I Stap na Wok Bilong Jisas

Aiwara i Pinis na Bikpela Amamas i Kamap

TAIM Jairus i lukim Jisas i oraitim wanpela meri i save karim blut oltaim, ating em i bilip moa yet olsem Jisas i gat strong bilong wokim ol mirakel. Jairus i bin askim Jisas long i go wantaim em na helpim pikinini meri bilong em i gat 12-pela krismas. Em i laikim tru dispela pikinini na klostu pikinini i laik i dai. Tasol taim ol i wokabaut i go long haus bilong Jairus long taun Kaperneam o klostu long dispela taun, wanpela meri i holim klos bilong Jisas na sik bilong em i pinis.

Jisas i toktok yet wantaim dispela meri, na sampela man i kam na isi isi ol i tokim Jairus: “Pikinini bilong yu i dai pinis. Maski givim hevi moa long tisa.”

Dispela tok i bagarapim tru bel bilong Jairus! Tingim: Dispela man i gat biknem long ples bilong em, tasol taim em i harim olsem pikinini meri bilong em i dai pinis, em i no inap mekim wanpela samting. Jisas i bin harim dispela tok, olsem na em i strongim Jairus, na em i tok: “Yu no ken pret. Yu mas bilip tasol.”

Jairus em i bel hevi tru, olsem na Jisas i go wantaim Jairus long haus bilong em. Taim ol i kamap long haus, ol i harim ol manmeri i krai i stap. Dispela bikpela lain i bung na ol i bel hevi tru na ol i wok long paitim bros bilong ol. Taim Jisas i go insait long haus, em i tokim ol: “Bilong wanem yupela i krai na mekim bikpela nois? Dispela pikinini em i no i dai. Em i slip tasol.”

Taim ol i harim dispela tok bilong Jisas, ol i lap nogut tru long em, long wanem ol i save dispela pikinini i dai pinis. Tasol Jisas i tok em i slip, long wanem em i laik helpim ol long save, Jehova i givim strong long em na em inap kirapim bek man i dai pinis, wankain olsem yumi inap kirapim man long slip.

Nau Jisas i tokim olgeta man long lusim haus. Pita na Jon na Jems na papamama bilong pikinini tasol i stap long haus wantaim em. Em i kisim dispela 5-pela tasol i go insait long rum pikinini i stap long en. Em i holim han bilong pikinini na i tok: “Talita, kum.” Insait bilong dispela tok i olsem: “Liklik meri, mi tokim yu, yu kirap.” Na kwiktaim dispela liklik meri i kirap na wokabaut! Taim papamama bilong em i lukim dispela, ol i amamas nogut tru.

Jisas i tokim Jairus na meri bilong em long givim sampela kaikai long dispela pikinini, na bihain em i tok strong long ol i no ken tokim wanpela man long dispela samting. Tasol stori bilong dispela samting i go kamap long olgeta hap bilong dispela ples. Dispela em i namba tu taim Jisas i bin kirapim bek man i dai pinis. Matyu 9:​18-26; Mak 5:​35-43; Luk 8:​41-56.

◆ Jairus i harim wanem tok? Jisas i strongim bel bilong em olsem wanem?

◆ Taim ol i kamap long haus bilong Jairus, wanem samting i kamap?

◆ Bilong wanem Jisas i tok dispela pikinini i slip tasol?

◆ Husat ol 5-pela i stap wantaim Jisas na ol i lukim liklik meri i kirap bek?