“Em i God Bilong Ol Man i Stap Laip”

Yu ting strong bilong dai i winim strong bilong God? Nogat tru! Olsem wanem strong bilong dai o strong bilong ol narapela “birua” samting inap winim strong bilong “God I Gat Olgeta Strong”? (1 Korin 15:26; Kisim Bek 6:3) God i gat strong long pinisim dai long rot bilong kirap bek, na em i promis long mekim olsem long nupela taim em bai kamapim.a Olsem wanem yumi inap bilip tru long dispela tok promis? Pikinini Bilong God yet em Jisas, i tokim yumi long ol tok we i ken helpim yumi long wetim gutpela samting bai kamap bihain.—Ritim Matyu 22:31, 32.

Jisas i toktok long ol Sadyusi em ol i no bilip long kirap bek, na i tok: “Ating yupela i no ritim tok God i bin mekim long yupela long kirap bek bilong ol man i dai pinis, a? Em i tok olsem: ‘Mi God bilong Abraham na God bilong Aisak na God bilong Jekop.’ Em i no God bilong ol man i dai pinis, nogat, em i God bilong ol man i stap laip.” Jisas i tok long toktok God i bin mekim wantaim Moses long diwai i paia long yia 1514 B.C.E. samting. (Kisim Bek 3:1-6) Jisas i tok, God i bin tokim Moses olsem: “Mi God bilong Abraham na God bilong Aisak na God bilong Jekop.” Dispela tok i makim olsem God bai truim tok promis bilong em long kirapim bek ol man i dai pinis.

Tingim taim Jehova i bin mekim dispela tok. Taim Jehova i bin toktok long Moses, long dispela taim Abraham, Aisak, na Jekop i dai pinis—Abraham inap 329 yia, Aisak inap 224 yia, na Jekop inap 197 yia. Tasol Jehova i tok, “mi God bilong” ol. Jehova i tok long dispela 3-pela man, i olsem ol i stap laip yet. Bilong wanem em i tok olsem?

Jisas i tok: “Em [Jehova] i no God bilong ol man i dai pinis, nogat, em i God bilong ol man i stap laip.” Dispela tok bilong Jisas i helpim yumi long kliagut long wanpela bikpela samting bilong kirap bek. Sapos i no gat kirap bek, orait Abraham, Aisak, na Jekop i dai olgeta na ol i no inap kirap bek. Sapos olsem, orait Jehova bai stap olsem God bilong ol man i dai pinis. Na dispela bai i makim olsem strong bilong dai i winim strong bilong Jehova—i olsem Jehova i no gat strong long kisim bek ol gutpela wokboi bilong em long kalabus bilong dai.

Wanem samting i painim Abraham, Aisak, Jekop, na ol narapela gutpela wokboi bilong Jehova em ol i dai pinis? Jisas i mekim dispela strongpela tok, olsem: “Long tingting bilong [God] olgeta i stap laip.” (Luk 20:38) Yes, Jehova i tingting pinis long kirapim bek ol gutpela wokman bilong em i bin dai pinis na dispela bai kamap tru, olsem na em i tingim ol olsem ol i stap laip yet. (Rom 4:16, 17) Ol dispela gutpela manmeri bai stap long memori bilong Jehova inap long taim em yet i makim bilong givim bek laip long ol.

Olsem wanem? Yu amamas long bungim gen ol famili bilong yu i dai pinis? Sapos olsem, orait tingim olsem oltaim Jehova i gat bikpela strong moa, winim strong bilong dai. I no gat wanpela samting inap pasim em long truim tok promis bilong em long kirapim bek ol man i dai pinis. I gutpela yu kisim sampela save moa long tok promis bilong kirap bek na God husat bai truim dispela tok promis. Taim yu mekim olsem dispela bai helpim yu long go klostu long Jehova “em i God bilong ol man i stap laip.”