Yupela i Mas Redi i Stap!

“Yupela tu i mas redi i stap, long wanem, long taim yupela i no ting long en, Pikinini bilong man bai i kam.”​—⁠MAT. 24:⁠44.

1, 2. (a) Baibel i tok profet long wanem ol samting bai kamap na i wankain olsem taiga i kirap pait long man? (b) Dispela pait i laik kamap i mekim wanem samting long yu?

INAP sampela yia, wanpela man i gat nem, em i save amamasim ol man long rot bilong pilai wantaim ol Bengal taiga em i bin trenim. Em i tok: “Taim animal i trastim yu, yu pilim olsem yu bin kisim nambawan gutpela presen tru.” Tasol long Oktoba 3, 2003, dispela pasin bilong trastim narapela narapela i pinis. Wanpela animal bilong dispela man i kirap pait nating long em, em wanpela waitpela taiga i gat 172 kilogram. Dispela man i no gat tingting liklik olsem taiga bai mekim olsem, na em i no redi.

² I gutpela long tingim olsem Baibel tu i tok profet long wanpela “wel animal” bai kirap mekim pait, olsem na yumi mas redi i stap. (Ritim Revelesen 17:​15-​18.) Dispela wel animal bai kirap pait long husat? Wanpela narakain samting bai kamap, lain bilong Satan bai bruk na ol bai pait namel long ol yet. Dispela retpela wel animal i makim Yunaitet Nesen, na “10-pela kom” i makim olgeta gavman politik. Ol dispela lain bai kirap pait long Bikpela Babilon em wanpela pamukmeri na i makim olgeta lotu giaman, na ol bai bagarapim na pinisim em olgeta. Wanem taim dispela samting bai kamap? Yumi no save long de na aua em bai kamap. (Mat. 24:36) Tasol yumi save olsem em bai kamap long taim we yumi no ting em bai kamap, na dispela taim i klostu pinis. (Mat. 24:44; 1 Kor. 7:29) Olsem na em i bikpela samting long yumi mas redi i stap na taim dispela pait i kamap na Krais i kam olsem Man i givim strafe, em bai stap tu olsem Man Bilong Kisim Bek yumi! (Luk 21:28) Bilong yumi ken redi i stap, yumi inap kisim skul long pasin bilong ol gutpela wokboi bilong God em ol i bin redi i stap, na ol i bin lukim truim bilong ol tok promis bilong God long ai bilong ol yet. Olsem wanem? Bai yumi pilim tru long bel ol dispela stori?

Yupela i Mas Redi i Stap​—⁠Olsem Noa

 3. Wanem ol samting i mekim na i hatwok long Noa long stap gut long wok bilong God?

³ Maski pasin nogut i pulap tru long graun long taim bilong Noa, em i redi i stap bilong lukim truim bilong tok promis bilong God. Tingim ol hatwok i painim Noa taim ol bikhet ensel i tanim i kamap man, na ol i stap wantaim ol meri i gat naispela skin! Ol i kamapim ol pikinini i narapela kain, em “ol strongpela man tru” husat i yusim strong bilong ol long daunim ol narapela man. (Stt. 6:⁠4) Tingim pasin pait i bin kamap taim ol dispela traipela man i bagarapim sindaun bilong ol man long olgeta hap ol i go long en. Olsem na pasin nogut i pulap long graun, na tingting na pasin bilong ol man i go nogut olgeta. Orait nau Bikpela King Jehova i tokaut olsem taim bai kamap na em bai bagarapim ol dispela man nogut.​—⁠Ritim Stat 6:​3, 5, 11, 12.a

4, 5. Olsem wanem taim bilong yumi i wankain olsem taim bilong Noa?

⁴ Jisas i tok profet olsem taim bilong yumi bai i wankain olsem taim bilong Noa. (Mat. 24:37) Olsem: Yumi tu i lukim ol pasin nogut em ol spirit nogut i as bilong en. (Rev. 12:​7-9, 12) Ol dispela spirit nogut i bin tanim i kamap man long taim bilong Noa. Nau God i no larim ol i mekim olsem, tasol ol i wok strong long bosim ol yangpela na ol lapun tu wantaim. Ol manmeri i no save olsem ol dispela spirit nogut husat i laikim pasin sem, ol i kisim amamas long ol pasin nogut na pasin doti em ol inap kirapim ol man long mekim.​—⁠Efe. 6:​11, 12.

⁵ Baibel i tok Satan em i “man bilong kilim man i dai” na em i gat “strong bilong kamapim dai.” (Jon 8:44; Hib. 2:14) Tasol em i no gat strong inap long kilim stret man i dai. Dispela spirit nogut i save kirapim ol man long giaman na mekim pasin nogut. Em i kirapim ol man long tingting long kilim i dai narapela man. Olsem: Long olgeta 142 pikinini i bon long Amerika, kilman bai kilim i dai wanpela bilong ol. Pasin bilong pait na bagarapim man i go bikpela tru, olsem na yu ting Jehova i lukim pasin nogut ol man i mekim? Yes. Em i lukim pasin nogut ol i mekim, wankain olsem em i bin lukim long taim bilong Noa. Na em bai mekim sampela samting.

6, 7. Olsem wanem Noa na famili bilong em i kamapim klia bilip bilong ol na pasin bilong ol long daun long God?

⁶ Bihain, God i tokim Noa olsem em bai kamapim bikpela tait wara long graun na bagarapim olgeta samting i gat laip. (Stt. 6:​13, 17) Jehova i tokim Noa long wokim wanpela sip i luk olsem traipela boks. Noa na famili bilong em i kirap long wokim dispela sip. Wanem samting i helpim ol long bihainim tok na redi i stap taim kot bilong God i kamap?

⁷ Strongpela bilip na pasin bilong daun long God i kirapim Noa na famili bilong em long mekim olsem God i tok. (Stt. 6:22; Hib. 11:⁠7) Olsem het bilong famili, Noa i pas gut wantaim God na em i no insait long ol pasin nogut bilong ol man long dispela taim bipo. (Stt. 6:​9, 10) Em i save olsem famili bilong em i mas was gut, nogut ol i kirap bihainim pasin bikhet na pasin pait bilong ol man ol i stap namel long ol. Em i bikpela samting long ol i no ken putim olgeta tingting bilong ol long ol wok bilong ol wan wan de. God i givim wanpela wok long ol, na dispela wok i mas i stap olsem nambawan samting long famili olgeta.​—⁠Ritim Stat 6:​14, 18.

Noa na Famili Bilong Em i Redi i Stap

 8. Wanem samting i kamapim klia olsem famili bilong Noa i gat pasin bilong givim bel tru long God?

⁸ Baibel i mekim bikpela stori long Noa, em het bilong famili, tasol meri bilong Noa na ol pikinini man wantaim ol meri bilong ol, ol tu i save lotuim Jehova. Profet Esekiel i strongim dispela tok. Em i tok sapos Noa i stap long taim bilong em, stretpela pasin bilong Noa i no inap mekim na God bai kisim bek ol pikinini bilong Noa, nogat. Ol i bikpela man pinis inap long ol i ken bihainim tok o sakim tok. Olsem na ol yet i bin kamapim klia olsem ol i laikim God na ol pasin bilong em. (Ese. 14:​19, 20) Famili bilong Noa i bihainim tok bilong Noa, ol i gat wankain bilip olsem em, na ol i no larim ol man i pasim ol long mekim wok em God i bin givim long ol.

 9. Husat long nau i kamapim wankain pasin bilong bilip olsem Noa?

⁹ Yumi amamas tru long lukim olsem insait long bikpela lain brata bilong yumi i stap long olgeta hap bilong graun, i gat ol het bilong famili em ol i wok strong tru long bihainim pasin bilong Noa! Ol i save olsem, pasin bilong lukautim famili long kaikai, klos, haus, na ediukesen, dispela tasol i no inap. Ol i mas lukautim ol long ol samting bilong spirit tu. Taim ol i mekim olsem, ol i kamapim klia olsem ol i redi i stap long samting em klostu nau Jehova bai mekim.

10, 11. (a) Taim Noa na famili bilong em i stap insait long sip, ating ol i pilim olsem wanem? (b) Yumi mas mekim wanem askim long yumi yet?

¹⁰ Noa, meri bilong em, ol pikinini man na meri bilong ol, ating ol i bin wokim sip inap 50 yia samting. Taim ol i wok long wokim sip, ating ol i go i kam insait long sip planti handet taim. Ol i penim sip long kolta na bai wara i no ken kam insait, putim planti kaikai insait long en, na kisim ol animal i kam insait. Piksaim long tingting ol samting i kamap. Em de namba 17 bilong namba 2 mun long yia 2370 B.C.E., na ol i go insait long sip. Jehova i pasim dua, na ren i kirap pundaun. Dispela bikpela ren i no kamap long wanpela hap tasol. Olgeta dua long skai i op na wara i kapsait i kam daun, na paitim rup bilong sip. (Stt. 7:​11, 16) Ol manmeri ausait long sip i dai na ol lain insait long sip i stap gut. Yu ting famili bilong Noa i pilim olsem wanem? Ol i tenkyu tru long God. Tasol tu ating ol i tingting, ‘Mipela i amamas tru long mipela i bin wokabaut wantaim God tru na mipela i bin redi i stap!’ (Stt. 6:⁠9) Olsem wanem? Yu inap piksaim yu yet i stap bihain long Armagedon, na long bel olgeta yu tenkyu long God?

¹¹ I no gat wanpela samting inap stopim God i Gat Olgeta Strong long truim tok promis bilong em long pinisim dispela graun bilong Satan. Askim yu yet, ‘Mi bilip tru olsem olgeta wan wan samting God i bin tok promis long mekim ol bai kamap tru, na olgeta tok promis bai kamap tru long taim em yet i makim?’ Sapos yu bilip, orait yu mas redi i stap, olsem yu mas tingim olsem klostu nau “de bilong Jehova i kamap.”​—⁠2 Pita 3:⁠12.

Moses i Was i Stap

12. Wanem samting inap pulim nabaut tingting bilong Moses?

¹² Yumi ken skelim narapela eksampel. Long tingting bilong ol man, Moses i gat gutpela sindaun tru long Isip. Pikinini meri bilong Fero i adoptim em, olsem na ating ol man i rispek tru long em na em i gat ol nambawan gutpela kaikai, klos, na haus samting. Em i kisim bikpela skul. (Ritim Aposel 7:​20-22.) Ating em inap kisim bikpela mani kago long lain bilong king.

13. Wanem samting i helpim Moses long tingim ol tok promis bilong God?

¹³ Papamama bilong Moses i bin skulim gut Moses taim em i liklik yet, na dispela i helpim em long luksave olsem pasin bilong ol Isip long lotuim ol imis i longlong pasin tru. (Kis. 32:⁠8) Ol bikpela skul bilong ol Isip na gutpela kago bilong haus bilong king i no pulim Moses long lusim lotu i tru. Nogat. Em i tingim tingim long bel ol tok promis God i bin mekim long ol tumbuna papa bilong em, na em i gat bikpela laik long redi i stap long mekim laik bilong God. Moses i tokim lain Israel olsem: “Bikpela, em God bilong ol tumbuna bilong yupela, Abraham na Aisak na Jekop, em i bin salim mi na mi kam long yupela.”​—⁠Ritim Kisim Bek 3:​15-17.

14. Wanem samting i traim bilip na pasin bilong Moses long strongim bel?

¹⁴ Jehova i no olsem ol imis i makim ol god bilong Isip em ol i no gat laip. Nogat. Jehova i God tru, na Moses i bilip olsem em i stap tru. Long olgeta wokabaut bilong Moses, em i soim olsem em i “lukim dispela Man em ol man i no inap lukim long ai.” Moses i bilip olsem lain bilong God bai lusim kalabus, tasol em i no save wanem taim dispela samting bai kamap. (Hib. 11:​24, 25, 27) Moses i gat bikpela laik long lukim ol Hibru i kamap fri, dispela i kamap ples klia taim em i sambai long wanpela wokboi nating bilong lain Israel em man Isip i paitim em. (Kis. 2:​11, 12) Tasol dispela i no taim bilong Jehova long mekim samting, olsem na Moses i mas i stap olsem wanpela ranaweman long kantri i stap longwe. Yumi ken save tru olsem i hatwok long Moses i lusim gutpela sindaun bilong em long haus king bilong Isip na stap long ples drai nating. Tasol Moses i was i stap, olsem em i redi long bihainim olgeta tok Jehova i givim long em. Olsem na bihain long em i bin i stap inap 40 yia long kantri Midian, God inap yusim em bilong helpim ol brata bilong em. Moses i bihainim tok bilong God, na i go bek long Isip. Nau em taim bilong em long mekim wok God i givim, na em i mas mekim dispela wok long pasin God i makim. (Kis. 3:​2, 7, 8, 10) Taim Moses, “man bilong daunim em yet,” i kamap pinis long Isip, em i mas i gat bilip na strongpela bel bambai em inap i go sanap long ai bilong Fero. (Nam. 12:⁠3) Em i no mekim olsem wanpela taim tasol, nogat, em i mekim planti taim, na taim wanpela hevi i pinis na narapela i no kamap yet, em i no save hamas taim moa em i mas i go lukim Fero.

15. Maski ol samting i no kamap olsem Moses i laikim, wanem samting i kirapim em long givim ona long Papa bilong em long heven?

¹⁵ Insait long 40 yia bihain long dispela, long 1513 B.C.E. i go inap long 1473 B.C.E., i gat ol samting i mekim Moses i bel hevi. Tasol maski i olsem, oltaim em i redi long givim ona long Jehova na em i strongim tru ol wanlain Israel long mekim wankain. (Lo 31:​1-8) Bilong wanem em i mekim olsem? Long wanem, em i laikim tru nem bilong Jehova na wok king bilong em, winim nem bilong em yet. (Kis. 32:​10-13; Nam. 14:​11-16) Maski yumi bel hevi o ol samting i no kamap olsem yumi laikim, yumi tu i mas wok yet long sapotim wok king bilong God. Yumi mas bilip olsem rot God i makim long mekim ol samting em i kamapim bikpela savetingting moa, i stret moa, na i gutpela moa, winim ol arapela rot. (Ais. 55:​8-11; Jer. 10:23) Yu bilip olsem?

No Ken Slip!

16, 17. Olsem wanem Mak 13:​35-37 i gat bikpela mining long yu?

¹⁶ “Yupela i mas was i stap, no ken slip, long wanem, yupela i no save long dispela taim God i makim.” (Mak 13:33) Jisas i mekim dispela tok lukaut taim em i stori long ol mak bilong pinis bilong pasin nogut bilong dispela graun. Tingim laspela hap tok bilong tok profet bilong Jisas, olsem Mak i raitim: “Yupela i mas was i stap, long wanem, yupela i no save long wanem taim Papa bilong haus bai i kam. Bai em i kam taim san i go daun pinis o long biknait o taim kakaruk i krai o long bikmoning, em yupela i no save. Nogut em i kam wantu tasol na em i lukim olsem yupela i slip i stap. Tok mi mekim long yupela, mi mekim long olgeta: Yupela i mas was i stap.”​—⁠Mak 13:​35-37.

¹⁷ Tok bilong Jisas i kirapim tingting. Em i stori long 4-pela haptaim bilong was i stap long nait. Long laspela haptaim, ai bilong man bai hevi na i laik slip, long wanem, dispela haptaim i kirap long 3 klok bikmoning na i go inap long san i kam antap. Ol saveman bilong skelim woa, ol i ting dispela i gutpela taim tru long i go pait long ol birua, long wanem, ating ol birua i “slip i stap.” Na long nau tu, i olsem ol manmeri i slip long ol samting bilong spirit, olsem na yumi mas wok strong bambai yumi no ken slip olsem ol. Yumi save olsem yumi gat wok long “was i stap” na “no ken slip,” na bai yumi redi taim pinis i kamap na God i kisim bek yumi.

18. Yumi ol Witnes Bilong Jehova i gat wanem gutpela wok bilong mekim?

¹⁸ Dispela man bilong trenim ol Bengal taiga, em yumi bin stori pinis long em, em i no dai taim taiga i pait long em. Tasol tok profet bilong Baibel i kamapim klia olsem lotu giaman na ol narapela hap bilong graun bilong Satan i no inap abrusim bagarap taim pinis i kamap. (Rev. 18:​4-8) Gutpela sapos olgeta wokboi bilong God, ol yangpela na lapun, i tingim olsem em i bikpela samting long ol i mekim olgeta samting ol inap mekim bilong redi i stap taim de bilong Jehova i kam, wankain olsem Noa na famili bilong em i bin mekim. Yumi stap long graun we ol manmeri i no save givim ona long God, olsem ol tisa bilong lotu giaman, na ol lain i no bilip long God i stap, em ol i save mekim ol tok i daunim Man Bilong Wokim yumi. Yumi no ken larim tok bilong ol i stiaim tingting bilong yumi. Yumi mas pilim tru stori bilong ol man em yumi bin stadi nau long en, na oltaim sambai long Jehova na givim ona long em olsem ‘God i winim olgeta kain giaman god,’ yes, “em i bikpela na strongpela, na olgeta samting i mas pret na aninit long em.”​—⁠Lo 10:⁠17.

[Futnot]

Yu Inap Tingim?

• Bilong wanem Noa i mas tingim famili long ol samting bilong spirit pastaim?

• Olsem wanem taim bilong yumi na taim bilong Noa i wankain?

• Maski Moses i bel hevi, i gat wanem as na em i tingting strong long ol tok promis bilong Jehova?

• Wanem ol tok profet bilong Baibel i kirapim yu long was i stap long ol samting bilong spirit?

[Piksa long pes 25]

Noa na famili bilong em i tingting strong long wok bilong Jehova

[Piksa long pes 26]

Ol tok promis bilong God i helpim Moses long was i stap