Yu Save Lusim Rong Bilong Man?

BILL wantaim pikinini meri bilong em Lisa, em i gat 16 krismas, tupela i no sindaun gut wantaim. Tupela i save kros kros na planti taim narapela i bikmaus long narapela. Bihain bikpela kros i kamap na papa i rausim Lisa long haus.a

Bihain liklik, Lisa i save em i gat asua na em i laik mekim i dai kros. Tasol papa i no laik lusim tingting long ol pasin kranki Lisa i bin mekim. Em i bel nogut long Lisa na sakim em. Em i no sori long pikinini bilong em yet!

Planti handet yia bipo wanpela man i no gat asua em i kot na kot i tok em i mas i dai. Ol witnes i mekim ol tok giaman long kot, na ol bikman politik i no laik stretim. Dispela man i no gat asua em Krais Jisas. Paslain liklik long taim em i dai, em i beten long God na i tok: “Papa, yu ken lusim sin bilong ol. Ol i no save long dispela samting ol i mekim.”​—⁠Luk 23:⁠34.

Jisas i no bel nogut long ol​—⁠em i lusim rong bilong ol. Na em i kirapim ol disaipel bilong em long mekim wankain pasin. (Efesus 4:32) Tasol planti man i mekim pasin olsem Bill; ol i no laik sori na lusim rong bilong man. Olsem wanem long yu? Yu save lusim rong man i mekim long yu? Na sapos man i mekim bikpela rong, yumi mas lusim dispela kain rong tu?

I Hatwok Long Mekim

Sampela taim i hatwok long mekim pasin sori olsem. Na long dispela taim bilong planti hevi, ol man i hatwok long sindaun gut wantaim. Planti hevi i save kamap insait long famili. Longtaim bipo, aposel Pol i tok kain hevi olsem bai kamap long “taim bilong las de.” Em i tok: “Ol man bai i laikim ol yet tasol, na ol bai i laikim tumas long kisim mani. Ol bai i litimapim nem bilong ol yet na hambak nabaut . . . Ol bai i birua long olgeta gutpela pasin. Ol bai i mekim nogut long ol pren bilong ol yet, na ol bai i bihainim kwik olgeta kranki tingting bilong ol yet. Ol bai i tingim ol yet i bikpela man tru.”​—⁠2 Timoti 3:​1-4.

Ol hevi bilong ausait i traim sori bilong yumi. Na samting insait long yumi tu i givim hatwok long yumi. Pol i tok: “Gutpela pasin mi laik mekim, em mi no save mekim. Na pasin nogut mi no laik mekim, em mi save mekim. Orait pasin mi no laikim, dispela mi save mekim. Olsem na i no mi yet mi mekim dispela. Nogat. Sin i stap insait long mi, em tasol i mekim.” (Rom 7:​19, 20) Olsem na planti man i no sori na lusim rong bilong man, maski ol i laik mekim olsem. Sin na ol tingting nogut sin i kamapim, dispela i bosim yumi na sampela taim yumi no sori long ol man.

Ol i laik kirapim wanpela meri long lusim tingting long liklik rong narapela i bin mekim long em, tasol meri i tok: “No gat wanpela i gutpela inap long yumi mekim bikpela hatwok bilong lusim rong bilong em.” Sapos yumi tingim tok bilong dispela meri, i olsem em i mekim hatpela pasin na em i no sori long ol man o bilip long ol. Tasol sapos yumi skelim gut, em i kamapim tingting bilong planti man long nau, em ol i les, long wanem, ol i lukim olsem ol narapela man i tingim ol yet tasol na ol i no tingim ol narapela man o ol i birua long ol. Wanpela man i tok: “Sapos yu lusim rong bilong ol man bai ol i wok yet long mekim nogut long yu. Bai ol i daunim yu tru.”

Olsem na long nau i hatwok long kisim pasin bilong sori na lusim rong bilong man. Tasol Baibel i kirapim yumi long mekim gutpela pasin olsem. (Lukim 2 Korin 2:⁠7.) Orait, bilong wanem yumi mas lusim rong bilong man?

[Ol Futnot]