I Stap na Wok Bilong Jisas

I Orait Long Mekim Wanem Long Sabat?

LONG narapela Sabat Jisas i go long wanpela haus lotu bilong ol Juda klostu long Raunwara Galili. Na wanpela man i stap, han bilong em i drai pinis. Ol Farisi na ol saveman bilong tu ol i was long Jisas; ol i laik save, em bai mekim orait dispela man long Sabat, o nogat. Olsem na ol i askim em: “Ating yumi ken mekim orait sikman long sabat, o nogat?”

Ol dispela hetman bilong lotu Juda i ting, i orait long helpim sikman long Sabat sapos em i laik bagarap. Tasol ol i lainim ol man olsem, long Sabat i tambu long stretim bun i bruk, o taitim banis long skru i lus. Ol i painim rot bilong kotim Jisas na ol i givim dispela askim long em.

Tasol Jisas i save long tingting bilong ol. Na em i save ol i no bihainim tok bilong Baibel long wanem samting i olsem wok tru na i tambu long Sabat. Em i laik stretim tingting kranki bilong ol, olsem na em i tokim dispela man, han bilong em i nogut: “Yu sanap long namel.”

Nau Jisas i tokim ol Farisi na ol saveman bilong lo: “Sapos wanpela man namel long yupela em i gat wanpela sipsip, na dispela sipsip i pundaun long wanpela hul long sabat, dispela man i save holim sipsip na pulim i kam antap, o nogut?” Ol i save, ol bai pulim sipsip i kam antap, nogut em i bagarap na bai ol i no inap kisim bikpela pe long en. Na tu Baibel i tok: “Ol stretpela man i save marimari long ol animal bilong ol, na lukautim ol gut.”

Jisas i stori long sipsip na bihain em i tok: “Tasol man em i win tru long sipsip. Olsem em i orait yumi mekim gutpela wok long sabat.” Ol hetman bilong lotu i save, dispela tok i stret na i gat gutpela tingting na em i pasin bilong sori. Olsem na ol i no inap mekim wanpela tok; ol i pasim maus i stap.

Jisas i lukim bel bilong ol dispela man i pas na em i belhat, na em i bel hevi tu. Em i lukluk raun long ol na bihain em i tokim dispela man: “Stretim han bilong yu.” Orait, em i stretim han, na han i kamap gutpela gen.

Ol Farisi i no amamas long dispela samting. Kwiktaim ol i kirap i go, na ol i bung wantaim lain bilong Herot na wokim toktok bilong kilim Jisas i dai. Lain bilong Herot ol i lain politik na ol Sadyusi, ol i wanpela lain bilong lotu Juda, ol i insait long dispela lain politik. Ol Farisi na dispela lain politik i save stap birua birua, tasol nau ol i bung wantaim bilong birua long Jisas. Matyu 12:​9-14; Mak 3:​1-6; Luk 6:​6-11; Provep 12:10; Eksodas 20:​8-10.

◆ Wanem samting i kamap na Jisas i sakim tingting bilong ol hetman bilong lotu Juda?

◆ Ol Juda i gat wanem tingting long oraitim sikman long Sabat?

◆ Jisas i stori long wanem samting bilong stretim tingting kranki bilong ol?