Kain Papa Ol Pikinini i Mas i Gat

OL PIKININI i mas i gat papa husat i laikim ol, na sapotim ol, na i mekim olgeta samting em inap mekim bilong helpim ol long kamap gutpela man na meri taim ol i bikpela pinis. Ol man i save ol pikinini i mas i gat kain papa olsem tasol ol i no bin stori tumas long dispela.

Tru, ol mama i save karim ol pikinini, na pasin bilong ol long mekim gutpela wok mama em i bikpela samting tru. Tasol bilong soim olsem papa i gat bikpela wok tu, magasin The Wilson Quarterly i tok: “Planti papa moa i no mekim gut wok papa bilong ol na dispela em i as bilong planti hevi i wok long painim ol manmeri bilong Amerika”​—⁠na yumi ken tok em i as bilong planti hevi long olgeta hap.

Niuspepa Jornal da Tarde bilong Brasil i stori long wanpela wok painimaut i tok planti hevi bilong pasin bilong ol yangpela​—⁠olsem pasin bilong salensim narapela, bikhet, ol i no kisim ol gutpela mak long skul, na pasin bilong les​—⁠planti taim ol dispela samting i kamap bikos “papa i no stap wantaim famili.” Buk Gli imperfetti genitori (Ol Papamama i No Gutpela Olgeta) bilong Itali, em Marcello Bernardi i bin raitim, i tok strong olsem bilong ol pikinini i ken kamap gutpela, ol i mas i gat papa na mama.

Sindaun Bilong Famili Inap Kamap Gutpela

Maski pasin bilong papa long i no stap wantaim famili i mekim ol hevi i go bikpela o em yet i as bilong klostu olgeta hevi bilong famili, dispela i no makim olsem ol i no inap stretim ol hevi na sindaun bilong famili i ken kamap gutpela. Olsem wanem dispela samting inap kamap? Papa i mas mekim wanem?

Ol pikinini i mas i stap long wanpela famili, ol i mas pilim olsem wanpela man husat i tingim na lukautim ol i bosim famili. Taim ol pikinini i no gat kain famili olsem, na planti pikinini long nau i no gat kain famili olsem, dispela i nogutim ol pikinini. Tasol i no olsem i no gat gutpela samting inap kamap, maski i gat papa o nogat. Long Song 68:​5, Baibel i tok: “God i save stap long ples bilong em yet, na em i save lukautim ol pikinini, papa bilong ol i dai pinis.”a

Rot Bilong Kisim Helpim

Ol famili i mas kisim helpim bilong God bilong winim ol hevi na ol inap kisim kain helpim olsem. Samting i painim Lidia, dispela yangpela meri bilong Polan yumi bin stori pinis long en, i kamapim klia dispela samting. Famili bilong em i bin stap olsem wanem? Olsem wanem famili bilong em i bin kisim helpim long God?

Franciszek, papa bilong Lidia, i tokaut olsem taim ol pikinini i liklik yet, em i no pas wantaim ol, olsem Lidia i bin kamapim. Em i tok: “Mi no bisi long ol samting ol pikinini i mekim. Mi no soim ol olsem mi laikim ol, na mipela i no pas gut wantaim.” Olsem na em i no save olsem taim Lidia i gat 14 krismas, em na liklik brata na susa bilong em ol i kirap pinis long raun long ol pati nogut, smok, dring, na insait long ol pait.

Bihain Franciszek i luksave long ol hevi ol pikinini i insait long en, na dispela i kirapim em long mekim samting. Em i tok: “Mi bin prea askim God long helpim mi.” I no longtaim bihain long dispela na ol Witnes Bilong Jehova i kam long haus bilong em, na em wantaim meri bilong em ol i orait long stadi long Baibel. Bihain nau, tupela i kirap bihainim tok bilong Baibel long laip bilong ol. Dispela i mekim wanem long ol pikinini?

Franciszek i tok: “Ol i luksave olsem mi no dring moa na mi wok long kamap gutpela papa. Ol i laik kisim sampela save moa long ol Witnes Bilong Jehova. Ol tu i kirap stadi long Baibel na ol i lusim ol poroman nogut bilong ol.” Pikinini man, Rafał, i stori long papa bilong em olsem: “Mi kirap laikim em tru olsem wanpela pren.” Na em i tok moa: “Kwiktaim strit geng i no bikpela samting moa long mi. Mipela i save bisi long mekim ol samting bilong spirit.”

Long nau Franciszek em i wanpela elda Kristen long wanpela kongrigesen bilong ol Witnes Bilong Jehova, na em i pas gut yet wantaim famili bilong em na helpim olgeta wan wan long kamap strong moa long ol samting bilong spirit. Meri bilong em na Lidia ol i wok painia, olsem autim tok fultaim. Rafał na liklik susa bilong em, Sylwia, ol i givim bel olgeta long stadi long Baibel, bekim tok long ol miting Kristen, na autim bilip bilong ol long ol narapela manmeri.

Em i Bihainim Tok Em i Autim

Tingim tu ol samting i bin kamap long Luis, papa bilong Macarena. Em dispela meri Spen i gat 21 krismas em yumi bin stori long en long namba wan stori bilong dispela magasin. Luis i bihainim pasin bilong papa bilong em, em man i kalabus long dring. Olsem Macarena i bin tok, Luis bai raun wantaim ol poroman na famili i no lukim em inap sampela de. Na tu, pasin em i save mekim long meri bilong em i olsem em i wokmeri nating, na i no gutpela poroman em i save amamas long em. Klostu marit bilong ol i laik bagarap, na tingting na bel bilong Macarena na ol liklik bratasusa bilong em i bagarap.

Tasol bihain, Luis i orait long stadi long Baibel wantaim ol Witnes Bilong Jehova. Em i tok: “Mi kirap lusim sampela haptaim bilong i stap wantaim meri pikinini bilong mi. Mipela toktok wantaim, kaikai wantaim, na stadi long Baibel wantaim. Na tu, mipela i save mekim ol wok bilong haus na painim amamas wantaim.” Macarena i tok: “Mi kirap pilim olsem wanpela gutpela papa husat i tingim tru famili bilong em i stap wantaim mipela.”

Bikpela samting tru i olsem, Luis i strongim famili bilong em long mekim wok bilong God na em yet i bihainim tok em i lainim ol long en. Macarena i tok: “Em i lusim wanpela gutpela bisnis tru bikos dispela wok i kisim bikpela haptaim bilong em, na em i laik lusim sampela haptaim moa long lukautim ol samting bilong famili.” Dispela i kamapim samting i gutpela tru. Macarena i tok: “Pasin em i bihainim i lainim mi long pasin bilong larim ai bilong mi i stap gutpela na putim ol samting bilong spirit i stap namba wan.” Long nau Macarena i save mekim wok painia, na mama na ol bratasusa bilong em ol i insait long kongrigesen Kristen na autim tok long olgeta taim.

Disisen Bilong Bikman Bilong Tren Kampani

Tru tumas, ol pikinini i mas i gat papa i save mekim ol disisen i soim olsem em i tingim tru sindaun bilong ol pikinini bilong em. Yangpela pikinini man bilong Takeshi Tamura, dispela bikman bilong tren kampani bilong Japan yumi stori pinis long en, i bin kirap raun wantaim ol poroman nogut na i luk olsem bikpela hevi i laik painim em. Dispela i kamap long 1986, taim Takeshi i tokaut olsem em bai lusim bikpela namba em i holim long tren kampani bilong Japan. Takeshi i gat wanem tingting long disisen em i bin mekim winim 18 yia i go pinis?

Em i tok: “Em i nambawan gutpela disisen mi bin mekim. Mi bin lusim sampela haptaim moa long mekim ol samting wantaim pikinini man bilong mi, na stadi long Baibel wantaim em, na dispela i bin kamapim bikpela samting tru. Mipela i kamap pren, na em i lusim ol poroman nogut na ol pasin nogut.”

Meri bilong Takeshi i bin kamap wanpela Witnes Bilong Jehova sampela yia paslain long dispela taim, na gutpela pasin em i save bihainim i mekim na man bilong em i kirap skelim Baibel na em i pas gut wantaim famili. Bihain, Takeshi yet, pikinini man na pikinini meri bilong em ol i kamap ol Witnes. Takeshi na pikinini man bilong em ol i mekim wok elda long ol kongrigesen ol i stap long en, na meri bilong em na pikinini meri bilong em ol i mekim wok painia.

Ol Papa i Mas Kisim Helpim

Planti papa, maski ol i save ol i no lukautim gut ol pikinini bilong ol, ol i no save long ol samting ol i mas mekim bilong helpim ol pikinini. Fran pes bilong niuspepa La Vanguardia bilong Spen i tok “42 Pesen Bilong Ol Papamama [Bilong Spen] i Tokaut Olsem Ol i No Save Long Rot Bilong Mekim Bikpela Long Ol Pikinini i Gat 13-19 Krismas.” Tasol yumi ken mekim wankain tok long ol papa bilong ol pikinini i no winim yet 13 krismas na ol pikinini i no winim 3-pela krismas. Maski planti i no ting olsem, ol yangpela pikinini tu i mas i gat papa i stap wantaim ol na mekim ol samting bilong helpim ol.

Yumi inap kisim wanem skul moa long pasin bilong kamap gutpela papa? Husat i stap gutpela piksa tru long ol papa? Yumi inap kisim wanem save long ol? Laspela hap bilong dispela stori bai skelim ol dispela askim.

[Futnot]

[Ol Piksa long pes 7]

Ol papa husat i save givim ol samting ol pikinini bilong ol i mas kisim

Franciszek na famili bilong em

Luis na famili bilong em

Takeshi na famili bilong em