Kisim Helpim Long Baibel Ritim Bilong Yu

 1. Wanem samting i soim olsem Ol Rait Holi i bikpela samting long Jisas?

PIKSAIM long tingting samting em ol manmeri i pilim taim ol i harim ol tok Jisas i mekim. Planti taim em i save kolim ol tok bilong Ol Rait Holi i stap long tingting bilong em! Ol fes tok Jisas i mekim bihain long em i kisim baptais na ol laspela tok em i mekim paslain long em i dai, em ol tok i kam long Ol Rait Holi.b (Lo 8:3; Sng. 31:5; Luk 4:4; 23:46) Insait long 3 na hap yia Jisas i mekim wok bilong em long graun, planti taim em i save ritim na kolim ol tok bilong Ol Rait Holi na kamapim insait bilong ol.​—Mat. 5:17, 18, 21, 22, 27, 28; Luk 4:16-20.

 2. Taim Jisas i wok long kamap bikpela, wanem samting i helpim em long save gut long tok bilong Ol Rait Holi? (Lukim fran pes piksa.)

² Long ol yia paslain long Jisas i kirap long mekim wok autim tok, planti taim em i bin ritim na harim Tok Bilong God. Long haus, em i save harim Maria na Josep i kamapim tok bilong Ol Rait Holi taim famili i stori wantaim long olgeta de.c (Lo 6:6, 7) Yumi save olsem Jisas i save go long sinagog long olgeta Sabat wantaim famili bilong em. (Luk 4:16) Taim em i stap long hap, ating em i putim gut yau taim ol man i ritim Ol Rait Holi. Bihain Jisas yet i lain long ritim dispela Ol Rait Holi. Dispela i mekim na Jisas i save gut long Ol Rait Holi na em i laikim ol dispela tok na larim ol i stiaim ol pasin bilong em. Olsem, tingim samting i bin kamap long tempel taim Jisas i gat 12-pela krismas tasol. Ol tisa em ol i save gut tru long Lo Bilong Moses, “ol i kirap nogut long save bilong [Jisas] na ol tok em i bekim long ol.”​—Luk 2:46, 47, 52.

 3. Yumi bai stori long wanem samting long dispela atikol?

³ Yumi tu i ken kisim save long Tok Bilong God na laikim tok bilong em taim yumi ritim Baibel long olgeta de. Tasol olsem wanem yumi ken kisim helpim long ol tok yumi ritim? Yumi ken kisim skul long tok Jisas i mekim long ol man i save gut long Lo, dispela i makim tu ol saveman bilong Lo, ol Farisi, na ol Sadyusi. Ol dispela hetman bilong lotu, planti taim ol i save ritim Ol Rait Holi, tasol ol i no kisim helpim long ol tok ol i ritim. Jisas i kamapim klia 3-pela samting em ol dispela man i no mekim bilong kisim helpim long Ol Rait Holi. Ol tok em i mekim long ol bai helpim yumi long (1) kliagut long ol tok yumi ritim, (2) kisim save long ol tok i tru, na (3) larim Tok Bilong God i stiaim yumi.   

 4. Olsem Luk 10:25-29 i kamapim, yumi mas mekim wanem taim yumi ritim Baibel

⁴ Yumi mas kliagut long mining bilong ol tok yumi ritim long Baibel. Sapos nogat, yumi no inap kisim helpim long ol tok yumi ritim. Olsem, tingim toktok i kamap namel long Jisas na “wanpela man i gat gutpela save long Lo.” (Ritim Luk 10:25-29.) Taim dispela man i askim Jisas long samting em i mas mekim bilong kisim laip oltaim, Jisas i stiaim em i go long Tok Bilong God taim em i askim em olsem: “Wanem tok i stap long Lo? Yu ritim olsem wanem?” Dispela man i bekim stret askim taim em i kolim tok bilong Ol Rait Holi we i tok long yumi mas laikim God na laikim ol narapela. (Wkp. 19:18; Lo 6:5) Tasol lukim tok em i mekim bihain, em i tok: “Dispela narapela mi mas laikim, em i husat?” Dispela man i kamapim klia olsem em yet i no kliagut long mining tru bilong tok em i ritim. Olsem na em i no save hau long bihainim ol dispela tok bilong Ol Rait Holi long laip bilong em.

 5. Olsem wanem pasin bilong beten na ritim ol tok isi isi inap helpim yumi long kliagut long ol tok yumi ritim?

⁵ Yumi ken kliagut moa long Tok Bilong God taim yumi kisim pasin bilong ritim gut ol tok. Hia em sampela samting yu ken mekim bilong helpim yu. Beten paslain long yu ritim Baibel. Yumi nidim helpim bilong Jehova long kliagut long ol tok bilong Baibel, olsem na yumi ken beten askim em long givim yumi holi spirit bilong helpim yumi long putim tingting olgeta long ol tok yumi ritim. Bihain ritim ol tok isi isi. Dispela bai helpim yu long kliagut long ol tok yu ritim. Ating yu bai kisim helpim taim yu ritim strong ol tok o taim yu harim odio rekoding bilong Baibel na long wankain taim yu bihainim long Baibel bilong yu. Taim yu putim yau na lukim ol tok long wankain taim, dispela bai mekim na Tok Bilong God bai pas strong long tingting na bel bilong yu. (Jos. 1:8) Taim yu ritim pinis, orait beten gen long tok tenkyu long Jehova long em i givim Baibel olsem presen na askim em long helpim yu long bihainim ol tok yu ritim.

 6. Olsem wanem pasin bilong mekim ol askim long yu yet na raitim ol sotpela nout inap helpim yu taim yu ritim Baibel? (Lukim tu piksa.)

⁶ Hia em tupela samting moa yu ken mekim bilong helpim yu long kliagut moa long ol tok bilong Baibel. Mekim ol askim long yu yet long ol tok yu ritim. Taim yu ritim wanpela stori, orait askim yu yet olsem: ‘Dispela hap i stori long husat lain? Husat i wok long toktok? Em i toktok long husat, na bilong wanem? Long wanem hap na long wanem taim dispela samting i kamap?’ Kain ol askim olsem bai helpim yu long tingim na bihainim gut ol bikpela poin bilong stori yu ritim. Na tu, raitim ol sotpela nout taim yu wok long rit. Taim yu mekim olsem, yu bai tingim gut ol tok yu ritim na dispela bai helpim yu long kliagut moa long ol dispela tok. Yu ken raitim ol askim, ol wok painimaut bilong yu, ol bikpela poin, na raitim hau yu ken yusim ol dispela tok yu ritim, o yu ken raitim ol samting yu pilim long bel. Yu bai luksave olsem taim yu raitim ol kain nout olsem, dispela bai helpim yu long tingim Baibel olsem tok bilong God i kam stret long yu.   

 7. Yumi mas i gat wanem pasin taim yumi ritim Baibel, na bilong wanem? (Matyu 24:15)

⁷ Jisas i kolim wanpela bikpela pasin yumi mas i gat bambai yumi ken kliagut long ol tok yumi ritim long Baibel—em pasin bilong skelim gut ol samting. (Ritim Matyu 24:15.) Pasin bilong skelim gut ol samting em wanem kain pasin? Em pasin bilong kliagut long hau wanpela tingting i poroman gut wantaim narapela tingting na hau tupela tingting i no wankain, na long luksave long samting i no stap ples klia. Olsem Jisas i tok, yumi mas i gat pasin bilong skelim gut ol samting bambai yumi ken luksave long ol samting i wok long kamap long nau we i truim ol tok profet bilong Baibel. Na tu, yumi mas i gat dispela pasin bambai yumi ken kisim helpim long ol tok yumi ritim long Baibel.

 8. Olsem wanem yumi ken skelim gut ol tok yumi ritim?

⁸ Jehova i save givim pasin bilong skelim gut ol samting long ol wokman bilong em. So beten long em, na askim em long helpim yu long kisim dispela pasin. (Prov. 2:6) Olsem wanem yu ken mekim ol samting i stret wantaim beten bilong yu? Skelim gut ol tok yu ritim, na luksave long hau ol dispela tok i poroman gut wantaim ol save yu gat pinis. Bilong helpim yu, yusim ol pablikesen ol i wokim bilong stadi long Baibel olsem Research Guide for Jehovah’s Witnesses. Ol dispela pablikesen bai helpim yu long skelim gut mining bilong ol tok bilong Baibel yu ritim, na luksave long ol rot yu ken bihainim ol dispela tok long laip bilong yu. (Hib. 5:14) Taim yu skelim gut ol tok yu ritim, yu bai kliagut moa long ol tok bilong Baibel.

 9. Ol Sadyusi i no luksave long wanem bikpela tok i tru bilong Ol Rait Holi?

⁹ Ol Sadyusi i save gut long fes 5-pela buk bilong Ol Skripsa Hibru, tasol ol i no luksave long sampela bikpela tok i tru i stap long ol dispela buk. Olsem, lukim tok Jisas i mekim taim ol Sadyusi i givim askim long em long kirap bek. Em i askim ol: “Ating yupela i no bin ritim dispela stori bilong liklik nil diwai long buk bilong Moses, a? Long dispela taim God i tokim Moses: ‘Mi God bilong Abraham na God bilong Aisak na God bilong Jekop.’” (Mak 12:18, 26) Maski ol Sadyusi i bin ritim dispela stori planti taim, tok bilong Jisas i kamapim klia olsem ol i no luksave long wanpela bikpela tok i tru bilong Ol Rait Holi, em tok i tru long kirap bek.​—Mak 12:27; Luk 20:38.d

10. Yumi mas tingim gut wanem samting taim yumi ritim Baibel?

¹⁰ Yumi inap lainim wanem samting? Taim yumi ritim Baibel, yumi laik tingim gut olgeta samting em wanpela ves o wanpela stori long Baibel i skulim yumi long en. Yumi laik save long ol tok bilong Baibel we em isi long kliagut long en, na tu, ol bikpela tok i tru na ol stiatok bilong en.

11. Olsem 2 Timoti 3:16, 17 i kamapim, olsem wanem yu ken painim ol tok i tru long Baibel?

¹¹ Olsem wanem yu ken painim ol tok i tru taim yu ritim Baibel? Skelim tok em 2 Timoti 3:16, 17 i mekim. (Ritim.) Tingim olsem “olgeta tok i stap long Rait Holi, . . . ol i gutpela” long (1) skulim man, (2) stretim man, (3) mekim ol samting i kamap stret, na (4) skulim ol man long stretpela pasin. Yu inap kisim dispela 4-pela helpim tu long ol buk bilong Baibel we yu no save ritim planti taim. Skelim gut stori yu ritim bambai yu ken luksave long hau em i skulim yu long Jehova, long samting em i tingting pinis long mekim, na ol stiatok bilong God. Skelim hau ol dispela tok i ken stretim yu. Yu ken mekim olsem long rot bilong skelim hau ol ves i helpim yu long luksave na sakim ol pasin nogut na wokabaut yet long stretpela rot. Skelim hau ol tok bilong Baibel i mekim ol samting i kamap stret, o stretim tingting kranki em wanpela man yu bungim long wok autim tok i gat. Na lukim ol tok we i skulim yu long stretpela pasin na helpim yu long holim wankain tingting olsem bilong Jehova long ol samting. Taim yu tingim dispela 4-pela helpim em yu inap kisim, yu bai painim ol tok i tru i dia tumas we bai mekim Baibel ritim bilong yu i kamap gutpela moa.

12. Wai na Jisas i askim ol Farisi olsem “ating yupela i no bin ritim”?

¹² Jisas i mekim dispela askim tu olsem “ating yupela i no bin ritim?” bilong kamapim klia olsem ol Farisi i gat tingting kranki long ol tok bilong Ol Rait Holi. (Mat. 12:1-7)e Long dispela taim, ol Farisi i tok olsem ol disaipel bilong Jisas i bin brukim lo bilong Sabat. Bilong bekim dispela askim, Jisas i kolim tupela eksampel long Ol Rait Holi na em i kolim tok bilong wanpela ves long Buk Hosea bilong soim olsem ol Farisi i no kisim bikpela poin bilong lo bilong Sabat na ol i no mekim pasin marimari. Wai na ol dispela man i no larim Tok Bilong God ol i ritim i stretim stretim ol? Long wanem, ol i gat pasin antap na ol i ting olsem ol yet i stretpela man, na ol dispela tok ol i ritim i no go long ol. Dispela pasin antap bilong ol i pasim ol long kisim mining tru bilong ol tok ol i ritim.​—Mat. 23:23; Jon 5:39, 40.

13. Yumi mas i gat wanem pasin taim yumi ritim Baibel, na bilong wanem?

¹³ Yumi kisim skul long tok bilong Jisas olsem taim yumi ritim Baibel yumi mas holim stretpela tingting. Yumi mas i gat pasin daun na redi long kisim ol tok bilong skulim yumi, dispela em i narapela kain long pasin bilong ol Farisi. Long “pasin isi, [yumi] mas larim God i planim tok bilong em long bel” bilong yumi. (Jems 1:21) Sapos yumi gat pasin isi, yumi bai larim Tok Bilong God i go daun tru long bel bilong yumi. Yumi mas sakim pasin antap na pasin bilong ting olsem yumi stretpela man. Taim yumi mekim olsem, orait ol tok bilong Baibel long pasin marimari, pasin sori, na pasin laikim bai helpim yumi long kamap gutpela man o meri.

14. Hau yumi ken luksave sapos tok bilong Baibel i wok long stretim stretim yumi o nogat? (Lukim tu ol piksa.)

¹⁴ Pasin yumi mekim long ol narapela bai soim olsem yumi larim tok bilong Baibel i wok long stretim stretim yumi o nogat. Ol Farisi i no larim Tok Bilong God i go daun tru long bel bilong ol, dispela i mekim na ol i “kotim ol dispela man i no gat asua.” (Mat. 12:7) Olsem tasol, tingting yumi gat na pasin yumi mekim long ol narapela bai kamapim klia olsem yumi wok long larim Tok Bilong God i stretim stretim yumi o nogat. Olsem, yumi save stori long gutpela pasin bilong ol narapela, o yumi save hariap long tokaut long ol popaia bilong ol? Yumi save mekim pasin marimari na redi long fogivim narapela, o yumi ting yumi stretpela man na yumi save holim bel nogut i stap? Taim yumi skelim yumi yet long ol dispela samting, dispela bai kamapim klia olsem yumi wok long larim Tok Bilong God i stretim tingting, pasin, na ol samting yumi pilim long bel.​—1 Tim. 4:12, 15; Hib. 4:12.

15. Jisas i gat wanem tingting long Ol Rait Holi?

¹⁵ Jisas i laikim tru Ol Rait Holi, na Baibel i tok profet long samting em i pilim long Buk Song 40:8, olsem: “God bilong mi, mi amamas long mekim laik bilong yu, na lo bilong yu i stap long bel bilong mi.” Dispela i mekim em i stap amamas na em i mekim gut wok bilong Jehova. Yumi tu i ken stap amamas na mekim wok bilong God sapos yumi larim Tok Bilong God i go daun tru long bel bilong yumi.​—Sng. 1:1-3.

16. Olsem wanem yu ken kisim sampela moa helpim long Baibel ritim bilong yu? (Lukim blok “Ol Tok Bilong Jisas i Ken Helpim Yu Long Kliagut Long Tok Yu Ritim.”)

¹⁶ Yumi ken mekim Baibel ritim bilong yumi i kamap gutpela moa wankain olsem ol tok na eksampel bilong Jisas i kamapim. Yumi ken kliagut moa long ol tok bilong Baibel long rot bilong beten, ritim isi isi, mekim ol askim, na raitim ol sotpela nout. Yumi ken skelim gut ol tok yumi ritim long rot bilong skelim wantaim ol tok i stap long ol pablikesen bilong yumi. Yumi ken lain long yusim gut Baibel, na yumi ken yusim gut tu ol hap bilong Baibel we yumi no save yusim planti taim long rot bilong painim ol gutpela tok i tru i stap hait. Na yumi ken larim Tok Bilong God i stretim stretim yumi taim yumi holim stretpela tingting long ol tok yumi ritim. Taim yumi bihainim ol dispela rot, yumi bai lainim planti samting long Baibel ritim bilong yumi na yumi bai go klostu moa long Jehova.​—Sng. 119:17, 18; Jems 4:8.