pasin bilong Papa bilong em. (Jon 14:9) Olsem na pasin bilong Jisas long yusim strong bilong em i kamapim klia pasin bilong Jehova yet long mekim wok long strong bilong Em. Olsem: Tingim gutpela pasin Jisas i mekim taim em i oraitim wanpela lepraman. Jisas i sori tru long em, na i putim han long em na tok: “Mi laik!” (Mak 1:40-42) Long rot bilong dispela stori na sampela narapela, i olsem Jehova i tok, ‘Em pasin bilong mi long yusim strong bilong mi!’ Olsem wanem? Bel bilong yu i kirapim yu long litimapim nem bilong God bilong yumi i gat olgeta strong na tok tenkyu long em i yusim strong bilong em long kain gutpela pasin olsem?