Jon i Laik Save Long Jisas

Inap wanpela yia pinis Jon Bilong Baptais i stap long kalabus. Tasol em i save harim stori bilong ol gutpela wok Jisas i mekim. Ating Jon i amamas tru taim ol disaipel bilong em i tokim em olsem Jisas i bin kirapim bek pikinini man bilong wanpela wido long Nain. Tasol Jon i laik bai Jisas yet i tokim em long as na em i mekim ol dispela wok. Olsem na em i salim tupela disaipel bilong em i go long Jisas. Ol i go bilong mekim wanem? Ol i go askim Jisas, olsem: “Yu dispela Man i Mas i Kam, o mipela i mas wetim narapela?”—Luk 7:19.

Olsem wanem? Yu ting dispela em narakain askim? Jon em man husat i givim bel long mekim wok bilong God. Klostu tupela yia i go pinis, taim em i baptaisim Jisas, em i lukim spirit bilong God i kam daun long Jisas, na em i harim nek bilong God i tok em i amamas long Jisas. I no gat risen long ting olsem bilip bilong Jon i no strong moa, nogat. Long wanem, taim ol i kam givim askim long Jisas, Jisas i litimapim nem bilong Jon. Tasol sapos Jon i no gat tupela tingting, orait wai na em i givim dispela askim?

Ating Jon i laik harim Jisas yet i tokaut klia olsem em i Mesaia. Na dispela bai strongim tru Jon, long wanem, em i stap long kalabus. I gat gutpela risen na Jon i givim dispela askim. Em i save long ol tok profet bilong Baibel olsem Man God i Makim bai mekim wok king na kisim bek ol man. Tasol planti mun bihain long Jisas i baptais, Jon i stap long kalabus. Olsem na Jon i laik save sapos narapela man i mas kam bihain long Jisas, olsem senis bilong em bilong inapim olgeta tok profet i stori long samting Mesaia bai mekim.

Jisas i no tok stret long ol disaipel bilong Jon olsem, ‘Mi tasol mi dispela Man,’ nogat. Jisas i oraitim planti manmeri em ol i gat kain kain sik na dispela i kamapim klia olsem God i givim strong long em. Na em i tokim ol disaipel: “Yutupela go tokim Jon long olgeta samting yutupela i harim na lukim. Ol aipas i lukluk gen, na ol lek nogut i wokabaut, na ol lepraman i kamap klin na ol yaupas i harim toktok, na ol man i dai pinis ol i kirap bek, na ol rabisman i kisim gutnius.”—Matyu 11:4, 5.

Ating Jon i mekim dispela askim, long wanem, em i ting Jisas bai mekim bikpela wok moa winim ol wok em i mekim na em bai helpim em long lusim kalabus. Tasol Jisas i tokim Jon long em i no ken ting em bai lukim sampela moa mirakel winim ol samting em i mekim pinis.

Taim ol disaipel bilong Jon i go pinis, Jisas i tokim ol manmeri olsem Jon i no wanpela profet tasol, nogat. Em i “man bilong autim tok” bilong Jehova olsem Malakai 3:1 i tok profet long en. Na tu, Malakai 4:5, 6 i kolim em olsem profet Elaija. Jisas i tok moa: “Mi tok tru long yupela: Namel long olgeta man i kamap long graun, i no gat wanpela bilong ol i winim Jon Bilong Baptais. Tasol man i stap liklik tru long Kingdom bilong heven, em i winim Jon.”—Matyu 11:11.

Jisas i tok man i stap liklik tru long Kingdom bilong heven, em i winim Jon. Dispela i makim olsem Jon bai i no stap long Kingdom bilong heven, nogat. Jon i redim rot bilong Jisas, tasol em i dai paslain long Krais i opim rot long ol man bai mekim wok king long heven. (Hibru 10:19, 20) Jon em i wanpela gutpela profet bilong God na em bai stap long graun aninit long Kingdom Bilong God.