Toktok Wantaim Wanpela Neiba Yu Ting Jisas Em i God?

OL WITNES BILONG JEHOVA i amamas long toktok wantaim ol manmeri long Baibel. Olsem wanem? I gat wanpela tok long Baibel em yu laik kisim save long en? Yu laik save long sampela bilip o pasin bilong lotu bilong ol Witnes Bilong Jehova? Sapos olsem, orait kamapim tingting bilong yu long wanpela Witnes. Em bai amamas long toktok wantaim yu long dispela samting.

Stori nau mipela i kamapim em wanpela toktok namel long wanpela Witnes Bilong Jehova na wanpela meri. Wanpela Witnes, nem bilong em Karen, i toktok wantaim wanpela meri bilong haus, nem bilong em Samantha.

Em i Tru Olsem Yupela i No Bilip Long Jisas?

Samantha: Pasto bilong mi i tok ol Witnes Bilong Jehova i no bilip long Jisas? Olsem wanem? Dispela em i tru?

Karen: Mi laik kamapim klia long yu olsem mipela i save bilip long Jisas. Na mipela i bilip olsem ol man i mas bilip long Jisas na bai God inap kisim bek ol.

Samantha: Mi tu i bilip olsem.

Karen: Olsem na dispela em wanpela samting yumi tupela i wanbel long en. Sori, nem bilong mi Karen. Na nem bilong yu husat?

Samantha: Samantha. Mi amamas long bungim yu.

Karen: Mi tu i amamas long bungim yu, Samantha. Ating yu laik save, ‘Sapos tru tru ol Witnes Bilong Jehova i bilip long Jisas, bilong wanem ol man i tok ol Witnes i no bilip long em?’

Samantha: Yes, mi laik save long dispela.

Karen: Mi ken tok stret olsem mipela i gat strongpela bilip long Jisas, tasol mipela i no bilip long olgeta tok ol man i mekim long em.

Samantha: Wanem samting yupela i no bilip long en?

Karen: Olsem, sampela man i tok Jisas em i wanpela gutpela man, na em tasol. Tasol mipela i bilip olsem dispela tok i no stret.

Samantha: Mi tu, mi no bilip olsem.

Karen: Olsem na dispela em narapela samting yumi wanbel long en. Namba 2 samting em olsem: Ol Witnes Bilong Jehova i no wanbel long ol tok i pait wantaim tok em Jisas i mekim long namba em yet i holim na namba bilong Papa bilong em.

Samantha: Yu minim wanem?

Karen: Planti lotu i skulim ol man olsem Jisas em i God. Ating ol i bin skulim yu tu olsem.

Samantha: Yes, pasto bilong mi i tok God na Jisas i wanpela man tasol.

Karen: Tasol ating yu wanbel olsem nambawan gutpela rot long kisim save long tok i tru long Jisas em long rot bilong skelim ol tok em i mekim long em yet, a?

Samantha: Yes, mi wanbel long dispela.

Jisas i Tok Wanem?

Karen: I gutpela yumi skelim wanpela tok bilong Baibel em inap helpim yumi long kliagut long dispela. Plis, lukim tok bilong Jon 6:38. Jisas i tok: “Mi lusim heven na kam daun bilong bihainim laik bilong man i salim mi i kam na i no bilong bihainim laik bilong mi yet.” Ating bai yu tingting planti long dispela tok sapos i Jisas em i God, a?

Samantha: Mi no kliagut long tok bilong yu.

Karen: Lukim, Jisas i no tok long hia olsem em i kam daun bilong bihainim laik bilong em yet, nogat.

Samantha: Em i stret, em i tok em i kam bilong bihainim laik bilong Man husat i salim em i kam.

Karen: Tasol sapos Jisas em i God, husat i salim em i kam daun long heven? Na bilong wanem Jisas i bihainim laik bilong Man i salim em i kam?

Samantha: Mi kisim tok bilong yu. Tasol mi no ting dispela wanpela ves tasol inap strongim tok olsem Jisas em i no God.

Karen: Orait, skelim tok em Jisas i mekim long narapela taim. Em i mekim klostu wankain tok long Jon 7:16. Plis, inap yu ritim dispela ves?

Samantha: Em orait. “Jisas i bekim tok long ol olsem: ‘Tok mi skulim ol man long en i no bilong mi, em bilong man i salim mi i kam.’”

Karen: Tenkyu long ritim. Taim yu tingim dispela ves, yu ting Jisas i skulim ol man long ol tok bilong em yet?

Samantha: Nogat, em i tok ol samting em i skulim ol man long en i bilong dispela Man husat i bin salim em i kam.

Karen: Yu tok stret. Ating yu laik save: ‘Husat i bin salim Jisas? Na husat i givim em dispela tok i tru em i bin skulim ol man long en?’ Ating dispela Man i gat bikpela namba moa, winim Jisas, a? Yumi save olsem man husat i salim narapela, em i gat bikpela namba winim man em i salim i go.

Samantha: Em tru ya, mi no bin ritim dispela tok bipo.

Karen: Tingim tu tok bilong Jisas long Jon 14:28: “Yupela i harim pinis dispela tok mi bin mekim long yupela olsem, mi bai i go na kam bek gen long yupela. Sapos yupela i laikim mi, yupela bai amamas olsem mi go long Papa, long wanem, Papa i winim mi.” Taim yu tingim dispela ves, yu ting Jisas i gat wanem tingting long em yet na long Papa bilong em?

Samantha: Em i tok, Papa i winim em. Olsem na em i tingim God olsem Man i gat bikpela namba moa winim em.

Karen: Yes, yu tok stret. Narapela tok tu i kamapim klia dispela. Lukim tok Jisas i mekim long ol disaipel bilong em long Matyu 28:18. Dispela ves i tok: “God i givim mi namba long bosim olgeta samting long heven na long graun.” Olsem wanem? Jisas i tok oltaim em i gat namba bilong bosim olgeta samting?

Samantha: Nogat. Em i tok God i bin givim namba long em.

Karen: Tasol sapos Jisas yet em i God, olsem wanem bai em i kisim bikpela namba moa? Na husat i givim namba long em?

Samantha: Mi mas wokim gut tingting long dispela samting.

Em i Toktok Long Husat?

Karen: Sapos Jisas em i God, orait i gat narapela samting tu i hatwok long kliagut long en.

Samantha: Em wanem samting?

Karen: Em tok yumi ritim long baptais bilong Jisas. Tingim stori i stap long Luk 3:21, 22. Plis, inap yu ritim ol dispela ves?

Samantha: “Orait olgeta manmeri i kisim baptais pinis, na Jisas tu i kisim baptais. Na taim em i beten i stap, skai i op na holi spirit i kam daun long em na i luk olsem wanpela pisin balus. Na wanpela nek i kamap long skai na i tok: ‘Yu Pikinini bilong mi, mi laikim yu tumas, mi amamas long yu.’”

Karen: Yu luksave long samting Jisas i mekim taim em i kisim baptais?

Samantha: Em i beten.

Karen: Yes, ating yumi laik save, ‘Sapos Jisas em i God, orait em i wok long beten long husat?’

Samantha: Em wanpela gutpela askim. Bai mi askim pasto bilong mi.

Karen: I gat narapela samting tu yumi mas tingim. Taim Jisas i lusim wara na i kam antap, wanpela nek i kamap long heven. Dispela nek i tok wanem?

Samantha: Em i tok Jisas em i Pikinini Bilong Em, Em i laikim em tumas, na Em i amamas long em.

Karen: Yu tok stret. Tasol sapos Jisas em i God, orait husat i mekim dispela tok long heven?

Samantha: Mi no tingim dispela samting bipo.

“Papa” na “Pikinini”

Karen: I gat narapela samting yumi ken tingim: Yumi ritim pinis olsem Jisas i kolim God olsem Papa bilong em long heven. Na taim Jisas i kisim baptais, wanpela nek i kamap long heven na i kolim Jisas olsem Pikinini Bilong Em. Na Jisas i kolim em yet olsem Pikinini Bilong God. Orait, sapos yu laik mekim tok piksa bilong skulim mi olsem tupela man i wankain, yu bai kolim wanem lain insait long famili?

Samantha: Ating mi bai toktok long tupela brata.

Karen: Em i stret—ating bai yu tok long tupela brata em ol i twins. Tasol Jisas i kolim God olsem Papa na em i kolim em yet olsem Pikinini. So yu ting Jisas i laik mekim wanem tok?

Samantha: Mi klia long tok bilong yu. Tok bilong Jisas i makim olsem krismas na namba bilong wanpela man i bikpela moa, winim bilong narapela man.

Karen: Em nau. Tingim dispela: Yu bin tingim dispela gutpela tok piksa bilong makim tupela man i wankain, olsem tupela brata o twins. Sapos tru Jisas em i God, yu ting Jisas, olsem Bikpela Tisa, em no inap kamapim wankain tok piksa—o wanpela tok piksa i gutpela moa bilong soim olsem tupela i wankain?

Samantha: Em inap mekim olsem.

Karen: Tasol nogat, em i yusim dispela tupela tok “Papa” na “Pikinini” bilong makim namba bilong em na namba bilong God.

Samantha: Dispela tok i kirapim tru tingting bilong mi.

Ol Disaipel Bilong Jisas Long Pastaim i Tok Wanem?

Karen: Paslain long mi lusim yu, sapos yu gat taim mi laik skelim wanpela samting moa wantaim yu.

Samantha: Em i orait, mi gat taim.

Karen: Sapos tru Jisas em i God, ating ol disaipel bilong Jisas bai tokaut stret long dispela, a?

Samantha: Yes, ating ol bai mekim olsem.

Karen: Tasol long Baibel olgeta, yumi no ritim wanpela kain tok olsem, nogat tru. Lukim tok aposel Pol, em wanpela disaipel bilong Jisas long pastaim, i bin raitim. Long Filipai 2:9 em i stori long samting God i bin mekim bihain long indai na kirap bek bilong Jisas. Em i tok: “Long dispela as tasol God i givim bikpela namba moa long em [Jisas] na i givim em wanpela nem i winim olgeta arapela nem.” Sapos yu tingim dispela ves, God i givim wanem samting long Jisas?

Samantha: Dispela ves i tok, God i givim bikpela namba moa long Jisas.

Karen: Yes. Tasol sapos Jisas i wankain olsem God paslain long em i dai na bihain God i givim bikpela namba moa long em, yu ting dispela bai mekim na nau Jisas i winim God? Yu ting i gat wanpela inap winim God?

Samantha: Nogat. Em i no inap winim God.

Karen: Mi wanbel long tok bilong yu. Olsem na taim yu tingim dispela tok, yu ting Baibel i skulim yumi olsem Jisas em i God?

Samantha: Nogat. I no luk olsem. Baibel i tok em i Pikinini Bilong God.

Karen: Em stret. Mi laik tok stret long yu Samantha, ol Witnes Bilong Jehova i gat bikpela rispek long Jisas. Mipela i bilip olsem indai bilong em olsem Mesaia i opim rot long God inap kisim bek olgeta gutpela man.

Samantha: Mi tu i bilip olsem.

Karen: Em nau. Ating nau yu laik save, ‘Olsem wanem yumi inap soim Jisas olsem yumi tenkyu long em i givim laip bilong em bilong baim bek yumi?’a

Samantha: Yes, mi laik save long dispela.

Karen: Ating i gutpela mi kam bek na soim yu long bekim em Baibel i givim long dispela askim. Yu ting yu bai stap long haus long kain taim olsem long neks wik?

Samantha: Yes, bai mi stap.

Karen: Gutpela, bai mi lukim yu.

[Futnot]