Jehova i Skulim Yumi Long Mekim Laik Bilong Em
“Yu God bilong mi, mi laik yu skulim mi gut bai mi bihainim laik bilong yu.”—SONG 143:10.
LONG olgeta de man i stap laip na em i save mekim sampela wok, em inap skul long mekim wanpela gutpela wok. Yu yet na ol narapela tu inap mekim olsem. Tasol olsem wanem long taim man i dai? Ol i no inap skulim em long wanpela samting, na em i no inap lain long wanpela samting. Baibel i tokaut klia olsem ol man i dai pinis, “ol i no inap save long wanpela samting.” Ol man i stap long matmat, ol i no gat save long wanpela samting. (Saveman 9:5, 10) Olsem wanem? Dispela i makim olsem yumi bin hatwok nating long skul na kisim save long ol samting? Bilong save long bekim bilong dispela askim, yumi mas skelim ol samting yumi skul long en na wanem kain wok yumi mekim long dispela save yumi kisim.
2 Sapos yumi skul long ol samting bilong dispela graun tasol, i stap bilong yumi long bihain i no bilong longtaim. Tasol gutpela tru, i gat planti milion manmeri bilong olgeta lain ol i skul long mekim laik bilong God na bai ol i ken i stap oltaim oltaim. Taim Jehova i skulim yumi, i gat as na yumi inap bilip na wetim dispela gutpela samting, long wanem, em i As bilong ol save i givim laip oltaim long man.—Song 94:9-12.
3 Namba wan Pikinini bilong God, em namba wan sumatin bilong Em, em i bin skul long mekim laik bilong Papa bilong em. (Sindaun 8:22-30; Jon 8:28) Na Jisas i bin makim olsem Papa bilong em bai skulim planti milion manmeri. Orait, wanem gutpela samting bai painim yumi ol manmeri em God i skulim ol? Jisas i tok: “Tok i stap long buk bilong ol profet olsem, ‘God bai i skulim olgeta manmeri.’ Orait olgeta manmeri i harim tok bilong Papa na i kisim save long em, ol i save kam long mi. . . . Tru tumas mi tokim yupela, man i bilip long mi, em i gat laip i stap gut oltaim oltaim.”—Jon 6:45-47.
4 Jisas i kisim dispela tok long Aisaia 54:13, em wanpela tok i go long meri bilong God, em i makim Saion bilong heven. Dispela tok profet i makim tru ol pikinini bilong dispela meri, em lain 144,000 disaipel bilong Krais Jisas em God i bin makim ol long spirit holi. Liklik hap lain bilong ol i mekim wok long nau, na ol i go pas long mekim wanpela bikpela wok bilong skulim ol man long olgeta hap bilong graun. Olsem na planti milion moa, em dispela lain “planti manmeri tru,” ol tu i kisim skul long Jehova na dispela i helpim ol. Ol inap tingting long kisim save i go i go, na indai i no inap katim dispela wok. Tasol olsem wanem ol inap tingting long mekim olsem? Long wanem, ol i gat rot long abrusim taim bilong “bikpela hevi tru” klostu nau bai kamap, na ol bai kisim laip i stap oltaim long Paradais long graun.—KTH 7:9, 10, 13-17.
Tingting Strong Long Mekim Laik Bilong God
5 Long 1997, long olgeta kongrigesen long graun, winim 80,000, ol Witnes Bilong Jehova bai tingting long namba wan tok bilong Song 143:10: “Skulim mi gut bai mi bihainim laik bilong yu.” Dispela em i yia-teks bilong 1997. Dispela tok bai stap ples klia insait long ol Haus Kingdom, na em bai kirapim yumi long tingim gen olsem ol miting bilong kongrigesen i nambawan ples God i save skulim yumi long en, na long ol dispela miting yumi ken wok long lain na kisim save. Taim yumi bung wantaim ol brata bilong yumi long ol miting bambai Nambawan Tisa bilong yumi i ken skulim yumi, yumi ken kisim wankain tingting olsem bilong man bilong raitim Song, em i tok: “Ol i tokim mi olsem, ‘Goan, yumi go long haus bilong Bikpela.’ Ol i tok olsem na mi belgut tru.”—Song 122:1; Aisaia 30:20.
6 Yes, yumi laik skul long mekim laik bilong Jehova—yumi no laik skul long mekim laik bilong birua bilong yumi Satan o bilong ol man bilong dispela graun. Olsem na yumi bihainim pasin bilong Devit na yumi tokaut long dispela God yumi save lotuim em na mekim wok bilong em, olsem: “Yu God bilong mi . . . Mi laik bai spirit bilong yu i mekim gut long mi na i stiaim mi long gutpela rot.” (Song 143:10) Devit i no laik bung wantaim ol man i save mekim tok giaman, nogat; em i laik i stap long ples ol i save lotuim Jehova long en. (Song 26:4-6) Spirit bilong God i stiaim wokabaut bilong Devit, olsem na em inap wokabaut long rot bilong stretpela pasin.—Song 17:5; 23:3.
7 Krais Jisas, em Man Devit i piksa bilong em, em i tokim ol aposel, spirit holi bai skulim ol long olgeta samting na kirapim tingting bilong ol long tingim gen olgeta tok em i bin givim long ol. (Jon 14:26) Kirap long taim bilong Pentikos na i kam inap nau, Jehova i wok long kamapim long ples klia “olgeta tingting hait bilong God” i stap long Baibel, em Tok bilong em. (1 Korin 2:10-13) Em i mekim olsem long rot bilong wanpela lain i stap hia long graun, em Jisas i bin kolim olsem “wokboi i gat gutpela tingting.” Dispela lain wokboi i save givim kaikai bilong spirit long lain bilong God i stap long olgeta hap, na ol i save kisim ol dispela tok long ol miting bilong kongrigesen em i bilong skulim ol.—Matyu 24:45-47.
Ol Miting i Skulim Yumi Long Laik Bilong Jehova
8 Ol tok bilong Stadi Wastaua i save kamap long olgeta wik, planti taim i save toktok long olsem wanem yumi ken bihainim ol lo bilong Baibel. Ol dispela tok yumi kisim i helpim yumi tru long karim ol hevi i save painim yumi. Na long sampela stadi moa yumi save toktok long ol strongpela tok i tru bilong spirit o ol tok profet bilong Baibel. Long ol kain stadi olsem, yumi save lain long planti samting! Long planti hap, ol manmeri i pulap tru long ol Haus Kingdom bilong mekim ol dispela miting. Tasol long sampela kantri, namba bilong ol manmeri i save go long miting em i go daun. Yu ting i gat wanem as na namba bilong ol i go daun? Ating sampela i larim ol wok bilong skin i pasim ol na sampela taim ol i no bung wantaim “bilong kirapim ol [manmeri bilong God] long laikim ol arapela na mekim ol gutpela pasin”? O ating ol i save lusim planti aua long mekim ol samting bilong amamas wantaim ol narapela o long lukim televisen, na dispela i mekim na i olsem ol i gat planti wok tumas na ol i no gat taim bilong go long olgeta miting? Yumi mas tingim gen tok bilong Hibru 10:23-25, em spirit bilong God i bin kamapim. Nau yumi lukim “De bilong Krais em i kam klostu,” olsem na em i bikpela samting moa yet long yumi mas bung wantaim na bai God i ken skulim yumi, a?
9 Wanpela bikpela wok tru bilong yumi, em bilong mekim wok bilong God. Miting Bilong Wok Autim Tok em i bilong skulim yumi long mekim gut dispela wok. Yumi save lain long pasin bilong kirapim tok long ol man, na wanem ol tok bai yumi mekim, na yumi ken mekim wanem long taim ol i laik harim tok, na yumi ken mekim wanem long taim ol man i sakim tok bilong yumi. (Luk 10:1-11) Long dispela miting i save kamap long olgeta wik, ol i mekim ol tok na soim long pasin bilong mekim gut dispela wok, na dispela i helpim yumi long redi gut long autim tok long ol man taim yumi go long ol haus, o taim yumi autim tok long ol rot, o long ples bilong putim ol ka, o long ol bas, o long ples balus, o long ol ples bisnis, o long ol skul. Yumi beten olsem: “Skulim mi gut bai mi bihainim laik bilong yu,” olsem na bilong mekim ol samting i stret wantaim dispela beten, long olgeta taim yumi mas painim rot bilong mekim olsem Bikman bilong yumi i bin tokim yumi: “Lait bilong yupela i mas lait long ai bilong ol manmeri, bai ol i . . . litimapim nem bilong Papa bilong yupela i stap long heven.”—Matyu 5:16.
10 Long ol kain miting olsem, ol i save skulim yumi tu long kamapim ol disaipel. Taim yumi painim sampela man i laik harim tok, o ol i kisim buk o nius samting, tingting bilong yumi long taim yumi go bek lukim ol, em yumi laik kirapim Baibel-stadi long ol. Dispela i kain olsem samting ol disaipel i bin mekim, em ol i stap wantaim ol man i “gutpela na stretpela man” bambai ol i ken skulim ol dispela man long ol tok Jisas i bin givim long ol. (Matyu 10:11; 28:19, 20) Yumi gat ol gutpela samting tru bilong helpim yumi, olsem buk Save i Bringim Man Long Laip Oltaim, na ol dispela buk samting ol inapim yumi tru long mekim gut wok bilong yumi long autim tok. (2 Timoti 4:5) Long olgeta wik, taim yu go long Miting Bilong Wok Autim Tok na Skul Bilong Wok Autim Tok, yu mas wok strong long kisim gut sampela tok bilong helpim yu na bihain yu ken mekim wok long ol dispela tok bilong makim olsem yu wanpela wokman bilong God na yu inap tru long mekim wok bilong em.—2 Korin 3:3, 5; 4:1, 2.
11 God i laik bai yumi “wok pastaim long painim kingdom bilong God wantaim stretpela pasin bilong em.” (Matyu 6:33, Nupela Testamen na Ol Sam, bilong 1978) Askim yu yet: ‘Olsem wanem bai mi bihainim dispela lo sapos wok mani bilong mi [o bilong poroman marit bilong mi] i pasim mi long i go long ol miting?’ Planti brata sista i strong long ol samting bilong spirit ol bai stretim rot bilong toktok wantaim bos bilong ol long dispela samting. Wanpela sista i save autim tok long olgeta de em i tokim bos bilong em olsem em i mas i gat taim long olgeta wik bilong i go long ol miting bilong kongrigesen. Bos i orait long dispela samting. Tasol em i laik save long ol samting ol i save mekim long ol dispela miting, olsem na em i tokim sista, em i laik i go long miting. Orait long miting em i harim wanpela toksave long kibung distrik bai kamap. Olsem na bos i stretim rot bambai em inap i go long kibung na i stap inap wanpela de olgeta. Orait pasin dispela sista i mekim i givim wanem tingting long yu?
Papamama i Skulim Ol Long Mekim Laik Bilong Jehova
12 Tasol i no ol miting bilong kongrigesen na ol kibung tasol i skulim yumi long mekim laik bilong God. Em i givim tok long ol papamama i stap aninit long em olsem ol i mas skulim na stretim na mekim bikpela long ol pikinini na bai ol i ken litimapim nem bilong Jehova na mekim laik bilong em. (Song 148:12, 13; Sindaun 22:6, 15) Bilong mekim olsem, yumi mas kisim ol pikinini bilong yumi i go long ol miting na bai ol i ken “harim” na kisim save, tasol olsem wanem long skulim ol long haus long ol buk i gat tok bilong God? (Lo 31:12; 2 Timoti 3:15) Planti famili ol i bin kirap long mekim famili-stadi long Baibel long olgeta wik, tasol i no longtaim na ol i slek long mekim o ol i lusim olgeta. Olsem wanem? Dispela samting i bin painim yu? Yu ting dispela tok long mekim famili-stadi i no stret long yu o ol samting bilong famili bilong yu i narapela kain long ol narapela famili, na famili-stadi i no inap wok gut long famili bilong yu? Tasol maski sindaun bilong famili bilong yu i wanem kain, plis yupela ol papamama, kaunim gen ol gutpela stori, “Gutpela Samting Bilong Spirit Mipela i Kisim,” na “Pasin Bilong No Ken Les—Ol Gutpela Pe Bilong En,” i stap long Wastaua bilong Ogas 1, 1995.
13 I gutpela sapos ol famili i ken kisim pasin bilong kaunim na stori long teks bilong de long buklet Skelim Sampela Tok Bilong Baibel Long Olgeta De. Tru, sapos yumi kaunim skripsa na ol toktok bilong en, em i gutpela, tasol sapos yumi stori gut long en na bihainim ol dispela tok, dispela bai helpim yumi moa yet. Olsem: Sapos teks bilong de i stap long Efesus 5:15-17, famili i ken stori long olsem wanem ol inap makim hap taim bilong stadi na bilong mekim wanpela wok bilong God long olgeta de, olsem wok painia haptaim samting, na mekim ol narapela wok bilong ol insait long kongrigesen. Tru tumas, sapos long olgeta de famili i kaunim na stori gut long teks bilong de, dispela inap helpim wanpela o planti long “save gut long laik bilong Bikpela.”
14 Ol papamama i mas wok strong long skulim ol pikinini bilong ol. (Lo 6:6, 7) Tasol i no olsem papamama i mas krosim ol pikinini oltaim o toktok strong long ol na em tasol. Nogat. Papa na mama i mas wok tu long putim yau long ol tok bilong pikinini na bai ol i ken save, wanem ol tok pikinini i no kisim gut na ol i mas kamapim klia moa, o ol i mas kolim wanpela tok piksa na bai pikinini i ken kisim gut, o kolim gen dispela hap tok ol i laik skulim pikinini long en. Long wanpela famili Kristen, papamama i save kirapim ol pikinini long kamapim sampela askim long ol samting ol i no klia gut long en o ol i tingting planti long en, na long dispela pasin ol inap kamapim tingting bilong ol na toktok gut wantaim. Long dispela rot papamama i kisim save olsem pikinini man bilong ol, em i gat olsem 16 krismas samting, em i hatwok long pilim olsem Jehova i bin i stap oltaim oltaim na em i no bin kamap nupela long wanpela taim. Orait, papamama i kisim sampela tok i stap long ol buk na nius bilong Sosaiti Was Taua i kamapim klia olsem sampela samting i no bin kirap nupela long bipo na i no gat pinis bilong en, olsem ol de na yia samting, na ples antap tu—ol i go i go tasol. Em nau, pikinini i kisim gut dispela tok na em i amamas. Olsem na yupela papamama i mas mekim wok long Baibel na bekim gut ol askim bilong ol pikinini na helpim ol long save, ol inap kisim amamas long lain long mekim laik bilong God. Orait, lain bilong God—ol yangpela na ol lapun wantaim—ol i lain long wanem ol narapela samting long nau?
Lain Long Laikim Ol Narapela na Long Mekim Pait
15 Baibel i tok, ‘God i skulim yumi long givim bel long ol manmeri bilong God,’ na dispela i stret wantaim nupela lo Jisas i bin givim long yumi. (1 Tesalonaika 4:9) Taim yumi stap bel isi na ol samting i wok gut, ating yumi pilim olsem yumi save laikim tru olgeta brata bilong yumi. Tasol olsem wanem sapos sampela hevi i kamap namel long yumi o yumi bel hevi long wanpela tok o pasin wanpela Kristen i mekim? Em nau, ating dispela i traim bel bilong yumi—yumi laikim tru ol brata o nogat. (Skelim wantaim 2 Korin 8:8.) Orait, Baibel i skulim yumi long mekim wanem long kain taim olsem? Wanpela samting, em yumi mas wok strong long kamapim klia olsem yumi laikim tru ol brata. (1 Pita 4:8) Nogut yumi tingim ol samting bilong yumi yet tasol, o yumi kros long ol liklik pasin kranki bilong narapela, o yumi wok long tingim rong narapela i bin mekim long yumi—yumi mas wok long larim pasin bilong laikim tru ol narapela i karamapim planti sin. (1 Korin 13:5) Yumi save dispela em i laik bilong God, long wanem, tok bilong em yet long Baibel i skulim yumi olsem.
16 Tru, planti manmeri i no ting pasin bilong laikim tru ol narapela inap poroman wantaim pasin bilong mekim pait. Tasol Jehova i wok long skulim yumi long mekim pait, em wanpela pait i narapela kain. Devit i save Jehova i mas skulim em long pasin bilong mekim pait, tasol long taim bilong em i gat narapela pait tu, olsem ol i mas mekim pait tru long ol birua bilong lain Israel. (1 Samuel 17:45-51; 19:8; 1 King 5:3; Song 144:1) Olsem wanem long pait bilong yumi long nau? Ol samting yumi holim bilong pait, ol i no samting bilong dispela graun. (2 Korin 10:4) Pait bilong yumi em i pait bilong spirit, na bilong mekim dispela pait, yumi mas i gat ol klos pait bilong spirit. (Efesus 6:10-13) Long rot bilong Baibel na kongrigesen, Jehova i skulim yumi long mekim pait bilong spirit na winim dispela pait.
17 Long pasin giaman na pasin hait, planti taim Satan i mekim wok long ol samting bilong dispela graun, na ol man i bikhet na lusim bilip tru, na ol narapela birua bilong tok i tru, bambai em i ken pulim tingting bilong yumi i go long ol samting i no bikpela samting. (1 Timoti 6:3-5, 11; Taitus 3:9-11) I olsem em i save pinis, sapos em i mekim pait long yumi long ples klia, em i no inap daunim yumi, olsem na em i wok strong long kirapim yumi long toktok planti oltaim long wanpela samting na mekim ol askim i olsem tok kranki tasol na i no inap helpim man liklik long ol samting bilong spirit. Olsem ol soldia i save was gut, yumi mas was gut long ol dispela kain samting i laik bagarapim yumi, na yumi no was tasol long birua i stap ples klia long ai bilong yumi na i kam pait long yumi.—1 Timoti 1:3, 4.
18 Yumi no laik helpim ol man o ol lain man long kamapim laik bilong ol. Long rot bilong ol pasin Jisas i bin mekim, Jehova i bin skulim yumi olsem yumi no ken tingting moa long yumi yet na wokabaut, nogat; yumi mas kisim wankain tingting olsem bilong Krais Jisas na yumi tingting olsem yumi stap bilong mekim laik bilong God. (2 Korin 5:14, 15) Ating bipo yumi bin bihainim ol kain kain laik nogut bilong skin, na yumi lusim nating taim bilong yumi. Ol pati nogut bilong kisim amamas, na dring planti, na pasin pamuk, em i pasin bilong ol man nogut bilong dispela graun. Tasol nau yumi lain long mekim laik bilong God, na yumi amamas long yumi bin lusim ol pasin nogut bilong dispela graun, a? Olsem na yumi mas wok strong long mekim pait bilong spirit na bai yumi no ken insait long ol pasin bilong dispela graun i save mekim man i kamap doti.—1 Pita 4:1-3.
Skulim Yumi na Bai Yumi Stap Gut
19 Em i bikpela samting long yumi mas luksave olsem taim yumi lain long mekim laik bilong Jehova, dispela i save helpim yumi tru. Tasol yumi yet i mas mekim sampela samting, olsem yumi mas putim gut yau bambai yumi ken lain, na nau yumi mas bihainim ol tok yumi kisim long rot bilong Pikinini bilong em na long rot bilong Baibel na lain bilong em ol i bung long ol kongrigesen. (Aisaia 48:17, 18; Hibru 2:1) Sapos yumi mekim olsem, dispela bai strongim yumi long sanap strong long dispela taim bilong planti hevi na bai yumi sanap strong long taim ol hevi i painim yumi bihain, i olsem taim bilong bikpela win na ren. (Matyu 7:24-27) Long nau tu, bai yumi mekim laik bilong God na em bai amamas long yumi, na taim yumi mekim olsem, em bai harim ol beten bilong yumi. (Jon 9:31; 1 Jon 3:22) Na bai yumi stap amamas tru.—Jon 13:17.
20 Long 1997, planti taim bai yumi gat rot long kaunim na stori long yia-teks, em Song 143:10: “Skulim mi gut bai mi bihainim laik bilong yu.” Taim yumi mekim olsem, sampela taim yumi mas tingim ol samting Jehova i bin mekim bilong skulim yumi, olsem yumi lukim antap. Na taim yumi tingim tingim dispela tok, dispela i mas kirapim yumi long mekim pasin i stret wantaim dispela beten, long wanem yumi save, “man i bihainim tok bilong God, em bai i stap oltaim.”—1 Jon 2:17.
Bai Yu Bekim Olsem Wanem?
◻ Long nau husat ol i lain long mekim laik bilong Jehova?
◻ Song 143:10 i mas mekim wanem long yumi long 1997?
◻ Olsem wanem Jehova i skulim yumi long mekim laik bilong em?
◻ Taim ol papamama Kristen i skulim ol pikinini, ol i mas mekim wanem?
[Askim Bilong Stadi]
1, 2. (a) Wanem taim yumi mas skul? Yumi tingting long wanem samting na yumi mekim olsem? (b) Bilong wanem em i bikpela samting long Jehova i mas skulim yumi?
3. (a) Olsem wanem yumi inap tok, Jisas em i namba wan sumatin bilong God? (b) Olsem wanem yumi ken bilip tru olsem Jehova bai skulim ol man? Wanem samting bai kamap long dispela?
4. Ol tok Jehova i skulim yumi long en i mekim wanem long planti milion manmeri? Ol inap tingting long mekim wanem?
5. (a) Wanem yia-teks bilong 1997? (b) Yumi mas ting olsem wanem long go long ol miting Kristen?
6. Yumi tokaut long wanem samting olsem Devit i bin tokaut long en?
7. Olsem wanem spirit bilong God i bin mekim wok long kongrigesen Kristen?
8. Bilong wanem em i bikpela samting long yumi mas insait long Stadi Wastaua?
9. (a) Olsem wanem Miting Bilong Wok Autim Tok inap helpim yumi long mekim gut wok bilong autim tok? (b) Yumi mas ting olsem wanem long autim tok?
10. Olsem wanem yumi inap helpim ol “gutpela na stretpela man”?
11. Olsem wanem sampela i bin kamapim klia olsem ol i bilip long tok bilong Matyu 6:33?
12. Bilong skulim ol pikinini long laik bilong Jehova, papamama i mas mekim wanem na ol i no ken les kwik na ol i mas strong long mekim?
13. Taim ol famili i kaunim na stori long teks bilong de, dispela inap helpim ol olsem wanem?
14. Lo 6:6, 7 i makim olsem papamama i mas i stap wanem kain tisa? Olsem na ol i mas mekim wanem?
15. Wanem samting inap traim yumi, olsem yumi save laikim tru ol brata o nogat?
16. (a) Jehova i skulim ol Kristen long mekim wanem kain pait? (b) Yumi gat wanem samting bilong mekim dispela pait?
17. (a) Satan i save mekim wanem ol samting bilong pulim tingting bilong yumi? (b) Yumi mas bihainim gutpela tingting na klia long wanem samting?
18. Yumi mas mekim wanem na bai yumi no tingting moa long yumi yet na wokabaut?
19. Taim yumi lain long laik bilong Jehova na bihain yumi mekim laik bilong em, dispela bai helpim yumi olsem wanem?
20. Taim yu lukim yia-teks long 1997, i gutpela sapos yu tingim tingim wanem samting?