Yu Save Skulim Ol Man Olsem Jisas i Mekim?

“Ol bikpela lain manmeri ol i kirap nogut tru long skul bilong [Jisas]. Long wanem, em i no skulim ol olsem ol saveman bilong lo i save mekim. Nogat. Em i skulim ol olsem man i gat namba.”​—⁠MATYU 7:​28, 29.

LONG olgeta hap Jisas i go long en, ol bikpela lain manmeri i kam long em. Em i “go raun long olgeta hap bilong distrik Galili. Em i save go insait long ol haus lotu bilong ol na skulim ol manmeri. Em i autim gutnius bilong kingdom bilong God, na em i mekim orait olgeta sik . . . bilong ol manmeri.” Ol man i harim stori long dispela na “planti bikpela lain manmeri bilong Galili na bilong hap bilong distrik Dekapolis, na bilong Jerusalem na Judia na . . . hapsait bilong wara Jordan, ol i save bihainim em i go.” (Matyu 4:​23, 25) Jisas i sori long ol, long wanem, “ol i stap nogut tru, olsem ol sipsip i no gat wasman.” Taim em i skulim ol, i olsem em i putim marasin long sua bilong ol​—⁠ol i pilim sori bilong em na dispela i pulim ol i go long em.​—⁠Matyu 9:​35, 36.

² Jisas i wokim ol mirakel bilong oraitim sik bilong skin​—⁠em i mekim ol lepraman i kamap klin, na opim yau bilong ol yaupas, na ai bilong ol aipas, na ol lek nogut i wokabaut, na ol man i dai pinis i kirap bek! Ol dispela mirakel Jisas i wokim long strong bilong Jehova i pulim planti man i kam long em! Tasol i no ol mirakel tasol i pulim ol i kam; ol i kam bambai em i ken skulim ol na mekim ol i kamap orait gen long spirit. Taim em i skulim ol antap long maunten, “ol i kirap nogut tru long skul bilong en. Long wanem, em i no skulim ol olsem ol saveman bilong lo i save mekim. Nogat. Em i skulim ol olsem man i gat namba.” (Matyu 7:​28, 29) Ol tisa bilong ol i save kamapim tok bilong ol tumbuna bilong strongim tok bilong ol. Tasol God i givim namba long Jisas na em i skulim ol long ol tok bilong God. Jisas i tok: “Olgeta tok mi mekim, em mi save mekim olsem Papa i bin tokim mi.”​—⁠Jon 12:50.

Ol i Pilim Tru Tok Bilong Em Long Bel

³ Jisas i skulim ol man long ol tok i tru i kam long God; ol saveman bilong lo na ol Farisi i skulim ol long ol tok bilong ol tumbuna em i putim hevi long ol. Olsem na ol tok Jisas i skulim ol man long en i narapela kain, na pasin bilong em long skulim ol man i narapela kain. Ol saveman bilong lo na ol Farisi i hambak na mekim hatpela pasin; ol i gat pasin antap, na ol i laik bai ol man i kolim ol bikpela nem long ol, na ol i tingim ol bikpela lain manmeri i olsem samting nating, em ol i ting ‘God i tok pinis long ol i mas bagarap.’ Tasol Jisas i mekim pasin daun na pasin isi na gutpela pasin; em i pilim hevi bilong ol man, na isi long ol, na sori long ol. Em i laikim ol tru na mekim ol trupela na gutpela tok. Ol man i harim, ol i pilim tru long bel. Em i autim gutpela tok na dispela i pulim ol man i kam long em; ol i kirap long moningtaim tru bilong i go long tempel na harim tok bilong em, na ol i strong tumas long harim, na ol i amamas long harim. Planti tru i go long em, na ol i tok: “Bipo i no gat wanpela man i mekim toktok olsem dispela man.”​—⁠Jon 7:​46-49; Mak 12:37; Luk 4:22; 19:48; 21:38.

⁴ Em i save mekim ol tok piksa, na dispela i kirapim ol long laikim tok bilong em. Jisas i lukim ol samting ol narapela i lukim, tasol em i kisim tingting long en ol i no kisim. Ol i lukim ol plaua i stap nabaut, na ol pisin i wokim haus bilong ol, na ol man i tromoi pikinini wit long gaden, na ol wasman bilong sipsip i bringim ol sipsip i lus, na ol meri i samapim hap nupela laplap long olpela klos, na ol pikinini i pilai long ples bung, na ol man i kisim pis long umben​—⁠tasol taim Jisas i lukim ol dispela samting em i tingting long mekim wok long en bilong skulim ol man long God na Kingdom bilong Em, o long wanpela pasin ol man i mekim.

⁵ Jisas i mekim tok piksa long ol samting ol man i lukim planti taim long olgeta de, na dispela i helpim ol long kisim kwik na kisim gut ol tok i tru em i laik skulim ol long en. Ol i no harim tasol; ol i lukim tu long tingting, na i no hatwok long ol i tingim gen long bihain. Jisas i mekim liklik stori long wanpela samting tasol; em i no laik stori long planti samting na bai ol i no kisim gut ol tok i tru. Tingim tok piksa em i mekim long gutpela man bilong Samaria. Dispela i helpim yumi long save klia long gutpela pasin yumi mas mekim long ol narapela man. (Luk 10:​29-37) Na em i mekim tok piksa long tupela pikinini man​—⁠wanpela i tok em bai go wok long gaden wain na em i no i go, na wanpela i tok em i no ken i go, tasol em i go. Dispela i lainim yumi gut long pasin bilong bihainim tok​—⁠yumi mas mekim wok ol i tokim yumi long mekim. (Matyu 21:​28-31) Jisas i givim bel na autim olkain tok olsem, na i no gat wanpela man i ai slip o tingting nabaut. Ol i putim gut yau long ol tok bilong em na lukim tu long tingting.

Jisas i Save Isi Taim i Gat Rot Bilong Sori

⁶ Planti taim Baibel i tok, yumi mas isi long ol man. Man i gat gutpela tingting i kam long God, em i save isi long man i mekim rong sapos i gat rot bilong sori long em. Ol elda i mas redi long isi long man i mekim rong sapos i gat rot bilong sori long em na em i tanim bel. (1 Timoti 3:3; Jems 3:17) Jisas i stap gutpela piksa tru bilong pasin bilong isi long ol man, na em i marimari na sori long ol sapos i gat rot bilong mekim.

⁷ Jisas i bin tok: “Man i tokim ol manmeri olsem em i no man bilong lain bilong mi, mi tu bai mi tokim Papa . . . olsem dispela man em i no bilong mi.” Tasol em i no mekim olsem taim Pita i tok 3-pela taim em i no save long Jisas. I gat sampela samting Jisas i tingim na dispela i givim rot long em bilong sori long Pita. (Matyu 10:33; Luk 22:​54-62) Wanpela taim wanpela meri i karim blut oltaim em i brukim Lo Bilong Moses na em i kam i stap namel long ol manmeri. Tasol Jisas i no kros long em i bin mekim olsem. (Mak 1:​40-42; 5:​25-34; lukim tu Luk 5:​12, 13.) Jisas i tambuim ol disaipel long tokaut olsem em i man God i promis long salim i kam, tasol taim em i bungim meri bilong Samaria long hul wara, em i no holimpas strong dispela lo; em i tokim meri em i dispela man. (Matyu 16:20; Jon 4:​25, 26) I stret Jisas i isi olsem, long wanem, long olgeta dispela taim i gat rot bilong mekim pasin sori na pasin marimari.​—⁠Jems 2:13.

⁸ Tasol ol saveman bilong lo na ol Farisi i narapela kain; ol i mekim hatpela pasin. Ol yet i save brukim lo bilong ol bilong de Sabat na kisim bulmakau i go bilong dring wara; o sapos bulmakau o pikinini man bilong ol i pundaun long hul wara, ol i kalapim lo bilong Sabat na pulim em i kam antap. Tasol ol i no orait liklik long ol man nating i kalapim lo bilong Sabat! Ol i “no laik putim pinga tasol” bilong helpim ol long karim ol dispela lo i olsem hevipela samting i stap long sol bilong ol. (Matyu 23:4; Luk 14:⁠5) Jisas i moa tingim ol man, winim planti lo; ol Farisi i moa tingim ol lo, winim man.

Kamap “Pikinini Bilong Lo”

⁹ Sampela i bel hevi long i gat wanpela stori tasol long Baibel long taim Jisas i stap manki yet. Tasol planti ol i no save olsem wanem dispela stori i bikpela samting. Luk 2:​46, 47 i stori long papamama bilong Jisas “i wok long painim em inap long tripela de, na bihain tupela i lukim em i stap insait long banis bilong tempel. Em i sindaun i stap namel long ol tisa. Em i wok long harim tok bilong ol, na givim ol askim long ol. Ol man i . . . kirap nogut long save bilong en na long tok em i bekim long ol.” Wanpela dikseneri (Theological Dictionary of the New Testament, bilong Kittel) i stori long hap tok Grik ol i tanim olsem “askim” long dispela ves na i tok, dispela i no makim ol askim nating bilong manki i laik kisim save. Nogat. Dispela i makim ol askim olsem i save kamap long kot bilong save long as bilong tok, em i tru o nogat. Em inap makim tu ‘ol askim ol Farisi na Sadyusi i sutim long Jisas bilong trikim em,’ olsem i stap long Mak 10:2 na Mak 12:​18-23.

¹⁰ Dispela dikseneri i tok moa olsem: “Dispela hap tok i givim tingting long yumi olsem . . . [Luk] 2:46 i no stori long pasin bilong manki long mekim askim bilong kisim save, nogat; dispela ves i stori long gutpela save bilong em long mekim ol askim, na long bekim tok ol man i no inap sakim o daunim. Tok bilong [Luk 2 ves] 47 i stret wantaim dispela tingting.”a Rotherham i tanim tok bilong Luk 2 ves 47 olsem ol i pait long toktok na Jisas i winim ol tru: “Ol man i harim tok bilong em, tingting bilong ol i kirap nogut long save bilong em na ol tok em i bekim long ol.” Na buk bilong Robertson i tok, ol i kirap nogut tru na i olsem “ai bilong ol i kamaut.”​—⁠Buk Word Pictures in the New Testament.

¹¹ Taim papamama bilong Jisas i lukim em, tupela “i kirap nogut tru.” (Luk 2:48) Robertson i tok, as bilong hap tok Grik ol i tanim olsem, em “paitim.” Em i tok, ol samting Josep tupela Maria i lukim na harim, i olsem i “paitim” ol. Em nau, taim Jisas i stap manki yet, em i gutpela tisa pinis. Dispela samting i bin kamap long tempel i as bilong tok bilong Kittel long buk bilong em, olsem: “Taim Jisas i stap manki yet em i kirap long paitim tok wantaim ol birua na bihain ol birua i lus long dispela pait.”

¹² Ol i lus tru! Sampela yia bihain, long rot bilong ol askim, Jisas i daunim ol Farisi​—⁠i no gat wanpela inap bekim tok na “stat long dispela de, ol i pret long askim Jisas long wanpela samting moa.” (Matyu 22:​41-46) Em i bekim gut tok long ol Sadyusi long tok bilong kirap bek na ol i “pret long askim [em] long wanpela samting moa.” (Luk 20:​27-40) Ol saveman bilong lo tu i pait long toktok wantaim em, tasol ol i lus. Wanpela i givim askim long Jisas na Jisas i bekim gut tru na nau “olgeta man i pret long askim Jisas long wanpela samting moa.”​—⁠Mak 12:​28-34.

¹³ Bilong wanem Baibel i gat dispela wanpela stori tasol bilong taim Jisas i stap manki yet, em stori bilong em i toktok wantaim ol tisa long tempel? Long wanem, em taim bilong bikpela senis long laip bilong Jisas. Taim Jisas i gat 12-pela krismas samting em i kamap wanpela manki ol Juda i save kolim ol olsem “pikinini bilong lo,” nau em i gat wok long bihainim olgeta tok bilong lo. Maria i tokim Jisas, bel bilong em tupela papa i hevi tumas na tupela i wok long painim em, na ol tok Jisas i bekim long mama i makim olsem em i save, em i bin kamap long rot bilong mirakel na em bai kamap Mesaia. Yumi kisim tingting olsem, long wanem, em i tok God em i Papa bilong em. Em i tok: “Bilong wanem yutupela i wok long painim mi? Ating yutupela i no save, mi mas i stap long haus bilong Papa bilong mi?” Em namba wan tok bilong Jisas em Baibel i kolim, na i makim olsem em i save long wok Jehova i salim em i kam bilong mekim. Olsem na dispela samting i bin kamap long tempel em i bikpela samting.​—⁠Luk 2:​48, 49.

Jisas i Laikim Ol Pikinini na Pilim Tingting Bilong Ol

¹⁴ Ol yangpela i mas laikim tru dispela stori. Em i kamapim klia olsem Jisas i bin wok strong long stadi taim em i yangpela yet. Ol tisa long tempel i kirap nogut long save bilong dispela “pikinini bilong lo” i gat 12-pela krismas. Tasol em i wok kamda yet wantaim Josep, na “bihainim tok” bilong Josep tupela Maria, na em i kamap bikpela na God wantaim ol man “i laikim em.”​—⁠Luk 2:​51, 52.

¹⁵ Taim Jisas i stap long graun, em i helpim ol yangpela: “Ol bikpris na ol saveman bilong lo i lukim ol mirakel em i wokim, na ol i harim ol pikinini i singaut insait long banis bilong tempel olsem, ‘Amamas long Pikinini Bilong Devit.’ Olsem na ol i bel nogut na ol i askim Jisas olsem, ‘Ating yu harim dispela tok ol i mekim?’ Na Jisas i bekim tok bilong ol olsem, ‘Yes, mi harim. Tasol ating yupela i no bin ritim dispela tok, “Ol liklik pikinini i save litimapim nem bilong yu.” ’ ”(Matyu 21:​15, 16; Song 8:⁠2) Em i sambai tu long ol handet tausen yangpela long nau ol i stap gut long lo bilong God na litimapim nem bilong em, maski sampela i dai tu.

¹⁶ Taim ol aposel i tok pait long husat em i namba wan bilong ol, Jisas i tokim ol 12-pela: “Sapos wanpela man i laik i stap namba wan, orait em i mas i stap las tru, olsem wokman bilong helpim olgeta man. Na em i . . . sanapim [liklik pikinini] namel long ol . . . na i tokim ol disaipel olsem, ‘Man i tingting long mi na i helpim wanpela liklik pikinini olsem dispela pikinini, em i helpim mi. Na man i helpim mi, em i no helpim mi tasol. Nogat. Em i helpim Papa, em i bin salim mi na mi kam.’ ” (Mak 9:​35-37) Na taim em i go long Jerusalem long laspela taim bilong karim pen nogut tru na i dai, em i tingim ol pikinini. Em i tok: “Yupela larim ol pikinini i kam long mi. Yupela i no ken pasim ol. Nogat. Kingdom bilong God em i bilong kain man olsem ol dispela pikinini.” Na em i holim ol, na putim han long ol, na askim God long mekim gut long ol.​—⁠Mak 10:​13-16.

¹⁷ Jisas i save long i stap bilong pikinini namel long ol man i bikpela pinis. Em i bin i stap olsem, na em i bin wok wantaim ol man i bikpela pinis, na stap daun long ol, na pilim sori bilong ol i mekim em i stap belgut na amamas. Ol pikinini, Jisas em i pren bilong yu; em i dai bilong helpim yu, na sapos yu bihainim tok bilong em, yu inap i stap oltaim.​—⁠Jon 15:​13, 14.

¹⁸ Yu ting i hatwok long bihainim tok bilong em? I no hatwok. Em i stap redi bilong helpim yupela ol yangpela na olgeta man, olsem yumi kaunim long Matyu 11:​28-30: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela. Yupela kisim save long mi na aninit long tok bilong mi [o, “aninit long plang wantaim mi”], olsem yupela i kisim plang ol i save putim long nek bilong ol bulmakau . . . Samting mi givim yupela bilong karim, em i no hevi.” Yu mas tingting olsem: Taim yu wokabaut i go na mekim laik bilong Jehova, Jisas i wokabaut wantaim yu na helpim yu bambai dispela “plang” yu karim i no hevi. Yumi olgeta i ken tingim dispela gutpela samting!

¹⁹ Em nau, yumi stori pinis long sampela pasin bilong Jisas long skulim ol man. Olsem wanem? Yumi skulim ol man olsem em i mekim? Man i gat sik bilong skin o em i hangre long samting bilong spirit, yumi sori long em na wok strong long helpim em? Taim yumi skulim ol man, yumi skulim ol long Tok Bilong God, o yumi skulim ol long tingting bilong yumi yet, olsem ol Farisi i mekim? Yumi wok long lukim ol samting bilong olgeta de bambai yumi ken mekim wok long en bilong kamapim klia ol tok i tru na helpim ol man long kisim gut? Yumi strong tumas long ol narapela i mas bihainim ol lo, o yumi isi long ol long taim i gat rot bilong mekim pasin sori na pasin marimari? Na olsem wanem long ol pikinini? Yumi save tingim ol na wok long helpim ol olsem Jisas i bin mekim? Yu kirapim ol pikinini bilong yu long stadi gut olsem Jisas i bin mekim taim em i manki yet? Yu strong olsem Jisas, tasol yu redi long sori long man i tanim bel na kisim em olsem kakaruk meri i save bungim ol pikinini aninit long wing bilong en?​—⁠Matyu 23:37.

²⁰ Sapos yumi wok strong long skulim gut ol man olsem Jisas i bin mekim, bai em i helpim yumi, na bai yumi ‘aninit long plang wantaim em.’​—⁠Matyu 11:​28-30.

[Ol Futnot]

Yu Tingim?

◻ Bilong wanem ol bikpela lain manmeri i kam long Jisas?

◻ Olsem wanem na sampela taim Jisas i no tingim tumas ol lo na em i isi long ol man?

◻ Jisas i givim askim long ol tisa long tempel na dispela i lainim yumi long wanem samting?

◻ Gutpela pasin Jisas i mekim long ol pikinini i lainim yumi long wanem samting?

[Askim Bilong Stadi]

 1. Taim Jisas i skulim ol man long Galili, husat ol i bihainim em? Na Jisas i ting olsem wanem long ol?

 2. Jisas i wokim ol mirakel, tasol wanem samting moa i pulim ol bikpela lain manmeri i go long em?

 3. Olsem wanem pasin bilong Jisas long autim tok i narapela kain long pasin bilong ol saveman bilong lo na ol Farisi?

 4. Jisas i mekim wanem kain tok na planti man i laikim?

 5. Jisas i save mekim tok piksa long wanem ol samting? Olsem wanem ol man inap kisim gut ol tok piksa em i mekim?

 6. Wanem taim yumi mas isi long man na dispela bai helpim em tru?

 7. Wanem sampela taim Jisas i bin isi long ol man?

 8. Wanem taim ol saveman bilong lo na ol Farisi i orait long lusim lo, na wanem taim ol i no orait long lusim?

9, 10. Papamama i go bek painim Jisas long Jerusalem na ol i lukim em i stap we? I gat wanem as na Jisas i givim askim long ol tisa?

11. Maria tupela Josep i ting olsem wanem long ol samting ol i lukim na harim? Wanpela dikseneri bilong lotu i kamapim wanem tingting?

12. Bihain taim Jisas i toktok wantaim ol hetman bilong lotu, wanem samting i bin kamap?

13. Wanem samting i mekim na samting i kamap long tempel em i bikpela samting long laip bilong Jisas? Na ol samting i bin kamap i makim olsem em i save long wanem samting?

14. Stori bilong yangpela Jisas long tempel inap givim wanem save long ol yangpela?

15. Olsem wanem Jisas i bin helpim ol yangpela long taim bilong em? Orait, olsem wanem long ol yangpela long nau?

16. (a) Taim Jisas i sanapim pikinini namel long ol disaipel, dispela i skulim ol long wanem samting? (b) Wanem taim Jisas i bin tingim ol pikinini, maski bikpela hevi i laik painim em?

17. Olsem wanem Jisas inap save gut long tingting bilong ol pikinini? Ol pikinini i mas ting olsem wanem long Jisas?

18. Yumi mas tingim wanem gutpela samting taim hevi i painim yumi o samting i laik bagarapim yumi?

19. Gutpela sapos sampela taim yumi tingim gen wanem ol askim long pasin bilong Jisas long skulim ol man?

20. Taim yumi mekim wok bilong God, yumi ken tingim wanem gutpela samting na dispela bai strongim bel bilong yumi?