Kongrigesen i Mas Kamap Strong

‘Ol manmeri bilong sios ol i stap gut na kamap strong.’​—APOSEL 9:31.

 1. Yumi ken mekim wanem ol askim long “kongrigesen bilong God”?

LONG Pentikos bilong yia 33 C.E., Jehova i orait long ol disaipel bilong Krais i kamap wanpela nupela lain, “lain Israel tru bilong God.” (Galesia 6:16) Ol dispela Kristen God i bin makim Baibel i kolim ol tu olsem “kongrigesen bilong God.” (1 Korin 11:​22, NW) Tasol bilong kamap “kongrigesen bilong God,” wanem ol samting i insait long dispela? “Kongrigesen bilong God” i gat wanem wok? Ol i stretim dispela wok olsem wanem, maski ol lain bilong en i stap long wanem wanem hap bilong dispela graun? Na olsem wanem laip na pasin bilong yumi long stap amamas i insait long dispela samting?

2, 3. Jisas i tok wanem bilong soim olsem kongrigesen i gat wok ol i bin stretim gut?

² Olsem stadi i kamap paslain long dispela i kamapim, Jisas i tok profet long dispela kongrigesen bilong ol Kristen God i bin makim. Em i tokim aposel Pita: “Bai mi wokim sios bilong mi antap long dispela ston [Jisas Krais]. Na bai strong bilong Dai i no inap daunim dispela sios.” (Matyu 16:18) Na tu, taim Jisas i stap yet wantaim ol aposel, em i stori long wok bilong dispela kongrigesen na olsem wanem ol bai stretim dispela wok.

³ Long rot bilong tok na pasin bilong em, Jisas i lainim ol man olsem sampela long kongrigesen bai i go pas long wok. Ol bai mekim olsem long rot bilong mekim wok bilong helpim ol narapela. Krais i tok: “Yupela i save, ol man i save stap olsem ol hetman bilong ol arapela lain manmeri, ol i save strong tumas long bosim ol lain bilong ol. Na ol bikman bilong ol i save strong tumas long ol manmeri i mas bihainim olgeta tok bilong ol. Tasol dispela pasin i no ken i stap namel long yupela. Nogat. Man i laik i stap bikman namel long yupela, em i mas i stap wokman bilong yupela. Na man i laik i stap namba wan bilong yupela, em i mas i stap olsem wokboi nating bilong olgeta man.” (Mak 10:​42-​44) Tru tumas, ol lain insait long “kongrigesen bilong God” ol i no stap wanpis long wan wan hap bilong ol, na dispela i olsem wanpela kongrigesen. Nogat. Kongrigesen i gat wok ol i bin stretim gut, na ol lain insait long en i toktok gut na i wok gut wantaim.

4, 5. Olsem wanem yumi save kongrigesen i mas kisim skul long ol tok bilong Jehova?

⁴ Man i stap Het bilong dispela “kongrigesen bilong God” i tok olsem ol aposel na ol narapela husat i bin lainim ol tok bilong em, ol i gat wok long helpim ol narapela insait long kongrigesen. Ol i mas mekim wanem? Bikpela wok bilong ol i bilong skulim ol lain insait long kongrigesen long tok bilong Jehova. Bihain long Jisas i kirap bek, em i tokim Pita long ai bilong ol narapela aposel olsem: “Saimon, pikinini bilong Jon, ating yu laikim mi moa yet?” Pita i tok: “Yes, Bikpela, yu save, mi laikim yu.” Orait Jisas i tokim em: “Yu lukautim ol pikinini sipsip bilong mi long kaikai samting. . . . Yu was long ol sipsip bilong mi. . . . Yu lukautim ol sipsip bilong mi long kaikai samting.” (Jon 21:​15-​17) Em i wanpela bikpela wok tru!

⁵ Tok bilong Jisas i soim olsem ol man i bung insait long kongrigesen ol i olsem ol sipsip insait long wanpela banis sipsip. Ol dispela sipsip​—ol man, na meri, na pikinini Kristen​—ol i mas kisim kaikai bilong spirit na i mas i gat ol wasman bilong lukautim ol. Na tu, Jisas i tokim lain bilong em long skulim ol narapela na kamapim ol disaipel, olsem na olgeta nupela man i kamap sipsip bilong em ol i mas kisim skul long pasin bilong mekim dispela wok God i bin givim long ol.​—Matyu 28:​19, 20.

 6. Olsem wanem ol i stretim ol wok insait long nupela “kongrigesen bilong God”?

⁶ Taim “kongrigesen bilong God” i kamap, ol lain insait long en i bung wantaim long olgeta taim bilong kisim skul na bilong narapela i ken strongim bel bilong narapela. Baibel i tok: “Ol manmeri i strong long harim tok bilong ol aposel, na long helpim ol brata, na long kam bung na kaikai wantaim, na long beten.” (Aposel 2:​42, 46, 47) Narapela bikpela samting Baibel i stori long en, em sampela man i winim mak ol i kisim wok bilong helpim ol narapela long ol samting bilong skin. Ol i no makim ol long mekim dispela wok long wanem ol i bin kisim bikpela skul, o ol i gat save long mekim sampela wok. Nogat. Ol dispela man i gat ‘holi spirit na gutpela save.’ Wanpela bilong ol em Stiven, na Baibel i tok olsem em i “man i gat strongpela bilip, na Holi Spirit i pulap long em.” I gat ol kongrigesen na dispela i mekim na “tok bilong God i go nabaut long olgeta hap. Na planti manmeri moa i kamap disaipel long Jerusalem.”​—Aposel 6:​1-7.

Ol Man God i Mekim Wok Long Ol

7, 8. (a) Ol aposel na ol hetman long Jerusalem i stap olsem wanem samting long taim bilong ol Kristen long bipo? (b) Taim ol bratasista i kisim tok i kam long rot bilong kongrigesen, dispela i kamapim wanem samting?

⁷ Ol aposel i go pas long ol wok bilong kongrigesen long bipo, tasol i gat ol narapela man tu i mekim dispela wok. Wanpela taim, Pol na ol poroman bilong em i go bek long Antiok bilong Siria. Aposel 14:27 i tok: “Tupela i kamap pinis, orait tupela i singautim ol manmeri bilong sios i kam bung. Na tupela i tokim ol long olgeta samting God i bin mekim long han bilong tupela.” Taim ol i stap yet wantaim dispela kongrigesen, wanpela askim i kamap, olsem ol man bilong ol arapela lain i kamap bilipman ol i mas katim skin o nogat. Bilong stretim dispela tok, ol i salim Pol na Barnabas “i go long Jerusalem na stretim tok wantaim ol aposel na ol hetman” husat i stap olsem lain bilong bosim ol Kristen.​—Aposel 15:​1-3.

⁸ Elda Kristen, Jems, em brata bilong Jisas tasol i no wanpela aposel, em i bosim bung taim “ol aposel na ol hetman ol i bung bilong stretim dispela tok.” (Aposel 15:6) Ol i skelim gut dispela samting na holi spirit i helpim ol, na bihain ol i pasim tok i stret wantaim buk bilong God. Ol i raitim long pas dispela tok ol i bin pasim na salim i go long ol kongrigesen. (Aposel 15:​22-​32) Ol lain i kisim dispela tok ol i orait long en na i bihainim. Dispela i kamapim wanem samting? Dispela i strongim bilip na bel bilong ol brata na sista. Baibel i tok: “Bilip bilong ol manmeri bilong ol sios i kamap strong moa, na namba bilong ol i go bikpela moa long olgeta de.”​—Aposel 16:5.

 9. Baibel i givim wanem ol wok long ol man Kristen i winim mak?

⁹ Tasol olsem wanem ol kongrigesen i ken ron gut? Tingim ol kongrigesen long ailan Krit. Planti man i stap long dispela hap i gat nem nogut, tasol sampela i senisim pasin bilong ol na i kamap Kristen tru. (Taitus 1:​10-​12; 2:​2, 3) Ol i stap long narapela narapela taun, na olgeta i stap longwe long lain bilong bosim ol Kristen long Jerusalem. Tasol dispela i no wanpela bikpela hevi, long wanem, ol i makim “ol hetman” long olgeta kongrigesen i stap long Krit, olsem ol i mekim long ol narapela hap tu. Ol dispela man i winim ol mak em Baibel i kolim. Ol i makim ol long kamap elda, o wasman, em ol inap ‘skulim ol manmeri long olgeta tok tru na kirapim bel bilong ol long bihainim tok, na stretim bek tingting bilong ol man i gat narapela tingting.’ (Taitus 1:​5-9; 1 Timoti 3:​1-7) Ol narapela strongpela man i winim mak bilong helpim kongrigesen ol i mekim wok kongrigesen sevan, o dikon.​—1 Timoti 3:​8-​10, 12, 13.

10. Olsem Matyu 18:​15-​17 i kamapim, ol wokman bilong God i mas stretim ol bikpela hevi olsem wanem?

¹⁰ Tok bilong Jisas i soim olsem bai i gat ol dispela kain man bilong lukautim kongrigesen. Tingim tok bilong Matyu 18:​15-​17 we Jisas i tok ol hevi inap kamap namel long tupela wokman bilong God, taim narapela i mekim sampela rong long narapela. Man em narapela i bin rongim, em i mas go long man i rongim em na “stretim tok wantaim em.” Em i mekim olsem taim tupela tasol i stap. Sapos dispela samting i no stretim hevi, orait em i ken singautim wanpela o tupela man husat i save long dispela hevi long i go wantaim em bilong stretim hevi. Tasol olsem wanem sapos hevi i stap yet? Jisas i tok: “Sapos em i no laik harim tok bilong ol, orait yu mas tokim ol manmeri bilong sios [“kongrigesen,” NW]. Na sapos em i no laik harim tok bilong ol tu, orait yu mas lukim em i olsem wanpela haiden na olsem man bilong kisim takis.” Taim Jisas i mekim dispela tok, ol Juda i stap yet olsem “kongrigesen bilong God,” olsem na pastaim dispela tok bilong em i makim ol.a Tasol taim kongrigesen Kristen i kamap, tok bilong Jisas i go long ol. Dispela em i narapela samting i soim olsem lain bilong God i gat ol brata ol i makim insait long kongrigesen bilong strongim na stiaim olgeta wan wan Kristen.

11. Olsem wanem ol elda i insait long wok bilong stretim ol hevi?

¹¹ I stret ol hetman, o wasman, i stap olsem maus bilong kongrigesen taim ol i stretim ol hevi o taim ol i helpim ol man i bin mekim sin. Dispela i stret wantaim ol mak ol elda i mas winim olsem Taitus 1:9 i kolim. Tru, ol elda i gat sin, olsem Taitus, em Pol i bin salim em i go long ol kongrigesen bilong “stretim olgeta hap wok i no stret yet.” (Taitus 1:​4, 5) Long nau, ol man em ol brata i tingting long makim ol i kamap elda, ol i mas kamapim klia bilip bilong ol na pasin bilong givim bel long God, na bihain ol brata i ken makim ol. Olsem na i gat as na ol narapela insait long kongrigesen inap bilip long wok bilong ol elda long stiaim na bosim ol.

12. Ol elda i gat wanem wok bilong mekim insait long kongrigesen?

¹² Pol i tok long ol elda bilong kongrigesen Efesus olsem: “Yupela i mas was gut long yupela yet, na long olgeta manmeri bilong sios bilong God, em ol dispela manmeri em i bin baim long blut bilong Pikinini bilong em yet. Na Holi Spirit i makim yupela i stap wasman bilong ol dispela sipsip bilong God.” (Aposel 20:28) Na i wankain long nau tu, ol i makim ol wasman long “i stap wasman bilong ol dispela sipsip bilong God.” Ol i mas mekim dispela wok long pasin laikim, ol i no ken stap olsem ol bikman na daunim ol sipsip. (1 Pita 5:​2, 3) Ol wasman i mas wok strong long strongim na helpim “olgeta manmeri bilong sios bilong God.”

Pas Gut Wantaim Kongrigesen

13. Sampela taim, wanem samting inap kamap insait long kongrigesen? Bilong wanem dispela samting inap kamap?

¹³ Ol elda na olgeta narapela insait long kongrigesen i gat sin, olsem na sampela taim ol tingting kranki o hevi i save kamap, olsem i bin kamap long bipo taim sampela aposel i stap yet. (Filipai 4:​2, 3) Wanpela wasman o narapela man inap mekim sampela tok em yumi ting i hatpela tok, o tok nogut, o tok i no tru olgeta. O yumi inap ting wanpela pasin i brukim lo bilong Baibel i kamap, na maski ol elda i save long dispela samting, i luk olsem ol i no stretim dispela hevi. Ating ol i bin skelim dispela samting o ol i wok long skelim long pasin Baibel i makim, na ol i tingim ol samting tru tru i bin kamap, em ol samting yumi no save long en. Tasol maski sampela pasin i no stret i wok long kamap, tingim dispela: Inap sampela hap taim, wanpela bikpela rong i bin stap insait long kongrigesen Korin, em wanpela kongrigesen Jehova i lukautim. Bihain, em i mekim na kongrigesen i stretim dispela man. (1 Korin 5:​1, 5, 9-​11) Yumi inap askim yumi yet olsem, ‘Sapos mi bin stap long Korin long dispela taim bipo, mi bai mekim wanem taim kongrigesen i no stretim yet dispela hevi?’

14, 15. Bilong wanem sampela i no bihainim moa Jisas? Dispela i lainim yumi long wanem samting?

¹⁴ Tingim narapela samting inap kamap insait long kongrigesen. Ating wanpela brata i hatwok long kliagut na bilip long wanpela tok bilong Baibel. Ating em i bin mekim wok painimaut long Baibel na ol buk na nius em inap kisim long rot bilong kongrigesen, na em i bin askim ol strongpela Kristen, ol elda tu, long helpim em. Tasol em i hatwok yet long kliagut o bilip long dispela tok. Em inap mekim wanem? Wankain samting i bin kamap wanpela yia paslain long taim Jisas i dai. Em i tok em i “bret bilong laip” na man i mas ‘kaikai bodi bilong Pikinini Bilong Man, na dringim blut bilong em’ bambai em i ken kisim laip oltaim. Dispela tok i bagarapim bel bilong sampela disaipel bilong em. Planti disaipel i no laik painim as bilong dispela tok o bilip na wet long Jehova bai i stretim dispela samting, nogat. Ol i “no wokabaut moa wantaim [Jisas].” (Jon 6:​35, 41-​66) Orait tingim gen, sapos yumi bin stap long dispela taim, bai yumi mekim wanem?

¹⁵ Long nau, sampela i no bung moa wantaim kongrigesen, ol i ting ol yet bai lotuim God. Ol inap tok olsem wanpela i bin bagarapim bel bilong ol, o ol i ting kongrigesen i no bin stretim wanpela pasin nogut, o ol i no inap bilip long wanpela tok bilong Baibel. Yu ting ol i bihainim savetingting? Tru, olgeta wan wan Kristen yet i mas pas gut wantaim God, tasol God i mekim wok long kongrigesen i stap long olgeta hap, olsem em i bin mekim long taim bilong ol aposel. Na tu, Jehova i mekim wok long ol kongrigesen long taim bilong ol aposel na i blesim ol. Em i stretim rot na bai i gat ol elda na kongrigesen sevan bilong helpim ol kongrigesen. Em i save mekim olsem long nau tu.

16. Sapos wanpela i tingting long lusim kongrigesen, em i mas tingim wanem samting?

¹⁶ Sapos wanpela Kristen i ting em i pas gut wantaim God na dispela em inap, em i givim baksait long samting God i bin putim. Dispela samting em kongrigesen bilong olgeta hap na olgeta wan wan kongrigesen bilong lain bilong God. Kristen hia inap stap wanpis na lotuim God o bung wantaim sampela tasol, tasol bilong wanem Jehova i stretim rot na bai i gat ol elda na kongrigesen sevan bilong kongrigesen? Taim Pol i raitim pas long kongrigesen long Kolosi na i tokim ol long ritim dispela pas long Laodisia tu, em i toktok long ol i mas “sanap strong long [Krais], olsem diwai i sanap strong long graun.” Ol lain insait long kongrigesen​—i no ol man i stap wanpis​—ol bai kisim dispela helpim.​—Kolosi 2:​6, 7; 4:16.

Strongpela Pos i Karim Tok i Tru

17. Tok i stap long 1 Timoti 3:15 i lainim yumi long wanem samting long kongrigesen?

¹⁷ Long namba wan pas aposel Pol i raitim long elda Kristen Timoti, em i kolim ol mak ol elda na kongrigesen sevan bilong ol kongrigesen i mas winim. Bihain stret long dispela, Pol i tok long “sios [“kongrigesen,” NW] bilong God bilong i stap oltaim,” em i tok kongrigesen em i “strongpela pos i karim tok tru.” (1 Timoti 3:15) Kongrigesen bilong lain Kristen God i bin makim i bin stap olsem dispela kain strongpela pos long taim bilong ol aposel. Na tru tumas, nambawan rot bilong olgeta wan wan Kristen long kisim tok i tru em long rot bilong kongrigesen i stap long hap bilong ol. Em ples we ol inap kisim save long tok i tru na harim ol tok i strongim tok i tru, na em i ples we ol i ken kisim strong.

18. Bilong wanem ol miting bilong kongrigesen i bikpela samting?

¹⁸ Na olsem tasol, kongrigesen Kristen i stap long olgeta hap em i lain bilong God, olsem “strongpela pos i karim tok tru.” Pasin bilong yumi long go oltaim long ol miting na bekim tok long ol miting, em i nambawan bikpela rot bilong strongim pasin bilong yumi long pas gut wantaim God, na kisim helpim bilong mekim laik bilong em. Taim Pol i raitim pas long kongrigesen i stap long Korin, em i toktok long ol tok ol i kamapim long ol miting. Em i tok em i laik bai ol tok ol i mekim long ol miting i klia na ol man inap kisimgut bambai ol i ken kamap strong. (1 Korin 14:​12, 17-​19) Yumi long nau inap kamap strong sapos yumi bilip olsem God Jehova i as bilong wok bilong kamapim ol kongrigesen na em i sapotim dispela wok.

19. Bilong wanem yu laik tok tenkyu tru long kongrigesen bilong yu?

¹⁹ Tru tumas, sapos yumi laik kamap strongpela Kristen, yumi mas i stap insait long kongrigesen. Inap longpela taim pinis, kongrigesen i bin stap olsem banis bilong sakim ol bilip giaman, na God i bin mekim wok long en bilong inapim wok bilong autim gutnius bilong Kingdom bilong em long olgeta hap bilong graun. Tru tumas, God i bin kamapim planti bikpela wok long rot bilong kongrigesen Kristen.​—Efesus 3:​9, 10.

[Futnot]

Yu Inap Tingim?

• Bilong wanem yumi ken ting God i mekim wok long ol kongrigesen hia long graun?

• Maski ol elda i gat sin, ol i save mekim wanem bilong helpim kongrigesen?

• Olsem wanem kongrigesen i save helpim yu long kamap strong?

[Piksa long pes 26]

Ol aposel na ol hetman long Jerusalem i stap olsem lain i bosim ol Kristen

[Piksa long pes 28]

Ol elda na kongrigesen sevan i kisim skul bambai ol i ken mekim wok bilong ol insait long kongrigesen