I Stap na Wok Bilong Jisas

Ol Hambakman na Ol Man Bilong Pasin Daun

JISAS i stori long gutpela pasin bilong Jon Bilong Baptais, na bihain em i givim sampela tok long ol manmeri bilong taim bilong em, em ol i save hambak na senisim senisim tingting bilong ol. Em i tok: “Ol manmeri bilong dispela taim . . . i olsem ol pikinini i sindaun namel long ples na ol i singaut long ol arapela pikinini, i spik, ‘Mipela i winim mambu long yupela, tasol yupela i no laik singsing. Mipela i mekim singsing sori, tasol yupela i no laik krai.’ ”

Wanem insait bilong dispela tok bilong Jisas? Jisas i stori olsem: “Jon i kam, na em i no kaikai na i no dring wain. Na ol i tok, ‘Spirit nogut i stap long en.’ Na Pikinini Bilong Man i kam, na em i kaikai na i dring, na ol i tok, ‘Lukim, em i man bilong kaikai planti tumas, na em i man bilong dring planti wain tumas. Em i pren bilong ol man bilong kisim takis na bilong ol man bilong sin.’ ”

I no gat rot bilong amamasim ol dispela manmeri. Ol i no save amamas long wanpela samting. Jon i sakim ol laik bilong skin, long wanem em i wanpela Promisman bilong God, olsem wanpela man i stap tambu bilong mekim wok bilong God. Ensel i tok pinis, Jon “ i no ken dringim wain na ol strongpela dring.” Tasol ol man i tok, wanpela spirit nogut i stap long em. Jisas i kaikai na dring wankain olsem ol narapela man, em i no tambuim kaikai o wain, tasol ol man i tok, em i save kaikai na dring tumas.

I hatwok tru long amamasim ol dispela man! Ol i olsem ol pikinini, em ol i no laik singsing taim ol narapela pikinini i winim mambu, na ol i no laik krai taim ol narapela i mekim singsing sori. Tasol Jisas i tok, “Ol wok bilong God i soim save bilong em i samting tru.” Tru tumas, ol wok bilong Jon na Jisas i soim olsem ol dispela tok ol man i sutim long tupela em i giaman tasol.

Bihain Jisas i krosim sampela taun, olsem Korasin, na Betsaida, na Kapaneam, em ol taun em i bin wokim planti mirakel long en. Sapos em i bin wokim ol dispela mirakel long ol taun bilong ol Finisia, olsem taun Taia na Saidon, Jisas i tok, longtaim bipo bai ol Taia na Saidon i pasim pinis hap bek olsem laplap na ol i sindaun long sit bilong paia, na ol i tanim bel pinis. Jisas i krosim taun Kapaneam, em olsem as ples bilong em taim em i mekim wok bilong em long graun, na em i tok: “Mi tokim yupela, long de bilong kotim ol manmeri bai hevi bilong Sodom i no bikpela olsem hevi bai i painim yupela.”

Wanem insait bilong dispela tok bilong Jisas? Em i laik tok strong long ol Kapaneam, long wanem, planti ol i hambak na ol i no laik harim tok, na ol i gat asua, na Jisas i laik bai ol i pilim dispela samting. Em i tok, maski ol i stap long kot tu, ol i no inap tanim bel.

Jisas i mekim pinis dispela tok na bihain em i litimapim nem bilong Papa bilong em. Em i mekim olsem, long wanem God i save haitim ol gutpela tok i tru bilong em long ol man i gat save na tingting, tasol God i soim dispela gutpela tok long ol man i gat pasin daun olsem bilong ol pikinini.

Na bihain Jisas i singautim ol man i kam long em, em i tok: “Yupela ol man i mekim hatwok na i karim bikpela hevi, yupela olgeta i kam long mi, bai mi givim yupela malolo. Yupela kisim dispela diwai mi givim long yupela, na karim long sol bilong yupela. Na yupela kisim save long mi. Long wanem mi save mekim pasin isi long ol man, na mi save daunim mi yet. Na bai bel bilong yupela i painim malolo.”

Olsem wanem Jisas i givim malolo long ol man? Em i helpim ol long lusim ol pasin bilong lotu i save kalabusim ol na i olsem bikpela hevi ol hetman bilong lotu i bin putim long sol bilong ol, olsem ol hetman i kolim planti samting ol i mas mekim bilong bihainim lo bilong Sabat na i hatwok tumas long ol i mekim. Na ol man i karim hevi aninit long ol gavman politik, Jisas i soim rot long ol bai dispela hevi inap tekewe long ol. Na ol man i bel hevi long wanem ol i bin mekim rong, em i soim rot long ol bambai dispela belhevi bilong ol i ken pinis. Em i soim rot long ol bai sin bilong ol i ken tekewe na ol i ken i stap wanbel wantaim God.

Dispela “diwai” Jisas i laik bai yumi karim, em olsem: Em i laik bai yumi dediket long God na givim yumi yet olgeta bilong mekim wok bilong God, em i gutpela Papa bilong yumi na Man bilong pasin sori na pasin marimari. Dispela “diwai” Jisas i putim long sol bilong ol man i kam long em i no gat hevi−yumi mas bihainim tasol ol lo bilong God, em ol dispela lo i no hevi, na bai yumi inap long kisim laip. Matyu 11:​16-30; Luk 1:15; 7:​31-35; 1 Jon 5:⁠3.

◆ Ol manmeri long taim bilong Jisas olsem wanem ol i olsem pikinini?

◆ Wanem insait bilong ol tok Jisas i mekim long ol Kapaneam?

◆ Ol man i karim wanem ol hevi? Jisas i mekim wanem tok promis bilong helpim ol?