Kisim Skul Long Pasin Bilong Fogivim Narapela

Ol manmeri i gat tupela tingting, olsem na ol i no kliagut long ol tok na pasin bilong Jisas. Samting i kamap long haus bilong wanpela Farisi long Galili i kamapim klia dispela. Wanpela Farisi nem bilong em Saimon i invaitim Jisas long i go kaikai wantaim em, ating em i laik save gut long dispela man husat i wokim ol mirakel. Ating Jisas i tingim olsem rot i op long em inap autim tok long ol man i kam long dispela kaikai, olsem na em i orait long i go maski em i no bin kaikai wantaim ol man bilong kisim takis na ol sinman.

Taim Jisas i go long haus bilong Saimon, ol i no mekim pasin em ol i save mekim long ol visita. Ol rot bilong Palestain i gat planti das, na sapos man i werim sendol na i wokabaut long dispela hap, lek bilong em bai hat na doti. Olsem na taim ol visita i kam long haus, em pasin bilong ol Juda long wasim lek bilong ol wantaim kolwara. Tasol ol i no mekim olsem long Jisas. Na tu, ol i no givim kis long em na welim gras bilong em bilong soim pasin helpim na pasin bilong lukautim man i kam long haus bilong ol. Olsem na yu ting tru tru ol i welkamim Jisas?

Ol man i kam long dispela bung i sindaun na kaikai i stap. Na long dispela taim, wanpela meri i kam insait long haus. Ol manmeri long taun “i save olsem em i meri bilong mekim sin.” (Luk 7:37) Yumi save olgeta man i gat sin, tasol dispela meri i save mekim pasin nogut, ating em i wanpela pamukmeri. I luk olsem em i bin harim ol tok Jisas i skulim ol man long en, na tu, dispela singaut olsem ‘yupela ol man i karim ol bikpela hevi, yupela kam long mi na bai mi givim nupela strong long yupela.’ (Matyu 11:28, 29) Ating ol wok na pasin bilong Jisas i kirapim dispela meri long kam painim em.

Meri i kam baksait long Jisas na i nildaun long lek bilong Jisas na em i krai. Aiwara bilong em i kapsait long lek bilong Jisas na em i draim long gras bilong em. Em i kis long lek bilong Jisas na welim long sanda em i bringim i kam. Saimon i lukim dispela samting na em i no amamas, na em i tokim em yet olsem: “Sapos dispela man em i wanpela profet, em bai save long dispela meri i tatsim em, olsem em i husat na em i wanem kain meri. Em i wanpela sinmeri.”—Luk 7:39.

Jisas i save long tingting bilong Saimon, olsem na em i tok: “Saimon, mi laik mekim wanpela tok long yu.” Saimon i tok, “Yes Tisa, yu tok!” Na Jisas i tok: “Tupela man i gat dinau long wanpela man, wanpela i kisim dinau long 500 denarius na narapela i kisim dinau long 50 denarius. Taim tupela i no gat wanpela samting bilong bekim long em, em i amamas long fogivim tupela wantaim. Olsem na husat bilong dispela tupela bai i laikim em moa?” Ating Saimon i no tingim gut as bilong dispela tok piksa na em i tok: “Mi ting em dispela man i gat bikpela dinau moa.”—Luk 7:40-43.

Jisas i wanbel long tok bilong Saimon, na em i lukluk long dispela meri na i tok: “Yu lukim dispela meri? Mi kam insait long haus bilong yu na yu no bin givim wara bilong wasim lek bilong mi. Tasol dispela meri i wasim lek bilong mi long aiwara bilong em yet na em i draim long gras bilong em yet. Na yu no bin givim kis long mi, tasol taim mi kam insait na i kam inap long nau, dispela meri i wok long kis long lek bilong mi. Yu no bin welim het bilong mi long oil, tasol dispela meri i welim lek bilong mi long sanda.” Jisas i luksave olsem dispela meri i bel hevi long ol rong em i bin mekim na em i tanim bel tru. Olsem na em i tok: “Long dispela as mi tokim yu, maski dispela meri i mekim planti sin, mi fogivim ol sin bilong en, olsem na pasin laikim bilong dispela meri i bikpela. Tasol man husat i no gat planti sin em narapela i mas fogivim em long en, pasin laikim bilong dispela man em i liklik.”—Luk 7:44-47.

Jisas i no orait long pasin pamuk. Tasol samting em i mekim i soim olsem maski man i mekim bikpela rong, sapos em i hevi long rong em i bin mekim na i go long Krais bilong kisim bel isi, orait Jisas bai sori tru long em. Jisas i mekim gut bel bilong dispela meri na i tok: “Ol sin bilong yu i tekewe. . . . Bilip bilong yu i kisim bek yu, yu go wantaim bel isi.”—Luk 7:48, 50.