Bihainim Yet Nambawan Gutpela Rot!
“Sapos yumi stap laip, o sapos yumi dai, yumi bilong Bikpela tasol.”—RO. 14:8.
1. Jisas i givim wanem skul long pasin bilong bihainim nambawan gutpela rot?
JEHOVA i laik bai yumi bihainim nambawan gutpela rot. Ol man inap bihainim kain kain rot, tasol i gat wanpela rot tasol i nambawan tru. Dispela nambawan gutpela rot em pasin bilong bihainim Tok Bilong God na kisim skul long Pikinini bilong em, Jisas Krais. Jisas i skulim ol disaipel bilong em long lotuim God long holi spirit na long pasin i tru, na em i givim wok long ol long kamapim ol disaipel. (Mt. 28:19, 20; Jo. 4:24) Taim yumi bihainim ol tok bilong Jisas, bai yumi amamasim Jehova na Em bai mekim gut long yumi.
2. Long taim bilong ol aposel, planti man i mekim wanem taim ol i harim tok bilong Kingdom? Pasin bilong bihainim “Rot bilong Bikpela” i makim wanem samting?
2 Taim ol manmeri, em ‘bel bilong ol i gutpela tru bilong kisim laip oltaim,’ i kamap bilipman na kisim baptais, i gat as tru na yumi tokim ol, “Bihainim yet nambawan gutpela rot!” (Ap. 13:48) Long taim bilong ol aposel, planti tausen manmeri bilong ol narapela narapela kantri ol i kisim tok i tru, na long rot bilong baptais ol i kamapim long ples klia olsem ol i givim bel tru long lotuim God. (Ap. 2:41) Ol dispela disaipel bilong pastaim ol i bihainim “Rot bilong Bikpela.” (Ap. 9:2; 19:23) Dispela tok i stret, long wanem, ol man i bin kamap disaipel bilong Krais ol i larim bilip bilong ol long Jisas Krais i stiaim olgeta samting ol i mekim na ol i bihainim pasin bilong em.—1 Pi. 2:21.
3. Bilong wanem lain bilong Jehova i kisim baptais? Insait long 10-pela yia i go pinis, hamas i bin kisim baptais?
3 Long dispela taim bilong las de, wok bilong kamapim disaipel i go bikpela na nau ol i mekim long 230 kantri samting. Long 10-pela yia i go pinis, winim 2,700,000 manmeri i wokim disisen bilong mekim wok bilong Jehova na ol i kisim baptais bilong makim olsem ol i dediket pinis long em. Em olsem 5,000 manmeri long olgeta wan wan wik! Ol i wokim disisen long kisim baptais, long wanem, ol i laikim tru God, ol i save long tok bilong Baibel, na ol i bilip long ol tok Baibel i skulim ol long en. Baptais i bikpela samting tru long laip bilong yumi, long wanem, dispela em kirap bilong pasin bilong yumi long pas gut wantaim Jehova. Na tu, baptais i kamapim long ples klia olsem yumi bilip tru olsem Jehova bai helpim yumi long mekim gut wok bilong em, wankain olsem em i bin helpim ol wokman bilong em long bipo long bihainim rot em i makim.—Ais. 30:21.
Bilong Wanem Yu Mas Kisim Baptais?
4, 5. Kolim sampela blesing na gutpela samting bai kamap sapos yu kisim baptais.
4 Ating yu bin kisim save long God, senisim pasin bilong yu, na nau yu kamap wanpela pablisa i no baptais yet. Mipela i amamas long yu mekim olsem. Tasol olsem wanem? Yu dediket pinis long God long rot bilong beten na yu tingting long kisim baptais? Long stadi bilong yu long Baibel, ating yu kisim pinis save olsem nambawan samting yu mas mekim em long litimapim nem bilong Jehova, na yu no ken tingting tasol long amamasim yu yet na bungim planti mani kago samting. (Ritim Song 148:11-13; Luk 12:15.) Olsem na yu inap kisim wanem ol blesing na gutpela samting sapos yu kisim baptais?
5 Taim yu dediket pinis olsem wanpela Kristen, yu bai gat gutpela samting tru yu inap mekim na i no gat narapela samting i winim dispela. Yu bai amamas, long wanem, yu mekim laik bilong God. (Ro. 12:1, 2) Holi spirit bilong Jehova bai helpim yu long kamapim ol pasin em God i save laikim, olsem pasin bilong i stap bel isi na bilip. (Ga. 5:22, 23) God bai harim ol beten bilong yu na blesim hatwok bilong yu long mekim i stap bilong yu i stret wantaim Tok bilong em. Bai yu amamas long wok bilong yu long autim tok, na taim yu mekim ol samting olsem God i laikim, dispela bai strongim tingting bilong yu long kisim laip oltaim. Na tu, taim yu dediket na kisim baptais, dispela bai kamapim ples klia olsem yu gat laik tru long kamap wanpela Witnes Bilong Jehova.—Ais. 43:10-12.
6. Baptais bilong yumi i kamapim klia wanem samting?
6 Taim yumi dediketim yumi yet long God na kisim baptais, yumi tokaut olsem yumi bilong Jehova. Aposel Pol i tok: “Yumi save, namel long yumi i no gat wanpela man i save ting laip bilong en em i samting bilong em yet. Na i no gat wanpela em i save ting dai bilong en em i samting bilong em yet. Nogat. Sapos yumi stap laip, em i samting bilong Bikpela. Na sapos yumi dai, em tu i samting bilong Bikpela. Olsem na sapos yumi stap laip, o sapos yumi dai, yumi bilong Bikpela tasol.” (Ro. 14:7, 8) God i soim rispek long yumi long rot bilong larim yumi i stap fri long makim rot yumi laik bihainim. Taim yumi makim klia olsem yumi laik bihainim dispela rot bilong laip, long wanem, yumi laikim tru God, yumi mekim bel bilong em i amamas. (Snd. 27:11) Baptais bilong yumi i makim olsem yumi dediket pinis long God na yumi tokaut klia olsem Jehova em i Man Bilong Bosim yumi. Dispela i soim olsem yumi stap long sait bilong Jehova long dispela bikpela tok i bin kamap long husat i nambawan bos. (Ap. 5:29, 32) Na sapos yumi mekim olsem, Jehova i stap long sait bilong yumi. (Ritim Song 118:6.) Na tu, baptais i opim rot long yumi ken kisim planti narapela blesing bilong spirit long nau na long bihain.
Stap Insait Long Gutpela Lain Brata
7-9. (a) Jisas i givim wanem tok promis long ol manmeri i lusim olgeta samting na bihainim em? (b) Olsem wanem tok promis bilong Jisas long Mak 10:29, 30 i wok long kamap tru?
7 Aposel Pita i tokim Jisas: “Lukim. Mipela i bin lusim olgeta samting na bihainim yu. Bai mipela i kisim wanem samting?” (Mt. 19:27) Pita i laik save, bihain em yet na ol narapela disaipel bilong Jisas bai kisim wanem samting. Ol i bin lusim planti samting bambai ol i ken givim bel tru long autim tok bilong Kingdom. (Mt. 4:18-22) Jisas i givim wanem tok promis long ol?
8 Long stori bilong dispela samting em Mak i raitim, Jisas i kamapim olsem ol disaipel bilong em bai stap insait long wanpela lain brata bilong spirit. Em i tok: “Olgeta man i bin ting long mi na long gutnius na i lusim haus o brata o susa o mama o papa o pikinini o gaden, bai ol i kisim 100 moa. Taim ol i stap yet long dispela graun God bai i givim ol planti samting tru, i winim ol samting ol i bin i gat bipo. Ol bai i kisim planti haus na planti brata na planti susa na planti mama na planti pikinini na planti gaden. Na tu, bai sampela man i mekim pasin nogut long ol. Na long taim i laik kamap bihain ol bai i kisim laip i stap gut oltaim oltaim.” (Mk. 10:29, 30) Sampela Kristen long taim bilong ol aposel, olsem Lidia, Akwila, Prisila, na Gaius, ol i sampela bilong ol lain i bin givim “haus” long ol wanbilip, na ol i kamap olsem “brata o susa o mama” bilong ol, olsem Jisas i bin tok promis long en.—Ap. 16:14, 15; 18:2-4; 3 Jo. 1, 5-8.
9 Tok bilong Jisas i gat bikpela truim long nau. Ol “gaden” em ol disaipel i lusim, dispela i makim wok mani ol misineri, lain bilong Betel, ol intenesenel sevan, na sampela narapela i redi long lusim bilong mekim wok bilong Kingdom long planti kantri. Planti brata na sista i bin lusim ol haus bilong ol bambai ol i no holim planti samting bilong skin, na yumi amamas long harim ol ekspiriens bilong ol i soim olsem Jehova i lukautim ol na ol i kisim amamas long mekim wok bilong em. (Ap. 20:35) Na tu, olgeta wokman bilong Jehova em ol i baptais pinis ol i insait long wanpela lain brata Kristen i stap long olgeta hap na ol i kisim ol gutpela samting, long wanem, ol i “wok yet long painim kingdom pastaim na stretpela pasin bilong God.”—Mt. 6:33, NW.
Stap Gut Long Ples Hait Bilong God
10, 11. Ples hait bilong God i makim wanem samting? Olsem wanem yumi inap i stap gut long dispela ples hait?
10 Dediket na baptais i kamapim narapela gutpela blesing—yumi inap “i stap klostu long God I Gat Olgeta Strong,” olsem stap long ples hait bilong God. (Ritim Song 91:1.) Dispela ples i makim wanpela ples we man i ken i stap gut na i no gat wanpela samting inap nogutim em long ol samting bilong spirit. Ol man em ol i no kliagut long ol samting bilong spirit na i no save bilip long God, ol i no save long dispela ples. Taim yumi bihainim dediket bilong yumi na yumi bilip tru long Jehova, i olsem yumi tokim em: “Yu save banisim mi na yu was gut long mi. Yu God bilong mi. Mi save bilip long yu.” (Sng. 91:2) God Jehova i kamap wasman tru bilong yumi. (Sng. 91:9) I no gat narapela gutpela ples i winim dispela, a?
11 Taim yumi stap long dispela ples hait bilong Jehova, dispela i makim tu olsem yumi kisim blesing long pas gut wantaim em. Dispela i kirap long taim yumi dediket na baptais. Bihain, yumi mekim ol samting bilong pas gut moa wantaim God long rot bilong stadi long Baibel, beten strong, na bihainim gut ol tok bilong em. (Jem. 4:8) Jisas i pas gut tru wantaim Jehova, na em i bilip strong long Man Bilong Wokim olgeta samting, bilip bilong em i no slek liklik. (Jo. 8:29) Olsem na long olgeta taim yumi mas bilip olsem Jehova i laik helpim yumi long truim dediket bilong yumi, na em inap long helpim yumi. (Sav. 5:4) Ol samting bilong spirit em God i bin redim long lain bilong em i kamapim klia tru olsem em i laikim tru yumi na em i laik bai yumi mas mekim gut wok bilong em.
Amamas Long Paradais Bilong Spirit
12, 13. (a) Paradais bilong spirit i makim wanem samting? (b) Olsem wanem yumi inap helpim sampela nupela?
12 Na tu, dediket na baptais i opim rot long yumi long stap long wanpela gutpela ples paradais bilong spirit. Dispela i makim olsem yumi na ol wanbilip bilong yumi i stap narapela kain long ol samting bilong spirit, olsem yumi stap wanbel wantaim God Jehova na wantaim ol narapela wanbilip. (Sng. 29:11; Ais. 54:13) Ol manmeri bilong dispela graun i no gat wanpela gutpela paradais bilong spirit olsem yumi. Dispela paradais bilong spirit i kamap ples klia moa yet long taim bilong ol kibung intenesenel, we ol brata na sista bilong yumi long planti kantri, tokples, na lain, ol i kam bung wantaim na ol i stap bel isi, wanbel, na narapela i laikim tru narapela.
13 Yumi stap long paradais bilong spirit na dispela i narapela kain long ol samting nogut tru bilong dispela graun long nau. (Ritim Aisaia 65:13, 14.) Long rot bilong autim tok bilong Kingdom, yumi gat wok long singautim ol narapela long kam long dispela paradais bilong spirit. Na tu, yumi amamas long helpim ol manmeri em nau tasol ol i kirap bung wantaim kongrigesen na taim yumi skulim ol long mekim wok autim tok, dispela bai helpim ol. Sapos ol elda i makim yumi, yumi inap mekim gutpela wok bilong helpim sampela long ‘kliagut long Rot bilong God,’ wankain olsem Akwila na Prisila i bin helpim Apolos.—Ap. 18:24-26.
Wok Yet Long Kisim Skul Long Jisas
14, 15. I gat wanem ol as na yumi mas wok yet long kisim skul long Jisas?
14 I gat as tru long yumi kisim skul yet long Jisas. Taim em i no kam yet long graun, Jisas i bin wok planti milion yia wantaim Papa bilong em. (Snd. 8:22, 30, 31) Em i bin save olsem nambawan gutpela rot long bihainim em long mekim wok bilong God na autim tok i tru. (Jo. 18:37) Jisas i save olsem sapos em i bihainim narapela rot, dispela i olsem em i tingim em yet na ol samting bilong nau tasol. Em i save olsem ol bikpela traim bai painim em na ol birua bai kilim em i dai. (Mt. 20:18, 19; Hi. 4:15) Olsem Man i stap gutpela piksa bilong yumi ken bihainim, em i skulim yumi long rot bilong i stap gut long God.
15 Bihain liklik long Jisas i kisim baptais, Satan i traim Jisas long lusim nambawan gutpela rot—tasol Satan i no inap. (Mt. 4:1-11) Dispela i skulim yumi olsem maski Satan i mekim wanem, yumi inap holimpas pasin bilong i stap gut long God. Ating Satan i tingting strong long pulim ol man i laik kisim baptais na ol man i baptais nupela. (1 Pi. 5:8) Famili bilong yumi inap birua long yumi, long wanem, ol i harim sampela tok kranki long ol Witnes Bilong Jehova na ol i ting ol i gat wok long helpim yumi. Maski i olsem, ol kain traim olsem i opim rot long yumi long kamapim ol gutpela pasin Kristen, olsem yumi soim rispek na bihainim gutpela pasin taim yumi bekim sampela askim na autim tok long ol man. (1 Pi. 3:15) Olsem na ol dispela samting i painim yumi inap kirapim tingting bilong sampela man long harim tok bilong yumi.—1 Ti. 4:16.
Bihainim Yet Nambawan Gutpela Rot!
16, 17. (a) Olsem Lo 30:19, 20 i kamapim, yumi mas mekim wanem 3-pela bikpela samting bilong kisim laip? (b) Olsem wanem Jisas, Jon, na Pol i strongim tok bilong Moses?
16 Inap olsem 1,500 yia paslain long Jisas i kam long graun, Moses i tokim ol Israel long makim nambawan gutpela rot long bihainim long taim bilong ol. Em i tok: “Orait i gat rot bilong i stap gut na rot bilong i dai. Long wanpela rot God bai i mekim gut long yupela, na long narapela rot bai yupela i painim bagarap. Orait nau yupela i mas makim wanem rot yupela i laik bihainim. Na bai mi singautim heven na graun long lukim yupela na save long wanem rot yupela i makim. Tasol mi laikim yupela i mas bihainim rot bilong i stap gut. Yupela i mas laikim tru God, Bikpela bilong yumi, na yupela i mas harim tok bilong en na bel tru long em oltaim.” (Lo 30:19, 20) Ol Israel i no bin stap gut long God, tasol 3-pela bikpela samting Moses i kolim bilong i stap laip, dispela i no senis. Jisas na sampela narapela i kolim gen ol dispela samting.
17 Namba wan, ‘yumi mas laikim tru God, Bikpela bilong yumi.’ Yumi kamapim olsem yumi laikim tru God taim yumi bihainim ol stretpela pasin bilong em. (Mt. 22:37) Namba tu, ‘yumi mas harim tok’ bilong Jehova long rot bilong stadi long Tok Bilong God na bihainim ol lo bilong em. (1 Jo. 5:3) Bilong mekim olsem yumi mas i go oltaim long ol miting Kristen, we ol i skelim ol tok bilong Baibel. (Hi. 10:23-25) Namba tri, ‘yumi mas bel tru long em oltaim.’ Maski wanem hevi i painim yumi, long olgeta taim yumi mas bilip long God na bihainim Pikinini bilong em.—2 Ko. 4:16-18.
18. (a) Long 1914, The Watch Tower i tok wanem long tok i tru? (b) Yumi mas ting olsem wanem long lait bilong tok i tru long nau?
18 Em wanpela gutpela blesing tru long bihainim tok i tru bilong Baibel! Long 1914, ol i kamapim dispela bikpela tok long The Watch Tower: “Yumi wanpela lain i kisim ol gutpela blesing na yumi stap amamas tru, a? God bilong yumi i save tingim tru yumi. Sapos wanpela man i save long wanpela samting i gutpela moa, orait larim em i kisim dispela samting. Sapos wanpela bilong yupela i painim samting i gutpela moa, plis tokim mipela. Mipela i no save long wanpela samting i gutpela moa, o i gutpela liklik, winim ol samting yumi painim long Tok Bilong God. . . . I no gat wanpela samting i ken stori gut long bel isi, amamas na blesing em pasin bilong save gut long tok i tru bilong God inap kamapim long bel na laip bilong yumi. Stori long Savetingting, Stretpela Pasin, Strong na Pasin Laikim bilong God i inapim tru laik bilong tingting na bel bilong yumi. I no gat wok long yumi painim yet dispela samting. Yumi laikim tasol wanpela samting moa; yumi laik bai dispela Stori i mas i stap klia moa long tingting bilong yumi.” (The Watch Tower, Disemba 15, 1914, pes 377-378) Amamas bilong yumi long lait bilong spirit na tok i tru i no senis. Tru tumas, nau yumi inap amamas moa long “wokabaut long lait Bikpela i givim long yumi.”—Ais. 2:5; Sng. 43:3; Snd. 4:18, 19.
19. Bilong wanem ol man i winim pinis ol mak bilong kisim baptais ol i no ken lusim taim?
19 Sapos yu laik “wokabaut long lait Bikpela i givim long yumi” tasol yu no dediket na baptais yet olsem Kristen, no ken lusim taim. Mekim olgeta samting yu mas mekim bilong inapim ol mak bilong Baibel long kisim baptais—em i nambawan gutpela rot long kamapim tenkyu bilong yumi long ol samting em God na Krais i bin mekim bilong helpim yumi. Givim nambawan gutpela samting bilong yu long Jehova—em laip bilong yu. Soim olsem yu tingting long mekim laik bilong God long rot bilong bihainim Pikinini bilong em. (2 Ko. 5:14, 15) Tru tumas, dispela em i nambawan gutpela rot long bihainim!
Bai Yu Bekim Olsem Wanem?
• Baptais bilong yumi i makim wanem samting?
• Dediket long God na baptais i kamapim wanem ol blesing?
• Bilong wanem em i bikpela samting long kisim skul long Jisas?
• Wanem samting bai helpim yumi long bihainim yet nambawan gutpela rot?
[Piksa long pes 25]
Baptais bilong yu i kamapim olsem yu makim nambawan gutpela rot long bihainim
[Ol Piksa long pes 26]
Yu stap long ples hait bilong God?