Rot Bilong i Stap Gutpela Papa

WANPELA hap bilong magasin Economist i stori long sindaun bilong ol famili i wok long bagarap. Stori i kirap olsem: “Kamapim ol pikinini i no hatwok, kamap gutpela papa em i hatwok tru.”

Planti samting yumi mekim long laip bilong yumi em i hatwok, na wanpela samting i hatwok tru​—⁠na em i bikpela samting tu​—⁠em long i stap gutpela papa. Olgeta papa i mas i gat laik long i stap gutpela papa, long wanem, dispela bai mekim na famili i ken stap gut na amamas.

As na i Hatwok

Wanpela bikpela as na i hatwok long i stap gutpela papa em yumi bin kisim sin long Adam​—⁠ol papamama na ol pikinini tu. Baibel i tok: “Stat long taim ol manmeri i yangpela yet ol i save tingting long mekim ol pasin nogut.” (Stat 8:21) Olsem na wanpela man bilong raitim hap bilong Baibel i tok: “Taim mi stap yet long bel bilong mama, mi man bilong mekim sin.” (Song 51:5; Rom 5:12) Sin yumi kisim long Adam i mekim na yumi gat laik long mekim pasin nogut, na dispela em wanpela as tasol na i hatwok long i stap gutpela papa.

Pasin bilong dispela graun tu em i wanpela bikpela samting i mekim na i hatwok long i stap gutpela papa. Wai na i olsem? Bikos, olsem Baibel i tok, “dispela graun olgeta em i stap aninit long strong bilong Satan.” Na Baibel i save kolim Satan olsem “giaman god bilong dispela graun.” Olsem na yumi no kirap nogut long Jisas i bin tok olsem ol disaipel​—⁠olsem em yet​—⁠ol i “no bilong dispela graun”!​—⁠1 Jon 5:19; 2 Korin 4:4; Jon 17:⁠16.

Bilong i stap gutpela papa, oltaim yumi mas luksave olsem yumi no gutpela olgeta, Satan i stap, na em i bosim dispela graun. Ol dispela samting i no samting i stap long tingting tasol, nogat. Em ol samting tru tru i stap! Tasol man inap kisim we save bilong sakim ol dispela samting na lain long kamap gutpela papa?

Ol Gutpela Piksa Tru

Bilong kisim helpim long winim ol hevi yumi stori pinis long en, papa inap lukim Baibel. Stori bilong ol man i stap gutpela piksa tru i stap insait long en. Jisas i makim nambawan gutpela piksa taim em i lainim ol disaipel long prea olsem: “Papa bilong mipela, yu stap long heven.” Baibel i stori long pasin bilong Papa bilong yumi long heven olsem: “God em i pasin laikim.” Ol papa bilong graun i mas mekim wanem taim ol i tingim dispela gutpela piksa? Aposel Pol i tok: “Yupela i mas bihainim ol pasin em [God] yet i save mekim. Yupela i mas wokabaut long pasin bilong laikim tru ol arapela.”​—⁠Matyu 6:​9, 10; 1 Jon 4:​8, NW; Efesus 5:​1, 2.

Sapos yu wanpela papa, tingim gutpela skul yu inap kisim taim yu skelim samting God i bin mekim long Jisas, Pikinini bilong em. Matyu 3:17 i tok taim Jisas i kisim baptais long wara, ol man i harim nek bilong God i tok: “Dispela em i Pikinini bilong mi. Mi laikim em tumas. Bel bilong mi em i amamas long em.” Dispela inap skulim yumi long wanem samting?

Namba wan, tingim tingting bilong pikinini taim papa i amamas long em na em i tokim narapela man olsem, ‘Em pikinini man bilong mi’ o ‘Em pikinini meri bilong mi.’ Ol pikinini i save stap gut na amamas taim papamama i tingim ol, na moa yet taim papamama i tok amamas long gutpela wok ol i mekim. Dispela inap kirapim pikinini long wok strong moa na bai papamama i ken mekim gutpela tok amamas long em.

Namba tu, God i kamapim em i pilim olsem wanem long Jisas, em i tok “mi laikim em tumas.” Taim Papa bilong em i tok olsem dispela i mas mekim gut bel bilong Jisas. Ol pikinini bilong yu tu bai kisim strong sapos long rot bilong ol tok yu mekim​—⁠na long taim yu lusim, pasin yu mekim, na pasin bilong yu long tingim ol⁠—​yu kamapim klia yu laikim ol tumas.

Namba tri, God i tokim Pikinini bilong em: “Bel bilong mi em i amamas long yu.” (Mak 1:11) Dispela tu em i bikpela samting papa i mas mekim, em i mas tokim ol pikinini olsem em i amamas long ol. Tru, planti taim pikinini bai popaia. Yumi olgeta i save mekim olsem. Tasol yu papa, yu save wok long tingim sampela gutpela wok o tok ol pikinini i mekim na yu ken tok amamas long dispela?

Jisas i kisim gutpela skul long Papa bilong em long heven. Taim em i stap long graun, em i soim long rot bilong tok na pasin bilong em olsem Papa bilong em i ting olsem wanem long ol pikinini bilong Em hia long graun. (Jon 14:⁠9) Maski Jisas i bisi na em i gat planti samting bilong tingim, em i bin lusim haptaim bilong sindaun na toktok wantaim ol pikinini. Em i tokim ol disaipel: “Yupela larim ol pikinini i kam long mi. Yupela i no ken pasim ol. Nogat.” (Mak 10:14) Olsem wanem? Yupela ol papa, yupela inap bihainim moa yet pasin bilong God Jehova na Pikinini bilong em?

Stap Gutpela Piksa Em Bikpela Samting

Em i bikpela samting tru long yu mas i stap gutpela piksa ol pikinini bilong yu inap bihainim. Hatwok bilong yu long ‘mekim gutpela pasin long ai bilong Bikpela, na stretim gut ol pikinini bilong yu na skulim ol long tok bilong Bikpela’ bai i no karim gutpela kaikai sapos yu yet yu no save daun long ol lo bilong God na larim ol dispela lo i stiaim laip bilong yu. (Efesus 6:⁠4) Tasol long helpim yu kisim long God, yu inap winim olgeta hevi i laik pasim yu long bihainim tok bilong God long lukautim ol pikinini bilong yu.

Tingim stori bilong Viktor Gutschmidt, em wanpela Witnes Bilong Jehova long hap bipo ol i kolim Soviet Yunion. Long Oktoba 1957, kot i tok em i mas kalabus 10-pela yia bikos em i bin autim tok long bilip bilong em. Em i mas lusim tupela liklik pikinini meri na meri bilong em, Polina. Taim em i stap long kalabus, ol i larim em i raitim ol pas long famili bilong em tasol i tambu long raitim ol tok long God o long ol samting bilong lotu. Maski em i gat dispela hevi, Viktor i gat strongpela tingting long i stap gutpela papa, na em i save em i bikpela samting long lainim ol pikinini long God. Em i bin mekim wanem?

Viktor i tok: “Mi bin painim sampela tok long ol magasin Young Naturalist na Nature. Long ol poskat mi bin droim ol piksa bilong ol animal na ol manmeri na mi kamapim wanpela stori o ekspiriens long sampela samting bilong ol animal o diwai samting.”

Polina i tok: “Taim mipela kisim ol poskat, wantu mipela tingim wanem tok bilong Baibel i stret wantaim ol piksa na stori. Olsem, taim i gat piksa bilong ol bikbus o wara samting, mi bai ritim Aisaia sapta 65,” em stori long promis bilong God long kamapim Paradais.

Pikinini meri bilong Viktor, em Yulia i tok: “Bihain long dispela mama bai prea wantaim mipela, na mipela bai krai. Ol dispela poskat em i bikpela samting bilong helpim mipela long taim mipela i wok long kamap bikpela.” Polina i tok dispela i as na “tupela gel i laikim tumas God kirap long taim ol i liklik yet.” Olsem wanem long dispela famili long nau?

Viktor i tok: “Long nau tupela pikinini meri i marit long ol elda Kristen, na famili bilong tupela wantaim ol i stap strong long samting bilong spirit na ol pikinini bilong ol i stap gut long Jehova na mekim wok bilong em.”

Bilong i stap gutpela piksa, planti taim yu mas wokim gut tingting, na tu, yu mas wok hat tru. Taim ol pikinini i lukim papa i traim bes bilong em, ol bai pilim tru dispela samting long bel bilong ol. Wanpela brata husat i bin mekim wok autim tok fultaim inap planti yia, em i tok amamas long papa bilong em olsem: “Sampela taim papa i bin wok hat tru na skin i les olgeta na ai bilong em i hevi na i laik slip, tasol mipela bai mekim yet Baibel stadi bilong mipela. Dispela i bin helpim mipela long save olsem Baibel stadi em i bikpela samting.”

Em i klia tru, bilong i stap gutpela papa yu mas i stap gutpela piksa long toktok na long pasin. Yu mas mekim olsem sapos yu laik lukim truim bilong wanpela savetok bilong Baibel, i tok: “Skulim pikinini bilong yu long bihainim gutpela pasin, na em bai i wokabaut long dispela rot inap long em i lapun tru.”​—⁠Sindaun 22:⁠6.

Olsem na tingim, i no toktok tasol yu mekim i bikpela samting; bikpela samting em pasin yu save bihainim. Wanpela saveman bilong Kanada long skulim ol pikinini, i tok: “Nambawan gutpela rot long kirapim ol pikinini bilong yumi long bihainim ol pasin yumi laikim, em yumi yet i mas kamapim ol dispela pasin.” Tru tumas, sapos yu laik bai ol pikinini bilong yu i tingim ol samting bilong spirit, orait em i bikpela samting long yu yet i mas mekim olsem.

Painim Taim Bilong i Stap Wantaim Ol!

Ol pikinini bilong yu i mas lukim gutpela pasin bilong yu. Bilong mekim olsem yu mas stap wantaim ol​—⁠yu mas stap wantaim ol planti taim, i no liklik taim nau na liklik taim neks wik samting. Bihainim savepasin na bihainim tok bilong Baibel long no ken larim “taim i lus nating,” yu mas lusim ol samting i no bikpela samting na bai yu gat taim bilong stap wantaim ol. (Efesus 5:​15, 16) Wanem samting i bikpela samting moa i winim ol pikinini bilong yu? Wanpela nupela TV, pilai spot, naispela haus, wok mani bilong yu?

Sapos ol papa i no lusim taim bilong lukautim ol pikinini taim ol i yangpela, orait bihain ol papa bai karim hevi long dispela. Planti papa em pikinini bilong ol i bin insait long pasin pamuk o ol i no tingim liklik ol samting bilong spirit, ol dispela papa i pilim bikpela bel sori. Ol i bel hevi long ol i no bin stap wantaim ol pikinini taim ol i yangpela yet, em taim ol i mas i gat gutpela papa.

Tingim, taim ol pikinini i liklik yet em taim bilong tingim wanem samting bai kamap long ol samting yu tingting long mekim. Baibel i kolim ol pikinini bilong yu olsem ‘presen God i givim yu,’ em samting Jehova yet i givim long yu bilong lukautim. (Song 127:⁠3) Olsem na yu no ken lusim tingting olsem God bai kotim yu long ol samting yu mekim long ol!

Helpim i Stap

Gutpela papa i save amamas long kisim helpim em bai helpim ol pikinini bilong em. Bihain long wanpela ensel i tokim meri bilong Manoa olsem em bai karim wanpela pikinini, Manoa i prea long God olsem: “Bikpela, dispela man yu bin salim i kam, mi laik bai yu salim em i kam gen long mitupela. Na em i ken tokim mitupela long olgeta samting mitupela i mas mekim long dispela pikinini bihain bai i kamap.” (Hetman 13:​8, 9) Olsem ol papamama long nau, Manoa i mas kisim wanem kain helpim? Orait bai yumi skelim.

Brent Burgoyne, wanpela tisa long Yunivesiti Bilong Cape Town, Saut Afrika, i tok: “Wanpela gutpela presen tru yu inap givim long pikinini, em long skulim em long ol lo o stiatok bilong stiaim laip bilong em.” Wanpela ripot i stap long niuspepa Daily Yomiuri bilong Japan i soim olsem ol pikinini i mas kisim dispela kain skul, em i tok: “Wanpela wok painimaut i kamapim olsem ol papa bilong 71 pesen bilong ol pikinini long Japan i no bin tokim ol long ol i no ken mekim tok giaman.” Sori tumas, a?

Husat inap givim ol gutpela lo o stiatok bilong stiaim laip bilong ol man? Em dispela man i bin givim gutpela stiatok long Manoa​—⁠em God yet! Bilong helpim ol man, God i bin salim Pikinini em i laikim tumas, em Jisas, olsem Tisa​—⁠em dispela nem ol man i bin kolim em planti taim. Nau i gat wanpela buk, Learn From the Great Teacher. As bilong ol tok buk i kamapim em ol samting Jisas i bin lainim ol man long en. Ol i tanim dispela buk long planti tok ples na bai yu ken yusim bilong skulim ol pikinini.

Buk Learn From the Great Teacher i stori gut long ol lo na stiatok bilong stiaim laip bilong man em Tok Bilong God i as bilong ol. Na tu, i gat moa long 160 piksa i save helpim ol stori i stap long buk na ol piksa i gat ol gutpela askim i stap wantaim ol. Olsem, sapta 22, nem bilong en “Bilong Wanem Yumi No Ken Giaman,” i gat piksa i stap long pes 32 bilong dispela magasin. Ol tok i stap long dispela pes we piksa i stap i tok: “O ating wanpela mangi i tokim papa bilong em olsem: ‘Nogat, mi no bin kikim bal insait long haus.’ Tasol olsem wanem sapos tru tru em i bin mekim dispela samting? Yu ting i stret long tok olsem em i no bin mekim?”

Ol i kamapim ol strongpela tok bilong skulim ol pikinini long ol dispela sapta hia: “Pasin Bilong Bihainim Tok i Lukautim Yu,” “Yumi Mas Sakim Ol Traim,” “Wanpela Stori i Skulim Yumi Long Mekim Gutpela Pasin,” “No Ken Kamap Stilman!,” “God i Amamas Long Olgeta Pati o Nogat?,” “Rot Bilong Mekim God i Amamas,” na “Bilong Wanem Yumi Mas Wok?,” em sampela bilong ol 48 sapta bilong dispela buk.

Tok i go pas long dispela buk i tok: “Ol papamama i mas stiaim ol pikinini i go long Man i as bilong olgeta savetingting, em Papa bilong yumi long heven, God Jehova. Dispela em samting Jisas, Bikpela Tisa, i bin mekim oltaim. Mipela i laik bai dispela buk i ken helpim yu na famili bilong yu long stretim sindaun bilong yupela na bai Jehova i amamas long en, na yupela i ken kisim ol blesing inap oltaim oltaim.”a

Samting i klia tru em i olsem, bilong i stap gutpela papa yu mas stap gutpela piksa ol pikinini bilong yu i ken bihainim, lusim bikpela haptaim long i stap wantaim ol, na helpim ol long bihainim ol lo bilong God em i bin kamapim long Baibel.

[Futnot]

[Piksa long pes 8]

Maski em i kalabus, Viktor Gutschmidt i bin i stap gutpela papa

[Ol Piksa long pes 8, 9]

Viktor i stap long kalabus bikos em i bin autim bilip bilong em, na long dispela taim em i bin droim ol dispela piksa bilong skulim ol pikinini bilong em

[Piksa long pes 9]

Tupela pikinini meri bilong Viktor long 1965

[Piksa long pes 10]

Ol papa i mas wok oltaim long skulim pikinini bilong ol