I Stap na Wok Bilong Jisas

Askim Long Tambuim Kaikai

JISAS i go long Pasova long yia 30 C.E. na nau wanpela yia i go pinis. Jon Bilong Baptais i bin i stap kalabus inap sampela mun pinis. Jon i laik bai ol disaipel bilong em i go bihainim Krais, tasol sampela ol i no mekim.

Nau sampela disaipel bilong Jon i kamap long Jisas na ol i givim askim long em olsem: “Olsem wanem na mipela wantaim ol Farisi mipela i save tambuim kaikai, tasol ol disaipel bilong yu ol i no save tambuim kaikai?” Ol Farisi i save tambuim kaikai tupela taim long wik; em wanpela pasin bilong lotu bilong ol. Na ating ol disaipel bilong Jon tu i bihainim dispela pasin. O ating ol i tambuim kaikai bilong makim olsem ol i bel hevi long wanem Jon i stap kalabus, na ol i ting ol disaipel bilong Jisas tu i mas mekim olsem.

Jisas i bekim tok long ol na em i tok: “Sapos man i marit nupela em i stap yet wantaim ol wantok bilong en, orait ating ol inap bel hevi, a? Nogat. Tasol bihain bai ol i tekewe dispela maritman na em i no moa stap wantaim ol wantok bilong en. Long dispela taim bambai ol i tambuim kaikai.”

Ol disaipel bilong Jon i mas tingim tok Jon yet i bin mekim, em i tok Jisas em i olsem Man i laik marit. Olsem na taim Jisas i stap yet wantaim ol, Jon i no ken ting i stret long tambuim kaikai. Na ol disaipel bilong Jisas i gat wankain tingting. Bihain, taim Jisas i dai pinis, nau ol disaipel bilong em i bel hevi na ol i tambuim kaikai. Tasol taim em i kirap bek pinis, i no gat as moa na ol i mas bel hevi na tambuim kaikai.

Jisas i givim dispela tok pinis long ol disaipel bilong Jon na bihain em i kirap mekim sampela tok piksa, olsem: “I no gat man i save kisim hap nupela laplap bilong samapim hul long olpela saket. Sapos em i mekim olsem, bai dispela laplap bilong pasim hul em i brukim saket gen, na hul i kamap bikpela moa. Na i no gat man i save pulimapim nupela wain long olpela skin meme. Sapos ol i mekim olsem, bai skin meme i bruk, na wain i kapsait long graun, na skin meme tu i lus. Tasol ol i save pulimapim nupela wain long nupela skin meme, na tupela wantaim i stap gut.” Tasol olsem wanem dispela tupela tok piksa i stret long askim bilong tambuim kaikai?

Jisas i helpim ol disaipel bilong Jon long save, ol disaipel bilong em i no ken bihainim ol olpela lo bilong lotu Juda, olsem lo long tambuim kaikai samting. Jisas i no kam bilong “samapim hul,” olsem stretim olpela pasin bilong lotu i laik pinis. Lotu Kristen i no ken bihainim ol pasin na lo bilong lotu Juda long taim bilong Jisas, em ol man yet i as bilong planti pasin na lo bilong en. Lotu Kristen i no ken i stap olsem hap nupela laplap bilong samapim hul long olpela saket, o olsem nupela wain long olpela skin meme. Matyu 9:14-17; Mak 2:18-22; Luk 5:33-39; Jon 3:27-29.

◆ Husat ol i save tambuim kaikai? Bilong wanem ol i mekim?

◆ Bilong wanem ol disaipel i no tambuim kaikai long taim Jisas i stap yet wantaim ol? Na bihain wanem samting i kamap na i no gat as moa long ol i tambuim kaikai?

◆ Jisas i mekim wanem ol tok piksa? Wanem insait bilong ol dispela tok piksa?