Yu Save Long Dispela?
Tru ol birua i bin wokim banis diwai na banisim Jerusalem, olsem Jisas i bin tok profet long en?
Long tok profet bilong em long Jerusalem bai bagarap, Jisas i tok long dispela taun: “Bihain wanpela taim bai i kamap, na ol birua bilong yu bai i kam hipim graun raunim bikpela banis bilong yu. Na ol bai i banisim yu tru long olgeta hap.” (Luk 19:43) Tok bilong Jisas i kamap tru long yia 70 C.E., taim Taitus i bringim ami bilong Rom i kam wokim bikpela banis i raunim Jerusalem olgeta. Taitus i tingim 3-pela samting em i laik mekim—pasim rot bilong ol Juda long ranawe, kirapim ol long lusim pait, na ol bai i no gat kaikai na bikpela hangre bai painim ol na ol bai larim ol Rom i kisim taun.
Flavius Josifas, em wanpela saveman bilong dispela taim bipo, em i tok, taim ol i pasim tok pinis long wokim dispela banis, ol bikpela na liklik lain soldia long ami bilong Rom ol i resis wantaim long lukim wanem lain bai namba wan lain long pinisim hap banis ol i gat wok long sanapim. Ol i katim olgeta diwai ausait long Jerusalem i go inap olsem 16 kilomita na i no gat wanpela diwai i sanap, na insait long 3-pela de tasol ol i pinisim wok bilong sanapim banis, em i longpela inap olsem 7-pela kilomita. Josifas i tok, “nau ol Juda i no gat rot tru long ranawe lusim Jerusalem.” Bikpela hangre tru i kamap, na ol lain soldia bilong ol i wok long pait namel long ol yet na narapela i kilim i dai narapela. Olsem na 5-pela mun samting bihain ol Rom i go insait na kisim taun.
Tru King Hesekia i bin wokim tanel i kam insait long Jerusalem?
Hesekia i bin i stap king bilong Juda olsem 700 yia paslain long Krais, na long dispela taim Juda i bin mekim pait wantaim strongpela kantri Asiria. Baibel i tok em i bin mekim bikpela wok tru bilong lukautim Jerusalem na helpim ol Juda bambai ol inap kisim wara long taim bilong pait. Wanpela bikpela wok bilong em, em wanpela baret wara, olsem tanel, em i bin wokim insait long graun, em i longpela olsem 533 mita, bilong bringim wara i kam insait long taun.—2 King 20:20; 2 Stori 32:1-7, 30.
Inap 140 yia samting i go pinis, ol i bin painim kain tanel olsem. Bihain ol i kolim olsem Tanel Bilong Hesekia, o Tanel Bilong Siloam. Insait long tanel ol i painim wanpela rait i stori long ol laspela wok bilong ol man long kamautim graun na wokim tanel. Ol saveman i glasim gut ol mak bilong rait na planti ol i ting em i bilong taim bilong Hesekia. Tasol 10-pela yia i go pinis, sampela i tok ol i bin wokim dispela tanel 500 yia samting bihain. Long 2003, wanpela lain saientis bilong Israel i kamapim long nius ol save ol i bin kisim long wok painimaut bilong save long taim stret ol i bin wokim dispela tanel. Ol i bin kisim wanem save?
Profesa Amos Frumkin bilong Hebrew University Bilong Jerusalem i tok: ‘Mipela i mekim wok long kabon-14 na glasim liklik hap graun samting i stap long simen long banis insait long Tanel Bilong Siloam, na masin bilong skelim yia bilong ol samting i glasim ol samting i pas long banis, na mipela i painimaut olsem ol i bin wokim dispela tanel wara long taim bilong Hesekia.’ Wanpela stori long nius bilong saiens, nem bilong en Nature, i tok moa: “Ol i skelim 3-pela samting olsem evidens—samting olsem pawa i stap long ol liklik hap graun, na ol rait bilong bipo, na stori bilong ol samting i bin kamap bipo—na olgeta dispela samting i makim yia olsem 700 BC. Dispela i mekim na Tanel Bilong Siloam em samting ol i bin skelim gut tru yia bilong en, winim olgeta narapela samting Baibel i tok ol man i bin wokim.”